肉醬意粉 + 粟米蛋花湯 ( 27-NOV-2015 )

( 27-NOV-2015  FRI )

今朝里奧大人出咗門口   我都瞓得唔係咁林   之後懶下床又好似瞓着咗咁   但 9 點 15 分都醒咗 lu   即刷牙落樓食早餐喇 ~

番到屋企就執好食飯枱   之後就大清潔個廁所   搞掂哂就沖涼   原來都 11 點喇   要去美心皇宮攞位呢 ~

估唔到要等位   好在等 15 分鐘有位咋   媽咪同工人 11 點半都到喇 ~

美心皇宮雖然有點心車   但來來去去都係嗰啲   同埋點心車又唔多   有時一嚟就幾車嚟   之後想搵架都無囉 ~

沙律明蝦角 - 又係唔熱   個皮又唔脆   唔掂啦

瑤柱蒸蘿蔔糕 - 我同媽咪食㗎   幾好味   有蘿蔔絲   最驚係一 Pat 嘢呢  

干蒸牛肉賣 - 好味呀   我食得一粒咋   比 2 粒工人食啦   等佢有啲營養   

北菇滑雞扎 - 媽咪同工人 Share 食   估唔到都好多魚肚   

雞包仔 - 叫比工人食   

仙翁合桃露 - 媽咪同工人 Share 

飲到 2 點都走喇   媽咪話喺手袋拎嘢   我問係咪佢請飲茶   工人一聽到我話媽咪請   佢即拎張點心卡擺喺媽咪面前   笑死我   之後我話我請啦   叫佢請家姐就得㗎喇   家姐成日同佢飲茶嘛 ~

坐咗兩個半鐘   真係要郁下囉   所以同媽咪去馬莎買茶餅   再去 MP 買生果   我順便買 Pack 澳洲牛肉   咁比錢嘅時候   聽到 Cashier 話朱古力 $9.9 一包   咁得 2 包   我買哂去啦   之後我碌卡比錢嘛   咁等嘅時候周圍望   一望望到原來係 $19.9 一包   嗚嗚   勁貴啦   我覺得吉百利唔值囉   嗚嗚嗚嗚   不過慶幸佢得兩包咋   如果佢有 6 包   我實買哂比家姐架   十蚊之內嘅零食   依家真係好少有家嘛   之後問家姐好唔好食   佢話好味   不過我話唔會再買比佢   嘩哈哈 ~

買完就去牛頭角放低藥方比中醫   咁星期一可以飲 lu ~

番到屋企已經 3 點幾   抖咗陣就抹書房   之後大清潔個廚房   乾乾淨淨最舒服呢 ~

里奧大人 6 點 45 分放工   咁又要預備煮嘢喇 ~            

是日懶餐 - 肉醬意粉 + 粟米蛋花湯 

肉醬意粉 - 今次用免治牛肉   估唔到特價 $21 嘅份量都好多   不過可能我今晚又煮得好少扁意粉   所以感覺肉見過扁意粉   之後加啲肉碎落粟米湯度啦   估唔到口感同豬肉一樣咁 "鞋"   我覺得自己煮嘢嘅水準真係好穩定咁呀   哈哈哈哈 ~

粟米蛋花湯 - 本來買西蘭花   不過媽咪話唔靚   所以唔買   又唔知買咩好   咁飲粟米湯算喇 ~

搞掂哂就沖涼休息喇   雖然今日放假   但真係忙過番工咁 ~

11 點幾瞓喇   聽朝 9 點半要起身呢 ~