生炒排骨 + 蒜蓉辣椒菜心 + 豬腳薑 (外賣) ( 16-FEB-2016 )

( 16-FEB-2016  TUE )

仍然凍凍地   好在唔係話太乾燥   因為之前乾燥得滯   R 到成身損哂   好鬼痛呢   哈哈 ~

早餐食菠蘿油   太耐無食   覺得幾好味 ~

菇場唔忙   可以做下自己嘢   順便抖下   呢排瞓得唔係咁好   成日都好攰咁 ~

食完 Lunch 就出去行下   去完佳寶買菜   再去萬寧買熊仔餅比工人   今日出位價 $15/盒   超級抵   所以買 2 盒比佢   我無帶環保袋嘛   一手拎住 2 盒   可能啲人以為我好鍾意食都未定   哈哈 ~

好嘢   仍然 Hea 過   放工就去 Taste 買餸   買完即番屋企喇 ~

浸好菜   醃埋排骨就開機洗衫   之後即刻拖地   難得今日都算乾爽嘛   所以就算攰都堅持要拖地呀 ~

里奧大人 7 點放工   咁我都預備煮飯喇 ~                 

是日晚餐 - 生炒排骨 + 蒜蓉辣椒菜心 + 豬腳薑 ( 外賣 )

生炒排骨 - 唉   啲排骨炸得唔夠香脆   最衰自己懶啦   唔用另一個碗蘸生粉   如果唔係唔會咁囉   依家同食茄汁豬肉無分別   哈哈   好在里奧大人都鍾意食茄汁嘢   唔係就慘 ~    

蒜蓉辣椒菜心 - 灼完碟菜心    加啲甜豉油同蒜蓉辣椒   真係惹味好多   但就好鬼辣 ~   

豬腳薑 ( 外賣 ) - 呀 mi 話佢食咗碗好好味嘅豬腳薑   搞到我都勁想食   所以喺 Taste 買碗嚟食啦   $25/碗   但唔好食囉   醋唔夠香甜就預咗   但啲薑好鬼腍   所以都無咩點食   嘥鬼哂   不過咁都好   可以了咗心事   唔駛成日想食佢   哈哈哈哈 ~

搞掂哂就沖涼   之後食橙   其實我好鍾意食橙   不過唔知點解   次次拻完橙之後   手指甲位置都會爆開流血   好鬼痛架   食個橙啫   真係有血有淚㗎   好在次次里奧大人都會幫我拻橙   唔係我真係唔會食呢 ~

家姐打嚟教我搭巴士去醫院   之後我問媽咪點啦   係咪就嚟出得院   家姐話有排啦   咁鬼懶   我無諗過家姐咁話媽咪   因為多數我講話媽咪懶之嘛   之後佢話佢頭先激鬼氣發媽咪脾氣呀   佢話媽咪瞓喺度話: 好凍呀   咁工人即刻幫媽咪蓋被   家姐即刻揭番開佢張被   之後話媽咪: 妳無手㗎 ?!   自己唔識蓋被呀 ?!   咁媽咪後尾自己都有蓋被   之後就話家姐又鬧鬧鬧   其實家姐都好少會咁話媽咪   可能真係頂唔順媽咪咁懶   真係好令人討厭   咁家姐公司又多嘢做   嘢已經做唔切   星期六都要番埋工   又晚晚探媽咪   真係超級攰   依家先發佢脾氣算好好啦 ~   

我最開心係家姐終於明白   媽咪真係超級懶   因為我次次話媽咪懶   佢就會話媽咪有病   所以佢話可能未必再晚晚探佢   我話無問題啦   反正佢都係瞓   妳 4 點半到同 8 點到都係一樣   真係嘥人時間   但如果佢起身傾下偈   話想郁下手腳   我坐 4 個鐘陪佢都無所謂啦   但佢成日話好攰   咁是鬼但啦   我可以早啲走仲好   大佬   來回兩個鐘   我可以做到好多嘢呀 ~

睇陣電視   11 點唔夠就瞓喇   但其實今晚又唔係咁眼瞓   不過唔理喇   照瞓 ~