濛濛濛 ♡ 黃山 5 天豪華團 DAY 5 (PART 2/2) ( 21-NOV-2015 )

( 21-NOV-2015  SAT ) - PART 2/2

有啲團友又買啲樽仔   即係又要等啦   所以又周圍行下囉 ~

佢喺個樽入面畫畫

全神貫注

畫到咁靚

我鍾意呢個櫃

喺洗手間門口望番出去

我對甲骨文最有興趣   因為好得意   哈哈

好大支毛筆   其實勁想買支番屋企擺下   但原來要 RMB1,200   咁一定唔買啦

佢哋提供咗唔同嘅毛筆比我地寫字   咁又幾好玩㗎   因為好耐無揸毛筆寫字嘛   之後佢哋當然又 Sell 毛筆啦   話寫毛筆字係好好嘅消遣節目   我話唔啱我   我鍾意打機多啲   咁兔兔仲衰   話打牌仲好   好在佢哋無黑面咋   哈哈

好在唔駛上去

11 點走人

呢棵榭好多顏色   我好鍾意呀   哈哈

屋頂一大塊鐵片   其實係供應熱水嘅   因為天氣太凍   要有好大容量先得呢

呢間屋究竟起完未㗎 ?!   就咁行出去晾衫 ?!

間間屋差唔多   好似話要設計要劃一定咩

@ 11月21日   11:21am

沿途

好大霧

行山行呢度都唔錯咁喎

12 點 lu

山上面有棵細細嘅植物

影呀影

又見到大鐵片

成日唔記得問飛哥   屋頂啲圖案係咩嘢意思

我覺得呢個樹林好靚呀   唔係齋綠色咁單調呢

1 點到飯店   飛哥講明話要快啲食   食完要即走   最好唔好食完又傾下偈咁喎   其實我想話頭先人哋買嘢又唔見妳叫人快啲買完 ?!   我知跟團係咁   我仍都好鍾意買嘢   但唔會因為掛住自己買嘢誤時而影響到人哋囉 ~

今餐飯又有搞笑嘢   因為我哋同枱有 2 個男團友   其中一個係龍友   咁有晚食飯   只見龍友一個人喺度   咁團友問龍友   朋友去咗邊 ?!   佢話唔知   咁後尾里奧大人有晚聽到 O 仔派房間 Key   係講咗 2 個組別   先知佢哋真係唔識   但奇怪啦   我哋問你朋友去邊   你應該話比人知佢唔係你朋友嘛 ~

喺呢度食飯

開餐喇

雞湯 ?!   一陣坐長途車   所以一定唔飲咁多水

咁炒法真係好食好多

熱辣辣最正   不過我無食呀

炒薯仔 ?!

好味呀   佢哋話係欖菜

擺到咁樣   好似好唔新鮮咁   哈哈

又有蝦毛

仍然係有蕃茄蛋

唔知咩來

超大個包

今次係哈爾濱啤酒

里奧大人居然夠膽影廚房   哈哈

我哋坐嘅旅遊巴   坐位都舒服

趕住走人喇

經過茶園

原來我哋都逃唔過去茶園   哈哈哈哈

中間空蕩蕩   唔知有咩用呢 ?!

同之前喺張家界介紹黑茶嘅模式一樣   飲完會燒脂呀  體內毒素排哂出嚟咁咁咁呀

得臭青味咋噃

周圍逛下啦

環境係唔錯嘅

無咩好睇   哈哈   同埋落雨濕濕   成個地又濕哂   真係望住地下多過望周圍啲嘢呀

生草嘅茶壺

佢好似行緊出嚟咁

內地好多地方都鍾意用燈籠做裝飾

如果可以去對面度影相就好 lu

車程流流長   咁飛哥就一定講下嘢啦   話以前團體餐有臭桂魚食㗎   係新鮮醃嘅   味道係鹹魚同鮮魚之間咁   但好多團友都接受唔到隻味道   所以最後取消咗呢 ~

佢話以前睇電視   啲人次次探人都會拎壺老火靚湯   佢唔明啦   因為佢哋嘅所謂嘅湯水   只係滾蛋湯   唔係廣東人煲幾個鐘嘅老火湯嘛   所以佢話去廣州做嘢嘅時候   就要試下飲老火湯   一飲之後就愛上咗啦   覺得好好飲   所以終於明白啲人成日會拎住壺湯去探人呀   佢仲話 "飯前飲湯身體好   飯後飲湯死得早"   係咪㗎 ?!   哈哈 ~

之後佢話嗰時一日飲 5 支可樂   因為係最平   咁佢有次見到廿四味   覺得應該係正嘢   因為佢以為係有廿四種味道   點知佢飲咗一啖就唔飲喇   哈哈 ~

我唔記得邊度嘅野山豬好出名   頸係黑色   頭同身係白色   係家豬同野豬雜交嘅豬    但只係食菜嘅   所以係無污染   之後唔記得佢想講咩   咁用嚟做雲腿就最好   冬天劏豬後腿   封乾個半月   再醃 3-5年   咁再耐啲就叫臘肉   佢哋係買一隻   唔似我哋咁買一件件呢 ~

佢教我哋想買最香嘅雲腿   就係用針一吉最尾嘅地方   聞到香味就係正嘢   如埋一切開係 95% 瘦肉   仲要係棗紅色同栗子色就係最靚   所以如果佢見到隻雲腿比人吉咗好多窿就唔買呢   因為一定係唔靚呀   啲人睇完唔買嘛 ~

之前佢帶個一團係精英團   唔記得係咩退休人事    最細係 6x 歲   最大嘅係 8x 歲   但反而 8x 歲係行得最快   咁老人家喇喎   一定有假牙家嘛   有一日有位老伯唔記得帶假牙就走咗   但行程係唔會番轉頭   咁老伯話副假牙好緊要   咁好慶幸酒店無掉咗副假牙   所以叫飛哥將副假牙速遞番香港   因為行程仲未玩完嘛   所以就叫佢個仔代為收件   咁無諗過速遞咁快   真係個人都未番到香港   副假牙已經到咗香港   佢個仔收到件就嚇死佢啦   無啦啦收到副假牙   佢以為佢爸爸比人綁架呀   即刻上旅行社問發生咩嘢事   咁又係   無啦啦收到假牙   都咪話唔驚   哈哈 ~

去機場喇

地下又有零零舍舍一棵嘅小植物

3 點 45 分喇   落雨加塞車

里奧大人係都要我用個頸枕

睇唔到係壞車定炒車   因為當時個天都黑哂   呢張係我將張相較到好光   咁先睇到係咩車呢   佢哋話係燃油車嚟㗎   咁真係超驚險啦   爆炸好大穫家嘛

5 點喇    我哋要 7 點半前到機場㗎

中途站去洗手間   因為已經 5 點半   所以真係咩都要快   咁開車嘅時候   里奧大人咁啱要喺兔兔隔離個位搵嘢   隔離團友以為佢無上車   咁之後 O 仔點人數   佢好驚話 "妳先生呢 ?!   我話佢未上車呀   O 仔個樣真係驚到變哂   哈哈   之後我話喺隔離呀   但 O 仔其實喺旅遊巴門口前都數齊人   之後上到車再數咁呢   咁啱里奧大人着黑色褸   咁啱又 "烏" 低身搵嘢   真係見佢唔到㗎   哈哈

好緊張呀   7 點 29 分都未去到機場

終於到機場   導遊同領隊都鬆一口氣呢   我又唔驚呀   因為我帶多咗套衫褲   可以住多晚   不過如果叫佢哋賠錢   咁就唔好囉

個個趕住拎行李

一支支向下插   都幾恐怖   哈哈

7 點 35 分到機場   去 Counter Check-out 又耐   明明我哋係頭嗰 3 位排隊   點知我哋係最後走嘅一個   離哂大譜 ~

得我哋呢團 Check-in 咋

我哋 Counter 嘅人掛住傾偈   我哋明明第一變最尾

跑入去喇

焗鬼到呢   所以去買嘢飲   咁我喺汽水機買嘢飲嘛   有個唔知印傭定咩   望住我好耐   唔係以為我係同鄉呀嘛   同佢講國語佢又唔明   講英文佢又喺度笑   好驚啦我   之後里奧大人過嚟啦   我同阿奧講話佢唔知做咩   唔係等我比錢請佢飲呀嘛   之後佢捉住我隻手喺度笑   我聽到佢好似話 "呃我" 定咩鬼   嚇鬼到我捉番住里奧大人走呀

8 點半坐接駁巴士   8 點 40 分到飛機門口   我第一次咁樣上機㗎咋   好似好近距離望到飛機   好開心呢 ~

好多人坐哂喺度 lu

仲要坐程接駁巴士

5 分鐘後落車

我第一次咁上機

個服務員企正喺樓梯   所以阻住我哋上去   可能落緊雨   佢唔想開遮啦

我第一次咁近距離見到飛機   好大鄉里呢

8 點 45 分起飛番香港喇

又寫下意見調查表先

9 點 10 分   熄哂燈 lu

勁恐怖   左邊燈隔離有條唔知咩嘢   關唔番上去呀   又開又關咗 6 次都關唔到入去   所以全機人都喺度笑囉

食完飯   空姐收哂嘢   我同里奧大人就即刻瞓着咗喇   個飯係咪落咗安眠藥㗎   因為我絕少會食完飯即瞓   多數望下嘢咁   CC 話佢一路食已經一路中緊眼瞓添呀   但飛機唔焗喎   唔通我哋真係太攰 ?!   但頭先坐巴士都好好瞓㗎啦   哈哈 ~

呢支嘢幾好飲

10 點派餐

個包脤卜卜

9 點 20 分起飛   11 點 42 分降落   終於番到香港喇 ~

安全降落

已經 12 點 08 分 lu   又要坐無人駕駛

12 點 20 分先到行李輸送帶   拎埋行李都 12 點 40 分喇   林雪話變咗 6 日團   哈哈 ~

等埋行李

差唔多 12 點 40 分先搞掂

我哋打的番屋企   諗住兜埋 CC 佢哋啦   但佢哋堅持坐巴士番屋企   咁是但啦   我就一定唔坐巴士   因為太夜喇   想早啲番屋企呢 ~

12 點 42 分上車

喺車度影月亮   變哂型好搞笑

沖埋涼   抖咗陣   2 點半先瞓呀   最搞笑里奧大人話我係想等埋 CC 番到屋企先瞓   但其實唔係囉   可能頭先喺飛機度瞓咗   唔係話好眼瞓咁呢 ~