熱晴 ♡ 胡志明市。越南 (頭頓 & 美拖椰子島) 5 天美食團 DAY 1 (PART 1/3) ( 27-JUN-2015 )

( 27-JUN-2015  SAT )

今朝 4 點半起身喇   教咗 4 個鬧鐘   不過響咗 1 個已經醒啦   實在太興奮   所以其實瞓得唔係咁林   哈哈 ~

沖埋涼   Double Check 哂所有証件   關哂水喉煤氣制   其實都只係 5 點 10 分   我哋 Call 咗的士 5 點半   諗住 Hea 下   點知司機叔叔打嚟話已經喺停車場   咁我哋 5 分鐘之後都落去坐車 lu ~

出發喇

去到唔知邊度   無啦啦有警車指示所有車要慢駛   第一次遇到咁情況咋   好在預早出門口   慢駛咗 10 分鐘左右就暢順番哂啦   之後差唔多到機場   無啦啦有架私家車停低搵路   黐佢孖根   得一條路去之嘛   我同司機都忍唔住啤佢呀   害人害物   落車之後我同里奧大人講   好在司機叔叔唔係跟車太貼咋   唔駛炒埋都似   但里奧大人話唔駛驚   因為我咃坐嗰架的士係超級安全 (慢到呢)   同埋架架車都快過我哋   咁其實又係真係好慢嘅   不過我其實果時都未瞓醒   只係奇怪點解我隔離啲車好似架架都快過我哋咁解啫   哈哈 ~

塞車呀   都咪話唔驚囉   飛機唔等人嘛

去到已經 6 點   好在集合時間係 6 點 10 分   無遲到呢 ~

今次都係帶 1 中 1 細喼   雖然越南未必有嘢買   但我都覺得帶 2 個喼穩陣啲囉

6 點到機場喇

咁即去同領隊報到啦   原來我哋係第一個 Party   之後有個 Party 見到里奧大人   同佢講得佢一個男人  因為佢哋去茶會時係得全女班   哈哈   唔係咁搞嘢呀嘛   不過阿奧唔駛驚   因為妳老婆都係麻甩型   有我陪你   哈哈 ~

今次去越南 5 天團   搭 CX 機    起程係 6 月 27 日嘅 8:40am -> 11: 20am ( 當地時間)   回程係 7月 1 日嘅 19:00pm --> 22:45pm (香港時間)

我次次都係睇完個團嘅目的地   之後就睇個領隊名   唔會睇下係咩團   因為我根本唔會記住   哈哈

之後去埋 Counter 放行李就去食早餐喇   諗住去美心飲杯奶茶   估唔到摺埋咗   咁我哋去離境區內食囉 ~

最搞笑 6 點半有個人打嚟   但係打錯嘅   咁之後電話又響   里奧大人話又係嗰條友   不過我當然會拎電話出嚟睇下啦   點知原來係媽咪打嚟   哈哈   因為我無諗過媽咪咁早打嚟呢   我同佢講   我上機前會打比佢嘛 ~

因為國泰 Counter 未開   我哋就坐低等下囉   所以又影下肥寶先   真係覺得佢樣衰得嚟又幾得意   哈哈   但里奧大人同家姐就話佢好肉酸   係嘅   我鍾意啲嘢比較另類   呵呵

@ 6:30am

乜都影一餐   影咗 10 分鐘先離境

希望之後你多啲出場啦下

里奧大人 6 點半喺大家樂排隊買早餐   但買完都已經 7 點 lu ~

好多人排隊

無諗過有薯蓉   所以食到非常之飽呢   呵呵

里奧大人嘅小愛人出場喇   改佢名叫 "紅 Mo 仔"

我特登買本薄嚟寫遊記   跟團真係識到好多嘢   但自己老人痴呆   所以真係要寫得去囉   仲特登買定 2 支筆   好穩陣呢

無嘢好行   所以 7 點 45 分都坐喺閘口等 lu

今日非常好天   希望越南都係啦

香港去越南大約 2 個半鐘   去河內只需 45 分鐘咋

坐定定 lu

起飛喇

好乾淨嘅玻璃窗

我同里奧大人講話啲船泊得好整齊   之後佢話應該係橋墩喎

好在我都有 Zoom 嚟影咋   原來堅係橋墩   哈哈

好平靜嘅感覺

無嘢做就睇電視啦   我揀 "發現大絲路"   因為主持人又靚仔   今集仲介紹新彊添

9 點半派餐   原來已經換哂紙盒包裝

里奧大人食伊麵   我就食芝蛋包

坐飛機係勁口渴   所以紙包飲品先係最吸引呢

熱辣辣唔錯喎   我覺得自己好勁   可以咁短時間內食到兩餐   衰里奧大人又話 Share 食   點知最後話只食伊麵   我一個人食哂成個芝蛋包好滯家嘛

如果唔反光就好啦

10 點半已經見到山喇   應該到咗越南呢

雲海呀

衝入雲海   當下係 Feel 到有啲阻力㗎   震震哋咁   平時我無留意呢   哈哈

開始好興奮喇

差唔多降落

平安到越南喇

出面 33 度   我仲諗住起碼 40 度添   因為個個都話越南好熱好熱

里奧大人一馬當先

去到越南係 10:27 am (當地時間)   等咗 20 分鐘先拎到行李   再 Check-in   咁搞掂哂都 12 點 10 分   旅程正式開始喇   勁開心呢 ~

行程 - 香港 --> 胡志明市 --> 平貴風景區 (越式風味餐 - 越式酸湯 / 蔗蝦 / 特色炸糯米飯) --> 古芝地道 --> 中日泰越式 BBQ 海鮮自助餐 --> Windsor Plaza Hotel (胡志明市住宿五星級)

越南慢香港 1 個鐘   所以一定要 Set 番好時間   唔係就大穫   哈哈 ~

機場都好多人喎

@ 10:47am (當地時間)

個個都金精火眼睇住自己件行李   哈哈

Check-in 喇

一出機場見到有個男人舉康泰牌   原來係當地導遊   咁跟住佢行去坐車 lu ~

離遠已經見到康泰牌喇

好好天呀   開心開心

今次香港領隊係小石小姐   當地導遊係賓尼兔先生   全團只有 14人 (有 5 個 Party - 我 & 里奧大人 + 1 對夫婦 + 1 對女性朋友 + 4 個 Auntie + 2 對母女) ~

小石同賓尼兔介紹完自己之後   咁賓尼兔就開始講解越南生活文化   話當地電單車黨猖獗   第一樣係叫我哋唔好拎手袋出街   因為電單車黨以為係成袋美金   第二樣係唔好拎相機同手機影相   如果企喺馬路邊影嘅話   妳好開心咁影呀影   就會一嘢比電單車黨扯走   追都追唔到呢   同埋要小心過馬路   最緊要行得快喎 ~

講到咁   我同里奧大人講   好感恩我哋今次唔係自由行   唔係呢兩樣嘢我哋會做足呢   哈哈 ~

出發去胡志明市喇

救護車 ?!

點比錢呢 ?!   4-8 CHO 係 4-8 人 ?!

Call 車 Number 好好記喎  38 38 38 38

啲電單車好似亂嚟咁

無英文地方名   咁其實去越南都唔係咁方便噃

賓尼兔問我哋覺唔覺機場好多人接機   佢話其實佢哋係接一個人機嘅啫   但佢哋習慣係十幾廿個人一齊接你機囉   都幾搞笑 ~

跟得團   咁導遊一定要介紹一下越南啦   我都好有心機聽寫㗎  (我真係覺得自已好勁啦   呢幾日全程係又聽又寫又影相喎   唔怪得我晚晚咁好瞓啦   哈哈 ) ~

今次特登買本記事薄做旅遊筆記   因為我好鍾意聽當地啲人點生活   文化係點   但次次聽完都唔鬼記得   對上果次去台中同張家界   我好後悔無寫低呀   所以今次點都要寫   因為真係記得番好多嘢呢   咁樣跟團先有意思嘛 ~

我真係寫低賓尼兔講嘅嘢㗎   里奧大人都話我勁   駛乜講   哈哈

賓尼兔話越南靠種植為主   越南出口米係排第二位   所以越南一定要有雨落   不過越南落雨都係落一陣就停   落完雨之後就無咁熱   咁都好啦   起碼唔熱嘛 ~

至於咖啡排名就係巴西   越南同埃塞俄比亞喇 ~

呢張相係上網搵嘅   因為賓尼兔話越南係漁米之香嘛   有山水河海   而呢個 Logo 嘅上面代表漁米之香   下面就代表運輸   真係唔講唔知   哈哈

仲有佢哋食唔哂啲米就會比非洲   非洲國家又會送番啲動物比你   最搞笑係話送動物   餵佢哋食嘢要錢家嘛   講緊嘅仲要係獅子老虎呢啲   食量好大家嘛   所以係唔化算呢   哈哈 ~

越南地型係 S 型海岸線   有 3,200 公里   講到地型呢家嘢   我真係唔識喇 ~

整個越南人口 ( 九千一百萬 )   女多男小   7:3 比例呀   同埋重男輕女   但為咗提供女性地位   所以越南就出咗第一位女總理呢 ~

胡志明市有 ( 19 郡 ) = 香港嘅 19 區   64 個省份   南越首都係西貢   北越首都係河內   咁南越之後統一咗   為紀念胡志明呢位黨主席   所以改為胡志明市   讀音係 "開之 Min"   越南仍都係共產黨國家呢   原來胡志明本身姓阮  (1890-1969)   真係唔講唔知呢 ~

越南文係 "F" "W" "Z" 加拉丁拚音咁讀嘅   佢哋嘅 "ABCD" 係讀 "鴉啤些呢"   因為我係寫低家嘛   佢讀 "鴉"音    我諗咗好耐先諗到點寫呀   執筆忘字真係慘   哈哈 ~

打仗都經歷過   真係分分鐘連命都無嘛   所以佢地仲有咩嘢驚   佢哋生活態度係 "天跌落嚟當被冚   水浸眼眉當酒飲"   同埋唔太注重物質生活   覺得 3 餐溫飽已經好足夠呢 ~

1945 年經歷咗 9 年抗法戰爭  1955 年抗美到1975年   前前後後打仗 30 年   唔落後先奇啊   咁打仗 30 年   和平 40 年   即係無咗 70 年   搞番好都有排搞   又落後喎   咁一定無乜人去啦   係近呢 10 年先開放咋 ~

去越南要簽証家嘛   老實講   我覺得貴   仲要得 1 個月有效期   之後賓尼兔話越南人嚟香港   簽証要 HK$1,000 (5 日)   仲要放 HK$2,000 (VND1,040,000) 喺銀行 2 個月   之後先批   所以我哋算平喎   但越南打贏咗美國   東盟國家就唔駛簽証呢 ~

好似想落雨咁喎

PHO 呀   希望食到啦

越南人唔興 Shopping   因為無錢嘛   佢哋習慣係買就買   唔買嘅話直頭唔會睇   唔似香港人唔買都摸下   好似講緊我咁   哈哈哈哈   又叫我哋買貴嘢好啲   始終一分錢一分貨咁話喎 ~

佢哋有午睡習慣   番工時間係彈性嘅   總之朝早做 4 個鐘   下午做 4 個鐘   中午就瞓 2 個鐘    同埋好多都係朝早 7 點已經開舖做生意㗎喇   所以越南無乜夜生活   因為早開早收 ~

見到 WASECO   我諗起 WASABI   哈哈

露天 CAFE

依家仲未算係最多電單車呢

好多人都着長袖   勁呀   我知着長袖係無咁易曬傷皮膚   但我真係頂唔順囉

好喇   最重要嘅一環就係兌換錢喇   賓尼兔話公司兌換率統一用 VND260,000   因為之前有啲團友兌換嘅時候係HK$100 : VND250,000   之後第日就回落到 HK$100 : VND240,000   覺得蝕咗咁   所以就統一用 VND260,000 呢個兌換率喇 ~

佢哋分好咗 HK$500 一份 (唔同銀碼嘅越南盾)   佢建議我哋兌換 HK$500 先   即係 VND1,300,000   百幾萬噃   希望好好駛啦   其實我最驚咁多個零   好似去韓國咁   真係要用計數機篤篤篤㗎 ~

無高樓   真係好開揚好舒服呢

我想買越南人戴嘅帽

賓尼兔叫我哋唔好亂食街邊嘢   一陣水土不服就慘喇

沙塵滾滾

呢度就乾淨啲

四眼嘅女人   由我拎起相機佢已經對住我笑   叫埋隔離朋友一齊望我添呀   之後同我 Bye Bye 添

呢對母子就怕怕羞羞   好搞笑

但其實有啲人會好好奇望住我影相呢   好似呢個細路仔咁   哈哈

啲蟹咁樣擺法   好易食到肚屙喎真係

喺生豬肉面前食飯   我真係唔得呢

油站唔少得

嚟料

感覺真係好落後咁   但我鍾意   哈哈

12 點到 平貴風景區 食飯   落車前無啦啦落勁大雨呀   好感恩落咗10 分鐘左右就停雨呢 ~

終於見到越南傳統打扮嘅女仔

我哋坐 Golf 車入去   仍都可以行入去   只係 7-10 分鐘左右呢   咁我當然坐啦   唔想行到成身汗呀

大蓮蓬

呢日有好多人嚟影婚紗相

好多裝備   個籃好似有幾棵菜咁   哈哈

廚房 ?!

啲侍應跑來跑去傳菜

呢個地方好有田園 Feel 噃   即係無冷氣   哈哈

我哋就係坐呢啲草屋入面開餐呢

勁呀呢   快快手手影相先   因為我仲未慣用部新機呀   哈哈

頭先落咗場雨   真係無咁熱喎

就係坐呢架 Golf 車出入喇

我哋得兩圍枱   我同里奧大人 + 1 對夫婦 + 1 對女性朋友坐一圍   我口7 6 個人一圍枱實在太正啦   可以傾偈   好感恩大家都好啱傾   又鍾意去旅行   最開心係一齊飲啤酒呢   哈哈 ~

今次又同里奧大人講   叫佢同團友講 "我要影相做記錄   唔好意思"   咁當然我都會講啦   好感恩團友都鍾意影相   咁我就唔駛就住就住嘛   同埋我仲未慣用部新機   有時都影得唔好   所以叫埋里奧大人一齊影呀 ~

我仍然喺度影緊碗魚露   哈哈   影咗成分鐘

6 個人一圍枱   爽呀

呢碟魚露都放咗好耐下   有好多蚊滋   叫佢哋換過另一碗呢

濕紙巾好厚㗎   唔似香港嗰啲薄切切

好大個煎埋   比妳影完相就拎去另一枱   佢咃都了解相機食先呢個文化呢

里奧大人好似影得大個啲咁   哈哈

之後剪開一片片   脆脆地又煙棧   不過好油   唔敢食咁多呢

其實見到咁賣相都驚㗎   好似無乜味咁   之後團友話啲魚有陣泥味   咁我試啦   因為我唔知咩叫泥味   哈哈   依家知啦

椰青 - 自費   好似 VND30,000/個

蔗蝦都幾好味

春卷都好味   因為我最愛香口嘢

呢個都幾好味

炒豬肉都好味   哈哈   乜鬼都話好味

炒菜

呢個酸湯   我覺得係泰式辣雞醬加水嘅味道   係甜嘅   唔知點咁

切到細細粒又唔錯喎

   
呢日未完㗎 ^^