干炒肉片河 (外賣) + 焗年糕 ( 28-FEB-2021 )

啲年糕焗出嚟   個樣都好樣衰下   哈哈

( 28-FEB-2021  SUN )

9 點起咗身   之後做一陣家務就沖涼 ~

家姐 9 點 45 分接我   所以要即去買早餐喇 ~

Berry 已經喺門口歡迎我   但就唔好咁大聲吠好啲   真係耳仔差啲聾咁滯   哈哈 ~

每次都同家姐 Share 食   佢好少食呢啲早餐   所以佢好開心㗎   同埋佢鍾意飲啡走

我正想食早餐   但見佢坐定定又幫佢影張相先

點呀妳 ?!   哈哈哈哈

比零食佢食   個樣好緊張咁    

Berry 今朝肚屙呀   咁里奧大人起碼 2 點放工   我又唔想行   所以陪下 Berry 姐啦 ~

家姐同姐夫 12 點唔夠就出去   我就仍然喺佢屋企陪 Berry   佢真係好乖喎   其實應該係屙到攰   所以係咁瞓 ~

中緊眼瞓

咁我都坐梳化陪佢啦   希望佢喺我大肶瞓   不過係無嘅   哈哈哈哈

頂唔住啦   要瞓覺

瞓瞓下又跳落地   咁我都即刻整好張毯比佢瞓   我怕佢凍呀

又唔瞓

郁來郁去

肥肶

終於可以托住佢個頭仔   哈哈哈哈

神情呆滯

差唔多 2 點幾   啱啱我去廁所   聽到 Berry 吠一下   咁我都估到家姐番嚟   家姐都好愕然我未走 ~

本身諗住去姑奶屋企拎嘢   但里奧大人坐車番咗屋企   咁我都番屋企喇   家姐話整定車我番屋企   咁又係   如果我早走   咁肯定自己搭車啦   哈哈 ~

我走嘅時候就   佢就咁嘅樣   似乎好攰

同里奧大人差唔多時間番到屋企   所以叫佢買 tea 番屋企食呀 ~

我只飲咗杯奶茶咋   盒炒河完全無食過   激死我啦   之得叫一個下午茶餐就算啦

里奧大人瞓晏覺   我就執衫   之前買得太多抓毛衫   依家都應該唔駛着啦   所以要 Pack 好去 ~

7 點唔夠預備晚餐   所以 7 點半就可以開餐 ~

是日晚餐 - 干炒肉片河 + 焗年糕

干炒肉片河 - 炒翻熱就搞掂   第一次要加油炒呀   本身啲河粉比較乾   我唔落油肯定痴底 ~

焗年糕 - 懶呀   唔想開鑊   我上網睇到有人焗年糕   咁我又試下   只係外皮比較硬   但都煙韌   不過無諗過焗出嚟咁樣衰   哈哈 ~

洗埋碗就沖涼   之後休息睇電視   抖陣再食生果 ~

里奧大人坐喺我隔離食藍莓   好奇怪佢嘅手勢係揀嚟食咁   即係隻手喺碗都撩撩去咁   正路係一拎起就食嘛   之後我知點解啦   原來佢揀哂啲細嘅嚟食   留番啲大粒嘅比我食呀   真係好感動呀 ~

好耐好耐之前   我住醫院   里奧大人買咗一盒藍莓比我   係好大粒㗎   同埋好甜   真係到依家都食唔番   所以佢依家仍然記得   好想再買   但都幾難了   哈哈 ~

今晚食埋兩個燒餅   焗完出嚟都已經有啲硬喇   哈哈 ~

洗埋碗就開機洗衫   搞掂哂就沖涼 ~

今晚都幾攰   11 點左右都自己瞓先喇 ~

素餃子 & 腐皮卷 & 什錦齋滷味 + 土伏苓牛大力鑽地老鼠豬骨湯 ( 27-FEB-2021 )

鹹蛋散好味呀

( 27-FEB-2021  SAT )

今朝天氣勁潮濕   仲落毛毛雨   真係好唔想番工   哈哈 ~

懶床

~

早餐食丁米   咁就可以頂到 2 點 ~

菇場唔忙啦   真係 Hea 住等放工 ~

放工即走   同里奧大人喺淘大食嘢   咁我就行住等啦 ~

諗住買件夾棉褸   比錢嘅時候   因為里奧大人話已經落車   我就咁買件褸就算   點知職員話買第 2 件有 88 折   又話買滿 $300 就即做會員送 $50 超市 Coupon   但我話要去食飯呀   叫佢幫我 keep 住件褸先   一個鐘頭先再嚟買 ~

之後里奧大人打嚟問邊間食嘢 ?!   我話買緊衫呀   佢話明明話搵餐廳   做咩無啦啦去咗買衫   我覺得佢講得好好笑呀   我不嬲係咁㗎啦   如果得我一個人行   肯定會睇衫同零食先㗎架   哈哈 ~

本來想去食台灣嘢   但間食店好細又迫   同埋好多人呀   所以唔會去 ~

再諗住去上海姥姥啦   見到午市套餐又唔係咁啱   所以都係去南記喇 ~

食完就即去買衫   叫里奧大人周圍行住等我 ~

里奧大人至愛

我唔知原來可以單叫豬腩肉酸辣米線㗎   仲只係 $38   好在家姐話我知   因為加埋春卷真係好飽好飽囉 

終於買咗 1 件夾棉褸 + 2 件中袖 Tee    只係 $348 咋   仲要有張 $50 超市 Coupon   即係 $100 一件咋   講緊仲要係褸喎   所以里奧大人問我買咩同價錢   我講完   佢只係哦一聲   即係抵囉   但佢又唔可以直接話抵   因為咁樣會令我再番轉頭買呢   哈哈 ~

里奧大人話去德福   我話又有咩想買 ?!   佢話想買珍珠奶茶比我飲呀   因為佢記得我講話德福嗰間好飲   呢下好感動   仲記得我話生日想飲珍珠奶茶   哈哈 ~

不過我話真係飲唔落喎   佢話買番屋企飲咪得囉   我話唔啦   真係唔想飲呀   佢先肯罷休 ~

今晚唔想煮   所以去埋 Taste 買晚餐同街市買湯料就番屋企喇 ~

收埋對手仔   好似唔想比人抱咁噃

番到屋企都沖涼先   呢啲潮濕天氣真係令人好唔舒服喇 ~

抖陣就煲湯   咁 6 點左右可以飲湯先 ~

差唔多 7 點預備晚餐   7 點 40 分可以食得喇 ~

是日懶餐 - 素餃子 & 腐皮卷 & 什齋滷味 + 土伏苓牛大力鑽地老鼠豬骨湯

素餃子 & 腐皮卷 & 什齋滷味 - 樣樣都好味道 ~

土伏苓牛大力鑽地老鼠豬骨湯 - 湯包 ($22) +  2 斤粉葛 ($21) + 西施骨 ($60)   豬肉佬切嘅時候好大件㗎   我心諗買 $60 真係值得   但原來係得一半咋   哈哈哈哈 ~

洗埋碗就沖涼   抖陣就同里奧大人一齊睇戲 ~

今晚 11 點幾都瞓喇   其實算遲添喇   哈哈 ~

黑糖薑汁年糕 ( 26-FEB-2021 )

呢個年糕都有薑味   唔錯唔錯

( 26-FEB-2021  FRI )

今日我生日呀   所以同里奧大人一齊請假慶祝 ~

9 點 15 分起身   里奧大人去買早餐   我就刷牙沖涼 lu ~

11 點左右出發去整嘢   感恩好快搞掂   之後去尖沙咀拎藥喇 ~

@ K11

我同里奧大人講話呢隻係龍   佢話呢隻係獅子

之後我話啡黃色係老虎   里奧大人好驚話呢隻其實都係獅子   哈哈哈哈

拎完藥就走人   但都係 12 點幾   所以同里奧大人行陣商場先 ~

差唔多 2 點就去 Outback   因為想避開哂 Lunch Time 嘅人潮   但如果多人嘅話   我都會即轉場   感恩去到真係無咩人   咁就可以食得安心啲呢 ~

黑糖包 - 今次唔太 Soft

蘑菇湯 - 勁好味呀   我好鍾意飲㗎

燒肉醬味豬肋骨 ($128) - 好似無咩汁   但其實係舖滿汁   仲要骨肉分離   正呀

香辣炸雞膇 ($72) - 我必食㗎   但里奧大人今次只食 2 隻   即係幾乎我食哂咁滯   食完真係好飽囉   可能炸嘢關係   同埋我又蘸哂啲芝士醬   哈哈 

真係好飽   我同里奧大人講話點攰都要行 ~

咁就行海港城啦   今日都唔少人   但就未去到多人呢   同埋今次夠冷氣呀   行埋 Citysuper 就再去花園街行下 ~

好大件麥炸雞呀   我同里奧大人講係咪派雞呀 ?!   不過我話放心   我都唔會拎啦   又唔係即刻番屋企   哈哈   

好少喺尖沙咀慢行   以前人太多   想行都行唔到

仲有好大棵樹   真係依家先知咋

出到花園街   里奧大人話一陣去德福   我話有嘢買 ?!   佢話想買珍珠奶茶比我飲   因為我話生日要飲珍珠奶茶   我話唔駛啦   出完旺角唔會再去德福囉   頭先講話是但去一個地方嘛 ~

行呀行   又買咗 3 條睡裙   勁開心呢 ~

望下錶原來已經 5 點   怪不得開始攰啦   最後買埋燒餅就搭小巴番屋企喇 ~

我哋今日行咗接近 16,000 步   真係行大潭水塘都無咁多步呀   哈哈   所以真係要番屋企抖喇 ~

我想飲酸嘢   所以去八方雲集買百香果綠茶   之後里奧大人睇到黑糖珍珠奶茶 Poster   又話好想飲   佢實在太假啦   已經 5 點幾仲點會想飲奶茶吖   我都知佢想比我飲㗎喇   咁買啦   等佢可以完成我生日願望   哈哈 ~

番到屋企真係要即沖涼   今日又熱又濕   出咗好多汗呀 ~

今晚唔餓呀   但點都要食啲嘢   所以 7 點幾煎糕呢 ~

是日晚餐 - 黑糖薑汁年糕

黑糖薑汁年糕 - 家姐喺八珍買㗎   今次我好有心機煎   搞掂就喺 FB 寫嘢   所以就未食住   之後到我食啦   係未熟透㗎喎   但里奧大人已經食咗 1 件   真係比佢激死   點會食得落口㗎 ?!   口感同熟嘅完全唔同   佢話唔想我再煎   驚我辛苦   我話你肚屙時要照顧   我仲辛苦啦 ~

洗埋碗就大清潔廚房同廁所   之後即沖涼 ~

我次次見到佢瞓覺樣   就覺得佢好得意   同埋好乖   哈哈哈哈

  

今晚勁攰   但睇電視睇到 11 點半先瞓覺 ~

豆醬炆豆腐五花腩 + 鮮冬菇節瓜鹹蛋湯 ( 25-FEB-2021 )

( 25-FEB-2021  THU )

尋晚里奧大人開會開到 11 點半   我覺得超級夜呀   但今日要番公司   如果唔係可以瞓多一個鐘呢 ~

同里奧大人講話隻手發炎   佢勁驚以為我喉嚨發炎   我話隻手又舉唔起呀   煩死 ~

今朝潮濕又凍   仲落埋雨添 ~

早餐食餐蛋治   因為如果中午落雨就食 Flakes 算喇 ~

菇場忙咗陣又 Hea 過   最緊要唔駛打字   哈哈 ~

里奧大人朝早 10 點就已經有紅豆沙食喇   仲要咁多料   勁羨慕呀

Lunch Time 出去行陣   今日涼咗唔想行街   所以行一田喇 ~

行到差唔多 12 點 20 分就去買燒賣腸粉番菇場食   懶得食杯裝米粉 ~

里奧大人 1 點半又有紅蘿蔔湯   佢真係幾乎每星期都有一次湯水飲㗎   真係滋潤過我呢   

仍然唔忙   咁就好喇   可以準時放工 ~

番到屋企都要即刻預備晚餐   因為里奧大人已經放工呢 ~

7 點左右開餐   都算快㗎喇 ~

是日晚餐 - 豆醬燜豆腐五花腩 + 鮮冬菇節瓜鹹蛋湯

豆醬燜豆腐五花腩 - 本身諗住韓國辣醬做汁   但怕里奧大人熱氣   所以一定要轉陣   突然醒起有黃豆醬   用佢炆餸真係好好味   之前買咗中華硬豆腐   原來都好易煎   今次算係煎得好靚   哈哈 ~

鮮冬菇節瓜鹹蛋湯 - 尋晚食剩幾粒鮮冬菇   今晚食埋去   我之前唔知道鮮冬菇可以留架   問 8 卦會唔會留過夜 ?!   佢話佢次次買鮮冬菇都係凍㗎   所以我先夠膽放雪櫃呢 ~

今晚里奧大人食咗好多餸   同埋飲哂成碗湯食埋湯渣   真係第一次咁樣咋   佢話因為飯嘅份量啱啱好   同埋佢話個餸好味道   第一句應該咁講啦   哈哈 ~

洗埋碗又大清潔廚房   咁順便拖地   又比里奧大人話我強迫症   佢真係好鍾意咁話我 ~

開機洗衫就沖涼   隻手仲有少少痛   所以真係要抖下 ~

里奧大人熨衫   好在佢好肯熨咋   我成日用錯力熨衫   次次熨完   隻右手會痛囉   唉 ~

今晚 11 點幾瞓都瞓喇   天氣潮潮濕濕   個人係特別特別攰 ~

韓國炸醬麵 + 鴨胸蒸節瓜 ( 24-FEB-2021)

( 24-FEB-2021  WED )

呢排真係瞓極唔夠   可能天氣影響 ~

今朝好大風   短頭髮有樣好   唔會話吹到變咗隻女鬼咁   哈哈 ~

早餐食芝腿治烘底   因為好想食鹹嘢 ~

菇場唔忙   又係 Skype 過日   諗起初初番工   真係悶到爆   所以同 CC 係咁 MSN   咁啱佢都得閒   之後佢忙就唔可以成日傾   我就開始寫 Bblog   從網絡世界認識朋友   所以我成日覺得番工好似喺網吧咁㗎   哈哈哈哈 ~ 

Lunch Time 都係出去行陣   買牛腩河番菇場食 ~

無啦啦勁忙   真係有啲唔慣呀 ~

放工即走   番到屋企即預備 ~

里奧大人 7 點番到屋企   又問沖唔沖得涼 ?!   我話今晚肯定可以   仲要等起碼 15 分鐘先開餐呀   哈哈 ~

是日晚餐 - 韓國炸醬麵 + 鴨胸蒸節瓜

韓國炸醬麵 - 春醬 2 月到期   真係點都要食埋去   我買嘅時候以為就咁倒落鑊煮就可以   但上網睇煮法   係要炒熱啲春醬   正宗好似係有薯仔椰菜   但我唔想煮咁耐   所以加鮮冬菇   因為易熟嘛   唉   又要炒又要搞   煮完一大輪已經攰到死呀   好在無失敗咋   同埋好在里奧大人唔鍾意食咋   哈哈哈哈   煮完一次真係驚驚 ~

鴨胸蒸節瓜 - 我其實本身就咁蒜蓉蒸節瓜   但我驚煮麵失敗   咁就加埋鴨胸一齊蒸   等里奧大人可以有啲肉咬下嘛   節瓜麵都真係無咩胃口嘅   哈哈 ~

洗完碗又大清潔廚房   因為隻右手好痛呀   仲要洗咁耐   覺得好痛苦囉 ~

搞掂哂就開機洗衫   之後即沖涼喇 ~

唉   依家連條頸都痛埋   真係要里奧大人即刻幫我按摩下   係舒緩咗啲   但仍然痛囉   嗚嗚 ~   

里奧大人 8 點半熨衫   叫佢唔好熨係都要熨   熨到 9 點 20 分先停   因為 9 點 35 分要開會 ~

Berry 快過家姐上床   睇佢個款都好眼瞓咁   哈哈

我 10 點 45 分要瞓喇   里奧大人都仲未開完會呀 ~