嘉華大酒樓 @ 官塘 ( 10-NOV-2015 )

蘿蔔牛腩煲 - 好大陣八角味   最驚

蒸紅鮋

豉椒味菜炒鵝腸 - 都無味菜嘅

燒肉切雞拚盤

花生眉豆雞腳湯 - 我好鍾意飲㗎   但自己好少會煲雞腳湯呢  

( 10-NOV-2015  TUE )

今朝落毛毛雨   真係無諗過 11 月仲會落雨囉 ~

仍然無咩胃口   所以食奶醬多算喇   諗住番工   點知阿爽嚟咗食早餐   咁一齊傾下偈   等埋佢食完先番工呢 ~

菇場忙下停下   終於可以整理好啲嘢   尋日太忙   根本做咩都最緊要快   所好多手尾今日要做番   搞掂哂就最好   唔駛成日掛住掛住 ~

今日有 Lunch Box   食完都落去行 20 分鐘先  好耐無行   係時候要郁番下喇 ~

放工去媽咪屋企   今晚大食表妹嚟探媽咪   佢話佢阿媽話係時候要探姨媽   所以星期日即打比我約幾時食飯   因為佢要通知學生   咁啱今日里奧大人上大陸   所以就約今晚食飯呢 ~

一入屋   媽咪就比出門利是比我   仲話又要佢擔心   我話去玩駛咩擔心喎   不過如果家姐去旅行   我又係好擔心佢㗎喎   擔心呢家嘢   唔通會代代相傳   哈哈 ~

大食 7 點唔夠就嚟到   咁一齊去嘉華食飯喇 ~  

家姐今日 5 點先開會囉   開到 7 點半   今晚同唔到我哋食呀   好唔慣呢 ~    

食到 8 點幾就番媽咪屋企坐陣   差唔多 9 點先走   我約咗里奧大人去 Taste 買啤酒   但大食係都要黐住我   係都要陪我去 Taste   成個細路仔咁   佢仲話同我傾偈多過同佢阿妹傾偈   鬼咩   條友仔哦一聲都成 15 秒   無咩邊個會頂到囉   好多人 5 秒唔夠已經鬧爆佢㗎喇   但今晚佢好咗好多喎   講咗唔同嘅嘢   唔似以前咁講嚟講去都係嗰呢   哈哈 ~

同里奧大人一齊買完啤酒   就送埋大食到交通銀行就走喇   里奧大人話佢咁有心探媽咪   送佢行遠啲喎   哈哈   因為我初初諗住送佢到商場門口就叫佢自己走呀   真係衰呢 ~

里奧大人今朝上大陸   之後再去見客   坐兩個半鐘頭車先到落馬洲   真係兜大運   所以佢都 7 點幾先番到屋企   又食麥記餐   但又食唔哂啲薯條   又飲唔哂杯汽水   話留比我喎   但其實咁不如就咁食個包算啦   搵我嚟搞 ~

番到屋企即沖涼   之後大舅父打嚟話想約媽咪食飯   順便比啲薑醋我哋   咁我話下星期唔得囉   叫佢約家姐   佢問媽咪身體點樣 ?!   我話好好多喇   佢居然同我講話 "咁之前又講到好危殆咁   又話要洗腎嘅 ?!"   我當堂 O 咀   遲咗陣先比到反應    因為正常都會答話 "咁就好喇"   唔會好似懷疑妳之前所講嘅嘢咁囉   而事實之前媽咪身體狀況真係唔好   我絕無誇張   同埋我唔知婆婆點同你講媽咪情況   可能婆婆自己加咗好多嘢   講到超級頂級嚴重囉  ~

同番里奧大人講   佢話覺得有啲反感   之後我激鬼氣打埋比家姐呀   家姐話舅父講嘢不嬲都係黐黐哋咁   唔駛理佢   之後我講番舅父問家姐去唔去食飯   話多個人好啲   我哋咪話囉   咩叫多個人好啲   自己人嚟   又唔係唔識   真係奇奇怪怪 ~

夜晚凍咗好多咁   加上又攰   所以 11 點就即瞓喇 ~