照燒汁洋蔥豬扒 ( 28-NOV-2013 )

( 28-NOV-2013  THU )

今朝真係凍咗喇   要着格棉褸先得   去旅行之前真係唔可以病呢 ~

早餐食奶醬多   下次都係唔食   好甜同好漏咁 ~

我朝早唔鍾意去啲太嘈嘅地方食嘢   因為未瞓醒嘛   咁依家去開嘅茶餐廳   有 2 個女人同 1 個男人成日講嘢好鬼大聲   今次仲同佢坐埋一枱   我直頭全程眉頭縐呀   我估佢睇到我咁樣都知咩事啩   不過點避都無辦法   因為佢有次坐入面   我坐出面都聽到佢哋啲聲   有次佢哋同埋茶餐廳阿姐講笑   講又大聲笑又大聲   我隔離個女人都忍唔住話突然變咗街市   可想而知幾大聲呢 ~      
菇場唔忙   不過唔好忙   唔想有手尾要同事跟嘛 ~

諗住去叮飯   咁啱我同事拎緊個 Lunch Box 出嚟    我同佢一齊話好臭呀   忍唔住睇下叮咗啲咩   原來係鹹魚仔呀   真係微波爐大忌啦   啲臭腳味久久不散   好難頂 ~

食完又 1 點幾   唔可以出去行 lu   咁又上網啦 ~

差唔多 4 點又忙   好在放工前搞掂咋 ~

放工唔駛買餸   不過番到屋企都忙㗎    要煲中藥同開機洗衫   又抹下書房   之後抖陣就煮喇   今晚食出前一丁   因為想食濕嘢呀 ~

是日懶餐 - 照燒汁洋蔥豬扒 

照燒汁洋蔥豬扒 - 依家會買包裝醬料   其一慳位   其二就係一餐份量啱啱好   雪柜真係長期咁多嘢   真係要再諗諗計點清哂啲嘢先 ~ 

洗埋碗   沖埋涼就執旅行啲嘢喇   之後就等里奧大人放工呢 ~   

里奧大人 5 點喺公司開 Conf. Call Meeting   差唔多 8 點幾先開完會   搞埋啲手尾差唔多 9 點半先放工   真係搞埋我啦   因為要煮麵比佢食嘛   想休息下都唔得 ~

里奧大人仲要做少少公司嘢   所以叫我幫佢洗碗   真係好笑喇   佢有幾時自己洗過碗呢下 ~

呢排瞓得唔好   11 點幾就想瞓喇   所以自己瞓先 lu ~