冬蔭功雞扒 + XO 醬蒸帆立貝 + 金銀蛋菠菜 ( 10-NOV-2013 )

我覺得煎到勁樣衰呀   燶到呢   塊雞皮直頭煎到燶哂添呀   下次都係用光波爐算喇   之前用開嚟焗雞扒   所以到煎嘅時候   先記得無落生粉   但一切已經太遲喇

( 10-NOV-2013  SUN )

今朝 10 點起身   好耐無番教會   所以今日一定要番呢 ~

食完早餐就番屋企抖陣   之後番教會喇 ~

奉獻完之後就去 Market Place 買生果   今日又買滿 $100 有 95 折呀   勁開心   但生果只係買咗 $96   唔抵嘛   所以里奧大人叫我睇下第啲嘢   之後買咗 2 支細麥啤    又見到 Balieys 做 Promo $179   其實心大心細買唔買好   年年想買又驚飲唔哂   不過佢話擺喺雪柜可以放半年   咁都好   咁就試酒啦   試咗 Hazelnut 同 焦糖味   好似好甜   雖然飲開原味   但飲飲下好似好多酒味   唔太鍾意   之後里奧大人話 Coffee 味好飲   咁我又試   真係唔錯   所以買 1 支啦   同埋試咗咁多杯   都唔好意思唔買囉   其實飲咖啡酒都好得意   咖啡提神   但飲酒又眼瞓 ~       

明明買生果咁健康   無啦啦又買埋酒 ~

我要去街市買餸呀   所以同里奧大人分道揚鑣喇 ~

其實好鬼大風   但喺街市滕嚟滕去   所以好熱呀   有汗添呀   所以浸好哂菜就去沖涼喇 ~

呢日都要開冷氣   係因為太大風呀   好驚吹甩隻窗   情願開冷氣好過 ~

差唔多 3 點食 Tea   之後里奧大人買 Scraf   呵呵   我又買咗個袋呀   開心開心 ~

番到屋企都 4 點幾喇原來   拿拿聲煲中藥同燉肉汁   再開機洗衫   再望鐘又已經 5 點   抖陣又預備煮飯 lu ~

(豬肉檔阿姐話肉排先甜   同埋價錢同瘦肉一樣   所以叫我買肉排呢)

又唔餓   咁 7 點半先開始煮飯   8 點幾開餐   其實算夜食喇   但 7 點真係食唔落啦 ~    

是日晚餐  - 冬蔭功雞扒 + XO 醬蒸帆立貝 + 金銀蛋菠菜 

冬蔭功雞扒 - 好在開一開雪櫃   完全唔記得自己醃咗雞扒呀   今次試新嘢   咁之前淥冬蔭功麵比里奧大人   多數淥 2 個   但只用 1 包嘅調味粉   所以我會留番嚟用   今次試下醃雞扒   醃嘅時候覺得好濃味咁   因為係咁打噴嚏   不過原來係無咩味   所以要蘸泰式酸甜醬   當堂好味   呵呵 ~  

XO 醬蒸帆立貝 - 雪櫃哂生果 中藥同肉汁   所以要清咁啲嘢   咁就清埋樽 XO 醬啦 ~

金銀蛋菠菜 - $6/扎好抵喎   又青青綠綠好靚   又記得要清埋鹹蛋皮蛋   咁就一定要食啦 ~  

執碗嘅時候   里奧大人又要做公司嘢喇   咁電視播緊 "吾淑唔食"   我問里奧大人仲要做幾耐呀 ?!   佢話唔知  唔夠 2 秒   電視機好大聲講口號 "吾知唔得"   真係笑爆咀呀   係咪咁啱呀   不過唔夠上次里奧大人咁驚   唔記得去邊度   行行下我叫佢幫我影對腳   佢影嘅時候聽到有人話 "唔係咁變態呀嘛"   嚇到佢即刻望後面   原來嗰個人係傾緊電話   但一定唔係話緊里奧大人   因為里奧大人聽到佢哋仲係講緊同一樣嘢   但唔關影相嘅嘢嚟呢 ~

沖埋涼就食提子睇電視   里奧大人差唔多 10 點做完嘢   之後佢沖完涼就食提子   佢一食就知道喺 MP 買   因為百佳果啲係大粒   但唔甜   所以依家好多時都情願行遠少少去 MP 買呢 ~

今晚又 11 點幾瞓   如果聽日唔駛番工就好啦   所以我最鍾意係星期六   唔駛番工真係瞓都瞓得好啲咁   無壓力嘛 ~