炒粒粒 + 燒汁煎鯖魚 + 牛蒡豬骨湯 ( 4-JUN-2015 )

( 4-JUN-2015  THU )

今朝又係好好天   熱就熱咗啲   不過依家帶咗把風扇仔   行起上嚟無咁熱   同埋真係要用下把風扇仔   唔係好易壞   又嘥嘢㗎喇 ~

早餐食菠蘿油   但都仲未接受到食哂成片牛油   所以家姐話不如唔好食菠蘿油喎   哈哈 ~

菇場抖咗陣又忙   忙到 Lunch Time 都未做完添 ~

出去拎番個背囊   好感恩師傅幫我整番好條拉練   之前師傅話如果換成條拉練 + 扣要 $60   同埋起碼要 3 個星期   因為要等條拉練番嚟   但我驚趕唔切去旅行之前拎嘛   但都要整囉   唔整都用唔到架   但估唔到個背囊唔駛成條換   所以只收 $30   咁好抵啦   因為我預咗起碼要 $100 呢 ~ 

超勁焗熱呀   所以去買車仔麵番菇場食喇 ~

忙呀忙    忙到 3 點幾就搞掂   終於可以抖下 ~

放工去街市買菜   番到屋企又已經 6 點半   但我已經有哂策略點行家嘛   估唔到都要咁耐   唉 ~

里奧大人唔舒服   好似感冒   但佢話想飲菊花茶   咁就煲比佢啦   所以今晚係得番一個爐煮嘢   感覺好似用多一陪時間咁呢 ~

7 點開始煮嘢喇   諗住食先再徑步   點知里奧大人 7 點 15 分放工   咁等埋佢一齊食啦   今晚食麵嘛   唔想食完隔一陣又再煮   咁一齊煮唔駛咁煩   哈哈 ~

一見到里奧大人就問佢出面熱唔熱   佢話係好焗先啱   所以叫我唔好去徑步喎 ~

是日晚餐 - 炒粒粒 + 燒汁煎鯖魚 + 牛蒡豬骨湯  

炒粒粒 - 好在買咗半斤青豆   唔駛必咁耐 ~  

燒汁煎鯖魚 - 用牛肉汁醃   真係好味喎   個汁咁百搭真係唔錯   哈哈 ~  

牛蒡豬骨湯 - 媽咪煲㗎   今次啲湯勁無味   咁我以為係我問題啦   但家姐都話係無味   叫我落啲鹽   哈哈   同埋佢話其實媽咪次次煲湯都無味   咁我都覺   不過我都接受到   但今次好似飲緊水咁   真係好難頂   所以我都飲咗一半   其他真係要倒咗去呢   大佬   好似飲好油嘅豬骨水咁   好難頂 ~ 

搞掂哂就沖涼   里奧大人做咗陣公司嘢就沖涼   之後 10 點唔夠就瞓喇   我就 11 點幾先瞓 ~