回鍋茄子雞柳 + 菜心苗 ( 20-AUG-2026 )

尋晚食剩嘅酸辣湯韭菜餃

今晚唔係咁想食茄子   所以又要番番了

( 20-AUG-2026  THU )

感恩一覺瞓天光呀   我最開心係瞓得好呢 ~

今朝里奧大人去買早餐   買完就去佢公司喇   食完坐陣先番工 ~

菇場唔忙   又做自己嘢喇 ~

阿齋問我啲蛋食哂未 ?!   我話仲未拎喎   船頭話幫我答係因為係想買   阿齋話我真係為買而買   船頭話買完唔食但到期一次食哂其實咪仲驚 ?!   我話呢句講得好   因為我老公成日都咁講   哈哈 ~

Lunch Time 即慶同船頭 阿齋行一田   行到唔知時間呀   番到菇場已經 12 點 45 分喇   要即刻叮飯了 ~

我只係買土耳奇無花果開口箱 ($75)

預佢哋會買嘢   所以我話推車仔

又去 $8 區買嘢   今次多咗啲碗但要 $18   所以船頭話買 2 隻試咗先   好用先叫我哋買

唔忙又做自己嘢啦   船頭話隻碗係 Made in Japan 和歌山喎   阿齋以為係八蚊雞   我話係十六蚊呀   之後我話聽日一齊去買啦   我唔帶飯   船頭話佢都唔帶啦   我話出去譚仔三哥啦   之前妳話想去食 ~

阿齋話聽日會帶飯   船頭話星期六食啦   將啲餸樣樣少少擺落碟度   咁就唔似食隔夜餸嘛   我話駛咩咁煩呀   今晚食哂啲餸唔食飯咪得囉   船頭話咁妳又衰啲喎   哈哈 ~

放工即走   番到屋企即預備晚餐喇   里奧大人今晚 6 點 15 分番到屋企   我話咁早嘅   佢話今日應該放 5 點㗎 ~

我同里奧大人講話聽日唔帶飯   因為要同船頭血拚   佢笑住話我哋依家買嘢買到黐咗   哈哈 ~

時日晚餐 - 回鍋茄子雞柳 + 菜心苗

回鍋茄子雞柳 - 尋晚仲剩咗啲回鍋肉   咁仲有啲汁就唔好嘥嘛   加埋茄子同雞柳一齊炒   一樣咁好味呀 ~

菜心苗 - 里奧大人話個菜好食呀   因為有啲肉同汁   咁我下次都買定啲免治肉碎   煮菜就加啲肉碎   咁確實係無咁單調嘅 ~

煲埋蕃薯糖水就洗碗   之後開埋機洗衫就沖涼喇 ~

船頭 Whatsapp 話個碗好好用   我叫佢提我聽日買 4 隻呀   佢話咁多 ?!   我話信妳好用嘛   哈哈 ~

里奧大人唔係咁舒服咁   所以 8 點 15 分都瞓覺喇 ~

睇 Youtube 睇個女仔行絕壁天梯   真係唔係自己行都感覺到雙腳酸軟囉 ~

本身諗住 10 點 20 分瞓覺   點知睇到 10 點 40 分瞓覺呀 ~