元氣壽司 @ 九龍灣 ( 15-NOV-2015 )

飛魚籽軍艦 / 芥辣八爪魚軍艦 / 海膽墨魚軍艦

香草羅勒赤海蝦壽司 / 三文魚腩壽司 / 油甘魚壽司 / 三文魚壽司

里奧大人真係好鍾意食炸蝦卷   佢細細聲同我哋講話唔知係咪漏單   我同家姐如夢初醒咁一齊答佢話: 我哋無叫呀   哈哈哈哈   無計啦   年紀大記唔到咁多嘢   呵呵

玉米蝦船

元氣卷

芝麻八爪魚 

會員優惠   好似食任何 5 碟就送呢   

( 15-NOV-2015  SUN )

今朝 9 點半起身   刷牙洗臉沖埋涼就出去食早餐喇 ~

食完番屋企抖陣   之後就番教會   奉獻完之後就即走喇   因為約咗媽咪同大舅父飲茶呢 ~

里奧大人有時會話我行得好快   好似拉住佢嚟行咁   我話精神夠同埋唔駛拎重袋嘅話   基本上我可以行得好快   之後我講話依家真係好鍾意行山   其實係家樂徑   我話遲啲會挑戰另一啲山   佢笑住話係呀係呀   青山吖嘛   哈哈 ~     

因為里奧大人要番上屋企拎脫脂奶   所以佢行快啲啲行   咁我去埋洗手間先走   一出教會門口就見到大食表妹   我其實真係以為自己眼花   我都知佢都會同媽咪飲茶   但無諗過佢嚟咗淘大   原來佢頭先 Whatsapp 我話嚟緊   不過我崇拜嗰陣無認真睇佢寫嘅內容   以為去話嚟緊酒樓咋   真係邪啦   佢有 4 個訊息比我   我立一立最後兩個訊息係話已經上車同到咗   原來佢第 2 個訊息話嚟緊淘大搵我   最重要呢點反而我就無睇   哈哈 ~

好啦   一齊去酒樓   不過里奧大人要放低 6 Pack 奶去媽咪屋企先   我就同大食一齊去酒樓喇 ~

求其影   哈哈

之前約家姐   仲諗住只係我同里奧大人   媽咪家姐同大舅父   無諗過婆婆同工人   阿姨同大舅母都一齊嚟探媽咪呢   好開心呀我   但佢哋 12 點已經嚟到   所以我哋食咗少少嘢   咁傾下偈   2 點就走 lu ~

我同里奧大人就送婆婆佢哋搭的士   家姐就送大食同阿姨坐小巴   之後一齊上媽咪屋企坐下喇 ~

次次媽咪一番到屋企   工人就會幫媽咪量血壓   咁我哋幾個又會量下   我同里奧大人多數係 12x/80   家姐就 14x/9x   上下壓都高啦   所以阿姨都叫佢睇醫生呀   佢又唔做運動   所以里奧大人話要捉佢去行山   哈哈   同埋佢工人煮嘢太濃味   油又多   1 大罐海鹽可以半年定 1 年用哂   真係黐線啦   我屋企包海鹽   真係只用嚟浸菜多咋   仲要係 1 年都用唔到 1 包添   平時出街食都大把鹽份   所以我煮嘢真係唔多需要落鹽   但家姐咩都唔理   又係痴嘅   唉 ~

我哋坐到 3 點就走人喇   家姐又比平安利是比我   又買咗臘鴨肶比我   本來我諗住拎 6 條廁紙同 4 Pack 汽水番屋企   但家姐話咁多嘢   下次等佢揸車先拎喎   實在太錫我喇   佢同媽咪同工人都好驚拎太多嘢   可能平時見我個樣好似就嚟死咁啦   哈哈   所以我成日同里奧大人講   家姐對我好好㗎   佢都要對家姐好好呢   哈哈 ~

勁想飲凍咖啡呀   所以去大快活食個最平嘅餐   因為其實唔想食嘢   但就咁飲嘢又唔抵   呵呵 ~

番到屋企 4 點幾   熨埋 2 機衫   今日好似好熱咁   11 月中喇   凍啲好無呀   哈哈 ~   

呢啲係帶去旅行嘅零食   係 4 個人食㗎   都應該夠    

兔兔仲勁   買咗 15 包 Kinder   CC 話我同兔兔好似細路仔去旅行咁   兔兔仲話呢罐 Nuts 係到時一路飲啤酒一路食   聽見都開心   哈哈   不過 CC 同里奧大人話熱氣喎   真係成日講掃慶嘢   哈哈

差唔多 6 點家姐又嚟到   佢話膊頭痛   所以叫佢做撐艇   做完就落去元氣呢 ~

感恩等咗 10 分鐘就有位   食完再去食雪糕   我同家姐一入商場就話好凍呀   但里奧大人居然話好舒服   我同家姐即刻相對望   里奧大人仲話頭先元氣有啲焗添呀   咩事呀佢   姨丈到 ?! 

(綠茶 / 黑芝麻)   (薄荷朱古力 / 豆腐 )

食完就上番屋企繼續撐艇   家姐話真係舒服好多   佢屋企以前有張按摩椅又唔做   比啲狗用嚟瞓覺   又比佢哋抓到爛哂   之後要掉啦   咁買咗 Stepper 又唔做   郁下都好嘛   真係嘥哂啲錢呢 ~

家姐 8 點幾就走喇   咁我就拖地   沖埋涼就休息   11 點唔夠就瞓喇 ~