鳳爪排骨飯 + 雞蛋牛肉飯 + 雞扎 (外賣) @ 屋企 ( 31-MAY-2021 )

( 31-MAY-2021  MON )

今朝鬧鐘響   但起身暈暈地   所以都繼續瞓到 7 點半先起身 ~

早餐食芝腿治烘底   但食咗半件已經好飽   咁留番半件做 Lunch   反正個天都黑哂   都應該就落雨喇 ~

菇場唔忙   但今日個人有啲攰   唔知做乜鬼 ~

Lunch Time 落勁大雨   咁唔出去行喇   食少少 Flakes + 乳酪   抖陣再食埋半件芝腿治   咁都夠哂飽 ~

仍然唔忙   準時放工 ~

今晚仍然好攰咁   所以唔煮喇   買埋外賣就番屋企 ~

沖埋涼就食飯   唔駛煮飯又無去徑步   突然覺得多咗好多時間咁呀 ~

里奧大人熨衫   我就睇 ASTRO   有時覺得好好笑嘅片   都會同里奧大人一齊睇   見到成班後生仔咁好感情   真係替佢地開心  哈哈 ~

9 點半先睇 "會讀心術的那小子"   每日睇 1 集   好似睇咗好耐咁   不過我都最多睇 2 集   因為唔想咁夜瞓 ~

今晚 10 點 40 分都瞓喇   真係好攰咁呢 ~

黑毛豬午餐肉辛辣麵 & 牛肉米粉 + 菜心苗 ( 30-MAY-2021 )

里奧大人話好辣   我仲話我哋依家都唔食得太辣   之後我醒起   我原來落咗成包辣椒粉呀   平時落半包㗎咋

( 30-MAY-2021  SUN )

今朝 8 點左右醒咗   咁出去徑步   之後再大清潔廚房 ~

10 點出發   食埋早餐就番崇拜喇 ~

崇拜完畢都無周圍去喇   喺里奧大人公司等佢放工 ~

里奧大人同同事都係藍色衫   我又係藍色碎花裙   唔知以為係制服 ~

里奧大人同我講話佢地以為我唔着 Colorful 嘅衫   里奧大人話其實我有着   但着深色無咁肥   皇太后指住里奧大人話你唔肥咩 ?!?!?!   哈哈哈哈   真係無諗過會咁講   所以佢成日話啲人撐我   我話總知唔好得罪女人啦   哈哈 ~

之後同阿妹頂爺傾韓國食物   原來阿妹都有睇 Hamzy   我話睇咗佢好耐喇   有時我會叫里奧大人一齊睇㗎   因為佢隻狗仔好得意   個名又易記   叫做炸醬   好有韓國 Feel   哈哈 ~

傾到 1 點半左右就走喇   今日食埋 Lunch 先番屋企 ~

番到屋企就沖涼   之後睇 ASTRO 喇 ~

里奧大人 5 點瞓到 6 點   其實頭先都有啲想瞓   但合埋眼又瞓唔到喎   所以搞到個人唔知點咁   同埋勁反胃 ~

抖到 7 點先煮晚餐   其實唔想煮   但又唔想食外賣   所以求其煮麵算囉 ~

是日懶餐 - 黑毛豬午餐肉辛辣麵 & 牛肉米粉 + 菜心苗

黑毛豬午餐肉辛辣麵 & 牛肉米粉 - 今晚不在狀態煮嘢   差啲唔記得淥熟啲午餐肉呀 ~

菜心苗 - 喺超市買 $5.2 咋   其實我係叫阿姐執少少比我   呢個份量真係啱啱好 ~

洗埋碗就要即去徑步   家姐話就落雨   叫我快啲去徑步呀 ~

番到屋企開機洗衫   沖埋涼就睇劇 ~

今晚 11 點 15 分先瞓   算夜啦   唉 ~

蜜糖焗雞翼 + 粟米蛋花湯 + 自家制麵包 ( 29-MAY-2021 )

( 29-MAY-2021  SAT )

今朝 7 點 50 分都醒咗   所以又出去徑步喇   之後再去超市睇下生果   見到香蕉開箱   即刻買咗兩梳   一陣可以比一梳比家姐呢 ~

反正有時間   所以即大清潔屋企再拖地   最後就大清潔廚所   搞掂哂就沖涼   之後等家姐接我 ~

以前成日覺得食咗早餐先有力做嘢   所以依家都覺得自己勁架   起碼肯做運動   又唔駛食完先做家務   哈哈 ~

家姐 10 點左右接我   今朝真係一袋二袋比家姐   所以好感恩今日係 Off   咁之前喺一田買嘅嘢就可以比到佢嘛 ~

一入家姐屋企   叫佢即開冷氣喇呀   我實在太熱喇 ~

食完又同 Berry 玩下   又同家姐傾下偈   幾咁他他條條呀   哈哈 ~

好似好攰咁噃

又嚟眼啤啤

哈哈哈哈

喺梳化灘抖嘅時候   我覺得好似爭咁啲嘢咁   原來唔見 Berry 呀   佢喱咗喺梳化底   所以我即拉佢出嚟   哈哈

個樣好肉酸   哈哈

點都唔望鏡頭

佢應該真係好眼瞓

仍然無反應   所以我真係要拉佢出嚟喇   哈哈

好快又到 1 點半   里奧大人都放工   咁我都走人喇   感恩去到有小巴   咁樣出去就快好多呢 ~

今日主要係里奧大人買褲   感恩今日 Aeon 服裝部 8 折 ~

估唔到仲有好多衫裙都好抵   所以打咗好多次比家姐   之後佢話頭先放咗三百喺我袋入面嘅拉鍊袋   最搞笑係我拎支 Hand Cream 出來都唔發覺   好在無跌咗咋 ~

里奧大人買咗 3 條 7 分褲  每條 $139 再 8 折   4 條長褲 ($199 再 8 折)   我就買咗 2 條 1 pc ($59 再 8 折) & 連帽外套 ($138 再 8 折)   最後買埋 10 Packs 褲仔 ($39.9/Pack)  咁可以比 5 Packs 比家姐 ~

比錢嘅時候   職員話買滿 $1,000 有 $80 現金回贈   感覺真係抵上抵呀 ~

其實之前我買 TOPVALU 品牌嘅衫同裙都好舒服   之後里奧大人又買件 Tee 同褲試下   佢就成日話質地舒服   所以依家都鍾意去 Megabox 呢   哈哈 ~

又好耐之前都買過 TOPVALU 嘅烏冬   又係好鬼正   不過無出好耐 lu   Berry 姐之前食嘅魚仔乾   又係呢個品牌   最緊要所有嘢唔係貴嘛   但質素又有喎   所以真係好吸引囉 ~

買完都已經接近 3 點   係時間食下午茶喇    我同里奧大人講話有得 shopping 真係可以唔食嘢   不過佢話佢唔得   哈哈 ~

去到日和號   原來 3 點有下午茶時間   咁仲有 5 分鐘就到   當然等下午茶啦   因為想份量無咁多呢 ~

火炙鱈場蟹柳壽司 (+$16) - 特登叫比里奧大人㗎   佢都鍾意食蟹柳呢

味付螺肉 (+$15) - 好耐無食喇   估唔到份量仲好多添呀

叉燒稻庭烏冬 ($63) - 烏冬煙韌呀   食得好開心   哈哈

豬軟骨讚岐烏冬 ($72) - 呢個都好正呀   里奧大人唔食軟骨   所以益哂我

下午茶餐係送加州卷 & 飲品

食完抖陣就去 Ikea 同 Aeon 超市買嘢   換埋積分就番屋企 ~

今日拎住 4 袋嘢   所以要搭的士番屋企   咁里奧大人無啦啦話袋榴槤喺邊 ?!   我以為漏低咗喺地下   諗住番轉頭   點知原來里奧大人自己拎住囉   佢話因為好輕以為無拎到喎 ~

番到屋企即沖涼   之後都抖喇 ~

里奧大人又話比番 $1,000 比我   佢同家姐做嘅嘢都係一樣   哈哈 ~

因為唔係咁餓   所以 7 點 45 分先預備   8 點 15 分就可以開餐喇 ~

是日懶餐 - 蜜糖焗雞翼 + 粟米蛋花湯 + 自家制麵包

蜜糖焗雞翼 - 我喺 Aeon 超市係咁同里奧大人講話買嘢食番屋企   之後記得雪櫃有醃咗兩晚嘅雞翼呀   咁今晚食埋去啦 ~

粟米蛋花湯 - 無買菜   飲粟米湯最好 ~

自家制麵包 - 里奧大人同事比架   咁就好喇   唔駛煮麵   食包都夠飽呢 ~

洗埋碗就開機洗衫   沖埋涼就食榴槤   年紀大真係食 2 嚿已經好鬼飽   不過咁都好   唔駛食咁多   始終糖份好高架   少食多滋味   同埋 1 個要 $149   我覺得貴啦   真係一年一次都夠喇 ~

睇多陣 ASTRO 就睇 "會讀心術的那小子"   今晚睇到 11 點 15 分   我同里奧大人講話要瞓啦   佢聽朝要番工嘛 ~

柚子香檸雞 & 叉燒拚燒鴨 + 蒸節瓜 ( 28-MAY-2021 )

喺大家樂買晚餐有樣好   因為肯定可以食兩餐   哈哈

( 28-MAY-2021  FRI )

今朝 6 點 10 分起咗身   但都可以瞓得番嘅   哈哈 ~

依家 6 點 57 分起身   感覺時間好用啲   因為想 20 分鐘徑步   5 分鐘做伸展 ~

慢慢行番屋企再沖涼   之後番工   咁樣唔駛咁趕 ~

早餐食奶醬多   依家真係唔係咁想食佢囉 ~

菇場忙呀   仲要煩嘢   差唔多 Lunch Time 前先搞掂 ~

呢排着平底水鞋   所以對腳有啲痛   今日都唔行喇   直接去買牛丸米番菇場食   第一次感覺無汗番菇場呀   哈哈 ~

又忙咗輪就等放工   番到屋企都即煲雪梨無花果茶   係時間清潤一下呢 ~   

里奧大人就 6 點半放工   咁我都即預備晚餐喇   不過今晚就咁焗同蒸就搞掂   但都要 7 點幾先開餐   呢排手腳慢   哈哈 ~

是日懶餐 - 柚子香檸雞 & 叉燒拚燒鴨 + 蒸節瓜

柚子香檸雞 & 叉燒拚燒鴨 - 尋晚特登留番啲柚子汁   食落就無咁乾喇 ~

蒸節瓜 - 今晚點都要清埋最後 2 個節瓜呢 ~

洗埋碗就開機洗衫   沖埋涼就休息喇   今晚唔徑步喇   比對腳休息下 ~

9 點幾開始睇 "會讀心術的那小子"   依家開始緊張喇   但都係睇 1 集就算 ~

今晚 11 點鬆啲都瞓   雖然聽日 Off   但都唔會咁夜瞓   想早睡早起   哈哈 ~

柚子香檸雞 + 菠蘿咕嚕肉 + 叉燒拚燒鴨 (外賣) @ 屋企 ( 27-MAY-2021 )

柚子香檸雞

菠蘿咕嚕肉

叉燒拚燒鴨 - 本身已經想食燒鴨   但又唔食咁多啦   所以要油雞   但居然無哂油雞   真係整定要食燒鴨呀   哈哈

( 27-MAY-2021  THU )

我發覺好多時半夜去廁所   之後就會發咗好多夢   今朝 7 點鬧鐘響   都唔知係夢境定真實   不過聽咗一陣都知係鬧鐘響了   哈哈 ~

梳洗之後即去徑步   今朝比較趕   都係 7 點前起身好啲 ~

今朝早咗一班車番工   其實我鍾意 8 點 20 分前番到菇場   咁就可以有好多時間食早餐同睇 Youtube 喇 ~

早餐食芝腿治烘底   我都係鍾意食鹹嘢多啲 ~

菇場忙咗陣又 Hea 過   呢排好靜呀 ~

Lunch Time 去一田買嘢   買咗唔少嘢   不過都係同家姐 Share 嘅 ~

今次買咗 4 包 KETTLE 手製薯片 (特價 $36.9/2包) + 芝士 ($56.5/3包) + 紀文迷你燒魚卷 ($13.9/2包)    之後打比家姐   佢話泰國扎肉好抵   又番轉頭買 4 條 ($95)   之後再話要牛油果 ($24.8)   佢簡直係聲控買嘢   哈哈   不過好在我知道哂位置   所以就唔駛搵囉   臨比錢前我又買咗 4 包 ORIHIRO 啫喱 ($25.9/2包)   今次買嘢連比錢只需要 25 分鐘   真係算快㗎喇 ~

快快手買埋燒賣腸粉番菇場喇   因為已經 12 點半呢 ~

唔知係咪頭先趕住買趕住走   又熱喎   所以突然間好鬼攰呀 ~

好在菇場唔忙   可以抖到放工 ~

里奧大人又要 6 點幾先放工   咁我番屋企放低哂嘢就去徑步喇 ~

徑 30 分鐘   再行陣超市   之後就買外賣番屋企 lu ~

咁啱里奧大人差唔多時間番到嚟   可以幫手拎嘢   哈哈 ~

沖埋涼先開餐   真係好鬼爽呀 ~

抖陣再食木瓜   差唔多 10 點先睇劇 ~

不過今晚都攰   所以我 10 點 40 分都瞓覺先喇 ~

燒汁焗鯖魚 + 小旺菜粉絲鍋 ( 26-MAY-2021 )

( 26-MAY-2021  WED )

感恩一覺瞓天光   仲要 7 點唔夠就自然醒咗   所以梳洗後就去徑步喇 ~

之前應該又落咗一場大雨   所以無咁熱呢 ~

早餐食奶醬多   簡直完全無胃口   但飲凍嘢就一定要食嘢囉 ~

菇場忙呀   好快又到 11 點 45 分 ~

諗住出去行陣   點知落勁大雨   咁都唔出去 lu   好在有杯麵 ~

無啦啦勁勁勁眼瞓   其實預咗食杯麵會咁   味精太重喇   所以去廁所做 1 分鐘伸展   真係當堂精神番哂   最衰驚 Pantry 突然有人   如果唔係喺 Pantry 做就好啲 ~

一開工就同阿花 Whatsapp 傾偈   又傾咗 1 個鐘   不過對眼就好攰喇   哈哈 ~

唔忙喇   放工準時走 ~

里奧大人話 6 點幾先放工   咁我可以徑步先喇   但今晚拎住個袋直接去徑步 15 分鐘   條腰真係幾攰下   哈哈哈哈   但唔想上上落落   咁樣慳番唔少時間㗎 ~

番到屋企就開機洗衫   諗住沖埋涼就預備晚餐   但里奧大人已經上車   咁我都要即預備晚餐 lu ~

煮蝦子麵比里奧大人   我就食餸   今晚都要 7 點半先開餐 ~

是日懶餐 - 燒汁焗鯖魚 + 小旺菜粉絲鍋

燒汁焗鯖魚 - 懶呀   所以焗鯖魚 ~ 

小旺菜粉絲鍋 - 都係懶人菜首選   哈哈 ~

洗埋碗就沖涼   之後叫里奧大人幫我染髮   9 點幾搞掂   沖埋涼就抖陣 ~

今晚仍然睇劇   但 10 點 45 分都瞓覺 lu ~

點心 (外賣) @ 屋企 ( 25-MAY-2021 )

腐皮卷 / 炸雲吞 / 蝦角 / 芋角 / 韭菜餅 / 粟米餅

山竹牛肉 / 豬肉燒賣 / 潮州粉果

( 25-MAY-2021  WED )

今朝 8 點醒醒地   勁想去徑步   不過落雨   所以可以瞓番 lu ~

瞓到 9 點都真係醒喇   里奧大人就去買早餐   好在佢肯買咋   因為比着我次次買早餐   我真係唔係咁想囉   哈哈 ~   

里奧大人要清假   咁我都會請假倍佢   反正去唔到旅行   每月放兩日都唔錯 ~

成朝都落勁大雨   要等無咁大雨先出去呢 ~

12 點左右終於無雨   所以出旺角朗豪坊行下 ~

我覺得個商場冷氣唔夠   因為我一入到去都有啲攰   反而某啲商店嘅冷氣又夠喎 ~

行到 1 點半左右   見到間食炸雞嘅食店   所以入去食喇 ~

@ NENE CHIEKEN

開餐

炸雞達人 ($88) - 以為細細件好快食哂   但食 3 件已經好鬼飽   可能我一開始食有醬嘅雞呀   里奧大人熱氣又唔幫得我食   嗚嗚 

石鍋牛肉拌飯 ($68) - 份量都好多

百事可樂 & 凍檸茶 (+$2)

今日食完就算幾攰都必須要行   不過朗豪坊實在無咩冷氣咁   所以急步行完再行旺中   最後再行花園街   買埋木瓜就搭小巴番屋企喇 ~

我想徑步   但里奧大人話唔好   因為我已經行咗 1 萬步   佢驚我 Over 喎   不過今日真係幾攰下就真嘅 ~

沖埋涼就抖喇   咁又已經 5 點幾 lu ~

6 點 45 分開始整晚餐   今晚只係焗熱同蒸熱   所以 7 點 15 分可以開餐喇 ~

沖埋涼就開機洗衫   里奧大人 8 點半開會   差唔多 9 點半就開完 ~

抖陣就睇 "會讀心術的那小子"   里奧大人話我唔係咁鍾意睇呢套戲   話好少會瞓覺先   我話唔係呀   因為依家朝早做運動   所以想早啲瞓   佢話係喎   咁佢都瞓覺   哈哈 ~

不過做咗運動之後   真係 10 點半已經開始眼瞓咁㗎   所以 11 點前都多數瞓覺囉 ~