豐璟雞煲燒烤吧 + 227 甜棧 @ 太子 ( 8-NOV-2013 )

麻辣雞煲 (小辣) - 唔辣噃   阿 mi 話下次可以叫大辣

滾起喇   流哂口水

蒜蓉蒸扇貝 (送)

炸魚片頭 - 無咩嘅

炸魚皮 - 好碎呀   好在阿 mi 都覺得

金菇 - 索哂啲汁就最正啦 

燒原條茄子 - 好香孜然粉味呀   不過凍咗之後食呢   就超級油

藍妹啤酒 - 阿 mi 至愛   一見啤酒上枱   佢就笑哂口啦   我哋叫咗 2 支大嘅   我最勁只可以飲 1 杯   仲要係慢慢嘆   所以基本上我 Feel 唔到點解啲人成日話飲啤酒有涼快嘅感覺   哈哈

我嘅仙草涼粉 (手工芋圓地瓜圓 + 黑糖寒天凍 + 養生黑糖水) @ 227 甜棧 - 如果要讀出嚟   真係講完都無氣

阿 mi 嘅仙草涼粉 (杞子龍眼肉 + 珍珠 + 薑汁黑糖水) @ 227 甜棧 - 我掛住講嘢同影相嘛   之後想 "北" 粒珍珠試下   佢話比咗我啦   拎多一粒啫   咁唔捨得   哈哈

古色古香   我發覺依家好多食店都係咁呢 

( 8-NOV-2013  FRI )

終於 Happy Friday 喇   尋日同 CC Skype   傾傾下我以為係星期五   家姐又以為星期五   可能因為多數日星期五先同媽咪食飯呢   嘻嘻 ~

今朝叫完件芝腿治烘底就打機   有個男人問我對面個位有無人   我望一望佢之後就答無人   原來係 8 卦   佢 Whatsapp 問我喺邊   我都唔知呀   因為聽緊歌   好日唔聽   一聽佢就 Whatsapp 我 ~

好忙呀   忙到 Lunch Time   本來諗住食牛腩米   點知又休息   所以即轉食酸辣米線   其實一早已經想食   不過驚太飽   點知最後都係酸辣米線呢 ~

其實係小辣之嘛   個個同事一望到碗米線就會嘩一聲   以為好辣

好啦   忙到 4 點   寫咗篇 Blog 又再忙過呀   充實到呢 ~

忙到放工   其實仲未做完   不過唔理喇   又唔係急   留番星期一先做 lu ~

今晚約咗阿 mi 去太子食飯   所以搭地鐵   差唔多 6 點 15 分就到喇   佢又去恆生攞錢   次次都係咁嘅   唔通驚我大食唔夠錢找數   哈哈 ~

之前約好食飯㗎喇   我話想食辣雞煲呀   因為未試過嘛   好似好大鄉里咁 ~

咁我就話想去太子區   因為中間點   又無尖沙咀同旺角咁多人   咁阿 mi 就搵食店喇   雖然佢 Whatsapp 咗食店資料比我   但我完全唔記得睇添呀   所以佢帶我去邊就去邊㗎喇 ~

Book 左 6 點半   去到無人都幾咁好呀   之後開始多人啦   有班男仔坐喺隔離枱   嘈到呢   好在後尾無咁嘈咋 ~

點咗雞煲之後   一路食一路傾啦當然   差唔多食到一半就再叫火鍋料   因為我未試過嘛 ~

今晚傾得好開心呀   咩話題都傾一餐   今次阿 mi 講好多嘢添呀   唔比我插咀   我就一路聽一路食   幾鬼正呀 ~

傾呀傾   講開中醫   阿 mi 話我臉色好咗呀   我話其實係搽咗唇膏   咁唔駛臉青青咁   不過阿 imi 話唔係   臉頰係紅咗   之前見我唔係咁喎   實在太好啦   真係要 Keep 住睇呢個中醫   因為我真係好耐無比人話我臉色好喇   哈哈 ~ 

我今晚勁呀   飲 1 杯啤酒   杯啤酒由頭飲到尾   不過一睇阿 mi 應該唔夠喉   飲得唔多暢快   佢最後都按捺不住叫多支   不過我真係唔飲得架   佢最後留番小小比我   1cm 左右到啦   話驚我口渴   其實真係有啲口渴   不過我唔想飲王老吉同汽水   之後我飲咗 0.5cm 到啦   剩咗嗰啲比番佢   一飲果下   啲啤酒係凍嘅   超舒服呀   佢都飲得好快喎   成支差唔多飲完都仲係凍 ~

差唔多 9 點   老闆都問我哋叫唔叫嘢食   我哋唔叫喇   其實佢都好好㗎喇   因為限時 2 個鐘咋   呢餐都抵食   $280   因為我都好飽   但阿 mi 可能唔飽   因為佢好似食好少   可能知我想食   哈哈 ~

講好話食甜品   所以又由阿 mi 帶路喇   佢睇住個 Map 搵路   同我講話係呢度呢度   我都未睇得切   已經到咗目的地   如果靠我就慘喇 ~

又食喇   呢排食太多刺激嘢   塊臉爆哂瘡   所以我都唔理暈唔暈   食涼粉呀   我好少食呢啲涼嘢 ~

又傾喇   食到半路想爆肚   真係覺得超勁飽   同埋開始又凍喎   仲諗住坐門口無咁凍添 ~

之後阿喂打比阿 mi   原來已經差唔多 11 點喇   我以為 10 點咋 ~

好喇   一齊行去地鐵站   好在佢都搭地鐵   唔係我都唔知自己喺邊   夜媽媽好難認路家嘛   我覺得 ~

大家路線唔同   搭住電梯 Say Goodbye 啦   之後我等車嘅時候   Feel 到成陣雞煲味   我仲以為自己形住   無耐阿 mi 問我係咪成身雞煲味   原來佢都有    我估唔到食雞煲都咁大陣味添 ~

番到屋企要 Whatsapp 比阿 mi 報平安   里奧大人仲以為我哋仲傾唔夠   哈哈   咁我執啲文件嘅時候   佢無啦啦搓我個肚腩   話妳睇下妳肚腩幾大   哈哈   係呀   我個肚真係想爆咁㗎   唔知係咪飲咗啤酒有啤酒肚呢   哈哈 ~

沖埋涼   又睇下電視   因為太飽   真係唔敢即瞓   所以差唔多 1 點先瞓呀 ~