燒汁焗雞扒 + 蠔油菜心 + 青紅蘿蔔豬骨湯 ( 25-JUN-2015 )

( 25-JUN-2015  THU )

差唔多天光嘅時候   隻左腳小腿無啦啦抽筋   痛鬼到呢   但又費事叫醒里奧大人幫我搓腳   幾咁辛苦先拉番直隻腳呀   哈哈 ~

個天又係天黑黑咁   應該又落雨㗎喇 ~

早餐食麵餐呀   因為知道 8 卦會嚟食   比條腸仔佢   個餐包就留番做 Lunch ~

菇場忙咗陣   之後 Hea 過喇 ~

今餐食埋盒 Special K + 乳酪   再食埋朝早個餐包   飽到上心口   感覺有啲滯添呀   所以沖杯花茶消消滯 ~ 

好多時同 8 卦 Skype   我講爛 Gag 佢都會話我低能   好似里奧大人咁成日話我低低能能   今日仲邪   8 卦同冰姑差唔多時間同我講   叫我入青山   哈哈   里奧大人仲衰   叫我番青山   唔想同我講嘢   呵呵   佢同 8 卦都好醒   因為我間唔中問佢哋   我靚唔靚 ?!   8 卦會答妳最靚   得未呀 ?!  里奧大人就衰啲   我問佢我把聲好唔好聽 ?!   佢答全世界最靚係我把聲   因為無得再問   我會收口   哈哈 ~    

無啦啦又忙   好在好快搞掂   今晚要去銀行簽名   所以要即走囉 ~

15 分鐘搞掂   即番屋企開機洗衫喇   今晚里奧大人 7 點半先放工   所以我飲完湯就沖涼   等埋佢先一齊食呢 ~

呢期 Lunch 食得飽   夜晚真係唔想食粉麵飯   咁仲好   無咁肥   哈哈 ~  

是日懶餐 - 燒汁焗雞扒 + 蠔油菜心 + 青紅蘿蔔豬骨湯

燒汁焗雞扒 - 今次又係焗得好好味   真係超勁鍾意用光波爐   唔駛煎嘢煎到周圍都係油   哈哈 ~  

蠔油菜心 - 見到有幾條菜虫   真係勁驚   好在睇到咋   唔係食埋落肚都似 ~      

青紅蘿蔔豬骨湯 - 媽咪煲㗎   最搞笑里奧大人問我點解我會煲湯 ?!   唔係呀嘛   個個星期媽咪都比湯我㗎啦   你唔係依家先知呀嘛 ~  

搞掂哂都 9 點幾   再執埋啲行李就休息喇 ~

里奧大人掛住整嘢   我又掛住打機   終於 12 點先瞓   慘 ~