Babymama: 熱晴 ♡ 胡志明市。越南 ( 頭頓 & 美拖椰子島) 5 天美食團 DAY 4 ( PART 1/3 ) ( 30-JUN-2015 )

( 30-JUN-2015 TUE )

行程 - 胡志明市 --> 頭頓特區 (約 2.5 小時) --> 頭頓耶穌山 --> 鯨魚古廟 --> 大頭蝦海鮮餐 --> 頭頓海鮮餐 --> 頭頓海鮮餐宵夜 (自費) --> The Imperial Hotel Vung Tau (頭頓住宿五星級)

雖然今朝要 6 點起身個人係超攰但呢日係我最期待嘅一日呢 ~

梳洗完就去食早餐啦今朝有啲飽飽滯滯嘅感覺添同埋最慘係隻左眼超級勁痛真係眼都開唔到又係咁標眼水標咗成 15 分鐘眼水呀勁驚會盲囉 ~

喺度食早餐真係好舒服因為夠靜呀

出去影下相先其實我都唔知自己影咗咩哈哈因為隻眼痛到開唔到靠一隻眼濛住嚟睇咋

我企喺中間影㗎影右邊

有眼睛嘅船之前講過話係傳說用嚟嚇鱷魚呢

再企定定影左邊最衰我眼痛啦唔係就行到最盡頭影呢唔駛分兩張哈哈真係痛到唔知做乜添

粥嘅配料都唔小喎

西式早餐區

酥酥

如果可以拎走件朱古力蛋糕就好喇有時都幾想食呢啲切蛋

有幾個焗爐喺度

呢邊空蕩蕩

今朝坐番呢度

想食皮蛋鹹蛋咁唯有食兩啖粥啦又係唔熱嘅呵呵

我用夾夾雞蛋嘛點知睇唔鬼到一夾就跌咗落枱係咁碌碌碌之後煎蛋員幫我拎番上碟咋勁樣衰所以左邊隻蛋殼係裂咗嘅

我又係拎咗比里奧大人食先㗎我同佢講我隻眼痛到睇唔到嘢但都掛住你驚你無嘢食呀自己講完都覺得感動到想喊呀

呢個杏仁酥好味呀同埋我鍾意食糖粉嘻嘻之後我同里奧大人講我今朝食少好多嘢佢笑笑口話其實都唔少哈哈但我無食最愛嘅腸同煙肉喎

酒店入口個個忙住清潔打掃

幾條噴水嘅魚

阿里奧大人應該影影下全景有車駛入嚟所以影到咁哈哈

酒店大堂我件衫嘅顏色係 Combine 咗開門姐姐同清潔姐姐嘅制服哈哈

雖然酒店感覺有點舊式但其實房間真係好乾淨同埋啲食物都好味道呢真係有驚喜㗎

呢個 Lobby 只係問嘢咋如果要 Check-in / out 要去 4 樓即係餐廳嗰層我同里奧大人講唔知係咪治安唔好所以唔敢喺地下做 Lobby 驚人搶行李呢 ?!

唔知上去有咩嘢睇

髮晶石

頭髮嚟㗎好嘔心

原來大樹菠蘿都唔比帶入酒店嘅

胡志明市暫別喇

一列好長嘅屋離遠睇以為係火車添

住客卡個樣好老土呀哈哈

7 點 45 分準時出發由胡志明市去頭頓係 125 公里要坐 2 個半鐘頭車 ~

頭頓係渡假區地方大但人少車少所以好多胡市明市嘅人一到假期就會入頭頓渡假呢我哋差唔多全車都瞓覺呀勁攰呀差唔多 9 點就去加油站嘅洗手間之後繼續行程又可以繼續瞓呵呵 ~

同肥寶曬下太陽先哈哈哈哈

其實坐喺街邊食嘢真係好有特色風味不過我唔要個垃圾袋喺面前哈哈左邊男人件衫濕哂

"親子電單車" 勁呀

旅游 ?! 寫錯字噃

各有各 Hea

隻狗係倒及牙好搞笑呀同埋天氣咁鬼熱駛乜着件衫仔喎

越南啲屋係比較窄身即係長方形多呢之後賓尼兔話佢屋企個廁所可以比人打筋斗所以佢覺得香港啲酒店係好細間呢

金融區

右邊係全越南最高嘅商業大廈不過只係 68 層但特別在於中間有直昇機停機坪呀

越南人唔鍾意去獅子銀行開戶口因為年年都要扣手續費但錢已經擺得唔多仲成日扣所以有時扣嘅仲多過儲嘅咁又係離譜啲嘅

入隧道喇越南依家仲未有地鐵不過好似依家興建緊我估 10 年之後越南應該係另一片新天地咯有地鐵真係方便好多啦

又藍又綠好舒服

無聊望番轉頭高樓大廈真係唔多喎同埋啲高樓係相隔好遠呢

見唔到電單車好唔慣哈哈

直頭無車添真係好少見到會咁頭頓係渡假區今日又係平日所以無乜人入去呢

起緊 Apartment 但其實越南人唔鍾意住 Apartment 因為要交管理費啦又會有個揸 Lift 人幫妳按層數如果我嚟探妳係要比錢 (住客除外) 不過啲錢係用嚟維修呢

9 點左右到中途加油站

有張咁古色古香嘅櫈比妳哋坐好乾淨㗎真係比人坐呢哈哈

去洗手間要收錢嘅 VND1,000 一個人我都唔知要比錢所以直行出去之後個人問我拎錢先知咋咁啲錢係用嚟維修同清潔所以廁所都乾淨呢

又再影下細細架旅遊車

車頭係咁嘅

好曬呀

講唔夠 10 分鐘開始想落雨咁唔好呀

我哋沿途會經過好多屋咁有好多屋前都放咗墳墓係土葬嗰啲墳墓喎佢哋啲墳墓係喺地面咁挖咗都有 2 米深個棺都好大喎 ~

之後賓尼兔話好多越南人百無禁忌就算另一半走咗佢會做埋自己個墓喺隔離永不分離咁話之後又話開心嘅時候同妳講幾句心情唔好又可以鬧下妳妳駁唔到咀哈哈 ~

9 點 50 分差唔多到頭頓

10 點終於到耶穌山喇但其實我仲係半夢半醒 ~

要上到耶穌像好似要行 817 級樓梯但其實啲樓梯係好扁即係一次行 3 級都得但問題係今朝太早起身同埋只得 1 個鐘頭比我哋參觀好趕囉 ~

唔好講笑唔夠瞓加上又超級勁曬加上去旅行之前又無徑步真係行慢咗好多呀嗰刻覺得拖慢咗里奧大人有啲唔開心囉但我真係快唔到因為我已經有啲想嘔嘅感覺 ~

呢個男仔好好人等我哋影哂相先行過去影呢

開始行上去喇其實我已經有啲唔舒服

扁扁嘅樓梯級真係好好行呢

停低影下相

經過呢度又要再上樓梯

呢個女仔着住件厚褸仲包到實哂係咪唔舒服呢 ?! 今日好曬好熱喎

繼續行喇

都有唔少人去耶穌山

再上

好多蜻蜓呀勁驚所以全程要合埋口哈哈

行咗 15 分鐘咋我越嚟越辛苦要扶住嚟行呢

行到 350 級個肚有啲唔舒服勁驚啦唔上唔落嘛落得嚟去廁所一陣又無時間去睇所以急切祈禱唔好再肚痛感恩無事 ~

行到 550 級樓梯其實由頭到尾只係行咗 20 分鐘行咗大半㗎喇但我就越嚟越想嘔但我唔想嘔囉因為我唔鍾意嘔嘅感覺 ~

行咗 350 級咋仲有 5 百幾級要行頂住呀

好似就到咁噃

我要停低抖陣所以里奧大人又影下相拖慢哂佢啲步伐

行到身水身汗頭都濕哂所以望到個海勁想跳落去呀雖然我唔識游水

差唔多到喇

咁樣影靚啲

我睇咗右上角好多次真係以為影到自己啲手指但其實係樹葉嚟

我覺得呢張好有氣勢

因為上耶穌像係唔比帶背囊咁我坐喺附近嘅長櫈等里奧大人啦我順便可以休息下之後小石都上到嚟又一齊坐下傾下偈啦團友太太同我哋講話好多人上去影相又影得急我估里奧大人都有排迫咯 ~

里奧大人番落嚟嘅時候話條樓梯好窄同埋好焗又驚我唔舒服上唔到但我話點辛苦都要上呀 ~

實在非常之感恩我上去嘅時候只係後面有對男女前面係暢通無阻不過我一路行一路喘真係要龜速咁行囉 ~

上到去真係超級勁大風正呀但超勁曬其實唔知自己影乜哈哈 ~

呢度係入口初初見到呢幾級樓梯真係驚㗎因為驚之後啲樓梯無扶手嘛其實講明話唔準影相因為太多人行會頂住條路所以里奧大人影完就算好在都睇到哈哈