住家飯 @ 媽咪屋企 ( 1-NOV-2013 )

蒜蓉蒸龍蝦仔 

酸梅麵豉蒸排骨

蒸石斑仔 

炒菠菜

炒青瓜

蟠桃 / 柿

( 1-NOV-2013  FRI )

又 Happy Friday 喇   今日里奧大人唔駛上大陸   咁仲好啦   唔駛早啲起身嘛 ~

早餐食奶油多   因為 Lunch 出去食   所以唔可以食咁飽 ~

菇場唔忙   但整呢樣嗰樣   都好快到 Lunch Time ~

勁勁勁想食酸辣米線呀   上星期六開始食   計埋今餐   食咗 3 餐米線   但唔知點解真係食開想食咁囉   可能酸酸辣辣好開胃咁呢 ~

食到飽就當然行下啦   去惠康買出前一丁   $27/9包 x 0.95   我覺得好抵呀   不過我買嗰隻五香牛肉味唔係成日有貨   所以要去 2 間買   有 18 包喺手   終於了咗心事喇   因為屋企無哂出前一丁   家姐叫我買 9 包先   不過我話其實 18 包好快食完   佢覺得 18 包好多   因為姐夫每次食半包   咁 18 包咪覺得好多囉 ~

好鬼熱呀   買完番菇場喇 ~

放工即走   因為要去阿信屋掃薯片   會員 7 折咋   真係好抵   買完先去媽咪屋企食飯 ~

家姐今晚早喎   6 點 45 分番到嚟   咁又可以早啲食飯   不過我今晚只飲湯同食餸   如果食埋飯真係唔掂呢 ~

食埋生果又食薯片   真係超級飽   媽咪又買咗香蕉同蟠桃比我   又拎埋湯 + 薯片   所以又係好鬼重   不過依家我醒喇   會揹背囊   咁樣好啲   唔駛側哂身拎   家姐仲話   姐夫叫佢唔好拎咁多嘢番屋企   同埋唔好飲咁大碗湯   哈哈   我地都唔錯架   媽咪特登買比我哋   又特登煲湯   唔飲嘅話   媽咪會覺得我哋唔鍾意飲呢 ~

呢隻薯片都幾脆   不過無咩芝士味   但家姐話呢隻薯片唔算脆喎     

番到屋企無耐   里奧大人就番到嚟喇   今晚佢又食唐記   見到佢食雞扎同飯   我覺得好飽   不過都覺得好開心佢咁有胃口食嘢呢 ~

今晚勁熱呀   又要開番冷氣   沖埋涼再開機洗衫   之後就抖 lu ~

里奧大人又睇劇   我就睇雜誌   不過我 11 點半就瞓喇   聽日要番工嘛   咁佢自己就繼續睇 ~