脆肉炒椰菜苗 - 唔記得幾錢添 呢個好味 但可惜啲燒肉皮唔脆囉
雜錦拚盤 (蝦餅 / 魚餅 / 春卷 / 香葉包雞) - 食剩一半 咁一定要打包啦
芒果沙冰 ($26) - 我唔飲咁多凍嘢喇 我覺得食完碗酸辣米線勁勁勁口渴 我同里奧大人 Share 飲咗 1 支 1L 烏龍茶 之後我喺金坊飲咗 4 杯暖水 基本上我唔會飲餐廳啲水 因為我成日覺得飲水又係嗰隻杯 洗餐具又係嗰隻杯 好核突 但今次真係頂唔順 唔飲唔得囉
( 20-JUN-2015 SAT )
我今朝 9 點半自然醒喇 但里奧大人今朝 8 點幾醒咗 之後無啦啦話睇埋大時代結局 最勁係佢只係睇結局嗰集 ~
今日端午節假期 對我嚟講就真係有假放 但對於星期六 Off 嘅人嚟講就覺得蝕 哈哈 ~
食完早餐就諗住媽咪會約家姐飲茶 咁一齊飲啦 但估唔到媽咪話唔飲 咁好啦 我哋自己去行街 呵呵 ~
諗住去 GAP 買衫 所以坐 13X 去尖沙咀 行咗陣 Harbour City 再去 GAP 不過又係嗰啲款式 咁慳番唔駛買 lu ~
里奧大人成日想剷短啲頭髮 不過佢本身個髮型師就叫佢唔好剷 但去旅行好熱 里奧大人真係話想剷囉 咁我話不如去搵剪髮表妹 如果佢剪到咪去剪囉 剪唔到就當行街 反正我想去買衫 哈哈 ~
搭地鐵去荃灣 去到都已經 2 點 15 分 咁食埋嘢 里奧大人首選係酸辣米線 我都想食 大熱天時係要食啲酸辣嘢 ~
我又跟里奧大人咁影啦 不過無佢影得咁好睇 佢話唔好用 "跟" 字喎 哈哈 但我真係照跟佢嘛 所以有時睇啲相都好似熟口熟面 原來佢係有影過咁角度之類嘅嘢 哈哈
去到剪髮表妹度 原來佢啱啱食完飯 佢話要抖一陣先剪喎 咁好啦 都係抖 5 分鐘啫 哈哈 ~
差唔多 4 點就搞掂 我又去新之城買衫 不過唔啱心水 咁順便去旅行社拎嘢再去城市廣場喇 都未去到城市廣場就有啲頭暈 所以我話去麥記坐下 唯有叫里奧大人買杯新地食啦 ~
休息咗 15 分鐘 原來都 5 點喇 我話想去金坊食泰菜 咁行埋城市廣場就去金坊 驚今晚多人慶祝父親節 所以早啲去 ~
好喇 5 點 52 分去到 點解會記得咁清楚 因為我地等到 6 點 35 分先有得食 佢哋漏咗單呀 真係由唔餓變餓 哈哈 ~
今晚要收加一服務費 因為父親節喎 如果唔加一仲平 ~
好喇 食完都 8 點 坐小巴番屋企喇 ~
架車開咗無耐 轉個彎去到唔知邊個停車場出入口位置 我見到有架私家車喺我隔離 "High" 過 勁鬼驚啦 我唔明點解私家車可以咁駛出嚟 我坐小巴中間位置都比佢 "High" 到 佢係咪無諗過停車㗎 ~
好在搞咗 6 分鐘就走得 最頂癮係坐我哋隔離單邊位嘅女仔 因為我聽到佢打電話比佢男友 (我估) 佢同電話中人講話 "我坐架車比人撞到呀" 之後佢無出聲 隔咗幾秒就話 "點解妳唔問我有無事 ?!" 真係頂佢唔順 架車直頭喺我隔離 "High" 過 我都未敢講啦 之後佢叫人買嘢食 咁我同里奧大人傾偈家嘛 坐到咁上下 又聽到個女仔講電話 話 "咁辛苦你咁 你唔好買喇" 里奧大人話我做咩聽人講嘢喎 我話佢發脾氣講得大聲咋 我隔住你都聽到佢講咩 點解你會聽唔到㗎 ?!
勁焗熱呀 番到屋企即沖涼 里奧大人差唔多 9 點就出去徑步 ~
媽咪買咗黃皮同荔枝比我 今次啱喇 真係要食黃皮消滯呀
里奧大人 9 點半番到嚟 再開機洗衫 追埋 "選戰" 睇到差唔多 1 點 要瞓喇 聽朝 8 點半要起身呢 ~
沒有留言:
發佈留言