翠河餐廳 @ 九龍灣 ( 7-FEB-2016 )

菠蘿咕嚕肉 - 食剩一大半   唯有打包留番聽晚食啦   

金銀蛋油麥菜

( 7-FEB-2016  SUN )

今朝 9 點半起身   食完早餐就番屋企抖陣   今日有事奉   所以我自己要早啲番教會呢 ~

差唔多 11 點婆婆打嚟   問媽咪點   我話今日無探佢   佢居然串串共話: 問妳尋晚呀 ?!   咁一早講尋晚啦   之後佢問我聽日會唔會帶媽咪同佢飲茶   我話唔會啦   因為天氣凍   但其實我同家姐都決定今晚會同婆婆講話媽咪入咗院㗎喇   唔駛成日呃住佢咁   家姐問我點解要今晚   我話比啲時間我哋清靜下   話番咗屋企都一日打幾次嚟問問問媽咪喺邊   一陣話入院   又每日追魂 Call   大佬   我真係覺得好煩 ~ 

崇拜完畢都 1 點幾 lu   尋晚已經幫姑奶 Book 咗 2 點半車喺佢屋企樓下   點知佢話執唔切嘢要改 3 點半   真係麻煩   呢啲嘢係應該一早做哂家嘛   點會今日上機都仲未執好㗎 ~

里奧大人話唔上去佢哋屋企先呀   費事一陣話無咩嘢又要我哋買   等佢哋唔好成日以為咩都有人幫手   咁我都認同嘅   因為好多時都係咁囉 ~

無耐家姐好嬲咁打蹳   話婆婆 "跣" 我哋呀   佢原來尋晚已經知道媽咪入咗醫院   因為大食表妹打比家姐   話初二去探媽咪   之後家姐話尋晚去到醫院   佢都攰到瞓着咗   但又好似聽到媽咪同人講話喺醫院   不過家姐無理啦   瞓到濛濛瀧瀧嘛   咁我哋咪話囉   駛唔駛咁衰呀   喺度 "跣" 人   知道媽咪入院咪講出嚟囉   我哋同阿姨係費事妳咁擔心先唔講比妳知啫   同埋我哋最唔鍾意佢一樣嘢   未知實情就周圍講   自己加啲又減啲   之後就九萬人打嚟   唔知就咪講啦   已經夠攰啦   又要我哋解釋一大輪   真係好想同佢講   唔該妳收口當幫忙 ~       

心情當堂差哂   所以我同里奧大人講話想買下嘢   最後去完馬莎買咗 2 包糖   好感恩 $40 有 2 包   可以比 1 包家姐   呵呵 ~   

買完就去翠河食埋下午茶   之後就去佢哋屋企喇 ~

一上到去   佢哋間屋亂到比人打劫完咁   我真係頂唔順   雖然我屋企都好多嘢   但都唔會亂成咁囉 ~

佢有佢哋執嘢   之後晴晴無啦啦話漏咗啲嘢比我   原來係 UGG 靴呀   我勁鍾意呀   因為我正想買對卡其色短靴嘛   咁我問佢點知我 Size   佢話睇過我對腳   應該同佢差唔多   咁我即試下啦   唔啱就比番佢去澳洲換自己個 Size 嘛   唔好浪費   之後我問佢幾錢   因為香港買 UGG 貴嘛   佢話 AUD100   咁我話我都覺得貴啦   雖然佢喺澳洲都幫人補習賺外快   但我覺得佢留番啲錢比自己買嘢好過   唔駛成日送嘢比我呢   掛住我已經好足夠㗎喇 ~

里奧大人就慘啲   咩都無   所以水姑都喺度笑   好在晴晴 Daddy 都比咗樽防敏感沖涼梘液比佢   叫做有啲收獲啦   哈哈 ~

好喇   3 點半落到屋企樓下   之後姑奶問佢個背囊呢 ?!   佢以為有人幫佢拎落呀   真係頂佢唔順   手袋背囊呢啲梗係自己拎㗎啦   同埋問題係妳都無叫人幫妳拎   鬼知要幫妳拎咩   所以佢又要上番去拎   完全係浪費時間 ~

去到機場都 4 點幾   Check-in 之後就去翡翠拉麵食嘢   傾下食下   咁我靜靜雞問晴晴手機 PW   佢即刻答   嗰刻我覺得佢真係好相信我   因為佢之前壞咗電話   點都唔肯講 PW 比 Daddy 媽咪聽   所以我同里奧大人講   我真係替水姑可悲   同埋我話同晴晴講咗   佢做咩都會撐佢   不過佢最終都要聽 Daddy 媽咪決定   要聽佢哋話   始終唔係我個女嘛   前途呢家嘢   決定錯就好大鑊㗎喇   我揹唔起呢 ~

鍋貼

擔擔麵

炸醬拉麵 x 2 

宮保雞丁

回鍋肉

糖醋魚柳

6 點半喇   係時候要離境喇   但晴晴居然話唔記得拎部 Laptop   唔係呀嘛 ?!   咁緊要嘅嘢都可以唔記得拎嘅   之後佢話因為媽咪幫佢拎咗出嚟    無擺番入背囊度喎   但佢話可以喺 Library 拎番啲資料   唔駛寄比佢住   等媽咪過去時再拎比佢都得   但佢 Daddy 部電腦又壞咗   所以一番到澳洲要即買部新 Laptop   唔係無得用   真係人都顛   成日咁樣浪費錢   我同里奧大人只能講句錢多無辦法 ~

今晚我無喊呀   可能見到晴晴大個女   又定性   唔駛我擔心   但唔捨得就更有啦   我最想最想佢快快樂樂   成績彪炳固然之更好啦   因為佢阿媽最想   但真係唔好比咁大壓力自己   始終將來出嚟做嘢   壓力一定實有   希望佢好好享受校園生活呢 ~ 

佢頭先開到聲話好想我同父父兩年後去佢畢業禮呀   仲話請埋我哋過去添呀   話過嚟一日就得啦   所以話佢細路仔啦   唔知大人請假係點請   哈哈   去得澳洲起碼請 9 日假啦   搭飛機來回都無咗兩日家嘛 ~

真係要離別喇   佢居然第一個攬住父父   勁開心啦佢   之後到攬住我同錫我   好似佢細路仔嘅時候咁呀   我哋一走   佢實會錫我左右兩邊臉呢   勁乖 ~

咁我哋要去舖頭幫手嘛   所以打的番九龍灣   做到 9 點幾就去食嘢   之後再做到 12 點幾   終於搞掂哂喇 ~

勁攰呀   送埋水姑番屋企   我哋都打的走喇   沖埋涼   差唔多 1 點幾先瞓呀 ~