蜜汁焗五花腩 + 甜酸齋 (外賣) + 菜心 ( 30-JUN-2021 )

( 30-JUN-2021  WED )

一覺瞓到 10 點 20 分自然醒   所以起身都好精神   感恩感恩 ~

沖完涼就食早餐   抖陣就出發去西貢 ~

去到西貢就周圍行下   不過天氣勁焗熱   個天又好似想落雨咁   所以都唔坐船出去 lu ~

食午餐   冷氣夠勁   所以勁舒服呀   哈哈 ~

天婦羅&雜錦壽司 ($60) - 呢 Set 有齊哂我想食嘅嘢   所以食得好滿足 

日式咖哩雞扒飯 ($58) - 里奧大人話好味道呀

食完就周圍行下   之後再去碼頭行一陣   個天成日好似想落雨咁   所以都唔坐船去鹽田梓喇   同埋我個肚仲係有少少扯住唔舒服   都係留番下次先去喇 ~

今日都好焗熱   但勝在無乜人行   哈哈

呢邊唔算多烏雲

好開心又見到鷹呀

有個男人話就嚟落雨   所以我哋都走喇

坐小巴去德福行陣   之後去 MP 買甜酸齋   再去 Haagen Dazs 食雪糕   之後就番屋企 lu ~

芒果紅桑子 & 雲呢拿焦糖朱古力蛋糕   呢兩個球要 $69   我覺得超級勁貴   好在我有 $50 Coupon 咋   里奧大人話終於覺得經濟裝真係抵食好多   哈哈

呢個天時出街行真係唔講得笑   焗熱到一個點   不過里奧大人話想同我出去行下   唔好嘥咗日假   但就唔會話出去成日   因為我每月一到比較攰 ~

6 點幾煮飯   感恩可以煮到飯呢 ~

是日懶餐 - 蜜汁焗五花腩 + 甜酸齋 (外賣) + 菜心

蜜汁焗五花腩 - 之前喺 Aeon 超市買嘅   所以想快啲食埋去   原來都係薄身五花腩   所以整唔到叉燒   咁就原條焗再切片   咁樣都好好味 ~

甜酸齋 (外賣) - 好想食酸齋   但其實都好想食齋鴨腎   不過 MP 嘅就唔好味囉 ~ 

菜心 - 係時間又食番啲正氣菜   哈哈 ~

洗埋碗就沖涼   之後休息喇 ~

睇劇睇到 11 點幾   個肚有啲扯住痛   所以都瞓覺 lu ~

韓式辣味鍋貼 + 招牌鍋貼 + 韭菜水餃 + 大腸麵線 (外賣) @ 屋企 ( 29-JUN-2021 )

里奧大人笑住話我點都要食韓國味道   哈哈

( 29-JUN-2021  TUE )

今日開始放假   不過今日要去婦檢   所以 9 點都起身 lu ~

梳洗之後就食早餐   食完抖陣就沖涼 ~

10 點幾出發去旺角婦檢   去到診所啱啱好 11 點半 ~

抖咗 15 分鐘就量血壓   居然 161 / 94   但我都估到係高㗎喇   因為我好驚呀 ~

等到 12 點半先到我呀   今朝每月一到   感恩可以做到子宮抹片   再抽血驗其他嘢 ~

醫生超級細心   又解釋番食藥嘅反應   原來我算係正常反應   佢仲話記得我兩年前同佢講嘅嘢    因為我講都未講完   佢就講出個原因   之後我又同醫生講話 Book 咗睇醫生之後就開始驚   醫生問驚咩 ?!   我話驚有咩事囉   佢都笑哂同我講話放鬆啲   唔好咁緊張啦 ~

我今次再抽血   驗下有無貧血   再驗埋肝胃血色素   抽完血之後   我額頭冒哂汗   醫生話有個病人仲誇張   抽完血張枱係濕哂 ~

比錢嘅時候   姑娘都知我緊張   所以強調報告無事都會打比我   哈哈 ~

搞掂哂差唔多 1 點先搞掂   之後再 Book 另外一個婦檢就走人喇 ~

搭小巴去 Megabox   話咁快又 2 點   咁去食午餐喇 ~

今次去餃子駅食免費餃子套餐   因為用積分換嘅   哈哈 ~

酥炸排骨湯麵 + 韭菜豬肉餃 & 白菜豬肉餃 + 豆漿 (原價 $108) - 餃子真係非常普通

酥炸排骨湯麵好味道呀

擔擔湯麵 ($51) - OK 啦

食完行陣再去 Aeon 超市買嘢就番屋企喇   個人開始好攰咁呢 ~

個肚扯住唔舒服   所以沖完涼都要休息 ~

今晚都唔想煮呀   叫里奧大人去買餃子番屋企食 ~

抖陣又沖多次涼   差唔多 9 點左右睇 "我的 ID 是江南美人"   今晚都係睇到 12 點先瞓 ~ 

鳳爪排骨飯 + 煎蘿蔔糕 & 芋頭糕 + 鮮竹卷 + 雞扎 (外賣) @ 屋企 ( 28-JUN-2021 )

下次唔會又飯又煎糕   因為食到好飽   唔係咁舒服咁

( 28-JUN-2021  MON )

今朝預咗落雨   所以 7 點半先起身 ~

啲雨越落越大   之後就黃雨警告   好在我早出門口   因為塞車呀 ~

感恩 8 點 10 分左右番到菇場   8 點半改為黑雨   西瓜喺群組話黑雨警告落咗先番工   所以好多同事無番   但好奇怪   正路 8 點半都喺途中啦   講緊係住將軍澳馬鞍山喎   但有人住馬鞍山都番咗嚟囉 ~

因為車銀優食過   所以阿花好想食   又益埋我啦   哈哈 

菇場唔忙呀   可以做自己嘢 ~

Lunch Time 又落大雨   所以食杯麵   食完 10 分鐘之後勁勁勁眼瞓   我合埋眼都差啲瞓着   真係超級多味精   好在係最後一個咋 ~

仍然唔忙   可以準時放工 ~

里奧大人今日放假   我個人又有啲攰   所以都係買晚餐番屋企食 ~

差唔多 7 點半就同里奧大人出去徑步半個鐘   番到屋企就開機洗衫   之後即沖涼 ~

依家里奧大人都會 Send 關於 ASTRO 嘅片比我睇  之前佢 Send 咗 MJ 唱 So Long 首歌   我問佢聽咗幾次 ?!   佢答 1 次   我話要聽夠 500 次呀   佢喺度大笑   以為我叫佢認真啲聽首歌   哈哈 ~

今晚睇 "我的 ID 是江南美人"   雖然係舊片   但我好想睇車銀優   哈哈 ~

睇到 11 點幾都瞓覺   唉   呢排唔係成日咁快眼瞓咁 ~

雞絲炒麵 + 菜心 ( 27-JUN-2021 )

( 27-JUN-2021  SUN )

今朝瞓到 9 點自然醒   呢排瞓得唔好呀   里奧大人話可能睇咗 "德魯納酒店"   因為始終都係比較有啲恐怖同傷感嘅戲   哈哈 ~

難得無雨就即出去徑步   呢排成日落雨   真係好天就要好好把握徑步機會喇 ~

徑完步就去買早餐番屋企食   食完抖陣即沖涼 ~

本身如果早起就會去里奧大人公司幫手   但瞓到咁晏就唔去 lu ~

11 點幾去到里奧大人公司   阿妹一見到我就拉住我傾偈   仲叫里奧大人做住嘢先   真係笑鬼死 ~

崇拜完畢就等里奧大人放工   仍然都係同阿妹傾偈   所以時間過得好快  哈哈 ~

里奧大人 2 點幾放工   所以去米線陣食下午茶 ~

食完去姑奶屋企拎嘢   傾咗大半個鐘都走人   里奧大人話好攰呀 ~

搭的士番屋企   但我話要去徑步先   里奧大人話駛唔駛咁激呀   哈哈 ~

買埋菜同生果就番屋企   拖完地就沖涼休息喇 ~

7 點幾開餐 ~雞絲炒麵 + 菜心

雞絲炒麵 - 尋晚食剩半份豉油雞   我將雞肉拻成絲就搞掂   再加埋今朝嘅炒麵又一餐 lu ~

菜心 - 今次菜心都幾靚   所以買 1 Pack 食喇 ~

洗埋碗就即沖涼   8 點幾就開始睇 "德魯納酒店" 喇   又睇到 11 點 15 分先瞓覺 ~

豉油雞 (外賣) + 唐生菜 ( 26-JUN-2021 )

( 26-JUN-2021  SAT )

尋晚瞓得唔係咁好   成晚好似頭重重咁 ~

今朝諗住起身徑步   但落超級大雨   咁又上床瞓番 lu ~

之後鬧鐘未響都起身   做下伸展都唔錯 ~

早餐食丁米餐   已經少米   但都食剩   不過今朝真係唔想食包囉 ~

家姐同里奧大人完全睇唔到塊餐肉   但又係幾唔覺眼嘅   哈哈

菇場唔忙啦   做下自己嘢 ~

放工去家姐屋企先   等家姐買 Lunch 比我食   咁樣慳好多時間㗎 ~

MOS BURGER

粗薯條好味道

家姐同工人都話 Berry 依家食零食   唔多食正餐呀

家姐 3 點半出去整嘢   我就陪 Berry   不過佢成日瞓覺嘅 ~

咁我唯有睇 ASTRO 啦   因為想聽歌呀 ~

家姐出咗門口   佢三秒即瞓   哈哈哈哈

瞓 15 分鐘又醒醒哋   家姐問係咪等佢 ?!   我話唔係   哈哈哈哈

瞓啦   快啲瞓夠就可以陪我   哈哈

次次見佢咁   我都會開始眼瞓

瞓喇

都唔知佢想點

真正嘅深層熟睡   因為我郁佢都無郁呀   哈哈

人肉枕頭   瞓得更加舒服呀呢

家姐 6 點番到嚟   抖陣又車我番屋企 lu ~

里奧大人無咁早放工   咁我自己去徑步 20 分鐘   之後再買豉油雞同菜番屋企 ~

喺屋企做下小清潔   8 點左右就預備晚餐   今晚淥菜同煮個丁麵就搞掂 ~

里奧大人 8 點 35 分番到屋企就即 Zoom 開會   咁唯有一路食一路開會   因為真係唔知開幾耐嘛   無理由等開完會先食   但感恩 9 點 15 分左右就開完呢 ~

洗埋碗就大清潔廁所   之後沖涼 ~

里奧大人熨 3 機衫   仲諗住叫佢聽晚先熨添 ~

今晚睇 1 集 "德魯納酒店"   所以又 11 點幾先瞓 ~ 

蕃茄腸仔意粉 + 粟米蛋花湯 ( 25-JUN-2021 )

( 25-JUN-2021  FRI )

預咗今朝落雨   所以 7 點 10 分起身做伸展   但都無落雨嘅   天氣報告又話朝早密雨同雷暴   嗚嗚 ~

不過算啦   喺屋企做伸展都唔錯㗎   順便可以投票   呵呵 ~

早餐食奶醬多   食家食半件都飽 ~

菇場忙呀   仲要係煩嘢  ~  

Lunch Time 無落雨就去打簿   之後再行陣先買鯪魚球米番菇場   估唔到咁都行咗 3,000 步   咁又幾好喎   話哂今朝無行   依家補番數   哈哈 ~

忙到痴咗呀   好在 5 點左右搞掂   可以抖陣就放工 ~

今日里奧大人放假   咁我都即番到屋企預備晚餐喇   今晚忍唔住叫里奧大人幫手投票   哈哈 ~

搞掂哂都已經 7 點

是日晚餐 - 蕃茄腸仔意粉 + 粟米蛋花湯

蕃茄腸仔意粉 - 唔想食街外嘢   所以簡單煮   順便清埋個洋蔥   蕃茄醬汁就係現成嗰啲   唔駛詬味又好味 ~

粟米蛋花湯 - 無買菜呀   唯有飲粟米湯啦   今晚好似食兒童餐咁   哈哈 ~

洗埋碗就大清潔廚房   8 點幾就一齊出去徑步   今晚可以徑半個鐘   勁爽呀   難得無落雨嘛   又涼涼地 ~

沖埋涼就開機洗衫   之後就睇劇   但就要定時投票   今晚 11 點就會截止㗎喇   勁緊張呀 ~

因為係睇 30 個廣告   最長係 30 秒   我之前睇劇嘅時候   有時睇唔到啲劇情   我會同里奧大人講話因為投緊票   佢就以為我根本玩手機   今晚佢幫手投啦   佢話以為按一次搞掂   仲話終於明白我成日點解投票投咁耐呀 ~

好開心 ASTRO 團體排名第 1   但可惜 Rocky 個人排名得第 2   下次我會繼續努力   哈哈 ~

今晚睇到 11 點幾先瞓覺   又夜咗添 ~

椒鹽豬扒飯 + 涼瓜叉燒炒蛋飯 (外賣) ( 24-JUN-2021 )

椒鹽豬扒飯 ($50) - 豬扒好味呀   又唔油  

涼瓜叉燒炒蛋飯 ($45) - 里奧大人話呢個餸好好喎   有菜有肉有蛋有飯   哈哈

( 24-JUN-2021  THU )

感恩一覺瞓天光   今朝 7 點起咗身   不過見個天黑黑地   所以唔出去徑步   瞓多 10 分鐘先起身做伸展 ~

早餐食奶醬多   見到杯咖啡好似好多奶咁   好在都 OK   我好怕太多奶㗎 ~

菇場唔忙啦   可以全力為 ASTRO 投票   今日 Double Pink 呀   哈哈 ~

阿齋無啦啦喺我耳邊講   話我真係無留意枱面喎   我即望自己枱面啦   之後望到個化妝籃有兩張十蚊紙   佢係都要比番牛脷蘇嘅錢   但我話唔要囉   唔好成日比來比去 ~

Lunch Time 又落大雨   咁食杯裝拉麵算喇 ~

菇場仍然唔忙   但一路投票一路同阿花 Whatsapp   所以真係好快放工 ~

里奧大人今晚 9 點半先放工   我又陪佢食晚餐啦 ~

食到差唔多 7 點都要走喇   里奧大人要預備開工 ~

番到屋企換對波鞋就去徑步   不過都係徑 25 分鐘   因為有啲攰   哈哈 ~

買埋潮州粉果比里奧大人就即番屋企沖涼   之後就睇 ASTRO   其實想睇德魯納   但真係好驚見到鬼呀 ~

里奧大人 10 點幾先番到屋企   等佢沖埋涼先一齊睇 "德魯納酒店"   呢套劇真係要睇 2 次   因為我睇女主角啲衫再睇字幕再睇表情   真係睇唔切 ~

今晚勁喇   一路睇劇一路投票   成 12 點先瞓呀 ~