壽司 (外賣) @ 屋企 ( 30-SEP-2018 )

( 30-SEP-2018  SUN )

今朝 9 點起身   沖埋涼就即出發喇 ~

食完早餐就番學   最後一堂了   不過嚟緊都會番學   開心開心 ~

崇拜完之後就同水姑飲茶   同佢飲咗 3 次茶   真係講嘅嘢係一樣   我已經連續聽咗 3 次㗎喇   識背添呀   之後里奧大人都話我駛唔駛又重覆講佢聽   哈哈 ~

又係呢兩碟小菜   好在都好味道咋











傾開偈又講開醫療設備   咁香港都係數一數二好嘅   只係資源有限啫   咁外國嘅醫療設備應該會更好嘅 ~

佢話佢朋友喺外國生活   唔知邊度成日痛   但 Check 好多次都唔知邊度有問題   點知番香港一 Check   就好快 Check 到有事 ~

咁佢係都要強調外國醫療好吖嘛   但我咪話囉   醫療好又點 ?!   無病症比醫院做   根本就同無經驗無分別   等如香港生活緊張   隨手一個都有胃病   外國生活無咁緊張   妳想搵個有胃病出來都難咁解   之後里奧大人咪話我講得啱囉   無病例妳參考   醫療幾先進都無用啦 ~

我真係好頂水姑唔順   唔識就咪扮代表啦   成日以為自己啱哂   又唔知道自己根本係古老石山   唔識咩叫 FB 仲以為個女都唔識   就可以唔駛同啲唔好嘅同學仔聯絡   笑死人 ~

2 點就走喇   要番教會聽講座   4 點 15 分完畢   我同里奧大人講話今日好似全日喺教會渡過咁   哈哈 ~

唔知點解突然好開心咁   所以好想食炸兩呀   哈哈 ~



去日本城買嘢   再去爭鮮買壽司就番屋企喇 ~

7 點開餐   食完抖陣就沖涼   之後又一齊睇戲喇   又 12 點先瞓呀 ~

大家樂 @ 官塘 ( 29-SEP-2018 )

丹麥優質豚肉鍋 ($59) - 第一次食豚肉同豬骨湯底   平時多數牛肉架   個湯底真係清到不得了   下次唔會再叫啦   哈哈

( 29-SEP-2018  SAT )

今朝好開心呀   因為又同家姐食早餐   食下傾下啲時間真係好快過   如果大家番嘅工地方係附近就好啦   可以日日見幾次都得呀   哈哈 ~

咁要食滿 $100 先用到張 $50 Coupon   所以叫家姐買多個牛角包 ($20) 拎走   咁先係 $108   晨早流流要計數   頭都暈埋 ~

自選特級早餐 - 珍寶腸 / 煙火腿 / 烤雞 法國貴族牛角包 ($43) 
鮮菠菜雞肉奄列配蘑菇汁及法國百吉包 ($45)



鮮磨咖啡



菇場忙啦   阿 A 又番咗來   叫 PSY 同阿怪喺廳做嘢   麻鬼煩   嘈到死 ~

今日身體狀況都唔錯   咁里奧大人又要番工   所以約佢去旺角喇 ~

放工即坐巴士出旺角   佢同我到嘅時間差唔多   咁叫佢喺南記等我   佢估唔到我話去南記都好呀   因為我都想食啲酸辣嘢嘛 ~



食完行陣旺中買雪糕   之後再行過新商場   都唔記得叫咩名   行完就走喇   我條腰超級勁痛   我已經換咗個輕身袋   但都覺得重   之後忍唔住要里奧大人幫我拎袋   其實佢叫咗好多次   不過我話唔好啦   但最後都係忍唔住囉   我覺得因為呢個星期二全日瞓   瞓得太多   條腰痛囉   好多時都係咁   唉 ~

睇唔出呢杯係綠茶雪呀呀呢   哈哈哈哈



番到屋企就開機洗衫   之後抖喇 ~

好想打邊爐   所以去大家樂喇   食完再去超市買嘢   搞掂哂就番屋企 ~

今晚我抹完嘢就大清潔廁所    呢排都無咩點清潔屋企   其實我上星期同里奧大人講   話今星期要開始徑步   點知星期一就唔舒服   變相又無得做運動一個星期   又成日出街食   真係非常之唔健康囉 ~

沖埋涼就真係要休息喇   咁同里奧大人一齊睇戲   睇到 12 點左右都要瞓 lu   聽朝要早起身呢 ~

牛下新城 @ 九龍灣 ( 28-SEP-2018 )

秋刀魚 (泰式生蝦汁) ($16) / 梅頭豬肉 (沙嗲) ($12) / 雞軟骨 (川味) ($10)







( 28-SEP-2018  FRI )

今日狀態都叫回勇啦   好似講緊隻馬咁   哈哈   但都有少少攰囉 ~

呢兩日沖完涼出來都覺得凍凍哋   秋天到喇   要好好珍惜短暫嘅秋天呢 ~

實在好唔想食麵包   所以食丁米   但一定要扣定   其實我下次話少少米仲好   因為今次扣咗底都好多咁囉 ~

菇場超級勁忙   要還債嘛 ~

個人沾寒沾凍唔係咁舒服   所以買車仔麵食   銀針粉又係要少少   但都係食唔哂   唔知做乜鬼   食到一半就唔想再食咁囉 ~



仍然忙   好快放工喇 ~

今晚番小組   同里奧大人喺九龍灣食嘢   但佢 7 點先到   所有我食住等呢 ~

食完行陣消化下   差唔多 7 點 40 分都番教會喇   早啲番去同教友傾下偈仲好 ~

今晚有教友買咗龍珠果一齊食   勁開心呀   哈哈   之後另一個就拎埋包 Kitkat 出來一齊分享   不過都無時間食呀   個個掛住傾偈 ~

估唔到今晚小組有 17 人出席   算好多人㗎喇   同埋仲有 4 個無番   如果番埋嚟就真係正咯   一齊傾偈同查經真係好開心㗎 ~

今晚 10 點幾先結束呀   真係快樂不知時日過呢 ~

師母仲搞笑   佢話認得我   但唔記得邊度見過   我話之前食 Farewell 飯見過㗎喇   佢就有印象喇   同埋佢好奇我點解番呢個小組 ?!  我話其實我不嬲都係番呢個小組   不過有好長時間個人懶   所以唔番囉   但依家都會番㗎喇   因為我同里奧大人都覺得番小組好開心呀   哈哈 ~

搭車番屋企   之後即沖涼喇 ~

11 點半都要瞓   但其實我又唔係太眼瞓   仲係興奮狀態當中呀   哈哈 ~

豆漿大王 @ 九龍灣 ( 27-SEP-2018 )

酸辣淨餃子 ($34) - 個湯唔夠熱   反而里奧大人嗰碗又夠熱喎

上海排骨酸辣麵 ($40) - 豬扒好味道 



酥炸雲吞 ($20) - 香口嘢實勁好味啦



( 27-SEP-2018  THU )

今朝都係瞓到 7 點 50 分先起身   身體應該 OK 呢   但仍然好攰囉 ~

早餐食芝腿治   但食咗兩啖都食唔落   無咩胃口   咁打包留番做 Lunch 啦 ~



菇場超級勁忙   鬼咩   成個星期無做過嘢咁款   今日要開行九萬個 Turbo 還債了 ~

Lunch Tme 諗住瞓   但又瞓唔到   差唔多 1 點先食 K 餐   晏啲先食件芝腿治   唔知點解好唔想食包咁呀   哈哈 ~

仍然忙到抽筋   放工都未做哂   所以遲咗 10 分鐘先走 ~

今日去教會聽嘢   咁我去淘大行陣先   但其實勁肚餓   滿腦子只係想食食食   本來想食橙色嗰啲 雞腳   但費事食食下見到教友   啜住腳指同佢打招呼就核突死啦   哈哈哈哈 ~

咁諗住買鹽酥雞軟骨   但成 $32 一份   即係同食晚餐差唔多價錢   我唔食啦   同埋太大份   一陣食完又食唔落嘢喎 ~

最後咩都無食   咁去萬寧換埋積分禮物就走人   原來都 6 點 10 分   諗住去 Taste 買生果   但堅攰   去咗麥記坐陣   差唔多 6 點 20 分真係頂唔順   好鬼餓呀   所以去豆漿大王食嘢先喇 ~

食完仲有時間   里奧大人話去麥記食雪糕喎 ~



今晚有聚會   不過就 8 點開始   我地 7 點 40 分都到咗 lu ~

9 點 20 分完畢   即搭車番屋企喇 ~

呢間豆漿大王勁多味精   成晚勁口渴   同里奧大人已經飲咗 1 支提子味汽水同 1 杯水囉~

沖埋涼再按摩條腰   又好似好啲咁   之後抖咗陣   真係要里奧大人出手幫我按腰   人手按真係舒服好多 ~

里奧大人睇戲   我 11 點半即瞓了 ~

榮基打冷小菜 @ 官塘 ( 26-SEP-2018 )

( 26-SEP-2018  WED )

嘩   尋晚真係就來顛呀   又痛喎   同埋係咁沖涼   差唔多 6 點先叫做好啲咋   所以瞓到 8 點先起身   要打的番工   因為個人實在有啲暈暈哋 ~

咁我食腸粉   一定食唔哂   咁留番大半份比 8 卦   嗰次我講話食唔哂腸粉   想叫一半   但錢照比   好過嘥嘢嘛   之後佢話留比佢食   咁今次真係留比佢食啦   我夾起一碗比佢   阿姐勁好人   話幫我慶熱   等到 8 卦黎先拎比佢食   無諗過阿姐會咁囉   勁感動 ~

菇場又超級超級忙   我又超級超級攰   力不從心   真係咩都慢九萬拍   個個望到我樣   都好似覺得我就嚟死咁   哈哈 ~

Lunch Time 一到就即瞓   又瞓咗半個鐘   叫咗 8 卦幫我買粉果   呢期都成日要佢幫我買嘢   好在佢出去食咋 ~

仍然忙爆   但都係慢做 ~

放工諗住打的但無的   所以都係搭巴士番屋企算喇 ~

番到屋企即灘喺梳化   本來諗住等埋里奧大人拎淘寶   之後一齊去米線陣   但里奧大人話唔好喎   知我唔舒服   我今次都覺得自己好衰   對佢啲語氣勁差   好悔氣咁呢   因為我電話叉緊電   一聽電話又要行去聽   佢又打完一陣又再打喎   大佬   我好辛苦家嘛 ~

等到佢 7 點左右就去食嘢   食完即番屋企   抖陣即沖涼 ~

佢幫我淘咗 2 個暖水袋   咁樣可以替換用   我話兩個一齊用都得喎   佢好奇怪點一齊用   我話一個敷肚   一個敷腰   但上次辣到肚皮起水泡單嘢   佢記到依家   所以次次用到咁上下   佢就要睇下我肚皮有無紅哂   我話我仲唔知死咩   哈哈 ~

個肚無啦啦痛   所以 10 點半都瞓   但瞓得勁差   11 點半又起身沖個涼 ~

咁諗住再瞓   但其實瞓唔好囉   12 點半又起身沖涼   之後慘喇   條腰痛到我想死呀   頂唔順要開按摩機按按條腰   按咗半個鐘   條腰就舒服好多喇   同埋唔知係咪全身熱得滯   因為勁熱水涼再加暖水袋   反而令我條腰仲痛咁   奇怪   最後差唔多 1 點半先瞓   唉 ~ 

榮基打冷小菜 @ 官塘 ( 24-SEP-2018 ) + ( 25-SEP-2018 )

( 24-SEP-2018  MON )

尋晚瞓得唔係咁好   好在今日應該有得放早咋 ~

早餐食芝腿治   食得一半咋   留番一半做 Lunch ~

菇場忙呀   但好攰囉   樣樣拖慢做   死得 ~

今朝 11 點幾收到 Email 話放 4 點   第一次咁正常時間出 Email   好記得有年係 1 點 45 分先出 Email 囉 ~

Lunch Time 一到就即瞓   瞓到 1 點 05 分   當堂精神哂 ~

里奧大人又係收 4 點   咁番屋企抖陣先出去食嘢 ~

我都開始餓   所以 6 點即去食嘢喇 ~

食完都番屋企   里奧大人就自己去超市買涼粉   平時一定會陪佢   但今日狀態唔係咁好   只想快快番屋企 ~

抖陣就沖涼   睇陣電視   11 點幾都瞓   個肚又有啲唔舒服 ~

( 25-SEP-2018  TUE )

今朝瞓到 11 點幾   沖埋涼去食早餐喇 ~



唉   個肚有啲扯住   所以今日陪唔到里奧大人上深圳添   嗚嗚嗚嗚 ~

12 點幾嗰陣時   無啦啦直頭好似每月一到咁痛喎   所以我都係咁瞓喇 ~

里奧大人就 1 點 45 分出門口   之後我痛到就死咁滯喇   又嘔咗幾次   又係咁沖熱水涼   差唔多 6 點先好番好多 ~

但真係無胃口食嘢   叫里奧大人自己食埋嘢先番屋企   咁啱姑奶有嘢搵佢   佢可以一齊食埋嘢先番嚟呢 ~

佢差唔多 7 點幾番到屋企   佢見到我咁死款真係嚇親   哈哈   無諗過會辛苦到咁嘛 ~

我全日無離開過張床   10 點唔夠又再瞓   瞓到腰骨都痛埋   真係唔係呢度痛就嗰度痛   雖然今日陪唔到里奧大人有啲唔開心   但都感恩今日假期   可以比我盡情瞓呢 ~ 

焗吉列魚柳 + 芫茜皮蛋魚片湯 ( 23-SEP-2018 )

煲咁多次芫茜皮蛋魚片湯   第一次係綠色咋   但飲落又無怪味喎

( 23-SEP-2018  SUN )

今朝 9 點起身   沖埋涼就即去食早餐喇 ~







番完主日學就番崇拜   完畢都 1 點幾   所以我自己去街市買餸同行超市   叫里奧大人喺商場行陣等我    之後喺九龍灣食埋下午茶先番屋企呢 ~

差唔多 2 點幾先食   所以食完都即番屋企喇 ~

放好哂嘢   沖埋涼就休息一陣 ~

今日頻頻樸樸   完全唔想郁   睇睇下電視都 5 點   開始勁眼瞓   一瞓就瞓到 5 點半 ~

個肚無啦啦唔多舒服   唉  真係好沮喪   但買咗湯料   點都要煲啦 ~   

是日懶餐 - 焗吉列魚柳 + 芫茜皮蛋魚片湯

焗吉列魚柳 - 尋晚拎咗魚柳番來   就咁焗熱就搞掂   再焗埋豬扒飯比里奧大人食   我就乜都食唔落喇 ~

芫茜皮蛋魚片湯 - 飲咗碗熱辣辣嘅湯又好啲咁   所以飲完無啦啦都瞓咗陣 ~

里奧大人知我好唔舒服   因為我好少話唔陪佢食嘢   同埋食食下瞓着咗   估唔到佢仲幫我洗碗   百年一遇   不過呢個幾月   我身體都唔好   佢都好主動洗衫熨衫   我真係好耐無熨過衫咁喇 ~

我成日都會同佢講唔好意思   又幫我熨衫   又無餐住家飯食   佢叫我唔駛成日講唔好意思   哈哈 ~

好啦   瞓咗陣又好啲咁   所以即沖涼喇 ~

10 點幾都瞓喇   唉   個肚又有啲唔舒服 ~

大食會 @ 姑奶屋企 (大埔) ( 22-SEP-2018 )

( 22-SEP-2018  SAT )

今朝同 8 卦食早餐   依家真係無咩選擇啦   有一間幾好味嘅又摺埋咗   另一間又成日好多人   所以其實都懶得轉場 ~



菇場唔太忙   所以係咁 Load 相 ~

放工即走   約咗里奧大人去 mega BOX 飲茶   飲到 2 點幾就行陣 ~











去完 AEON 就埋拎 Haagen-Dazs 雪糕月餅   今次勁多人排隊呀   起碼一百個人   我排咗成 15 分鐘先拎到呢 ~

估唔到無冰袋同乾冰   感恩我一早拎定冰袋咋   唔係就麻煩囉 ~

咁都即搭車番屋企喇   抖到 4 點 45 分就出發   兒生仔車埋我哋去大埔食飯呢 ~

去到姑奶屋企就坐陣   之後去買嘢   點知條街好焗熱   所以買樽腐乳就上番姑奶屋企 lu ~

7 點開餐   今晚到會   估唔到啲嘢食好味道喎 ~

姑奶工人又特登整咗沙律比我食   好感動呀   姑奶成日都記得我鍾意食沙律呢 ~

另一個姑奶仲搞笑   成日話好開心見到我   因為我好多時都唔舒服   我都同佢講緊因為我食緊藥   會突然間好唔舒服   所以我都好驚成日應承咗又唔出席囉   之後佢都話知我辛苦   用暖水袋可以整到成個肚生水泡   一定係好痛先會咁囉 ~

今晚又同姑奶契女兩公婆傾偈   其實成日都見佢哋   但真係好少時間傾偈   所以今晚傾得好開心呀 ~

差唔多 9 點   里奧大人話走先喇   我哋聽朝要番學   唔想咁夜走 ~

番到屋企都即沖涼   里奧大人就睇戲   我就睇到 11 點半都自己瞓先喇 ~