煎糕糕 AGAIN ( 8-FEB-2016 年初一 )

( 8-FEB-2016  MON )

話咁快又新曆年喇   祝所有人新年快快樂樂   身體健健康康 ~

後生嘅時候   覺得講身體健康極之老土   永遠排到最後先講   仲有啲人成日話健康就是財富   心諗係咪咁誇呀   到依家老餅喇   講完新年快樂之後   第 2 句一定係講身體健康呀   哈哈   同埋好多人都知我弱雞   所以講第 2 句身體健康都零舍肉緊同大聲   哈哈哈哈 ~

9 點半起身食早餐   因為約咗大食兩姐妹 12 點左右到婆婆屋企坐陣先   1 點就去酒樓飲茶 ~

食完就番屋企沖涼   抖陣就問大食幾點到   佢話阿妹仲未起身   但當時已經 10 點 50 分喇噃   咁之後佢打嚟傾陣啦   佢話佢到依家都唔知去邊度飲茶   反而阿妹就知道邊度飲茶   其實我同家姐都唔知吔   但我哋無咩所謂   因為反正都要去飲茶   唔駛我哋周圍滕就得㗎喇 ~

但就覺得唔好咁大細超   年年叫人早到   但大舅父佢哋就最遲先到   咁先衰格嘛   所以我叫大食上車就話我知   我差唔多時間先出門口   一定唔會 12 點前到婆婆屋企囉 ~          

其實我同里奧大人真係諗住 11 點出門口   咁早啲去陪婆婆   點知婆婆咁鬼衰   我唔會咁早去囉   係佢自己攞嚟衰   明明一樣好開心嘅嘢   係都要搞到分化咁   再咁搞法   真係年初七先同佢拜年   講真   我想見下啲表妹咋   唔係真係唔想去   同埋里奧大人成日問我喺邊飲茶   我話唔知都奇怪啦   仲要係呢兩三年   婆婆成日叫人早到   但次次都有人遲到   里奧大人就覺得婆婆成日蝦人   感覺都已經唔好啦   人哋咁有心同妳拜年   妳大細超到咁   無 Hard Feeling 先奇 ~  

大食佢地 11 點 40 分先上車   咁我 12 點先出門口   12 點半去到紅磡   咁啱大食又到紅磡   所以約埋一齊行去婆婆屋企   咁家姐打嚟話婆婆要人 12 點 45 分前上到去喎   但我哋時運高   無收到婆婆電話喎   呵呵 ~

去到婆婆屋企樓下都 12 點 40 分   婆婆打比大食問我哋喺邊   大食話到咗佢屋企樓下   依家上嚟   收線之後   佢妹即丙佢   話去酒樓等咪等囉   又上又落麻鬼煩 ~

上到婆婆屋企   家姐無耐就到 lu   坐咗一陣就一齊去酒樓飲茶喇 ~

之後里奧大人同我講話舅父一定喺酒樓等   我話唔知佢哋點約   所以里奧大人都話次次有人遲到就唔話   但就要啲細嘅早早到   咁我係里奧大人都會嬲囉   點解要咁做先 ?!   我真係好難幫婆婆講一句好話   人哋有眼見嘛 ~

今年得婆婆 + 大舅父舅母 + 護士表妹 + 細表妹兩公婆 + 大食表妹 + 剪髮表妹 + 我 + 里奧大人 + 家姐飲茶   本來婆婆話食套餐   但我哋話食點心囉   套餐份量太多   食唔哂好嘥呢   同埋飲茶梗係食點心先開心家嘛 ~    

一嚟就係炸嘢   因為剪髮表妹好鍾意好鍾意食炸嘢   佢話有次同表弟叫點心   叫咗 10 樣   其中 9 樣係炸嘢   勁誇張   哈哈   

飲到差唔多 3 點   舅父舅母就番自己屋企   我哋一班老表就去卓悅買零食   大食話請我食零食喎   咁我要咗曲奇餅同糖   但佢之後叫我買番盒唔知咩朱古力比佢   佢請我就 $20   但我買番比佢要 $40 呀   我一定唔買囉   同埋我話妳有心請人食嘢   唔係咁呀嘛 ?!   講真   嗰刻我勁反感 ~

成班老表一上到婆婆屋企就係咁食糖   之後食生果食瓜子   所以食到個個都好飽   哈哈 ~

今晚探媽咪   所以我同里奧大人 家姐同大食坐到 4 點半就走人喇   估唔到其他老表又話走   咁一齊走啦   咁放假又真係想周圍行下嘅 ~

一齊坐巴士去將軍澳   去到見到媽咪都攰   鬼咩   成日唔郁   精神先奇 ~

7 點走人   我哋一齊出去搭巴士   感恩我哋嘅車站係同一地點   咁家姐可以陪埋大食等車   因為我唔熟路又唔熟巴士線   一陣搭錯車就煩 ~

番到屋企即蒸糕喇   終於清哂阿 mi 嘅兩盒糕喇   但仲有 1 盒買嘅蘿蔔糕未清   希望唔好過期先食 ~

之前買嘅紅豆糕   都幾多紅豆   八珍牌字都唔錯呢     

大食送比我嘅賀年禮物      

搞掂哂就沖涼   睇下電視   睇下雜誌   差唔多 1 點幾先瞓 ~