黑椒牛肋條炒麵 + 咖哩漢堡扒炒麵 + 福花 ( 31-JUL-2023 )

之前剩咗半碗白飯   咁加幾條牛肋條再焗熱   再加埋七味粉   好似又多款味道咁嘛   哈哈

( 31-JUL-2023  MON )

尋晚瞓得麻麻哋   仲要 7 點醒咗   但感恩起身都精神呀 ~

早餐食芝士紅腰豆包   家姐星期六買㗎   我留番今朝先食   咁唔駛去買麵包嘛   呢個包算係多料   起碼眼見都唔少芝士粒呢   同埋個包嘅口感係我最鍾意嘅   所以今朝食得好開心   哈哈 ~

最搞笑家姐以為我尋日食   仲話無話佢知個包嘅味道   估我可能覺得唔好食 ~

個包都好大個   唔係因為已經放咗 2 日   我係可以分兩餐食呢

芝士同紅腰豆嘅份量算唔少㗎喇

面頭都有芝士粒

我要咁樣影張相比里奧大人   佢話咁樣先知佢有早餐食喎

菇場忙咗陣就 Hea 過   依家食咗兩星期藥   頭一星期身體要適應   感恩都好快適應到   但情緒就真係比較低落   呢樣就真係希望快啲過   始終我又唔係唔開心嘛   突然情緒低落   個人比較辛苦囉 ~

Lunch Time 出去行陣   之後買雲吞米番菇場食 ~

家姐每次 WFH 就會問我食咩 Lunch ?!   咁啱喇   比佢估下我食乜 ?!   我打咗 1.雲吞米  2.牛什米  3.片頭米   佢估牛什米   再話好少見我食雲吞   所以再估係片頭米   哈哈   不過我真係絕少食雲吞米   但今日唔想食牛同丸類   所以食雲吞呢 ~

同埋佢好多時唔會揀第一個   今次又係   哈哈 ~

唔忙有時都唔想郁   就係咁   我托住個頭瞓咗 5 分鐘呀   因為我真係好怕自己瞓着   所以望下電腦嘅時間   好記得係 15:05   但一起身係 15:10   真係勁驚    但真係好眼瞓囉   唉 ~

放工即走   番到屋企要即刻預備晚餐喇 ~

是日晚餐 - 黑椒牛肋條炒麵 + 咖哩漢堡扒炒麵 + 福花

黑椒牛肋條炒麵 - 唔想又翻焗   所以搞搞新意思   對於我嚟講係叫新嘢添呀   其實只係將牛肋條剪開一條條   之後再整蛋絲   再用生抽老抽黑椒調味   真係非常之簡單 ~

咖哩漢堡扒炒麵 - 真係唔想里奧大人連食 3 餐牛肋條   所以特登焗 3 塊豬柳漢堡   同埋用現成咖哩醬料撈勻   咁樣無咁悶嘛 ~

福花 - 食福花都要咬好耐下   但間唔中又要食啲淺色菜咁囉 ~      

洗完碗諗住開機洗衫   原來里奧大人中午已經開機   實在太好   可以做少樣嘢   哈哈 ~

沖埋涼再抖陣   之後同里奧大人聽網上崇拜 ~

聽到差唔多 10 點   再睇陣 Youtube   又係 10 點半瞓覺喇 ~

芝士焗牛肋條 + 小元貝節瓜湯 ( 30-JUL-2023 )

呢份係比里奧大人聽日嘅   因為佢焗熱飯嘛   咁無理由比有芝士嘅佢嘛

( 30-JUL-2023  SUN )

今朝里奧大人 7 點唔夠就起咗身   佢沖完涼出嚟   我話唔同佢食早餐喇   佢話講大話   見我笑住講喎   我話咁黑都睇到   果然好眼   哈哈 ~

廢話少講即去沖涼洗頭啦   早啲食可以多啲時間傾偈 ~

食完就去佢公司幫手   今朝拍住阿妹   啲人成日話我哋好似   包括里奧大人   咁依家仍然戴口罩嘛   所以有時啲人都會差啲認錯   哈哈 ~

番完學就去崇拜   之後番屋企喇 ~

同里奧大人喺屋企整午餐   食完就要去拎嘢   搞掂哂都 4 點幾 lu ~

尋日食剩嘅薯條同肉醬螺絲粉   再加今朝食剩嘅牛油丹麥酥

番到屋企即沖涼   之後休息休息   今日出咗成日汗呀 ~

5 點半預備晚餐   諗住 6 點半開餐   但最後搞到 7 點先食得 ~

是日晚餐 - 芝士焗牛肋條 + 小元貝節瓜湯

芝士焗牛肋條 - 之前醃咗㗎喇   但唔舒服就唔煮   所以係時候要食埋去啦   今次加埋 Mozzarella 芝士   焗完脆脆地真係勁正   雖然係漏   但我鍾意食呀 ~

小元貝節瓜湯 - 唔想蒜蓉蒸   所以滾個湯喇 ~

洗埋碗就沖涼   之後要熨 3 機衫   只係用咗 1 個鐘   我覺得算快手㗎喇 ~

今晚又焗塊豬肉乾比里奧大人食   唔係又唔記得佢存在㗎喇

睇下 Youtube   以為出身汗會好早眼瞓   但居然 11 點先眼瞓呀 ~    

肉醬螺絲粉 + 福花 ( 29-JUL-2023 )

尋晚食剩嘅鹽酥雞粒同豬扒   今晚可以做埋餸

( 29-JUL-2023  SAT )

感恩尋晚都瞓得唔錯   但如果一覺瞓天光就更加好啦 ~

早餐食芝士夾甜餐包   甜甜鹹鹹都好味㗎 ~

上車無雨   但落車就超級大雨   好在今朝早咗番工咋   因為之後落得仲大呀   我同事全身濕哂   真係帶咗遮都無用呢 ~

菇場唔忙呀   個個等放工 ~

買埋午餐就番屋企   今日 2 點至 7 點送電視   希望里奧大人番工前可以送到嚟啦 ~

里奧大人 3 點半番工   點知師傅打嚟話 10 分鐘後到   咁等埋啦   點知等到 4 點 10 分都未到   真係要打比師傅啦   佢話有阻滯要等多半個鐘先到   咁里奧大人都唔等喇   我自己喺屋企等算喇 ~

最終師傅 4 點 35 分先到   安裝連埋追台   差唔多 5 點先搞掂   之後即出發去姑奶屋企拎嘢   我都遲咗一個鐘呀 ~

去到佢屋企都坐低傾陣偈啦   不過傾咗半個鐘都要走   因為約咗家姐喺地鐵站呀   佢又買咗嘢比我 ~

家姐話見到個紅腰豆芝士包好似好正咁   所以特登買比我   本來諗住唔要   因為唔想佢等得嘛   估唔到最後都約到   開心開心 ~

去到地鐵站見到家姐   無啦啦又買咗美珍香豬肉乾比我   其實話喺地鐵站都知佢會買㗎喇   因為佢上次已經話比 Coupon 比我囉 ~

糟糟整咗肉醬長通粉比家姐   但家姐話食唔到咁多   所以話比我   咁又好喎   今晚唔駛煮麵   嘻嘻 ~

傾咗 15 分鐘都走喇   感恩去到巴士站只係等 3 分鐘就有車 ~

其實如果唔係佢特登買比我   我真係唔會拎   聽到佢把聲好開心話買咗個包比我   之後我話唔要喇   佢好失望嘅聲   所以我寧願自己趕都要去拎啦 ~

佢今日中午食乳豬燒鵝飯   我話正呀   原來佢想買埋乳豬比我添呀   我話堂食先好食   咁樣佢就唔敢買比我㗎喇   唔係下次又話買就慘啦   始終唔鍾意佢為咗買嘢比我而頻旗樸樸嘛 ~

番到屋企都即預備晚餐喇   里奧大人差唔多放工呢 ~

原來份量咁多   怪不得咁重啦   呢度可以食兩餐了

紅蘿蔔粒+脆肉瓜粒+車厘茄+蘑菇粒   下次我都要咁整先

是日懶餐 - 肉醬螺絲粉 + 福花

肉醬螺絲粉 - 好味道呀   連里奧大人都話好食   話個醬汁好味道同埋好多材料   真係好少聽到啦   糟糟算係第一個比佢讚啦   哈哈   咁糟糟讀 F & B 嘅   水準一定有番咁上下啦   家姐有次去佢屋企食團年飯   好似有 8 個餸   賣相勁似外賣   原來係糟糟煮   連家姐唔鍾意食中菜都話好味呀   家姐工人每次放大假   佢就會一手包辦哂家姐 14 日晚餐   仲要晚晚唔同先勁 ~

福花 - 煮半個先   因為唔係咁餓 ~

洗埋碗就開機洗衫   之後即沖涼喇 ~

芝士紅腰豆包 ($36) - 家姐喺 J'amie Pain 買嘅   我覺得佢哋嘅麵包算係高質素   我同里奧大人以前一出旺角   必定會買迷你芝士包   嗰時覺得好好食   講緊都起碼有廿年   我記得位置係一樣   但印象中店名都好似無變   所以家姐有時經過旺角   我都會叫佢買麵包㗎

美珍香嘅豬肉乾係好味   但我覺得貴囉

難得新鮮   所以叫里奧大人食一塊

今晚有新電視睇真係勁開心   之前有部份係暗咗   同埋 Youtube 都比較濛   但里奧大人話依家 4K 㗎喇   一定清同快好多啦   話時話   部舊電視係 2014 年買㗎   原來都用咗咁多年 ~

睇多陣 Youtube   今晚反而 11 點先瞓 ~   

鹽酥雞粒肉燥飯 (外賣) @ 屋企 ( 28-JUL-2023 )

+$12 追加鹽酥豬扒   但最後都食唔落   哈哈

食剩嘅 Pizza 同酥脆蝴蝶蝦   仲有海鮮卷   一次焗埋就最方便

( 28-JUL-2023  FRI )

尋晚瞓得都 OK   但都係要去廁所   同埋好多時真係瞓夠 6 個鐘就起身去廁所咁   好在都瞓得番   唔係 4 點起身真係太早喇   哈哈 ~

早餐食芝士夾甜餐包   唔駛搽醬占真係快手好多 ~

菇場唔忙   同阿花 Whatsapp 最好 ~

Lunch Time 出去買菜   之後買牛腩米番菇場食   其實出去嘅時候唔熱   所以我想食熱嘢   點知買完行番菇場   呢下先攞命   哈哈 ~

唔忙就仍然同阿花 Whatsapp   一係同 8 卦 Skype   所以好快就到 5 點半 ~

放工買埋車厘子同龍眼就番屋企   最搞笑里奧大人見到個紅色袋就開嚟睇   一見到龍眼就話做咩唔買車厘子   之後再開另一個袋見到車厘子   就話幾驚妳無買車厘子 ~

食完晚餐就去超市買嘢   條街真係焗熱到呢   真係等 Lift 企定嘅時候   啲汗係直流   我覺得好似喺泳池出嚟咁呀 ~

$48/2 Pack   但買滿 $120 減 $18   所以買 6 Pack   以前會買下零食   依家唔係無興趣   而係無咩新嘢出   哈哈

放低哂嘢都即開機洗衫   之後沖涼   次次好熱嘅時候沖涼   到最後用凍水沖身都覺得熱咁   下次真係抖下先好沖涼 ~

里奧大人今晚網上上堂   咁我就睇電視啦   今晚 "靈戲迫人" 大結局   不過都係睇下唔睇下   哈哈 ~

睇多陣 Youtube   仍都係準時 10 點半瞓覺 ~

焗海鮮卷 + 昆明生菜 ( 27-JUL-2023 )

尋晚食剩幾隻酥脆蝴蝶蝦   今晚焗埋嚟食

 ( 27-JUL-2023  THU )

尋晚瞓得都算 OK   起碼知道自己係瞓得林   雖然去咗次廁所   但算好快瞓得番呢 ~

早餐仍然食多穀英國方包   我就夾芝士   里奧大人就搽醬占 ~

菇場唔忙啦   做下自己嘢又傾下偈   唔係時間會好難過   哈哈 ~

Lunch Time 出去行陣   之後買雞翼酸辣米線番菇場食   我已經要中辣   但真係一啲都唔辣   不過算啦   唔食咁辣都好嘅   咁諗好啲 ~

仍然唔忙   所以想快啲放工 ~

放工即走   番到屋企都即刻預備晚餐 lu ~

是日懶餐 - 焗海鮮卷 + 昆明生菜

焗海鮮卷 - 終於清哂   不過都會再買呢   用來做儲備都唔錯㗎 ~

昆明生菜 - 加埋食剩嘅冬菇片   唔駛就咁食菜咁悶   哈哈 ~

洗埋碗就小清潔屋企   之後沖涼休息休息 ~

睇陣電視再睇 Youtube   今晚都係 10 點半瞓覺 ~

意式風情大批 + 酥脆蝴蝶蝦 (外賣) @ 屋企 ( 26-JUL-2023 )

意式風情大批 ($105) - 轉手藝薄批   但其實我鍾意食以前嘅薄批   其一脆邊好食   其二真係無咁飽啦   依家手藝薄批都好似食緊厚批咁   哈哈

酥脆蝴蝶蝦 8 件 (半價 $39)

( 26-JUL-2023  WED )

臨起身前係咁發夢   仲諗住會記得啲夢添 ~

早餐食牛油排包 & 多穀英國方包   仍都係搽醬占 ~

菇場唔忙   呢排都係咁 ~

今日又開始飲番北芪當參   因為真係要補補氣   哈哈 ~

Lunch Time 同船頭一齊行   見到個天色都灰灰哋   佢話聞到 "打風味"   之後我都除口罩索一索   真係 "打風味" 呀   同埋開始好焗咁   不過晏啲都好似掛 1 號風球了 ~

去買禮物比主日學老師   之後買埋手打牛丸米就番菇場喇 ~

本來想買法式輕多士   但我好怕送到老師手中係餅碎   所以都係買米餅穩陣啲

其實我要扣底   但點解同無扣底嘅份量係一樣咁嘅   咁樣我真係食唔哂嘛   唉

其好在菇場有兩把風扇仔   基本上番工一坐埋位會開廿分鐘左右   食 Lunch 就開足全程   所以一把無電可以即刻用另一把   唔係真係會一路食一路勁出汗呢

唔忙就做自己嘢   咁就好快放工咁㗎喇 ~

今晚唔想煮呀   所以叫 Pizza   同埋今日買大批只係 $105 咋 ~

落完 Order 就番屋企沖涼   里奧大人等下就去拎 Pizza ~

食完就開機洗衫   之後睇電視 ~

里奧大人同事嘅手信   呢幾款都好味道   都埋口感都煙韌呀

包裝都唔錯㗎   用來送禮最好

里奧大人 8 點左右去做運動   呢排我仍然有啲攰   唔係應該做下運動會好啲 ~

瞓喺梳化睇 Youtube   睇到都瞓咁滯   所以即刻坐直睇   因為我唔想 9 點幾就瞓嘛   最後頂到 10 點 20 分都即刻瞓覺喇 ~

黑椒牛仔骨烏冬 + 薑蓉叉燒粒炒飯 + 冬菇片鵝掌學斗 ( 25-JUL-2023 )

( 25-JUL-2023  TUE )

尋晚都係瞓得麻麻哋   今朝起身有啲反胃添呀 ~

早餐食醬占牛油排包   以前細個食到驚   咁大個就唔舒服就會食排包   所以見到就驚   之後隔好耐好耐再食番    又覺得幾好味 ~

菇場唔忙呀   但有啲眼瞓 ~

Lunch Time 出去買菜   再買埋白粥同炸兩就番菇場喇 ~

8 卦話食白粥唔熱咩 ?!   我覺得菇場無咩人食粥   可能覺得唔飽   因為佢哋個個真係要食飯同炒粉麵咁呢

阿花聽日請假   我話聽日 1 號風球呀   之後佢話如果放假再 8 號會好嬲   我話妳又話自己大把假 ?!   佢話有假都唔係特登等到 8 號先請嘛   呢句好笑   哈哈哈哈 ~

放工即走   番到屋企即預備晚餐喇 ~

是日晚餐 - 黑椒牛仔骨烏冬 + 薑蓉叉燒粒炒飯 + 冬菇片鵝掌學斗

黑椒牛仔骨烏冬 - 尋晚食剩嘅牛仔骨   再加 1 磅手打烏冬炒呀炒   咁里奧大人就有飯帶啦 ~

薑蓉叉燒粒炒飯 - 將叉燒剪開一粒粒   再加埋薑蓉一齊炒飯   真係超級好味㗎 ~

冬菇片鵝掌學斗 - 仲食剩幾隻冬菇   又可以留番聽晚食 ~

洗埋碗就即沖涼   里奧大人話熨衫唔做運動   因為唔想用哂啲時間   咁我話我熨啦   寧願佢做運動   雖然我都好耐無熨衫   但熨 2 機衫都只係用咗 40 分鐘   我覺得算快呀 ~

今晚都係有食車厘子   里奧大人叫我買多 1 磅啦   我話仲有 1 盒未食呀   唔想一次食太多   物極必反呢 ~

青檸半磅只係 $10   但就唔係好大粒咁呢

睇下電視同 Youtube   今晚 10 點 15 分都瞓覺喇 ~

蠔油燜冬菇鵝掌 + 黑椒牛仔骨 (外賣) + 蜜汁叉燒 (外賣) + 學斗 ( 24-JUL-2023 )

 

( 24-JUL-2023  MON )

今朝 9 點半起身   沖埋涼就同里奧大人去食早餐 ~

咖啡 & 鴦走   兩杯嘅味道淡如水   連里奧大人都話無味呀

番屋企抖陣   但 11 點都出發去婦檢喇 ~

Book 咗 11 點半   不過又係差唔多 12 點先到我睇呢 ~

今次最主要係睇經痛   之後再問醫生可唔可以食番藥   醫生話可以   同埋話我係受到隻藥   因為唔係個個受到   所以當中真係好感謝神嘅看顧醫治 ~

之後再問其他嘢啦   醫生搭住我手講解原因   呢個舉動真係令我好暖心   真係令我無咁驚㗎   再話半年後再覆診   始終有個瘤係麻煩啲 ~

咁最後做埋 HPV & 子宮抹片檢查   因為我本身到 8 月都要檢查嘅   所以醫生話今日做埋啦   下次唔駛特登嚟做 ~

最搞笑同醫生講拜拜啦   佢笑得好開心   仲叫我同里奧大人去飲茶放鬆下啦 ~

我哋又唔餓   又唔想行街   所以里奧大人話去剪髮   咁又好喎   不過遲咗 10 分鐘   里奧大人要急步去髮型屋先   我就買麵包再去藥房買藥再去髮型屋 ~

里奧大人剪完就要去拎嘢   咁之後就到我剪喇 ~

買埋晚餐就番屋企   放低嘢再去食下午茶   里奧大人話食沙爹牛肉包   我話唔食呀   今朝已經食咗沙爹牛肉   但我好奇怪點解佢兩餐都食牛   因為食得太多嘅話會皮膚敏感嘛   之後佢話係想我食牛肉補血   佢話呢排見我個咀唇都好白   不過我話已經食緊車厘子   唔駛食牛啦 ~

所以我都覺得自己好煩   成日貧血咁款   令到家姐同里奧大人咁擔心   唉 ~

食完就去超市買嘢   之後要即番屋企喇   因為里奧大人要開會   好在 15 分鐘就開完 ~

咁我沖埋涼就染髮   搞掂就開機洗衫 ~

今日都好熱下   出咗一身汗更攰   所以抖到 6 點幾先預備晚餐呢 ~

是日晚餐 - 蠔油燜冬菇鵝掌 + 黑椒牛仔骨 (外賣) + 蜜汁叉燒 (外賣) + 學斗

蠔油燜冬菇鵝掌 - 尋晚燜定   今晚食就一定入味啦   因為唔見有炸鴨掌   所以買包急凍 A 級鵝掌   6 隻只係 $22   我覺得抵過細細隻嘅炸鴨掌   真係好耐無食鵝掌   我食咗 4 隻   真係咬到牙都軟   哈哈哈哈 ~

黑椒牛仔骨 (外賣) - 喺另一間兩餸飯店買㗎   只係 $45   份量唔少同埋好好味呀   係好有黑椒味同埋啲肉無乸過   所以下次一定會再買呢 ~   

蜜汁叉燒 (外賣) - 里奧大人鍾意食   咁買 $50 啦   依家食燒味真係唔平了 ~

學斗 - 買咗 1 斤   聽晚再食埋餘下嘅半斤   呵呵 ~

洗完碗再沖涼   之後休息休閒 ~

睇下電影再靈修一陣就瞓覺 lu   原來都 10 點 45 分   唔怪得有啲眼瞓啦 ~