阿明印尼餐廳 @ 深水埗 ( 9-NOV-2013 )

加多加多飯團 ( Gado-gado Lontong ) - 今次要大辣   真係幾辣   其實我鍾意食加多加多原因係好多菜呢   但之後啲沙爹醬就開始好甜咁   有啲反胃

黃薑飯 ( Nasi Kinung ) - 佢哋話小咗茄子   後尾用個碗仔裝番啲茄子比我哋   其實唔比都唔知   我其實只識讀 Nasi   之後教里奧大人讀   佢覺得我好勁呀   之後我求其再講整鬼佢咋   哈哈

加咗茄子

蝦醬蝦米炒通菜 (Cah Kangkung) - 都好味   最緊要有菜食

里奧大最鍾意飲嘅椰汁

( 9-NOV-2013  SAT )

一覺瞓到 9 點醒一醒   其實都精神   但見里奧大人唔喺身邊   咁我都懶下床   差唔多 9 點半   佢仲未入房   原來佢話個有啲搞肚痛   所以費時入房出房   不過我都起身 lu   想早啲去 CCBA 開戶口   咁里奧大人之後就入房再瞓 ~

初初約 11 點架   諗住自己遲起身   估唔到 9 點半都醒咗   早啲去早啲搞掂   因為上次里奧大人喺呢間銀行搞啲嘢   排咗 45 分鐘   因為 Counter 得 1 個人   做得又慢   但嗰時都有成 10 個人   都唔明點解唔開多個 Counter   真係完全嘥人時間企喺度等囉 ~

10 點幾搞掂喇   里奧大人都起身 lu   咁即刻沖涼換衫去 Mega Box 喇 ~

差唔多 11 點左右到 Mega Box   第一件事係去 UA 換飛睇戲呀   睇 "雷神奇俠 2 : 黑暗世界"  (Thor : The Dark World)   因為生日飛要即場買   今日唔睇   之後又唔得閒就嘥咗張飛㗎喇   好感恩買到嘅位置都唔差呢   雖然係細院   但時間啱嘛   最正唔駛睇 3D   我真係好驚戴副 3D 鏡   次次帶完之後   個鼻樑會好痛 ~

又去飲茶   呢間開始飲到有啲厭喇   飲到 1 點半就走喇   想去大眾幫家姐買 Mouse Pad 呀   感恩買到 ~

第一次早餐食蝦片咋   雖然爆緊瘡   但都照食   呵呵

法式焗雞批 - 新鮮焗出嚟真係好好味   同埋細細隻唔漏

鮮蝦翠苗餃 - 爆蝦呀   隻蝦好似我隻手指尾咁大隻   抵食喎

蜜餞叉燒腸粉 - 我唔鍾意食叉腸   不過里奧大人就鍾意食  

蟹籽燒賣皇 - 唔知叫咩好   所以叫燒賣   想食啲傳統嘅點心

菜家鄉煎薄撐 - 今次幾好味噃   之後里奧大人話想叫珍珠雞   我話可唔可以叫啲唔好咁飽肚嘅嘢呢

之前喺荃灣買   係我最鍾意嘅紅色

我最鍾意嘅碎花

我鍾意有間線   如果唔係會越寫越上   同埋啲字會越寫越細粒   唔知點解   哈哈

之後去睇戲喇   睇 1 點 15 分   買埋爆谷套餐就入場 lu ~

爆谷套餐 (中爆谷 + 2 杯大汽水) - 爆谷食極都有咁   不過食得好滿足   嘻嘻   但汽水真係飲咗 10 啖左右就無飲   嘥哂添

其實睇過第 1 集   覺得唔係咁吸引   但最慘係呢排好似無戲好睇咁   所以咪揀 "雷神 2" 囉   估唔到超有驚喜   我覺得勁好睇呀   有感人有搞笑   我覺得無冷場添呀   之後里奧大人話我真係好鍾意睇   因為我講咗幾次話雷神 2 好好睇呀 ~

睇完都係 3 點幾   又唔餓   所以去 AEON 行下   買咗頂帽比媽咪呀   咁佢朝早做運動唔駛驚大風呢 ~

之後到我買咗 Line 嘅八達通套同生日公仔   勁開心呀 ~

坐 Shuttle Bus 去九龍灣   再搭地鐵去深水埗高登   要幫晴晴買 Printer Iink   佢唔夠 1 個月就用哂   真係肯定係又 Print 唔係又 Print 啦   但澳洲買 Ink 好鬼貴   所以我哋買咗 5 盒加大寄比佢   咁樣實夠用喇啩 ~

買完都差唔多 6 點   今晚去阿明食印尼菜   不過食完有啲反胃   應該唔會再去㗎喇 ~

食完就行去坐小巴   途經寵物店   有隻白色松鼠狗咬住隻公仔好過癮   之後里奧中人話唔係公仔嚟㗎   但我望嘅時候   佢係完全唔郁嘛   再望真啲原來係芝娃娃   之後佢哋係咁咬頭仔撐腳仔打交   勁鬼可愛呀   里奧大人都覺得佢哋可愛   仲一齊入去睇呢   佢居然同我講話屋苑唔比養狗   如果唔係想買咗佢哋呀   呢句說話以往完全唔會喺里奧大人口中出現嘅   我問佢點解咁講嘅   佢話隻芝娃娃望住佢好耐呀   好似好想跟佢咁喎   咪講到咁慘啦   我都希望佢有戶好人家收養佢啦 ~

坐小巴時候見到啲舖頭嘅捲簾   吹到想跌咁呀   大風到好似打風咁   好犀利呀 ~

去埋百佳買生果就番屋企喇   第 1 次去完街   番到屋企都係 7 點幾咋   實在太好呢 ~

沖埋涼   一齊睇之前錄咗嘅戲   又食薯片   勁驚架   不過勁想食   呵呵 ~

聽朝番教會   所以 12 點要瞓喇 ~