元氣壽司 @ 九龍灣 ( 23-NOV-2015 )

帆立貝裙邊

炸三文魚皮 

蟹子沙律軍艦 / 芥辣八爪魚軍艦 / 飛魚子軍艦

炸蝦卷 

元氣卷 

三文魚腩壽司 / 三文魚壽司 / 油甘魚壽司 / 羅韌香草赤海蝦壽司 

三文魚籽迷你飯 ( $18 ) - 做緊優惠   所以即叫   哈哈  

( 23-NOV-2015  MON )

尋晚瞓得唔好添   加上今日又係星期一   所以覺得更加攰咁   哈哈 ~

今朝食芝蛋治   因為超級勁餓呀 ~

番到菇場勁忙   都知會係咁㗎喇 ~

9 點半家姐打嚟話工人話佢知媽咪無啦啦暈咗   右邊手腳軟哂   又流口水又標冷汗   所以工人即 Call 平安鐘   之後媽咪有反應喇   而救護員佢哋都到埋   仲有 8 個人咁多添呀   但媽咪唔知自己暈咗   仲問工人做咩叫咁多人嚟 ~

無耐平安鐘職員打嚟通知媽咪要入院   但情況就唔知   因為工人講得唔清楚   咁我都明   工人一定超級勁驚   又一定驚到喊   佢成日覺得媽咪有問題係佢嘅責任   因為照顧得媽咪唔好   所以媽咪先入院   但我地話唔係咁呢   又唔係佢練到媽咪暈   身體唔好就多病痛   叫佢唔駛咁緊張呢   最緊要冷靜就真呢 ~

咁西瓜又唔喺度   所以直接同老闆講話要去醫院呀   好在佢比咋 ~

即熄哂電腦   飛去打的   再打去問工人   媽咪咩情況   感恩媽咪有反應   同埋無再標泠汗呢 ~

我 10 點到急証室   不過媽咪都未到   之後家姐過咗 10 分鐘都嚟埋   但媽咪仲未到   之後等多 5 分鐘左右先到呀   今次應該要 Check 好多嘢先開車呢   媽咪一見到我同家姐都覺得好愕然   哈哈 ~ 

入到急証室就真係要工人講情況比醫生知喇   我聽到救護員頭先話媽咪 Suddenly LOC 30 秒   咁我再問番工人頭先媽咪點樣   佢話今朝都有飲茶做運動㗎   之後番屋企開門   佢關門之後叫聲媽咪   但媽咪無反應   之後叫咗幾聲   媽咪都無反應   咁右邊手腳無啦啦軟哂   又流口水又標冷汗   所以佢咩都唔理就打比平安鐘   再打比家姐工人   之後就打比家姐喇   工人一定勁驚   不過我話佢做得好啱呀   第一件事一定係打比平安鐘   咁佢地會即 Call 白車呢 ~ 

差唔多 10 點 45 分就走喇   因為媽咪要抽血   之後等上房   咁工人又喺度   所以我同家姐番番工喇 ~

同家姐一齊搭巴士   佢落官塘轉車   我就直接番到菇場呢 ~

一坐低就做做做   出咗去 2 個鐘   所以好似做咗無耐就 Lunch Time 咁   哈哈 ~

今晚 8 點幾先有得食   其實唔餓   但都買車仔麵   都係想食飽啲 ~

又做做做啦   放工都未做哂㗎   但唔理喇   要趕住探媽咪呢 ~

去到見到媽咪都精神   感恩感恩   不過就比佢激死   有醫院飯又唔食   叫姑娘打比工人話買魚蛋粉   但唔知點解姑娘無講比工人知囉   奇怪 ~   

咁又要我去樓下醫院餐廳買粥   但又話呢個時候無粥買   想食火腿通   我真係火嚟   大佬   我今日樸嚟樸去超勁攰呀   仲要我周圍走   工人知我攰   話陪我落去買   不過我話唔駛啦   佢都好攰嘛   媽咪 3 點半先上房呀 ~

好在去到有魚蛋麵咋   唔係我一定唔會買其他嘢囉   嬲呀 ~

之後打比里奧大人呻呻呻啦   佢話算啦   最緊要媽咪食到嘢   咁又係嘅   媽咪係煩   不過我都係超衰格㗎喇   成日話媽咪   但我又忍唔到喎   咁我頭先只係語氣重   但就唔係鬧囉   算好脾氣㗎喇 ~

家姐 7 點幾到   摸下媽咪隻手係暖   再摸下佢自己隻手同我隻手都係凍   話我哋似病多啲   哈哈 ~   

里奧大人 7 點放工   所以叫佢番屋企開機洗衫先   我哋探到 8 點就走喇   之後搭巴士落淘大   諗唔到食咩   咁就食壽司啦   家姐最鍾意 ~

食到 9 點幾   里奧大人幫我拎袋番屋企   我就送家姐搭巴士   感恩好快有車呢 ~    

沖埋涼   睇下雜誌   11 點半瞓 lu ~