燒汁焗雞翼 + 魚片炒油麵 + 菜心 ( 2-JUN-2015 ) (禁)

( 2-JUN-2015  TUE )

里奧大人今朝要同客上大陸開會   又要好早起身   其實佢次次起身之後   我都要諗一諗我係咪都要起身番工㗎   所以如果鬧鐘響完之後即刻可以瞓番   係一件好感恩嘅事呢   哈哈 ~

早餐勁想食奶油脆豬   可惜依家細咗啲啦   唔係就更好   哈哈 ~

菇場忙下停下   時間過得都好快呢 ~

食完 Lunch Box 就出去行下   太耐無行   驚唔想行呀   同埋難得有陽光   咁就行下啦 ~

無啦啦又忙   都好嘅   眨下眼可以放工   哈 ~

番到屋企即預備   抖陣就煮嘢   不過食唔落   咁里奧大人 7 點已經到咗上水   咁我炒埋麵就出去徑步喇   等埋佢先一齊食 ~   

是日懶餐 - 燒汁焗雞翼 + 魚片炒油麵 + 菜心  

燒汁焗雞翼 - 我用日式牛肉汁醃嘅   家姐問好唔好味   話以為牛肉汁只係醃牛肉   我話無乜所謂啦   最緊要唔駛自己調汁   同埋現成醬汁多數好味嘅   我最後又加埋蜜糖焗呢   咁應該好味啦   哈哈   可惜里奧大人喉嚨唔舒服   食咗 1 隻咋   等佢好番再焗   因為佢好鍾意食呢個雞翼㗎 ~            
魚片炒油麵 - 其實我想加椰菜   不過加一個又好多咁   同埋啲人話椰菜好濕熱   我又唔係幾敢食囉   其實加埋椰菜係好好味   爽爽地好有口感   哈哈 ~   

菜心 - 差啲唔記得食埋呢 1 斤添   如果唔係留番星期四食又黃咁咁㗎喇   難得佢好甜嘛   想快啲食哂佢 ~ 

7 點半出去徑步   徑咗 4 個圈就番屋企喇   超級勁焗熱呀   同埋開始餓喇   哈哈 ~

番到屋企即開機洗衫再沖涼   之後里奧大人就番到屋企喇   可以一齊食飯呢 ~

無啦啦有人按鐘   原來係 2 姑奶   上嚟傾咗陣偈就走喇 ~

搞掂哂都 9 點幾   里奧大人仲要做公司嘢   好感恩 10 點幾做哂   可以睇陣電視   呢期佢好鍾意睇 "South Park"   學埋啲衰嘢   哈哈 ~

11 點幾真係要瞓喇   因為勁攰呢 ~