麥當勞 (外賣) ( 12-FEB-2016 )

( 12-FEB-2016  FRI )

今朝 7 點 50 分起身   勁攰呀   又無力   所以都係打的番菇場   感恩車程暢順呢 ~

食食下早餐又見到 8 卦   咁我比利是佢個女   之後佢好大聲同我講身體健康   再講多句妳最緊要身體健康呀   哈哈 ~

番到菇場就派利是   又收下開工利是咁啦 ~

廠又未開工   老闆又無番   其實都唔知番嚟做乜 ~

12 點食乳豬   之後抖到 12 點半又話食開年飯喇   個口未停過咁   哈哈 ~

不過我都無咩胃口食嘢   個人呆呆滯滯咁 ~

食到 2 點就走人喇   呢下就最期待啦   哈哈 ~

番到屋企即灘喺梳化   咩都唔願做呀   好在今朝里奧大人熨咗衫   又開咗機洗衫   我唔駛心掛掛呢 ~

4 點出發去探媽咪   佢又係瞓   大佬   其實真係好想話佢   人哋探妳   好心妳唔好瞓啦   成日又唔郁   懶到出汁   所以我真係唔想探佢係有原因   我坐喺醫院度都唔知做咩   我不如番屋企休息好過 ~         

之後見到姑娘   姑娘都話媽咪懶呀   連落床坐櫈都唔想   又話媽咪好唔開心咁   我話係㗎   佢想番屋企    但大佬呀   又懶又唔郁   醫院都要評估身體狀況先批妳出院家嘛   咁樣唔郁法   可能覺得身體機能仲未復原   所以唔比出囉   煩 ~

咁姑娘仲話佢成日話氣速   但其實都除咗貓鬚一排㗎喇   其實我依家真係無乜點媽咪   我直頭唔知佢除咗貓鬚   因為我有時都費事望佢 ~

一話氣速就會即 Check 嘢家嘛   但姑娘話媽咪個指數係 95   係好好嘅指數   唔知點解話氣速 ~

之後我入番房啦   咁啱量血壓   姑娘話高咗啲啲   其實 OK   媽咪又話條氣唔係咁順   所以又 Check 下度氣   都係 9x   姑娘直頭話 Very Good 添啦   成日唔郁   郁少少就話氣速   真係唔知佢諗乜 ~

佢又係喺度瞓   我坐到 6 點半都走喇   之後好聲好氣叫佢郁多啲   佢又皺眉頭   咁我都唔講喇   都無同佢講拜拜   我覺得好討厭 ~

等咗半個鐘頭小巴   腰又痛   差唔多 7 點半先番到九龍灣呀   咁到咗屋企樓下啦   家姐打嚟   我企喺條街度同佢傾咗 20 分鐘電話   因為我費事番到屋企又唔記得打番比佢嘛   咁我順便講埋我一星期探一次算喇   我好攰   反正佢都係瞓   去嚟真係無意思 ~

差唔多 7 點幾開始餓   但我唔想再落街   所以叫里奧大人買魚柳包番屋企食呢 ~ 

抖多陣就沖涼   11 點幾都瞓喇 ~