煎芋頭糕 + 煎蘿蔔糕 & 元氣壽司 @ 九龍灣 ( 6-FEB-2016 )

呢兩粒係菠蘿蜜年糕   我比里奧大人問下咩味道   佢聞完即乸埋塊臉極速走開   之後先問咩味道   笑死我   因為佢唔食大樹菠蘿嘛   之後我話阿 Mi 特登比我哋食㗎   同埋我話等我食咗先   我覺得唔濃味先比佢食   唔好嘥嘛   我話真係唔濃味   只係食完之後   先會有大樹菠蘿味   感覺幾得意   同埋我想佢知咩叫軟糯嘅口感   因為我上次講完   佢話無人咁形容喎

@ 元氣壽司
原來晴晴都鍾意食呢個蟹籽沙律   咁又好喎   同我口味相似   哈哈     

辣味三文魚軍艦 x 4 / 芥辣八爪魚軍艦 - 晴晴肯定將三文魚有 Omega 3 入哂腦   因為佢媽咪成日係咁講   哈哈         

灸燒黑椒三文魚壽司 x 4 / 炸蝦卷 - 晴晴真係似足佢媽咪   咩都三文魚   仲要走黑椒   完全係佢媽咪食法   因為佢媽咪一聽見黑椒呢兩個字   就會話食黑椒會生癌   次次都咁講㗎

軟殼蟹手卷 - 今次軟殼蟹嘅 Size 好大隻呀   

帆立貝壽司

玉米蝦船

( 6-FEB-2016  SAT )

真係好開心   因為番埋今日就放新年假 lu ~

食完早餐諗住走   又見到 8 卦   咁等埋佢啦   好在佢食得快   唔係就唔等㗎喇   唔想成日遲到呀 ~

菇場無嘢做   工廠尋日都收爐啦   我咃都唔知番嚟做咩 ~

諗住可以放早   點知 11 點見到老闆   咁即係一定唔會放早囉   So Sad ~

放工即走喇   今日約咗阿 Mi 同阿喂去德福稻香飲茶   阿 Mi 勁有我心   話今年啲糕蒸得好靚   所以特登要送比我哋   等我哋全年都行好運   咁又要勞煩阿喂幫手拎   真係好感動呢 ~

咁里奧大人 12 點 15 分就到酒樓拎位先   里奧大人話我哋坐果張枱係最後一張卡位   之後要坐圓枱㗎喇   所以真係好感恩   因為卡枱位置無咁嘈呢 ~

里奧大人話阿 Mi 一到就將啲糕交比里奧大人   咁佢要拎番屋企先呀   阿 Mi 話雖然有冰   但坐喺酒樓都起碼 3 個鐘   會無咁新鮮   放喺雪櫃好啲 ~ 

我 1 點 20 分到酒樓   都算快啦   1 點放工即走   又等咗 8 分鐘車   所以一落車就即跑去酒樓   但太耐無徑步   膝頭哥痛呀   同埋真係腳仔軟   好在無見暈   哈哈 ~

泡椒雞腳 - 估唔到都幾入味   辣辣哋唔錯   如果阿 Mi 唔食   我就唔會有得食   因為我驚太辣

腐皮卷 - 熱辣辣正呀   今次啲點心好有驚喜   因為好多都係熱嘅   我同阿 Mi 講話對上一次嚟食啲點心唔熱   佢話今次可能好食呢   所以今次食得好開心   哈哈 

唔記得咩叉燒餐包      

每人一粒最好呢  

南乳豬手 - 我話唔食㗎   阿喂話妳估好多咩   哈哈

好似係叉燒腸          

碗仔翅 - 阿喂獨享   佢食第 2 啖嘅時候   我話你自己食哂呀 ?!   佢個樣有啲驚   可能覺得呢碗係 Share 食   其實我整鬼佢啦   呵呵

煎堆仔 - 掛住傾   真係食完都唔記得口感味道係點   哈哈   

食到半路   係時候又要叫啲點心喇   呢個時候就可以叫黑松露帶子炒飯喇   哈哈   估唔到都幾好味喎   飯夠乾身   同埋無諗過咁大碟   我哋食剩 1/3   阿喂話打包   後尾大家都唔記得 lu 

紅油抄手 - 都唔記得好唔好食添    

椒鹽魷魚鬚 - 阿 Mi 話叫㗎   其實我一早想叫   不過驚太大碟   所以唔叫住   我好驚啲嘢一嚟就大大碟   未食己經飽嘛   但呢碟好食呀   下次嚟會再叫   哈哈

鮮竹卷 - 唔知邊個叫   但我一定唔會叫囉   呵呵   因為我覺得啖啖肉咁  

其實一早已經諗住同阿 Mi 喂食團年飯   不過媽咪入咗院   所以食唔到   咁有日里奧大人去見客   諗住約去飯堂食   不過阿喂要開工   所以我同阿 Mi 話   如果食唔到團年飯   就食開年飯   再食唔到開年飯就食春茗   點都要一齊食一餐呀   哈哈 ~

今日要等阿喂同里奧大人嘗試馬拉從式飲茶   佢哋兩個男人   好難相信我哋兩個女人咁多嘢講嘛   因為我同里奧大人講話見一次面傾 4 粒鐘   真係濕濕碎   哈哈 ~

好喇   我唔餓   佢哋 3 個都餓啦   我次次叫人點嘢食就會話: 妳鍾意食乜就食乜   但人哋點完就話依樣唔好嗰樣唔好   里奧大人就領教得最多   家姐都領教唔少   哈哈哈哈 ~

阿喂話叫炒飯食   我咪話唔好囉   之後里奧大人就承機話我   話又叫人鍾意食乜就食乜   人哋食炒飯咪由人哋囉   我聽到阿 Mi 好似和應話我假民主   但我話要有策略嘛   點心都未食就食炒飯喎   咁咪好易飽囉   咁咪唔坐得耐囉   條數係咁計家嘛   哈哈~

傾呀傾   食呀食   好在今次我醒   話講完一個話題再講另一個   唔係次次都有頭無尾咁 ~

又講鬼故   我堅驚嘛   因為細個見過嘛   同埋我舊同事話唔好成日諗有鬼   唔係個磁場會去咗嗰邊   勁恐怖 ~

最搞笑係阿喂講咗一個真人真事比我哋聽   我又真係好似聽過   但唔 Make Sure 喺邊度聽過 ~

終於知道真係阿喂講過啦   阿 Mi 即刻話佢講完又講   我就唔敢話佢喇   因為我自己都係咁㗎   哈哈哈哈   如果我咁話阿喂   衰奧一定話我咪一樣係咁 ~  

晴晴差唔多 4 點話比嘢父父   佢一嚟到就比咗包蝴蝶酥比我   但無同阿 Mi 喂打招呼   所以叫佢快啲叫姐姐哥哥   之後佢叫里奧大人做伯伯叔叔   好在無叫我做婆婆嬸嬸   呵呵 ~

啲字太細隻   所以叫阿 Mi 幫我睇   佢話係曲奇四重奏   我好鍾意食蝴蝶酥   但我知道真係超級肥   所以真係驚   唔會買嚟食囉

之後阿喂話晴晴個樣都好純   聽到之後我勁開心   因為我好驚佢學壞   佢太二仔底喇   好易受人影響   由細到大都係咁   好在佢都聽我哋話   我哋講嘅嘢佢都會記得   同埋最緊要係佢好怕死   嚇兩嚇又驚   所以我哋都成日同佢媽咪講   晴晴喺反叛期實係曳   實係鍾意同啲同學仔玩   呢啲係好正常嘅事囉 ~

聽日佢就番澳洲   所以約佢今晚食嘢   佢話 9 點半喎   咁是但啦   我其實預佢唔嚟㗎喇   哈哈 ~

4 點左右侍應話要埋單   阿喂就開始坐主不安   哈哈哈哈   佢真係好驚比人趕咁   怕咩喎   又唔係成日嚟飲   同埋我哋真係有食唔少嘢喎   唔係 4 個人百幾蚊埋單喎   呵呵 ~

里奧大人先搞笑   話以為只係 2 點幾   所以佢應該明白   點解我同 Mi 成日見面傾咁耐   因為真係有講不完嘅話題   同埋真係好鬼開心   啲時間過得超勁快呢 ~

我同里奧大人講話其實今次半馬拉咋   飲得兩個半鐘   不過佢話阿 Mi 喂由 12 點半坐到 4 點都攰㗎   加上又特登山長水遠過嚟九龍灣   來來回回真係攰囉 ~

送到佢哋去地鐵站   之後就幫晴晴拎眼鏡   之後我同里奧大人講   頭先晴晴都喺德福   佢 Daddy 做咩唔叫晴晴自己拎呀 ?!   成家都無溝通咁 ~

搞咗成半個鐘先搞掂   又話一張單有折   另一張單用 Coupon   我覺得最麻鬼煩   幫妳比錢唔係問題   但妳都要講清楚幾錢嘛   咩都唔講就叫人去拎   我最憎咁囉 ~

喺街邊見到有糖蔥餅   我即買嚟食呀   今年天橋下面圍哂版   無哂街邊檔睇   我就係每年等呢一刻家嘛   因為好有新年氣氛㗎   唔買都會望下   今年無得望啦   嗚嗚 ~

番到屋企都 5 點喇   勁攰   所以抖到 6 點半就煎糕喇 ~

蘿蔔糕 / 芋頭糕 / 兩粒菠蘿蜜年糕   咁里奧大人話拎糕嘅時候   都覺得啲糕好重   但我唔知佢咩為知重嘛   又唔係成日會去拎糕   點比較喎   咁今晚我拎上手嘅時候   我同佢講話啲糕真係實的的好重   佢即刻話今日咪講咗重囉   我話我知   我想肯定下啫   哈哈

是日懶餐 - 煎芋頭糕 + 煎蘿蔔糕 

煎芋頭糕 - 阿 Mi 煎得好金黃   我知我實煎唔到咁   所以勁大壓力   哈哈   真係深呼吸之後先煎呀   我覺得唔燶已經好好㗎喇   同埋一路煎一路聞到芋頭香   口感好粉糯   充滿芋頭香   終於明白阿表成日話食過阿 Mi 煮嘅嘢   覺得好幸福   我鍾意感覺到喇 ~

煎蘿蔔糕 - 好耐無食過有蘿蔔絲嘅蘿蔔糕咯   再加埋甜辣醬   真係正到爆 ~   

洗埋碗都差唔多 8 點幾   其實煎完嘢   我係勁想沖涼   但唔想一陣同晴晴食完嘢又沖   所以一到 9 點諗住叫里奧大人打比晴晴   唔嚟食就由佢喇   等佢同同學仔開心下   點知晴晴 8 點 56 分話到咗九龍灣   咁佢話想食壽司   我話即落去拎位   佢叫我唔好喎   話等佢拎咗位   我哋先好落去呢   妳話係咪好抵錫吖佢 ~

佢一坐低就話激死佢   因為佢今日想出糧比我哋   但因為銀行搞錯嘢   所以拎唔到錢   咁里奧大人話一陣教佢 e-banking   我話出唔到糧比我哋就無問題   最緊要唔好比銀行扣錢就得   因為好多時個 Account 唔郁一年就扣手續費㗎   咁先唔抵囉 ~

食下傾下   見佢食嘢就最開心   因為佢又要減肥喎   咩都浸浸浸   我最鬼驚   但我都成日話囉   咁後生新陳代謝快   食多啲唔駛咁驚   最緊要唔好暴食咪得囉 ~

問佢捨唔捨得媽咪呀 ?!   因為我驚佢仲嬲媽咪嘛   之後佢話都唔捨得媽咪   同埋唔捨得我同父父喎   聽到心都甜埋   哈哈   因為佢之前都話過兩次話唔捨得我同父父   不過我話好快又會見到㗎啦   佢去咗澳洲原來都已經有兩年喇   時間過得勁快 ~  

食完就去我屋企   之後佢話想坐多陣   就就坐啦   反正我都會比錢佢搭的士番屋企   咁我唔駛心掛掛 ~

無諗過晴晴 11 點半先走   咁今晚都幾凍嘛   佢又無着外套   所以父父借咗件褸比佢着住先   之後佢走喇   話仲係好凍   想着住件褸番屋企   咁梗係無問題啦   但我整鬼佢   話佢着男裝褸   成個伯父咁   之後佢番到屋企同我講話覺得啲人望佢眼光好怪呀   唔知係咪着咗父父件褸   哈哈   笑鬼死我   我話鬼得閒望妳咩   同埋件褸係運動褸   都睇唔出係男裝定女裝啦   自己形住就話人望 ~

佢一走   我都即刻沖涼喇   抖多陣就瞓添喇   勁攰呀 ~