椒鹽豬扒 + 冬菇燜節瓜 ( 11-NOV-2013 )

( 11-NOV-2013  MON )

星期一喇   又係臨醒先發惡夢   尋晚都無睇恐怖戲   無啦啦都發惡夢   可能要番工   所以有壓力呢   哈哈 ~

早餐勁想食腿蛋治烘底   諗住好少蛋   點知原來都幾厚   所以勁飽 ~

番到菇場要做埋啲手尾   都差唔多 11 點幾先搞掂   眨下眼又 Lunch Time 咁呀 ~

又係食 Lunch Box   真係唔鍾意叮菠菜   口感好林   所以我會第一時間食咗先 ~

忙下停下   好在今晚唔駛買餸   所以又去超市買下嘢   番到屋企就抖下先   抖咗半個鐘就預備煮飯 lu ~ 

里奧大人差唔多 7 點打嚟   好緊張打嚟問煮咗飯未   咁我話煮咗啦   原來佢話難得咁早放工   想同我撐枱腳   不過我唔啦   醃好哂嘢   又已經煮緊 ~   

里奧大人又問食咩   我咪又話佢鍾意食嘅嘢嚟打發佢啦   點知  佢話成日話啲嘢係佢鍾意食   連佢自己都唔知自己鍾意食啲咩喎   哈哈 ~

難得佢咁早   咁當然等埋佢一齊食啦   今晚唔煮飯   淥個擔擔麵比佢食算喇 ~

時日晚餐 - 椒鹽豬扒 + 冬菇燜節瓜

椒鹽豬扒 - 今次好有心機整   仲係咁記住要落生粉   哈哈   但最可惜係唔記得買青椒同埋加指天椒   唔係賣相同味道就更加好呢 ~  

冬菇燜節瓜 - 雪櫃無位   所以清埋啲冬菇   咁樣燜都幾好食   其實我依家有啲怕食冬菇   因為次次食完都好滯咁囉 ~   

里奧大人幾衰呀   咁我食完先嘛   因為我只食餸   無食麵   咁我坐喺梳化度整啲嘢   突然間覺得佢嗰邊無哂聲   之後我見到佢鬼鬼祟祟蓋番個蓋   梗係擺啲豬扒落我 Lunch Box 度啦   之後佢擺完   見我望住佢   佢個樣好似見到鬼咁驚呀   哈哈 ~

搞掂哂再沖埋涼都係 9 點   實在好開心啦   可以做自己嘢嘛   咁之後打比個朋友   同佢傾咗 45 分鐘   傾完就食生果喇 ~

Raspberry - 我想食好耐㗎喇   因為我鍾意食有 raspberry 嘅雪糕同乳酪   所以買盒嚟試下   呢盒 $29.9   我覺得貴呀   咁我買嘅時候   聽到有人話酸   所以都心大心細   但里奧大人話買嚟試囉   點都要試過先知   咁又唔係好酸啫   不過口感原來係林嘅   我以為口感會好似藍莓咁添

無核青提   大粒又爽脆   雖然果糖好高   但都忍唔住要食呢

今晚里奧大人自己睇劇   咁我又打機咁啦   但熄咗電視   之後佢話瞓   咁我都瞓喇   但唔知幾多點   不過都應該超過 11 點呢 ~