別府 @ 九龍灣 ( 19-NOV-2013 )

炒野菜

吉列豬扒拉麵 ( 2 辣 ) - 辣呀   今次連家姐都話辣   但上次食 8 辣就一啲都唔辣

九洲拉麵

三文魚壽司

( 19-NOV-2013  TUE )

尋晚又比隔離單位嘅 BB 喊到我無覺好瞓   佢係出盡力咁喊㗎   真係勁想叫佢哋關窗   不過實無可能啦   所以之後我都要開番冷氣   佢咁喊法真係人都顛 ~

依家都會搽遮暇膏   因為黑眼圈實在太勁   好在我唔係瘦   唔係啲人以為我吸毒   哈哈 ~

超勁餓呀   所以食腿蛋治烘底 ~

菇場有嘢做   做完諗住抖   點知又有嘢做   咁又再諗住做完再抖啦   之後又有嘢做   係咪咁邪呀 ~

做到差唔多 Lunch Time   今日有肉醬意粉 Lunch Box   咁加咗 Tabasco   同埋啲芝士又溶哂落意粉度   勁好味呀   有芝士真係好味好多呀 ~

本來要去倉執箱   不過勁多嘢做   所以 Partner 同其他同事去執   我就係咁繼續做做做呢 ~  

做到放工都未完   如果要做哂   咁起碼要 8 點先放得工   所以我會留番聽日做 ~

今晚睇中醫   咁家姐又睇   所以就去排隊先   估唔到差唔多 7 點先有得睇   之後里奧大人打嚟話同我食   不過我應承咗家姐喺鰂魚涌食嘛   所以照陪番家姐啦 ~   

咁家姐又記錯咗自己嚟睇過   所以明明到佢   佢都要去隔離登記 Check 嘢先   咁到佢睇嗰時都已經 7 點半 lu   好在佢唔駛等執藥   唔係仲耐 ~

趕唔切搭巴士   咁就搭地鐵囉   所以又約番里奧大人一齊喺九龍灣食算喇 ~

搭緊地鐵嘅時候   家姐話我眼圈好黑呀   嚇啦   我已經搽咗遮暇膏喇噃   我話咁黑係因為比隔離 BB 嘈到無覺好瞓囉 ~ 

地鐵車程好快   但行嘅路真係好多   上上落落   行路時間可能仲耐過車程   哈哈 ~

8 點 20 分終於去到別府   咁里奧大人已經攞咗位   因為我地勁餓   所以叫咗里奧大人幫我哋 Order 三文魚壽司   去到即刻有得食   呵呵 ~

呢兩日特別餓呀   家姐同里奧大人話天氣凍特別易餓   之後家姐無啦啦講冬天食臘腸真係可以食一碗飯   但夏天就真係唔想食臘腸   記得有次自己夏天煮臘腸潤腸飯   仲切粒   所以成碗飯都充滿油份   食到一半已經覺得好滯   有啲驚呀 ~

家姐格言係食完鹹嘢要食甜嘢   所以又去麥當勞食新地喇   食完就各自歸家喇 ~

雖然番到屋企都 9 點半   不過我都照煲中藥   唔想偷懶 ~

11 點幾瞓喇   今晚堅持要開冷氣   唔係唔掂呀 ~