豉油王肉絲炒麵 + 迷你福建飯 (外賣) ( 13-AUG-2025 )

( 13-AUG-2025  WED )

尋晚去咗 2 次廁所   好在好快瞓得番咋   感恩今朝起身都精神呢 ~

早餐食牛油排包   又係搽芝麻醬   仍然都覺得好味㗎 ~

菇場唔忙   但有時整呢樣嗰樣   好快就到 Lunch Time 㗎喇 ~

阿花問尋晚阿怪咩事   我講番比佢哋聽   船頭話如果公司要開部電腦睇嘢   直頭係唔可以 Say No 添啦   公司電腦嚟㗎   妳估屋企電腦呀   佢講到好激動   我覺得好好笑   哈哈 ~

今日唔駛煮飯   所以去買豬腰芒   之後都係買埋茄瓜   因為聽日可能又狂風雷暴大驟雨嘛   買完去 759 過冷河   突然聽到有人同我講嘢咁   原來係阿花   傾咗一陣就我番菇場先   佢哋就去買嘢食喇 ~

買埋雞骨草比里奧大人就番菇場開餐   行行下又見到阿花佢哋   真係約埋都無咁啱呀 ~

唔忙又上網睇嘢   呢排好鍾意食花生   食食下覺得有陣酸味但唔係酸"叔"味   但我記得係 SALTED CARAMEL 先買嘛   之後睇下個罐   原來係 SEA SALT & VINEGAR   但其實食落鹹鹹酸酸都幾好味嘅

因為我係睇 Expiry Date 買嘅   可能咁樣拎錯咗味道   不過錯有錯着   哈哈

放工即走   咁我搭扶手電梯   我後面個女人同我前面個女人講嘢   係講佢唔鍾意食豆花米線   鍾意去邊間度食   其實駛唔駛咁心急講呀   又唔知自己好大聲   我都忍唔住望佢   上去都只係最多 10 秒   咁都等唔切 ?!

今晚里奧大人 7 點半要開會   所以去佢公司一齊食晚餐喇 ~

食完都差唔多 7 點鬆啲番屋企放低嘢   之後去樓上買嘢   買完都番屋企 lu ~

個人有啲攰   所以唔做機住   沖埋涼就休息下先 ~

睇下 Youtube   9 點 45 分番到屋企算快喇   佢第一句就笑住問有無睇 "麻雀樂團" 呀 ?!   佢知我鍾意睇就會咁問   不過我當然無睇啦   等埋佢先一齊睇嘛 ~

等佢沖埋涼就一齊睇 "麻雀樂團"   之後再睇陣 Youtube   差唔多 11 點先瞓呢 ~

薑蔥雞絲炒意粉 + 蒸節瓜粒 ( 12-AUG-2025 )

( 12-AUG-2025  TUE )

尋得都唔錯呀   係里奧大人去廁所郁一郁我   不過醒咗都好快瞓得番   感恩感恩 ~

發夢去食自助餐   見到豬老闆同其他唔識嘅人   諗住傾偈但好遠唔想行去 ~

我同里奧大人 阿妹 一個唔識嘅姊妹坐 4 人枱   姊妹執咗杯好好飲嘅茶比我   里奧大人就同阿妹對住坐   之後我跟住阿 B 一齊去拎炸物   我問佢做咩變咗把老牛聲 ?!   之後鬧鐘響 lu ~

早餐食甜餐包   都係搽芝麻醬   里奧大人就搽花生醬 ~

菇場唔忙   又做下自己嘢先 ~

Lunch Time 出去買麵包   之後再去一田行下   買埋魚肉燒賣就番菇場 lu ~

今日無帶飯就食埋個杯麵   估唔到啲魚肉燒賣好味呀   不過食咗 1 粒就唔食住   因為好飽   要留番晏啲先食

無啦啦又好忙呀   做做下嘢聽到阿輸叫阿怪 Send 份文件出嚟   但有啲就聽唔到佢講咩   之後阿怪好大聲話有人搞佢部電腦   所以 Set 咗 Password   咁阿輸叫佢比 Password 出嚟   佢話唔可以   阿輸話電腦係公司   一定要比 Password 出嚟   佢又再話有人搞佢部電腦   阿輸叫佢講邊個搞   佢話講咗係佢都唔會認啦 ~

呢啲人真係好有問題   公司電腦基本上唔會放私人嘢   咁怕咩比人睇   我有時放假   阿蟲都會喺我電腦做嘢   因為得我一個睇到舊 System 嘅嘢嘛   如果我 Set 咗 Password 都要話番比阿蟲知啦   唔係佢都開唔到   咁其實 Set 唔 Set 都一樣   根本就即係公開   所以阿怪真係好有問題   真係以為公司係佢咁 ~

放工即走   呢排搭快車就可以好快番到屋企   里奧大人打嚟問我喺邊   我答喺屋企   佢都話咁快嘅   哈哈 ~

唔駛睇培靈會真係煮得唔駛咁趕   不過都係 6 點 45 分先開餐   算係遲喇 ~

是日晚餐 - 薑蔥雞絲炒意粉 + 蒸節瓜粒

薑蔥雞絲炒意粉 - 今晚煮 1 撮意粉就夠   里奧大人仲可以帶埋 Lunch Box   因為我唔食呀   要留肚食蕃薯糖水 ~

蒸節瓜粒 - 加埋啲雞骨一齊燜   真係好味好多 ~

洗埋碗就煲蕃薯糖水   之後開機洗衫   搞掂就即沖涼喇   里奧大人就熨衫 ~

一路食糖水一路睇緊電視   突然間心血來潮覺得好似無開到洗衣機   點知真係唔記得按制   浪費哂啲時間添 ~

睇多陣 Youtube 又打陣機   今晚 10 點 45 分都瞓覺喇 ~

四季酸菜魚冰室 @ 佐敦 ( 11-AUG-2025 )

開餐

成都老城口水雞 ($78) - 我覺得好味呀   可能實在太想食喇   哈哈

四季老壇酸菜魚 ($88) - 最緊要啲魚肉無細骨   我鍾意食芽菜同酸菜   因為唔係成日食呀

( 11-AUG-2025  MON )

尋晚都算熟睡狀態   臨醒之前發夢我 9 點 49 分仲喺屋企   我同里奧大人講話要沖埋涼先出門口   但場景其實係喺公司㗎喎   我話一陣番公司坐陣再同你食早餐   費事咁遲先番到去   講完就鬧鐘響 ~

雖然瞓得好但起身都攰   今次食啲藥真係令到我個人散哂咁滯   所以要同里奧大人出去食早餐呀   反正今日佢要番工   哈哈 ~

菇場忙呀   咁就好喇 ~

Lunch Time 蒸完飯就出去買話梅薑比里奧大人   之後去買百香果   行行下又忍唔住買象啤   買完都要即番菇場開飯喇 ~

忙咗一陣又可以抖下   唔錯唔錯 ~

放工即走   但要番屋企擺低百香果   之後再同里奧大人一齊搭的士去 QE 探姑奶喇 ~

傾下傾下又 7 點   我哋都走喇   因為間房真係好迫   隔離床又 4 個人探病又有儀器   不過姑娘見到都話只可以 2 個人探呢   但儀器擺喺度其實一個人企入嚟都迫囉 ~

我哋搭小巴去佐敦   里奧大人話我好記性記   記得餐廳個名   我話記得個方向咋   同埋零零舍舍凸咗個牌出嚟嘛   之後又話我個鼻好靈   食過嘅地方一聞就記得   真係黐鬼線   哈哈 ~

行裕華超市   不過行到落去再望下巴士 Apps   我話差唔多有車都係唔行喇   里奧大人個樣好愕然   我話又無嘢想買嚟食   都係番屋企好過 ~

依家里奧大人一見到熊貓仲興奮過我   因為知我呢期好鍾意   哈哈

沖埋涼就睇 "麻雀樂團"   睇完又睇陣 Youtube   今晚 10 點 45 分瞓覺   我同里奧大人講話依家想早番啲瞓呀 ~

玫瑰豉油雞 (外賣) + 鳳城水餃 (外賣) + 炒麵 (外賣) ( 10-AUG-2025 )

( 10-AUG-2025  SUN )

尋晚瞓得麻麻哋   個人好熱咁   應該係食咗薯條呀 ~

今朝同里奧大人去食早餐   食完就去家姐屋企 ~

同家姐去 360 買糖   買下買下又過咗 $100 有張 $20 現金劵   不過要等下次買滿 $120 先用得   家姐會買辣雞麵比工人   咁都好呀   可以用到張劵   因為我好多時都用唔到囉 ~

買完即番屋企   Berry 女又係好熱情   好在佢唔大隻咋   唔係一定比佢推跌呀 ~

例牌動作   就係跳上梳化係咁 Fing 條尾巴

當我摸完佢就會好冷靜咁坐低㗎喇

我比哂 3 磅百香果比家姐   因為今次好甜呀   之後家姐話無得買咁點 ?!   我話咪唔買囉   又唔係必須要食 ~

講開英文名   我話有啲英文名叫 XX 啲性格都係一樣   家姐都話係呀   最邪係我同糟糟都識兩個唔同英文夠嘅人   但性格係一樣   之後佢上網睇話某個國家歸類改呢個英文名就係比較 XX   真係笑死我呀 ~

之後講宿舍啲 Case   估唔到家姐知道好多搞笑嘢   今日同家姐傾嘅嘢   有好多佢都知道   咁我唔駛解釋咁多   哈哈 ~

佢好眼瞓咁喎

咁我瞓喺度嘛   Berry 係咁塞個頭入嚟

我好希望佢咁樣瞓   所以叫家姐唔好嘈同埋郁   哈哈

真係瞓覺呀   家姐話佢放咗個屁

起身 lu   原來都瞓咗 15 分鐘

肥咗好多   諗起以前驚佢瘦得滯要迫佢食嘢   依家就唔敢比咁多嘢佢食

今日里奧大人有 Lunch Meeting   咁我又唔餓   所以都唔同家姐佢哋食嘢喇 ~

家姐入房傾電話   Berry 女即跟   咁我都跟啦   哈哈

1 點幾先走   家姐同工人 Berry 一齊送我搭車   條街熱到爆炸   企定定都會流汗呀 ~

頭先等車出咗汗   尋晚又瞓得唔好   所以都瞓着咗   仲幾好瞓添   哈哈 ~

難得有時間就去黃埔買豉油雞同水餃   之後買下呢樣買下嗰樣   買完都即番屋企喇   因為又已經流到一身汗呢 ~

番到屋企即沖涼   以前唔理三七廿一都沖凍水涼先   依家就唔敢喇   熱水暖水再凍水咁沖   咁樣都好舒服㗎 ~

一隻雞分咗兩盒   另外半隻就留番聽晚煮意粉

我 3 點半先食嘢   好在有啲餓咋   因為好驚 4 點幾先餓   到時都唔知食唔食好呢   哈哈 ~

星期四食剩嘅半碗白飯   就咁用辣菜甫送飯都好好味

里奧大人 4 點先番到屋企   我叫佢沖涼瞓晏覺呀   咁我唔眼瞓   所以開機洗衫做下家務喇 ~

家姐比里奧大人嘅生日利是

呢排又鍾意食軟糖   所以上次買咗嘅朱古力就唔想食   好在下年先到期咋

今晚 5 點 45 分就預備晚餐   咁可以 7 點準時睇培靈會呢 ~

是日晚餐 - 玫瑰豉油雞 (外賣) + 鳳城水餃 (外賣) + 炒麵 (外賣)

玫瑰豉油雞 (外賣) - 依家 1 隻要 $90 喇   之前好似 $70 定 $75 咋   師傅問切唔切頭同頸 ?!   我即刻話切呀 ~

鳳城水餃 (外賣) - 難得經過就買啦   我覺得真係好好食 ~

炒麵 (外賣) - 唔想煮飯   所以喺粥舖買份炒麵   只係 $13 咋   里奧大人食咗少少   我就唔想食   所以又可以一齊帶 Lunch Box 喇 ~

洗埋碗再即刻沖涼   咁就啱啱好睇培靈會喇 ~

忍唔住去買紅豆砵仔糕

睇完就睇 "臥底旅行團 5.0"   之後再睇多陣 Youtube   今晚 11 點瞓覺 lu ~

脆爆雞腿包 + 麥香雞 (外賣) ( 9-AUG-2025 )

脆爆雞腿包套餐 + 1 個麥香雞再送 4 件麥樂雞   呢餐 $61 好抵食呀

( 9-AUG-2025  SAT )

今朝同里奧大人瞓到 9 點自然醒   沖埋涼就去食早餐喇 ~

我話早餐加埋凍飲要 $50 好貴   里奧大人話咁當係佢加囉   咁妳咪唔覺得咁貴   哈哈   不過我間唔中都要飲凍飲   因為唔想飲咁濃嘅咖啡呢

食完番屋企   里奧大人就洗冷氣機隔塵網   我難得精神就執個食物櫃   因為買咗好多嘢飲要搵位放呀   搞掂就熨 2 機衫   咁就已經 12 點幾 lu ~

里奧大人 1 點幾出門口   我都喺屋企休息一下先   呢次食完抗生素消炎藥   隔咗兩個鐘就會令我好反胃   呢個醫生啲藥太勁   但我想食哂先   咁我食哂唔痛就應該無問題囉 ~

瞓到 2 點半都醒 lu   但真係好反胃   所以真係要去嘔   之後有啲暈陀陀   要抖多陣先出發買午餐   里奧大人唔想我去買   不過我話我都想食啲嘢   所以我話買麵包食喇 ~

我食雞尾包   里奧大人食餐蛋包+雞尾包

叻叻見我就咁食包   覺得我唔飽   我話無咩胃口呀   佢即刻話一陣如果妳有胃口   我去買乳鴿請妳食   真係勁感動呀 ~

我拎咗個橙   因為我想食啲酸酸甜甜嘅嘢   但如果太酸係會更加想嘔咁   好在個橙唔酸咋 ~

易姐請食火龍果

幫里奧大人執咗一陣嘢   執完覺得有啲攰咁   所以都係番屋企休息下先   之後先再番崇拜 ~

崇拜完畢就去等里奧大人放工   今晚到我想食麥當勞脆雞包呀 ~

我番屋企沖涼先   里奧大人就負責去買   辛苦佢了 ~

差唔多 8 點半先開餐   好在我都肚餓咋   哈哈 ~

食完再睇培靈會   今晚食多次消炎藥   如果食完真係反胃   我之後唔食喇   好在只比咗 2 日藥 ~

睇下 Youtube 又打機   差唔多 11 點半先瞓 ~

潮州肉丸白咖哩麵 + 油麥菜 ( 8-AUG-2025 )

( 8-AUG-2025  FRI )

感恩一覺瞓天光呀   今朝起身好精神呀 ~

同里奧大人出去食早餐   食完就去佢公司坐陣   掛住同佢傾偈   差啲唔記得睇巴士班次呀   好在趕得切搭車咋 ~

菇場忙咗陣就 Hea 過   今日 3D 實在太開心喇 ~

里奧大人話唔要   我話比我吖   間唔中鍊下都唔錯㗎

我次次都係一次過將藥丸放入口   咁今次 4 粒藥丸都大粒   但我都會照放哂入口   點知飲啖水想吞落去嘅時候   突然好想嘔嘅感覺   咁無理由吐番出嚟嘛   之後喺個口入面含住差唔多 30 秒先吞得落   但成個口苦哂   第一次咁樣咋   哈哈 ~

Lunch Time 蒸完飯就去買菜同蕃薯   之後都即番菇場   個人突然間無咩力咁呀 ~

今日無咩胃口   完全係唔想食咁滯   所以食到 1 點   好在今日 3D 咋 ~

家姐話 HKTVmall 買椰子水好抵   叫我買 1 箱   之後話買滿 $500 送貨   咁我揀嘢啦   佢叫我揀飲品最好   因為好重唔想我拎   咁我又買咗 4 Pack 奶茶同 1 箱黑咖啡   之後又買下其他嘢   折咗之後係 $500.5   真係夠絕呀   哈哈   其實我無特登計過   只係計多過 $500 就搞掂   但家姐話有啲係普通 VIP 價會平啲   我又要再揀其他嘢咁囉   所以搞咗好耐呀 ~

買完哂嘢就好忙喇   所以好快 5 點   坐多陣又放工 lu ~

我估真係食咗消炎藥令到我好反胃   因為我 3 點食完   差唔多放工就好反胃囉   今次啲藥真係好勁   我好少會咁辛苦呢 ~

其實諗住唔煮飯叫里奧大人買啲煎釀三寶就算   不過我落車佢都仲未放工   咁我話煮麵食啦   反正我買咗菜唔好嘥咗去 ~

番到屋企即刻煮晚餐   里奧大人 6 點半左右番到屋企都可以即刻開餐 lu ~

是日晚餐 - 潮州肉丸白咖哩麵 + 油麥菜

潮州肉丸白咖哩麵 - 因為我只係想食兩啖麵   我拎碗麵上枱嘅時候   我同里奧大人講話 Share 食   佢好愕然話咁細碗 Share 食 ?!   因為個麵唔係好似辛辣麵份量咁多嘛   哈哈 ~

油麥菜 - 1 包有 3 棵   只係 $5 咋   其實份量都唔少㗎 ~

洗埋碗就開機洗衫   抖多陣就沖涼 ~

睇完培靈會就睇陣 Youtube   之後再睇 "麻雀樂團"

之前 CC 送比我㗎   當甜品食唔錯   哈哈

睇多陣 Youtube   今晚 11 點半先瞓覺   其實我覺得好夜呀   但最慘 11 點都仲未眼瞓   我格硬瞓係瞓得仲差㗎 ~

涼瓜燜魚塊 + 蜜桃生炒骨 (外賣) ( 7-AUG-2025 )

( 7-AUG-2025  THU )

尋晚半夜小掩痛   醒咗兩次呀   所以瞓得唔係咁好 ~

早餐食菠蘿包   今朝里奧大仲食得快過我   其實我狀態唔係咁好   因為小掩仲痛   不過費事同里奧大人講呢 ~

菇場 3D   咁就好喇   我想抖下 ~

基本上我喺菇場一定焗嘢飲   船頭見我拎嘢出嚟   佢話係我啲補品   所以啲同事成日覺得我好養生咁   哈哈 ~

Lunch Time 蒸完飯就出去買百香果比阿妹   仍然係 $20/3 磅呀   其實上次都想買比佢   不過唔想一次拎 9 磅咁重呀 ~

今日狀態唔好   我居然比咗 $500 唔記得找呀   好在阿姐大聲叫住我咋   不過佢唔叫我   我都應該唔知自己比咗 $500   因為唔會睇自己銀包有幾錢家嘛 ~

行多陣再買埋蝦條就番菇場開餐喇   原來都已經 12 點 15 分呢 ~

之前整咗辣蘿蔔炒燒鴨但食唔哂   所以今日都要食埋去喇

唔忙就抖下啦   其實一坐一企都仲係痛   所以上網都無咩心機 ~

放工即番屋企附近睇醫生   今次唔係睇自己個家庭醫生囉   因為佢 10 號先番   我唔等得呀   哈哈 ~

雖然掛咗號   但等咗 25 分先有得睇 ~

我同醫生講話小掩痛   佢話係盲腸呀   我話我唔識呀   之後佢按我肚附近位置係完全唔痛   我落床嘅時候腳趾作抽筋呀   好在無事咋   唔係要姑娘扶住行先得呀 ~

醫生話有 3 個選擇   一係食消炎藥   一係去照 CT   如果再痛就入急症 ~

我梗係食藥先啦   照 CT 好貴嘛   我覺得自己未嚴重到咁囉   同埋我次次睇親都要我照呢樣嗰樣   其實我就唔係咁鍾意咁嘅   因為我睇開嗰個醫生唔會咁   只係有次覺得我經痛得好犀利先叫我去照下   唔係轉介去照添喎 ~

醫生叫我唔好拎粗重嘢同做運動   我覺得可以放假咁   哈哈 ~

不過我都拎定醫生紙   但希望用唔着啦 ~

今次要比 $50 呀   話今次啲藥係貴啲   仲只係比 2 日藥   因為驚我食完仲痛要星期六再睇喎   我見到粒粒都好大粒有啲驚   哈哈 ~

睇完打比里奧大人   咁我想比百香果比阿妹   咁唔駛拎嚟拎去嘛   里奧大人話佢行開咗   之後講完呢句就見佢番埋位   咁我即刻拎比佢喇 ~

佢知我睇醫生   我話醫生話我似盲腸炎   我好驚做手術呀   佢即刻話我肯定唔係盲腸炎   因為佢老公試過   係行都行唔到同埋要即入院做手術   我話聽妳咁講我當堂無咁驚呀   哈哈 ~

同里奧大人去買晚餐   我揀完就番屋企沖涼先   沖完涼就見到里奧大人   佢話食完先沖   因為驚啲晚餐凍哂   我話沖埋先啦   同埋我都要焗熱尋晚嘅福建炒飯   無咁快食得住呀 ~

今晚都係睇培靈會   依家可以上網睇真係方便好多呢 ~

我好想食蕃薯糖水   所以好感恩可以煮到呀

睇完再睇下 Youtube   但睇睇下都瞓着咗   里奧大人話入房瞓啦   我話 9 點半太早呀   驚半夜會醒   不過最後 9 點 58 分都一齊瞓覺   實在太攰喇   哈哈 ~