大快活 @ 九龍灣 ( 25-NOV-2015 )

今次啲咖哩汁好難食   完全無辣味嘅   我已經叫加辣㗎喎   我食剩哂啲雞呀   所以要留番做聽日 Lunch Box 添 

臘腸豉椒排骨煲仔飯

( 25-NOV-2015  WED )

今朝里奧大人上大陸   佢鬧鐘響完   我都可以即刻瞓番   實在太好喇   我超級勁羨慕啲人可以一覺瞓天光   同埋一瞓就瞓到   我黑眼圈好勁   啲人成日叫我唔好咁夜瞓   冤枉啦大人   我好多時 11 點就瞓   最遲都係 11 點半瞓   佢地聽完我話 11 點瞓又話我咁早瞓喎   想點呀   哈哈 ~

早餐食芝腿治   之後嘆下報紙   睇咗陣又夠鐘番工喇 ~

菇場打仗   所以次次做完之後   個人特別攰咁呢   因為太花時間同眼力呀   所以我依家如果有啲錢同有假呢   我一定要去旅行鬆一鬆   唔係我會提早入青山 ~

好想快啲整好哂啲相   所以 Lunch 落去買咖哩魚蛋同炒米粉   但咖哩魚蛋無味   勁難食   嗚嗚 ~

仍然忙呀   不過放工都即走喇   趕住探媽咪呢 ~

今晚 6 點左右就去到醫院   見媽咪仲未食飯   之後話工人唔夠力扶佢喎   所以遲咗食飯   我咪話囉   妳以為妳自己好輕呀 ?!   妳自己唔用力   成嚿石咁   無力扶力真係唔出奇囉   之後佢都醒   同工人講唔好意思   唔係我會開口話佢   唔好咩都話人哋囉 ~

今餐係冬瓜片同葡汁魚柳   家姐叫佢工人煲咗青紅蘿蔔湯   媽咪工人去佢屋企拎   佢想我拎啲湯番屋企飲   不過我今次真係唔要喇   根本無時間飲   咁媽咪又飲唔哂   就益我啦   哈哈 ~

感恩今晚又見到當值姑娘呀   佢話媽咪今日拆咗尿喉同貓鬚   身體都 OK 呀   感恩感恩 ~ 

我發覺好多時我同家姐做埋啲嘢係一樣   好似今晚咁   家姐買定啲芝士餅比工人   咁啱我頭先又餓   買咗 2 包粟一燒   因為 $12/2 包   我可以同工人 Share   家姐工人又比咗啲印尼餸比佢   佢都同我講今日好多嘢食   哈哈 ~

佢好錫我哋一家㗎   所以我成日都同佢講   如果佢喺香港   有我一日   佢都唔駛驚   我哋實會幫佢㗎   佢好多時有問題   佢爸爸叫佢記得聽老闆講   所以佢好信我哋   不過佢驚我哋覺得佢煩   唔敢成日問我哋嘢   我話煩咩呀   出咗事先講就真係煩喇 ~

咁媽咪同佢飲茶   媽咪食唔哂啲嘢   工人話佢㗎   話太太做嘢好辛苦   唔好咁浪費啦   我覺得好搞笑   同埋最最最搞笑係   次次埋單   媽咪話佢比   咁工人都企定定等拎媽咪啲錢埋單   點知次次都係家姐簽卡埋單   有次我見工人直頭催媽咪   叫佢快啲拎錢啦   所以媽咪都話工人最鍾意媽咪比錢   哈哈   所以妳話我哋點解咁錫佢係有原因呢   哈哈 ~

媽咪瞓覺   咁 7 點 45 分同媽咪祈禱   之後諗住即走   因為好鬼凍   點知講下講下又 8 點先走 ~

今晚凍咗好多呀   我隻手直頭僵硬哂   又等咗 15 分鐘車喎   好在等到架 28B   可以落到淘大   仲只係 $4.6   呵呵   因為 13X 要 $7.5 㗎   又同一個站落車   所以我今晚覺得賺咗   呵呵 ~

里奧大人 7 點到咗羅湖   所以佢 8 點 15 分都到咗九龍灣   同我差唔多時間到呢 ~

趕住洗衫   所以去大快活食嘢   真係最緊要快 ~

星期一先同導遊飛哥買嘅茶葉   估唔到今日已經寄咗比里奧大人公司   但我地錢都未比㗎喎   好在里奧大人一收到已經話要星期六先去銀行過數   平日真係無時間   因為用大陸戶口   我幫唔到佢哋呢  

番到屋企 9 點幾   要即開機洗衫   沖埋涼就熨 2 機衫   熨到 11 點   抖多陣就瞓喇    勁攰呀 ~