洋蔥蕃茄豬扒 + 粟米蘑菇蛋花湯 ( 16-JUN-2015 )

( 16-JUN-2015  TUE )

依家已經超勁熱   到咗七八月都唔知點頂咯   應該會留喺屋企多啲㗎喇   哈哈 ~   

熱到無咩胃口   咁都好   順便減肥   無耐 8 卦又嚟食   佢多數問我喺邊   之後就會講食啲咩   我真心覺得佢好勁   天氣咁熱   佢可以一坐低即食通粉餐   仲要係一口氣食哂喎   我就咁睇都覺得好飽啦   哈哈 ~

菇場忙咗陣就 Hea 過   好攰呀   唔想忙囉 ~ 

今日有 Lunch Box   食完都唔出去行喇   咁熱唔想行到成身汗呢 ~

今日媽咪去醫院覆診   佢對腳咁腫   所以我同家姐想佢入院 Check 下   始終都係一個 Signal 話妳知有啲問題嘛   無理由腫到豬蹄咁囉   佢 4 點幾覆完診就打比我   第 1 句就話 "妳開心啦   我入院喇   糖尿上腳呀   醫生話要据腳呀"   咁我超慶喇   我壓住把聲講話我無開心   要据腳係妳自己問題   之後佢又講要据腳   我問佢幾時据 ?!   佢無答   咁又問我探唔探佢 ?!   我話妳上房話我知啦   係咁 ~

真係火都嚟   由上星期六佢話腳痛   咁即刻睇佢   之後見到對腳咁腫   我已經好擔心   尋晚已經同里奧大人講預咗媽咪今晚要入院   幫我放 Pack 口罩落我背囊   仲話唔會煮飯要去探媽咪   我今朝成個人都好緊張   成日急尿呀   手又凍   又寫錯嘢   明明 FCC 寫 FEE   明明 K6V 寫咗 61V   好在自己 Check 幾次   唔係比人鬧爆 ~

之後我打比家姐啦   話佢知媽咪入院   點知家姐同我講話媽咪話講笑入院   聽晚食飯要食乳豬   嗰下我慶到呢   係咪黐咗條線呀 ?!  用入院嚟開玩笑 ?!   如果我唔打比家姐   我以為真   咁通知埋婆婆   婆婆實會第一時間通知所有舅父阿姨   咁點收科呀?!   家姐話媽咪好似喊聲咁同佢講話要据腳添呀   家姐當時真係好驚  問媽咪對腳仲有無感覺   叫醫生唔好咁快据住   媽咪仲黐到叫家姐即刻去醫院   好在家姐話依家 4 點幾   等到佢 5 點半放工即去醫院啦 ~

之後媽咪同家姐講話 "妳哋兩個最開心啦   我入院要据腳"   家姐話唔係   我哋擔心妳對腳有事   想妳入醫院 Check 下對腳啫" ~

家姐講完   我激到喉嚨比嘢塞住咁   我要即收線   激到我走去 Pantry 喊住打比里奧大人   我話我好嬲   點解媽咪用 "妳最開心啦   我入院据腳"   之後再講話用入院嚟開玩笑   我聽晚一定唔會去食飯   因為啖氣真係吞唔落 ~

好啦   放工媽咪打嚟   我特登話我已經到咗醫院   但其實我係去緊街市   我話點解妳喺屋企 ?!   妳唔係話要入院咩 ?!   佢仲好輕佻話 "我話入院啫   但我都未打比妳講幾號床"   但上次佢入院咪一樣關手機   我打比工人先知佢幾號床   咁如果真係入院   我第一時間去醫院   問姑娘都知幾好床啦   唔通番屋企等妳通知我再去醫院呀 ?!   不過我都唔講咁多嘢   因為我已經發顛   我好大聲鬧佢呀   "話用入院嚟玩 ?!   妳係咪低能㗎 ?! "   佢仲笑住話聽日煲淮山湯比我   我話咩都唔飲呀   呢個星期晚晚唔得閒   佢把聲好驚咁問咁我去邊 ?!   我話有嘢做   係咁 ~

番到屋企家姐打嚟   問我嬲完未 ?!   我話未   聽晚我一定唔會去食飯   叫佢同媽咪食   真係要比啲教訓佢   我咁關心妳   妳咁樣講嘢   同埋用入院嚟開玩笑   呢下係最離譜   就算我聽晚去食飯   根本我會再鬧佢   之後大家黑臉   其實咁食飯都無意思 ~

里奧大人 6 點 45 分放工   咁我都預備晚餐 lu ~        

是日晚餐 - 洋蔥蕃茄豬扒 + 粟米蘑菇蛋花湯  

洋蔥蕃茄豬扒 - 之前買咗 5 個洋蔥   依家整埋   仲剩 3 個   之後唔買咁多啦 ~  

粟米蘑菇蛋花湯 - 里奧大人笑笑話我真係好鍾意飲粟米湯   但其實今晚我想買生菜   不過無   同埋今晚無 Mood   所以唔想浸菜心   所以粟米湯囉 ~

搞掂哂就抖喇   終於每月一到   唔怪得今日個肚脹到不得了啦 ~

咁唔徑步喇   沖埋涼就休息 ~

家姐 8 點幾又打嚟   又問我嬲完未 ?!   我話未咯都話   佢話媽咪同佢講   話阿妹嬲咗佢   叫家姐約我去嘉華   家姐話照幫佢約   不過阿妹唔去都無辦法   我話真係唔會去囉   同埋每月一到好攰唔想出街 ~

今晚 11 點瞓喇   激完氣個人好攰   哈哈 ~