行程 - 美拖市 --> 天道教教壇 (椰子島) --> 湄公河三角洲 (乘遊覽船) --> 熱帶果園 (包水果任食) --> 包泛舟暢遊熱帶樹林沼澤 --> 美拖 (油泡象魚) --> 統一宮 ( 前總統府) --> 聖母大教堂--> 郵政大樓 --> Diamond Plaza --> 越式地道美食 (燒蜆 / 串燒豬肉檬粉 / 春卷) --> Windsor Plaza Hotel
雖然今朝 7 點 Morning Call 但我哋係校咗 6 點半起身 咁就唔駛咁趕 ~
7 點落到餐廳 食完就番上房沖涼 抖陣又要出發喇 ~
短褲踢拖真係超勁爽 但今日要上船落船 所以都係着密頭鞋好啲
餐廳入口
健康區
見到都凍區 哈哈
生果區 係咁快比人食哂定無 Re-fill 呢 ?!
都係食啲熱嘢舒服啲 哈哈
一碗粉有 9 款醬汁同配菜
我最最最鍾意食嘅煙肉同腸 佢哋好細心喎 用麵包索哂啲油
我初初以為係牛扒麵包 哈哈 其實係蛋糕呢
里奧大人第二至愛 朱古力蛋糕仔
拋鑊 但佢個樣好驚咁 哈哈
煎蛋員叫我指住要啲咩 我指完之後就行去張紙嘅後面 估佢應該有個樣印住
我哋坐 Sofa 位
我最唔鍾意食雞絲 所以比哂里奧大人食 哈哈 個沙爹醬好惹味呀 又香又辣 真係成碗粉嘅靈魂嚟囉 所以決定呢幾朝我會繼續食佢呢 諗起都開心 哈哈
之後我要其他配料嘅米粉 我幾好呀 比里奧大人試啖 佢覺得好食 我即比佢食啦
個橙色辣椒醬好味呀 香香辣辣咁 希望之後可以買到啦
呢條腸都幾好味
啲粥都唔熱嘅 不過算啦 我都係 1 啖粥送皮蛋 1 啖粥送油炸鬼 唔會 "北" 太多呢
佢仲一定食生果 我反而少食呢
其實 4 樓呢個 Lobby 先係 Check-in 咁地下個 Lobby 係做啲咩呢 ?!
好闊落
里奧大人影餐廳出面 搞到佢要避鏡頭 哈哈
最鍾意影 Lift 制 咁 12 15 16 22 同 23 樓嘅房間係可以食煙嘅 好奇怪喎 無 13 同 14 樓喎 但就有 4 同 24 樓 點解會咁呢 ?!
天空一片藍 好舒服呀
就係眼前橙色頂呢座 Building 夜晚睇好詭秘咁
右面都係好多屋 但唔會係高樓 望落去真係好舒服
Zoom 近啲睇 唔知係咪好多人已經開咗檔呢 ?!
話明 8 點半出發 點知有 2 個 Auntie 未到 最離譜係佢哋嘅 2 個 Auntie 朋友好似當唔識咁 唔上房搵又唔去餐廳搵 大佬 妳哋 4 個自己約時間家嘛 搞到小石同賓尼兔周圍搵 打上房又唔通 餐廳又唔見人 最終過咗 15 分鐘就見到 2 個 Auntie 啦 最緊要係佢哋無事 遲少少無所謂呢 佢一上車話唔好意思 佢哋係睇錯時間 同埋佢哋以為喺餐廳到等 所以唔敢周圍走囉 ~
8 點 45 分出發去美拖 10 點 15 分到喇 先坐船欣賞湄公河三角洲 差唔多 10 點半就到天道教教壇 (椰子島) 喇 ~
酒店對面有 Circle K 勁有親切感 同埋買酒勁方便 哈哈
仍都有間安東旅店喺 OK 隔離
好多人預備開檔 lu
上面塊板原來遮埋頭頂嘅 又幾好喎
坐喺車度 Zoom 嚟影佢
經過提岸 有 2 米高 以前係用嚟運輸嘅 而左右兩邊就會係貨倉
U-turn 標誌好得意 因為我見慣係咁嘅 ∩ 呢
呢座咩嚟嘅呢 ?!
終於比我見到 "不銹鋼儲水箱" 喇 賓尼兔話好多人會將儲水箱放天台 唔駛放喺屋企入面咁核突喎
我成日覺得呢啲咁舊式嘅招牌同電線 好有電影感呢
賓尼兔話南越係用通心磚 因為可以散熱 但北越就會用實心磚喇
公路實會有大大個招牌
車頂都載滿哂嘢 勁呀
坐車一路望住藍藍嘅天空 真係唔捨得瞓㗎 哈哈
入 Freeway 喇
Freeway 係日本興建嘅 路票就當利息 會比番日本呢 因為越南打咗好多年仗 啲人仲未有咁好嘅知識同技術興建 Freeway 始終起一條 Freeway 真係唔簡單嘛 同埋好似佢哋都起過 不過唔掂 最後都要比番日本起呢
賓尼兔又講講講喇 我哋個個都有聽佢講嘢㗎 佢口頭禪係 "把鬼" 好香港人 Feel 呀 哈哈
里奧大人會用女朋友連環快拍
曬到黃咁咁
坐船去椰子島嘅碼頭
咁睇佢無咩嘢
但原來佢坐到咁危險 跌落水就慘啦
呢度隔離就係男女廁所
基本上跟團去旅行 好多時一落車就會去洗手間先嘅 咁呢個地方男女廁喺黐住 男左女右 不過男廁無關大門囉 其實所謂大門 只係兩塊鐵片喺中間 即係遮到就算 但係佢哋無關門囉 我哋見到哂啲尿兜 即係會見到佢哋嘅背影同動作啦 好核突囉 所以我哋個個女人都望右邊 我當時已經喺度諗緊里奧大人去唔去廁所呢 ?! 之後見到佢喇 佢第一時間就係關好對門 原來對門係關到嘅 我仲以為壞咗唔關得添
行喇
上船喇
都好多架船喎
開船 lu
又介紹一下
咁講開信仰 越南係自由信仰嘅 有天主教呀 回教呀 但就唔比傳教呢 但就唔可以十個八個人企埋一堆 咁樣會當你係示威呢 ~
左邊隻細船拖住白色呢隻大船 里奧大人話要咁樣先影到呢 我初初 Load 相嘅時候 真係唔知里奧大人想影咩呢 哈哈
唔係好細隻啫
但真係無諗過係細拖大囉
船伕
我都知里奧大人實會影佢對腳 咁我同佢一齊睇相嘅時候 佢好驚訝咁同我講話 "船伕無着鞋㗎" 我話我一坐低就見睇到啦 佢無着褲就話驚啫 無着鞋駛唔駛咁驚呀 哈哈
乜船都有呢
睇呢張相都覺得自己奇怪 左手其實唔係捉住個防撞呔 但唔知點解啲手指會咁 船伕好好呀 捉到我實一實 我就捉住部相機 因為 Fing 落個肚度會好痛呢 其實最怪係里奧大人 應該扶我嘛 掛住影相 哈哈
曬
我行入去先 lu 因為里奧大人要扶其他團友上船呢 Man 爆 呵呵
出 / 入口處
椰子島教主
讀書讀到傻咗 之後仲只係靠食椰子為生 話食椰子會變成武士 所以佢都打扮成一個武士咁呢
賓尼兔話佢瘦到得 31 Kgs 條腰都攣埋 叫我哋睇佢坐喺度嗰張相 同埋教主話貓同老鼠係可以一齊生存嘅 如果賓尼兔唔講 我都唔知貓仔隔離嗰幾隻係老鼠添呀
左上二係正常嘅樣 右上三係已經傻咗呢 讀書讀到傻咗 真係好可惜
教主有好多追隨者
佢用爛杯爛碟整成一個 "九鼎"
賓尼兔話教主上過太空 我初初以為真係咁堅料㗎 嗰個年代上太空喎 點知原來係呢個太空
仲整埋南越同北越添
再行入去睇 勁勁勁勁熱呀
本身呢座嘢係可以比人入去睇 但太耐無維修 驚佢唔穩陣 所以封咗唔比人上去 lu
唔知上去有咩好睇呢 ?!
蓮花代表越南
介紹完就自由活動啦 摘椰子就無份 咁就周圍影相啦 得我同里奧大人周圍影咋 其他團友去飲柑蔗汁呢 ~
呢棵好似係海底椰 越南人就叫佢做水椰子
終於可以影佢喇
九鼎
烏龜代表長壽
咁就見到成隻烏龜喇
呢個唔知代表咩呢 ?!
生平
龍樣好搞笑
得 1 條龍公咋 因為得呢條龍尾係唔同呢
呢 8 條係龍婆 ?!
上到去無咩好望 就算望住海都唔覺得舒服 因為好好好好熱呀 熱到頭殼頂可以煎蛋呢
有間 Hotel
戴遮臉罩 咁就唔驚出斑啦 不過番到嚟香港 里奧大人明顯黑咗 我都覺自己黑咗 特別係對前手腎呀
好乾淨嘅水 哈哈
鬥雞 ?!
又有一班雞仔雞女 最搞笑係里奧大人叫我唔好行咁埋睇 大佬 有咩好睇喎
咁鬼熱 真係連手信都無心機睇呀
11 點又坐船喇 不過只係坐 15 分鐘啫 去到熱帶果園就買下手信 食下生果咁囉 ~
走人 lu
見到太空嗎 ?!
超級熱呀
船頭有對眼 傳說用嚟嚇鱷魚喎
唔好停 繼續講 唔係我本簿就無嘢寫啦 哈哈
好多泥 唔知用嚟整咩
呢度有人住 我真係睇見都有啲暈呢
到熱帶果園喇 不過首先要經過手信區先 啱哂我 呵呵
靚呀
呢啲就無興趣
好似話樣樣都係用椰子殼做
椰子殼型嘅袋好得意呀
唔夠時間睇啦 唔係真係會買呢啲呢 夠實用嘛
想買個大椰殼比里奧大人 叫佢夜晚瞓當帽咁戴 夠哂大個 咁就唔駛眼罩同耳塞啦 呵呵
我唔係咁鍾意呢啲型嘅散紙包
椰子皮帶 哈哈
試食即場做嘅椰子糖 好煙韌 同埋好香椰子味 但如果要買嚟做手信呢 就只能夠買一 Pack Pack 嗰啲 咁又試下啦 但完全兩個口感 所以無買
包裝過程一目了然
里奧大人專吼住我食嘢個樣 就算得條罅都會影 不過次次都比佢影到我偷食嘅樣 無辦法 因為一有得食 我唔會理佢喺邊㗎 嘻嘻 我頭髮亂咗又唔話我知 真係呢
之後佢幫我影張好啲嘅 我覺得咁嘅手勢好有賣酒 Feel 哈哈
里奧大人知我勁愛格仔袋 所以問我買唔買 不過我唔鍾意啲質地 所以唔買 lu
去果園食生果喇
原來只係坐喺呢度食
得 5 樣咁大把 哈哈
紅毛丹都甜 我食咗 2 粒 因為里奧大人唔食 話剥殼煩喎
最甜係火龍果 果然產地係正啲呀下
無啦啦嚟收小費 咁里奧大人比咗 VND20,000 佢呢 因為好多時聽賓尼兔話 VND20,000 小費已經好夠喇喎
呢日未完㗎 ^^
沒有留言:
發佈留言