阿利水韓國料理 @ 鰂魚涌 ( 5-NOV-2013 )

前菜 - 我覺得份量唔少

泡菜好辣下

大豆芽 - 無味係預咗呢

薯仔 - 好爽口

大豆芽湯又送   睇過樣好淡而無味  但其實好重胡椒味呀

牛肉石頭飯 - 我同家姐講話都無蛋嘅   家姐話原來喺佢嗰邊   遮住咗   同埋佢好快就撈埋咗喺飯度   我鍾意食呢個飯㗎   因為好多爽口嘅菜   加埋韓國辣椒醬又正   不過最正都係啲飯焦   哈哈

燜辣豬排骨 - 我哋諗住就咁一個餸   估唔到跟埋白飯   我今日先同媽咪講我 4 日無食飯   估唔到今餐食番 4 日飯嘅飯量   呢個排骨原來係豬軟骨   燜到好淋又入哂味   啲蘿蔔索哂啲汁   同埋真係要用啲汁撈飯先好食   越食越辣好過癮呀

( 5-NOV-2013  WED )

星期中喇   勁開心   今朝又係帶中藥加肉汁   真係好重 ~

我最鍾意同里奧大人出門口   第一當然係可以一齊行去地鐵站   第二係叫佢幫我睇下熄咗煤氣爐同埋關好雪柜門未囉   自從有次關唔實雪櫃門之後   我就次次一開雪櫃門   之後就會叫里奧大人 Check 多次   佢都比我搞到精神緊張   哈哈 ~

今朝好餓呀   想食啲唔濕嘅嘢   但又唔想食好乾嘅嘢   終於諗到食碎蛋吞拿魚治喇   勁好味 ~

番到菇場即做嘢   摩打手都做到 12 點   之後整依樣整嗰樣   好快就放工喇   今日婦檢   所以請半日假   當然會同媽咪工人飲茶之後先去 Check 呢 ~

好感恩好快有車   食下傾下   2 點 15 分要走喇   去到巴士站又即刻有車   勁感恩呀   唔係又要等 15 分鐘 ~

鮮蝦菜苗餃

薑蔥牛柏葉

時菜鯪魚球

燒肉油雞飯

菜心

今次勁呀   因為我第一次喺尖沙咀地鐵站行去北京道   以我呢個路盲嚟講   真係算勁囉   無問人喎   因為呢個地鐵站有 9 萬個出口家嘛   其實咁行都要 10 分鐘   不過都算快   起碼唔駛過馬路嘛   同埋好在唔焗   唔係就慘 lu ~

Book 咗 3 點 15 分   去到得 1 個男   仲以為我係第 1 個   點知原來佢係等緊老婆   咁我差唔多 3 點 45 分先睇   左 Check 右 Check   4 點搞掂   呢個醫生都好好   因為我好多問題   佢都好溫柔咁答我   唔會趕妳走嗰隻   咁霍醫生都係   但有啲唔係囉   好急好快咁答妳   仲要係一路寫一路答妳   唔會望妳咁呢   咁妳見佢咁急   好多時搞到連嘢都唔記得問就出咗去呢 ~

報告比我想像中好呀   感謝主 ~

咁因為我又要去鰂魚涌睇中醫   本來想搭 110   不過驚紅隧同銅鑼灣塞車呀   約咗家姐家嘛   唔想遲囉   最後搭地鐵   16 分鐘車程咋 ~

去到醫師度居然有人睇緊   仲諗住 4 點幾無人睇添   之後搞掂哂就啱啱好 5 點半   約埋家姐喺中醫樓下等   勁開心呀   咁早見到佢   又因為太早關係   大家都未餓   所以行惠康買零食   我地又買咗一百蚊薯片同糖   同家姐行超市真係唔會無收穫   哈哈 ~

差唔多 6 點 15 分就行去搵食   我講明話唔食連鎖店嘅餐廳   所以佢帶我食韓國嘢   因為佢 Lunch 食過   覺得幾好味呢 ~

叫埋嘢食都差唔多 6 點 45 分 lu   啱啱好開飯時間 ~

食到好飽   咁家姐想去廁所   咁就話去佢公司廁所喎   喺佢公司坐咗陣   見佢自己個文件櫃擺滿哂汽水同紙包飲品   勁正呀 ~

真係好飽   但家姐又想食甜品   所以一齊去佢公司附近周圍行下   睇下有無囉   同埋睇有咩嘢食下次一齊食   之後再行去北角嘅阿信屋   真係雙眼離唔開零食   哈哈 ~

之後過馬路去巴士站   呃佢話有 606   但其實我真係離遠望到有 3 個數目字同 2 個中文字   即係 606 彩雲呢   咁佢想起步跑   我話呃妳咋   之後我再望多次   原來真係有 606 呀   之後即跑    不過其實係跑 10 步左右嘅啫   不過我驚呢個站無人上會唔開車門   所以我先跑咋 ~  

出到官塘都係 8 點   又係由官塘唔知咩小學行番去九龍灣   但家姐真係勁想食甜嘢   但金滿堂又爆   所以去麥當勞食雪糕   食完之後就各自歸家呢 ~

冰雪彩虹新地 (椰子菠蘿味) - 下   我睇相先知原來係可樂思樂冰   但我話明要芬達家嘛   好在瞓到咋   唔係會鬧家姐   點做嘢   唔幫我 Check 下先拎   呢隻雪糕醬係菠蘿椰子味   又幾好味噃   有菠蘿同椰子味架真係

好立克新地 - 家姐想食麥記雪糕係因為知道有新口味   點知佢一坐低就扁哂咀話呃人嘅   就咁倒啲啲好立克粉落去   食咗幾啖又扁哂咀話得啲好立克粉   呃人嘅   又影到咁靚     再食多幾啖又扁哂咀話仲以為係好立克醬添   之後食幾啖又扁哂咀話   早知叫新地好過   我笑住望一望佢   佢都忍唔住笑呀   食咁耐講咁耐   但就唔係發火嗰隻   所以我覺得好好笑   我話係啦   食新地都有花生咬下   呵呵   所以佢當堂覺得我杯好抵同好好味呢   哈哈   

番到屋企即沖涼喇   差唔多 9 點   里奧大人都番到屋企 lu ~

家姐 Whatsapp 我話有樣好重要嘅嘢比我   我一估就估到係 Line 嘢   呵呵 

芒果乾半磅 ($30) - 我特登買比里奧大人食   佢上次喺正隆行想買   不過實在太大包買唔落手 

我最鍾意嘅薄荷糖   呢隻得力素都幾好食   好似細細個食太空糖啲口感

無啦啦超勁想食朱古力曲奇   所以買一盒細嘅   同家姐 Share 食最好呢