燒汁焗雞膇 + 菠菜苗 + 芫茜皮蛋魚片湯 ( 31-MAR-2024 )

 

( 31-MAR-2024  SUN )

感恩一覺瞓天光   我起身刷完牙   但見里奧大人仲瞓緊   以為佢扮嘢   點知佢真係瞓緊   仲話聽唔到鬧鐘響   好在我校鬧鐘咋   唔係瞓到 10 點都似   哈哈 ~

早餐都係要食飽啲   今日都係好晏先食午餐呢 ~

食完去里奧大人公司幫手   之後又陪阿妹去 Pantry 食早餐 ~

我要番教會事奉   不過 1 點就可以走人   但里奧大人未放工   我就去街市買餸喇 ~

買完都即番屋企放低嘢同換褲   因為我着咗厚身絲襪   真係熱到個人都掹掹哋咁㗎 ~

同里奧大人去大家樂食下午茶   佢諗咗好耐食咩好   我話唔想食可以即轉場㗎   但佢話囉得咁少人   所以唔想轉場喎 ~

突然間好想食西多士   里奧大人都話估我唔到呀

里奧大人話要將辣椒醬整個笑樣   佢梗係以為我將牛油整笑樣啦   但其實我係求其搽㗎咋   哈哈

食完都番屋企沖涼休息   里奧大人瞓晏覺   我就瞓唔到   所以睇電視 ~

5 點左右燜餸   搞掂都要預備晚餐 lu ~

之前同里奧大人講話假期唔煮飯   所以佢又問我做咩煮飯 ?!   話我成日轉得咁快   雖然出去食係方便   但有時又諗唔到食咩   坐車出去又唔想   咁不如簡單煮好過 ~

是日晚餐 - 燒汁焗雞膇 + 菠菜苗 + 芫茜皮蛋魚片湯

燒汁焗雞膇 - 唔知煮咩好   整呢個餸就好   夠哂簡單方便又好味 ~ 

菠菜苗 - 有湯就唔煮咁多菜   里奧大人見到咁細碟菜就最開心呢 ~

芫茜皮蛋魚片湯 - 尋晚食炸雞咬親條脷呀   即係好熱氣啦   所以即刻滾個下火湯喇 ~

洗埋碗抖陣就同里奧大人去做運動   依家要重燃做運動嘅心呀    哈哈 ~

沖完涼又睇下 Youtube   之後同里奧大人睇 2 集 "美好世界" ~

每集接近 1 個鐘   所以次次都睇 2 集就算   因為套劇都幾燒腦 ~    

唔經唔覺又 11 點半   係時代要瞓覺   晚晚咁時間瞓   之後番工起身好辛苦㗎   哈哈 ~

Jollibee @ 紅磡 ( 30-MAR-2024 )

樂脆雞配粟米 ($49) - 我一定係食辣脆雞   但今次超級辣呀   真係辣到流鼻水   咀唇仲慶哂添呀   真係食一啖要抖下   再慢慢食第二啖呀

蜂脆雞堡 ($49) - 里奧大人食呢個餐   仲食埋 1 件炸雞   佢話夠瞓就好好胃口   咁就好啦   諗番起佢上次唔舒服   食唔落嘢個樣   對比真係好大呢

( 30-MAR-2024  SAT )

尋晚瞓得超級差呀   我估係尋日 2 點幾飲咗杯珍珠奶茶囉   唉 ~

感恩今日放假   可以瞓到 9 點半呢   梳洗之後就同里奧大人出去食早餐喇 ~

   

食完都番屋企休息休息喇   開埋機洗衫就睇電視   話咁快又過咗半 lu ~

2 點左右食魚肉燒賣做午餐   因為依家清緊冰格嘅嘢   呵呵 ~

食完又睇下 Youtube   之後靈修 15 分鐘 ~

想瞓同唔想瞓之間   但最後由 3 點半瞓到 4 點 15 分呀 ~

今日想去黃埔買洗頭水   所以 5 點左右出發喇 ~

條街好焗熱呀   我覺得抖唔到氣咁好辛苦 ~

我頭先仲同里奧大人講話行街行好耐都無問題   真係勁樣衰   哈哈 ~

髮品店又無用開嗰隻洗頭水   咁走人啦   里奧大人話行 AEON 吖   但我話唔行呀   佢個樣好愕然   因為我鍾意行街嘛   我話條街好焗   有啲唔係咁舒服呀   所以我話去埋萬寧買洗臉膏同眼藥水就番屋企～

但入到有冷氣地方   個人真係舒服好多好多呀   里奧大人叫我慢慢行吖   真係第一次聽佢咁講   平時同佢買嘢   佢永遠只係會問買咩 ?!   仲有咩買 ?!   之後好快行到 Cashier 位置等我㗎喇 ~

里奧大人話要買紅豆砵仔糕比我食   我話貴咗唔買啦   但佢係都要買   話唔係成日食喎 ~

買完再睇手機時間   原來都 6 點   我話想食埋晚餐先番屋企   順便坐低抖下 ~

食完即番屋企沖涼   真係當堂舒服哂呀 ~

今晚又同里奧大人睇 2 集 "美好世界"   本身有車銀優都已經想睇   同埋呢套係懸疑片   我又鍾意金南珠   咁真係唔睇唔得啦   哈哈 ~

不過都係睇到 11 點半都要瞓   因為聽朝要早起身呢 ~

泰亞萊泰式美食 @ 紅磡 ( 29-MAR-2024 )

又係叫 "雙人套餐"   不過今次食海南雞飯

飛天通菜好辣呀   食完有啲驚   哈哈

泰式細拚盤 - 仍然覺得好味道

泰式椰汁冰

( 29-MAR-2024  FRI )

今朝 7 點去完廁所   之後再瞓就瞓到 10 點 40 了 ~

咁里奧大人起身   佢問我幾點 ?!   我話 11 點 40 分   佢話肯定唔係   我問點解你咁肯定 ?!   佢話

如果真係 11 點 40 分就會大叫無得食早餐   哈哈哈哈   真係好了解我咁噃 ~

沖埋涼即去食早餐   今朝一定要食飽啲   因為可能 4 點先食午餐呀 ~

食完就番屋企   難得放假就執好哂啲冬天衫   抓毛真係好嘥位   依家執好哂   當堂覺得好多空間擺衫   哈哈 ~

執完就熨 2 機衫   搞掂哂都已經 2 點幾   又要去里奧大人公司幫手喇 ~

今日好開心   所以點都要飲杯珍珠奶茶   買完先醒起原來 2 點幾   咁唔應該咁晏飲啦   哈哈   我多數要半糖少冰   其實下次可以微糖

去到里奧大人公司都要即刻做嘢喇   初初諗住 3 點出去買下午茶一齊食   到最後忙到要叫叻叻幫我買埋   差唔多 4 點半先食嘢呀   好在朝早夠飽咋 ~

同埋阿妹 叻叻 容姐喺 Pantry 一齊食   真係無咩幾何咁   哈哈

我同里奧大人 Share 食豬扒包   因為我飲咗杯珍珠奶茶   唔駛食咁多嘢   但唔醒起里奧大人依家先食嘢呀   好在佢都夠飽咋      

忙呀忙   之後我番受難節崇拜   完畢就即去里奧大人公司幫手 ~

里奧大人 8 點 45 分放工   我話好餓要即刻食晚飯喇   哈哈 ~

食完即番屋企沖涼休息   今晚睇 "美好世界"   估唔到幾好睇   所以睇到 12 點先瞓 ~

魚香茄子雞粒煲 (外賣) ( 28-MAR-2024 )

( 28-MAR-2024  THU )

感恩一覺瞓天光呀   但望個鐘只係 7 點   所以又懶下床   不過 7 點 20 分都起身整早餐 lu ~

早餐食奶醬多   焗到塊多士脆卜卜都唔錯   其實都接近燶咁滯   哈哈 ~

醒修 20 分鐘就出發番工   今朝車程早咗成 5 分鐘   應該好多人放假啦 ~

菇場唔忙   咁就好喇   因為已經開動 Holiday Mood 了   呵呵 ~

好好瞓嘅大肥豬  

同家姐傾咗幾轉電話   所以傾到 11 點 50 分先出去呀 ~

今日好想食牛筋米   家姐話我食咩都得   最緊要多蔥   咁我影比佢睇   佢問我係咪同人哋好熟 ?!   咁多蔥嘅 ?!   哈哈 ~

食完再行一田   差唔多 1 點先番到菇場 ~

正想食朱古力   點知阿齋就派金莎復活蛋   細細粒都唔錯

唔忙就好喇   話咁快放工 ~

里奧大人今晚開 OT   咁我番屋企焗熱炒飯   之後再買晚餐比里奧大人   咁就可以一齊食喇 ~

食完就去惠康買滴露淋浴液   我問里奧大人買唔買好 ?!   佢話想買咪買囉   呢啲係損耗品   其實屋企仲有 2 支淋浴液   佢唔問我就唔講了   呵呵 ~

好在有呢架戰車   裝住咗 4 支淋浴露 ($178)   贈品有 2 盒紙巾 + 2 Pack 出前一丁 + 2 Pack 牙刷 + 2 條廁紙   拖住佢上樓梯都無難度呢

買完即番屋企   沖埋涼就休息喇 ~

里奧大人 10 點幾先番到屋企   等佢沖埋涼就一齊睇 Youtube ~

我睇到 11 點 45 分都瞓喇   佢就仍然繼續睇呢  ~

三文魚粒炒飯 + 菜心 ( 27-MAR-2024 )

( 27-MAR-2024  WED )

尋晚瞓到半夜醒醒哋咁   所以去完廁所就望下個鐘   原來只係 6 點 22 分   基本上如果 6 點幾起身   都已經瞓夠 8 個鐘   不過我想再瞓多陣咁呢 ~

7 點 18 分都醒咗   咁早啲起身 lu   里奧大人無啦啦攪住我   之後好大聲話妳個身好熱呀   再話咩自殺式保暖定咩   話冬天攬就一流   夏天真係要行開   呵呵 ~

早餐食醬占多士   今次買全麥方包   好似健康啲 ~

麵包皮唔好浪費   將佢切粒再焗   但希望記得佢存在   哈哈

我鍾意將花生醬同果占搽勻哂成塊麵包   今次搽得唔係咁好   無計啦   已經 7 點 55 分   趕住食早餐喇

菇場唔忙   我都唔想忙呀   哈哈 ~

放工即走   我同阿花同 Lift   我話一陣出 Lift 要飛去車站   唔同佢傾呀   因為所有車都差唔多同一時間到   如果一走就全部走哂   我要等多 20 分鐘呢 ~

真係有咩車就上   感恩去到即刻有車呀 ~

去埋 Chateraise 買米餅禮盒就去十二味   本來阿妹同我一齊早啲到   但佢要去屋企整嘢   所以我自己去先 ~

我 12 點 15 分到   一坐低就可以落單   因為尋晚已經同阿妹諗定食咩呢 ~

點完單無耐   樹葉第一個到   咁又同佢傾下偈啦   之後阿妹到咗   里奧大人又到埋   再隔多陣勁哥同其他人都一齊到   所有嘢又已經上枱   可以即開餐喇 ~

我覺得地道檸檬茶無咁甜   同埋無咩味道

大盤花菜 ($60) - 呢個係小辣   咁樣大家都可以食   哈哈

XO 醬排骨籠仔飯 ($56) - 無食呀   但食剩好少飯   咁應該好味啩

上海黑醋骨 ($56) - 因為我唔知里奧大人同事食唔食得辣   所以我都揀啲唔辣嘅   真係好彩咁咋   因為有 3 個同事唔食得辣呢

泰式生炒骨飯 ($55) - 比個名呃咗   哈哈   其實咪即係生炒骨囉

蔥爆肥牛飯 ($62) - 醫師指定要呢個   所以唔揀水煮牛肉   但呢個都好味

雞翼肥腸麻辣香鍋 ($88) - 阿妹想食辣   所以叫中辣比佢試下

川式口水雞 ($58) - 都係中辣

酸菜魚 ($68) - 里奧大人話一定要叫   佢用湯送飯   之後個個都跟佢咁做   好搞笑

我話好感恩今日我請假咋   因為本來諗住阿妹同我到先   點知阿妹要整嘢   里奧大人同勁哥本身又係可以早啲   但臨時臨急又要做其他嘢   咁樹葉又唔知我哋食咩   因為食完飯   大家都有嘢做   所以唔想太晏食飯   咁我又可以早到   佢哋一嚟就可以食   唔駛咁急急趕趕囉 ~

食下傾下   里奧大人諗住試個位置影相   樹葉明明同大家傾緊偈   之後佢挨近勁哥   因為佢見到里奧大人想影相   勁哥話以為樹葉有咩同佢細聲講   咁嘅動作又幾似嘅   哈哈 ~

食到 1 點 40 分都要走喇   我都要去里奧大人公司幫手做嘢 ~

3 點半去睇中醫   醫師話我個脈好番好多喇   感恩感恩   不過個人都仲係好濕   咁要留心自己食啲咩 lu ~

今次仲係 1 日飲 1 次藥就可以   比起之前   我都覺得身體回復番好多   所以真係未必再日日整早餐喇   雖然真係唔辛苦   但真係想朝早可以放鬆下咁囉 ~

咁醫師話飲 6 日藥   我話 3 日得唔得呀 ?!   佢個樣好愕然   我話因為保險只能夠 Cover 3 日嘅診金   之後佢話同平一樣開 6 包藥   只係 1 日 1 次咁啫   哈哈哈哈 ~

里奧大人又未放工   咁我去買埋菜同波子提   之後再買 1 打蛋撻比佢啲同事食喇 ~

曲奇皮蛋撻   

阿妹見到蛋撻好開心   佢話唔係成日食   勁哥就話今日個口食唔停   哈哈 ~

因為唔係個個同事食   里奧大人又數少咗人喎   最後我無得食   不過咁仲好   我都係只想買   唔係咁想食囉～

里奧大人同佢哋講話我係鍾意請人食嘢   呢個病態無得醫   阿妹同勁哥話千奇唔好醫   皇尚話今晚唔好比飽飯佢食   所以里奧大人話每次講我   一定會有好多人幫我   哈哈 ~ 

傾下傾下   里奧大人終於可以 4 點 45 分放工   但佢仲要去銀行整啲嘢   我就番屋企預備晚餐喇 ~ 

早咗預備就可以早啲食飯   所以今晚 6 點 20 分可以開餐呢 ~

是日晚餐 - 三文魚粒炒飯 + 菜心

三文魚粒炒飯 - 中午食剩 2.5 碗飯   咁我話比我啦   我本身諗住整意粉   所以要轉炒飯   我加咗 2 隻蛋   同埋將幾條蜜糖腸切粒粒   炒埋咁大堆   又要分 3 餐食 lu ~

菜心 - 買咗半斤 ($7)   呢幾晚都唔煮飯   所以買半斤就夠 lu ~

洗埋碗就抖下   差唔多 8 點就同里奧大人出去做運動 ~

開埋機洗衫就沖涼   之後休息休息 ~

睇多陣電視   今晚 10 點半都瞓喇 ~

煎釀三寶 (外賣) ( 26-MAR-2024 )

我負責揀食啲咩   之後 Whatsapp 比里奧大人   咁佢跟住買就得㗎喇   我問佢覺唔覺得今次同上次唔同咗 ?!   佢話梗係覺啦   青椒得一件咁邊個食   哈哈哈哈   我話就係你唔鍾意食青椒   我咪改其他囉   仲好話人

我覺得雲吞皮分開放仲好

( 26-MAR-2024  TUE )

尋晚熱醒   咁之後再去廁所   感恩好快瞓得番呢 ~

我一起身就同里奧大人講話尋晚熱醒呀   佢話應該飲咗杯薑味好重嘅糖水啦   之後佢話因為已經開咗冷氣添   哈哈 ~

今朝同里奧大人出去食早餐   其實有幾間都會間唔中去嘅   但里奧大人覺得我平日去食嘅   一定要係我最鍾意嗰間 ~

我話好期待放假同佢食早餐   佢話依家都一齊食啦   我話放假食完係可以番屋企嘛   哈哈~

依家買咗好多鈣思寶   我叫里奧大人每日都要飲呀   之後我話飲鈣思寶好呀   飲咗鈣思寶 彈琴唔駛譜   佢話飲咗鈣思寶 個人好老土 ~

我再話飲咗鈣思寶 唔會戴綠帽   哈哈哈哈   里奧大人話我係都諗衰嘢   我本身唔熱   但笑到成個身熱哂呀   哈哈 ~

食完去佢公司坐一陣   之後都搭車番工 lu ~

我落車經過另一座大廈   咁啱見到辣姐等 Lift   同佢打完招呼就握住佢隻手   之後繼續行   嗰下我覺得自己好似好關心啲支持者咁   哈哈 ~

菇場唔忙啦   咁就好喇 ~

好瞓到呢

Lunch Time 行一田   咁啱見到阿花睇炸醬麵   一定又係車醬麵啦    笑鬼死   咁佢問我食咩 ?!   我話未諗   咁一齊食啦   但佢話要食酸辣米線   咁我又唔係咁想食   所以佢叫外賣喇 ~

咁再行下大生同 DAISO   之後去拎外賣喇 ~

佢拎住袋炸醬麵   又拎碗米線   我話幫佢拎袋啦   佢話驚我拎走咗   黐線   哈哈 ~

兩次佢都係比現金   我問點解唔嘟八達通 ?!   佢話唔想成日去增值   同埋咁樣唔駛比自己用咁多錢   我咪話我之前支付寶嘟下嘟下   嘟咗 8 千蚊呀   心痛到我呢   自此之後每個月只入 $1,000   用哂就等下個月 ~

今日 Lunch 食杯麵   所以阿齋好奇怪   以為我食完先番嚟 ~

唔忙又做下其他嘢   聽到阿虫話係幅相係蜥蝪   肥仔豪話變色龍呀   邊度有人喺屋企養蜥蝪㗎 ?!   肥仔豪有時啲對話仲搞笑㗎   睇佢平時唔聲唔聲咁   哈哈 ~

家姐話佢瞓哂成張床咁滯   以前姐夫一定唔比啲狗上梳化同床㗎   所以佢都好錫 Berry   可能知 Berry 身世可憐   哈哈

放工即走   諗住睇中醫   但中醫今日唔應診   我今日諗住唔打去問㗎喇   但諗諗下都係唔好   真係打去問咗咋   唔係白行一趟了 ~

咁本身都諗住煮飯嘅   但里奧大人話買煎釀三寶再煮辛辣麵   咁好啦   我都番屋企先 lu ~

等佢番嚟就再煮麵   差唔多 6 點半就可以開餐喇 ~

洗埋碗就抖下   之後同里奧大人一齊去做運動 ~

做 20 分鐘就算喇   因為做得太耐   我條腰又會好痛   唉 ~

沖埋涼就休息   同里奧大人一齊睇 Youtube   依家會睇啲真人真事案件   有時真係睇到莫名其妙   點解啲人可以咁蠢   比人呃錢又呃命 ~

睇到 10 點半都瞓先喇   里奧大人就繼續睇 ~  

豆豉鯪魚炒油麥菜 + 燒汁焗排骨 ( 25-MAR-2024 )

( 25-MAR-2024  MON )

尋晚半夜去完廁所   之後都好快瞓到   點知隻手右前臂好痛   加上又比里奧大人鼻鼾聲嘈醒   所以瞓得唔係咁好   但感恩 7 點 28 分起身都精神   本身諗住 7 點 50 分先起身添 ~

煲埋薑茶先沖涼   咁樣完成咗一樣嘢   沖涼會開心啲   哈哈哈哈 ~

早餐食芝士條    尋日係 A1 買㗎   不過我覺得唔夠芝士味呢 ~

食完就靈修 10 分鐘   之後番工喇 ~

菇場忙咗陣   呢排都 3D   所以個個都好開心   哈哈 ~

Lunch Time 食牛筋河   食完又行 15 分鐘   但已經流哂汗   所以番菇場喇 ~

唔忙又做自己嘢   咁就好快放工㗎喇 ~

放工即走   番到屋企即預備晚餐   我覺得用 40 分鐘都算快 ~

是日晚餐 - 豆豉鯪魚炒油麥菜 + 燒汁焗排骨

豆豉鯪魚炒油麥菜 - 每次煮呢個餸   佢都會話好味過出街食   話出面食係無味   我覺得珠江橋牌先好味 ~

燒汁焗排骨 - 特登焗㗎   咁里奧大人就有 Lunch Box 喇 ~

洗埋碗再整熱蕃薯糖水比里奧大人食   我就食雞屎滕 ~

好煙韌呀   下次會買比家姐同佢工人食   我覺得佢哋都會鍾意食   哈哈

我唔食蕃薯糖水   但就飲杯薑味勁重嘅糖水   飲完個身好暖好舒服

食完抖陣就開機洗衫   之後沖涼休息喇   因為里奧大人幫手熨咗衫   我做少一樣家務呢 ~

睇 Youtube 睇到想瞓   但 10 點太早啦   會半夜起身   所以睇到 10 點半先瞓呀 ~