黃豆醬炆蘿蔔腩肉 + 蒜蓉辣椒旺菜粉絲 ( 30-NOV-2020 )

( 30-NOV-2020  MON )

今朝起身沖完涼之後   真係覺得涼咗好多咁 ~

早餐食芝腿治烘底   好好味呀 ~

菇場唔忙   可以做自己嘢 ~

Lunch 食 Flakes + 乳酪   懶得出街   最搞笑阿齋細細聲問我   係咪依家疫情大爆發唔敢出街呀 ?!   哈哈 ~

菇場仍然唔忙   可以準時放工 ~

放工即走   番到屋企沖埋涼就預備晚餐 ~

里奧大人就熨衫   呢個家務等佢做最好   嘻嘻 ~

是日懶餐 - 黃豆醬炆蘿蔔腩肉 + 蒜蓉辣椒旺菜粉絲

黃豆醬炆蘿蔔腩肉 - 尋晚炆定   今晚翻熱再落鑊兜兩兜就用搞掂   我同里奧大人都覺得好味呀   平時食剩咗啲   比里奧大人佢唔食   但今晚好比面食哂   我試咗一嚿肥膏   真係入口即溶   第 1 次煮到呢啲口感   不過只能食 1 嚿   肥膏始終食壞人呢 ~

蒜蓉辣椒旺菜粉絲 - 呢個算係新餸   其實非常之簡單又好味 ~

洗埋碗就開機洗衫   之後沖涼喇 ~

抖陣就食埋半個芝士蛋糕   好在無壞咋   但食到好驚   短期內都唔會再食㗎喇 ~

諗住 10 點 45 分瞓覺   點知同里奧大人傾偈   傾到 11 點幾先瞓 ~

燒賣 & 鮮竹卷 ＆ 雞扎 (外賣) + 蠔油小旺菜 ( 29-NOV-2020 )

我買咗紫衣大腰果 ($40) / 南棗合桃膏 ($30) / 金羅漢果 10 個 ($50)

家姐比嘅杏仁條 & 粟米捧 & 果汁軟糖

( 29-NOV-2020  SUN )

今朝 8 點半都醒咗   咁都刷牙沖涼喇 ~

早咗 15 分鐘起身   所以多咗時間食早餐   不過依家都唔會話慢慢嘆   用正常速度食完就走   雖然人唔多   但都盡量避免留喺食店太耐 ~

本身 10 點半到里奧大人公司幫手   但我 10 點鬆啲都到咗 lu ~

里奧大人都好奇怪做咩咁早   佢以為已經 10 點半呀   哈哈 ~

佢同事阿妹第一時間同我講多謝我啲朱古力   其實有時都反應唔切   之後頂爺又話用我啲朱古力整麵包   兩個都話我啲朱古力   我真係有啲亂   因為我買咗兩款比佢哋家嘛 ~

咁我買咗包脆脆比叻叻   佢又送咗 1 支茶比我   我係都唔要   佢直接放入我手袋   勁搞笑   佢哋個個都知我個袋好大   可以裝好多嘢咁   哈哈 ~

崇拜完之後   我就去買嘢   今日涼涼地行街真係好舒服 ~

買咗一袋嘢   原來都差唔多夠鐘 ~

2 點前到里奧大人公司   但仲要等多陣先放工   咁同佢啲同事傾多陣偈先 ~

皇太后拎包蕃薯出嚟   我問咩蕃薯 ?!   佢無答就直接放入我個袋度   呢下搞笑   之後再比多 2 隻紫蕃薯比我   仲教我點樣揀蕃薯 ~

我哋傾到唔願走   原來已經 2 點半   里奧大人話好餓呀   要去食 Lunch 喇   哈哈 ~

食完要去公司放低啲嘢   之後去九龍灣 ~

里奧大人去剪髮   我就買點心再行商場   喺天上野買咗地拖   只係 $139   因為做半價呀 ~

家姐話隻隻唔同樣   我就話隻隻都好樣衰   特別係上層中間嗰隻   個樣好老呀   哈哈

番到屋企都 5 點   沖埋涼就熨 2 機衫   搞掂哂就抖下 ~

差唔多 6 點幾就炆餸   之後就預備晚餐 ~

是日懶餐 - 燒賣 & 鮮竹卷 & 雞扎 (外賣) + 蠔油小旺菜

燒賣 & 鮮竹卷 & 雞扎 (外賣) - 里奧大人話買 4 樣好喇   但我買 3 樣就算喇   因為仲有菜同芝士蛋糕食呢 ~

蠔油小旺菜 - 以前唔鍾意食蠔油   呢排又鍾意番   可能真係覺得就咁食菜好寡   哈哈 ~

洗埋碗就大清潔廚房   之後開機洗衫   沖埋就休息下先再食芝士蛋糕 ~

里奧大人 9 點幾瞓覺喇   佢真係好攰呢 ~

我就睇 youtube   不過睇到 11 點都瞓 lu ~ 

鮮蝦韭菜餃米粉 + 鮮蝦韭菜餃拚手打牛丸粗麵 (外賣) @ 屋企 ( 28-NOV-2020 )

( 28-NOV-2020  SAT )

尋晚終於唔駛開冷氣瞓   今朝起身都覺得凍呀 ~

早餐食飽啲   所以食吉列魚柳餐   間唔中食真係唔錯 ~

菇場唔忙呀   做自己嘢等放工 ~

唔知係咪頭先食得油得滯   12 點開始好反胃   有啲想嘔嘅感覺   但點解會咁遲先有呢啲感覺嘅   哈哈 ~

放工即走   感恩 1 點 15 分開車   去到新都城都 2 點 ~

超級勁樣衰   我懶醒約家姐喺大生等   但一出去又唔見   所以即打比家姐   我笑住叫佢   佢話係咪搵唔到大生呀 ?!   哈哈   好在佢見到我咋 ~

呢個時間食肆肯定多人   所以我叫家姐同姐夫食 Lunch 先   之後再幫我買 Lunch ~

其實如果佢哋早食   我就直接去佢屋企   但今日佢地晏咗   所以喺新都城 Join 埋喇 ~

去完譚仔拎 Lunch 就去 A1 買焦糖芝士蛋糕   做特價只係 $52 咋 ~

買完即番家姐屋企   同家姐 Share 米線 ~

重慶 3 小辣   家姐打比我問係咪要廣東 3 小辣 ?!   我真係以為係新口味呀   原來佢記錯

好似好耐無見家姐同 Berry 咁   不過家姐只會問嚟唔嚟探 Berry   哈哈 ~ 

身型真係好似柴柴

唔多友善   哈哈

仲迴避鏡頭添

一見支除塵拖板   就好似條鱷魚咁飛出來咬獵物

佢最憎呢個除塵拖板   又唔知成張除塵紙都係佢啲毛喎   唔拖點得呀

今日好攰咁呀   所以都係灘喺梳化同家姐傾偈 ~

我問家姐要唔要薯片 ?!   佢話唔要   之後我話咁我自己買 2 包算喇   家姐即話我衰呀   我話點解咁講 ?!   因為佢話佢唔要都諗住我唔要喎   咁又係   平時佢要我要   佢唔要我都唔要家嘛   哈哈 ~

之後我比家姐睇張好肉酸嘅網上照片   家姐話: 好似妳比我個 Icon 咁樣   真係比佢嚇死呀   聽到 "好似妳" 呢 3 個字真係有啲驚囉   哈哈 ~

個樣攰到不得了

托住我隻手瞓覺   我勁開心

再托住我對腳上面瞓覺   真係好難得㗎

眼瞓喇   點摸都得   呵呵

我挨落佢身上面   感覺到佢抖咗一下大氣   好得意呀

7 點左右走人   話咁快又一日 ~

番到屋企就拖地再大清潔廁所   沖埋涼就等里奧大人放工 ~

今晚唔煮喇   所以叫里奧大人買外賣番屋企食 ~

9 點開餐   唔駛洗碗真開心   哈哈 ~

睇多陣電視   今晚 11 點幾都瞓喇   聽日都早起身呢 ~

香蒜火腿絲意粉 + 鮑汁扒豆苗 + 自家制麵包 ( 27-NOV-2020 )

( 27-NOV-2020  FRI )

依家一起身   里奧大人就會話今日涼咗好多   我話你日日都咁講   我又唔覺涼咗好多咁喎 ~

早餐食奶醬多   又食翻佢   哈哈 ~

菇場唔忙   可以做自己嘢 ~

Lunch Time 出去行陣   之後再去買牛什米番菇場慢慢食 ~

仍然唔忙   可以準時放工 ~

番到屋企就沖涼   之後預備晚餐 ~

里奧大人 7 點鬆啲就番到屋企   佢問可唔可以沖涼先 ?!   可能之前佢太夜番   我叫佢唔好沖涼即刻食飯   佢就覺得以後都係咁   哈哈 ~

是日晚餐 - 香蒜火腿絲意粉 + 鮑汁扒豆苗 + 自家制麵包

香蒜火腿絲意粉 - 第一次煮   所以好比心機   不過唔係咁夠味   因為我直接試調味覺得好鹹   所以無再加多啲蒜粉   我覺得就咁用火腿絲都夠   唔需要加肉粒呢 ~

鮑汁扒豆苗 - 之前家姐比嘅鮑汁   用來煮豆苗同生菜都好味道   今晚一放啲菜落煲   就見到 3 條幾長嘅菜虫   但浸嘅時候又唔浮出來喎   咁我煮完就遂條夾上碟   唔想見到再有虫呀 ~

自家制麵包 - 里奧大人同事又整麵包   仲話用我之前送比佢嘅朱古力來整   怪不得里奧大人第一時間食朱古力包啦 ~

洗埋碗就大清潔廚房   之後沖涼喇 ~

食埋生果就睇電視   今晚 11 點都自己瞓先 lu ~

韭菜餃拼水餃 & 炸魚皮 (外賣) + 清甜白蘿蔔 & 小旺菜 ( 26-NOV-2020 )

皇帝蕉   老闆話本身 $20/磅   差唔多收檔就 $20/份   終於食到好味嘅皇帝蕉   下次見到會再買

( 26-NOV-2020  THU )

感恩一覺瞓天光   但仲係覺得攰   可能個人太濕重喇 ~

今日試新嘢   吞拿魚三文治好味   可惜即磨咖啡唔夠熱 ~

菇場唔太忙   又可以做自己嘢喇 ~

家姐今日開始 WFH   里奧大人都應該下星期㗎喇   我就肯定無   哈哈哈哈 ~

Lunch Time 出去行陣   之後再買米線番菇場食 ~

墨魚丸米線 (麻辣湯底 2小辣)   我本身要小辣   收銀員即話好辣   叫我揀最細嘅辣   不過我真係想食麻辣祛濕   唔辣咪等如無食 ?!   所以最後揀 2 小辣   比佢嚇一嚇有啲驚   但我都覺得唔夠麻辣   反而覺得味精重囉

之前家姐話呢隻蒟蒻好食   但我無見過   所以今次見到好開心   即買包比佢食

仍然唔忙   可以放工即時走 ~

去街市買水餃   再買定幾日菜   今晚街市唔多人   可能街市又再中招   所以啲人唔敢嚟買嘢 ~

買完即走   今晚里奧大人同我同步番到屋企   好在今日只係淥嘢咋 ~

我沖埋涼先煮嘢   7 點鬆啲可以開餐 ~

是日懶餐 - 韭菜餃拼水餃 & 炸魚皮 (外賣) + 清甜白蘿蔔 & 小旺菜

韭菜餃拼水餃 & 炸魚皮 (外賣) - 本身想煎蝦餅   但里奧大人話個咀生瘡   所以就煮啲清清哋嘅嘢啦 ~ 

清甜白蘿蔔 & 小旺菜 - 近期都係買呢兩樣   因為可以留得耐啲   哈哈 ~

洗埋碗就開機洗衫   之後沖涼休息 ~

今晚里奧大人 10 點都瞓覺   佢真係好攰呢 ~

不過我 10 點 40 分都瞓   呢排呢個時間就會眼瞓   咁都唔錯   11 點前瞓真係好健康咁呢   哈哈 ~

米線陣 @ 官塘 ( 25-NOV-2020 )

鮮味二人選套餐 ($128)

川辣口水雞 - 我覺得食到最尾啲汁好似甜甜地   好似甜豉油嘅甜   里奧大人以為聽錯呀

清湯蘿蔔+炆冬菇 - 我鍾意食呀

滷水雞翼 + 滷水金錢肚米線 (麻辣蕃茄湯 (+$2) - 中辣真係辣好多   可以驅寒

鮮蝦雲吞+ 滷水牛展米線 (麻辣蕃茄湯 (+$2) - 里奧大人要少辣

青檸薏米水 (+$4) & 雪碧

( 25-NOV-2020  WED )

感恩一覺瞓天光   起身都算好精神   可能見到陽光呀   哈哈 ~

早餐食腿蛋治   今朝真係好唔想食奶醬多呀 ~

菇場忙咗陣就可以 Hea 下   做下自己嘢咁啦 ~

里奧大人今朝又有湯飲   依家佢飲湯多過我呀   哈哈 ~

Lunch Time 出去買嘢   之後再行多陣就買燒賣+腸粉番菇場喇 ~

差唔多 12 點半先開餐   其實都唔太餓   不過唔想凍冰冰食囉 ~

我無買朱古力比里奧大人其中 1 個同事   但知佢鍾意食脆脆   所以買比佢

仍然做下自己嘢   菇場好靜   但阿爽真係好鬼嘈   拎張紙都大聲過人   真係驚人地唔知妳做緊嘢咁   有時我計緊數   佢又係咁做咩都大大聲   一係敲筆   我就最憎   完全影響人   唔明點解硬係要發啲聲出來   討厭 ~

今日里奧大人要去官塘整嘢   所以我都唔煮飯喇 ~

放工即走   同里奧大人去米線陣食晚餐 ~

應該好多商場都有聖誕氣氛㗎喇

食完都要番屋企喇   因為 8 點半要開會 ~

里奧大人番屋企沖涼先   我就去 759 買 CP 雞蛋  只係 $46/2盒   再買多包餃子同 Flakes 就走喇 ~

今晚沖埋涼就可以休息   里奧大人 9 點半開完會   都算好快 ~

呢排真係 10 點左右就眼瞓   所以今晚 10 點 40 分都自己瞓先喇 ~

魚香茄子 + 涼拌茄子 + 自家制麵包 ( 24-NOV-2020 )

( 24-NOV-2020  TUE )

感恩一覺瞓天光呀   今朝 7 點 10 分都起咗身   等里奧大人搞掂哂   我先梳洗 ~

今朝 8 點落車   所以去惠康買魚香茄子醬同香蕉   之後再買早餐 ~

又食奶醬多啦   我想食其他   但又無咩胃口 ~

菇場超級勁忙   做到差唔多 11 點 50 分先出去 ~

買朱古力比里奧大人同事   我今次買比幾個對我好好嘅同事   買完就去買魚柳包   番到菇場都已經 12 點 20 分 ~

1 點準時開工   仍然係超級忙 ~

終於 5 點 20 分做好哂所有嘢   可以準時放工 ~

買埋豬肉就番屋企   沖埋涼就要即刻預備喇 ~

預備好哂晚餐就煲雪梨茶   今晚只係雪梨乾+金羅漢果+無花果   咁樣好方便   但其實我都係鍾意用雪梨多啲   但今朝唔見有雪梨   咁唯有用雪梨乾啦 ~

里奧大人 7 點半先番到屋企   等佢沖埋涼就可以開餐喇 ~

是日晚餐 - 魚香茄子 + 涼拌茄子 + 自家制麵包

魚香茄子 - 里奧大人唔鍾意食蒸嘅茄子   但就好鍾意食魚香茄子   真係健康嘢都要重口味   哈哈   今晚加咗鹹魚碎 & 豆板醬   但鹹咗啲呀   最衰我手多多加豆板醬啦 ~

涼拌茄子 - 買咗 4 隻茄子   魚香茄子用咗 3 隻   因為隻碟裝唔哂   但又唔想留   因為上星期買家嘛   所以就諗起涼拌茄子呢個餸   順便快啲清埋樽紅油   一舉兩得 ~

自家制麵包 - 里奧大人同事好細心咁講比佢聽呢 3 個係咩包   但可惜到我耳邊嘅答案係唔記得咩味道嘅包   不過啡色一定係朱古力包   今晚食埋去喇   難得新鮮   同埋今晚食完鹹好想食甜呀   哈哈 ~

洗埋碗就大清潔廚房   再開機洗衫   搞掂哂就沖涼 ~

今晚睇電視   睇到 10 點 45 分都自己瞓先喇   呢幾日好攰   係濕重嘅攰囉   最怕咁樣 ~

翠肉瓜黑蒜炆雞 + 粟米香菇煎肉餅 + 油雞拚燒鴨 (外賣) @ 屋企 ( 23-NOV-2020 )

( 23-NOV-2020  MON )

雖然一覺瞓天光   但都覺得好攰咁 ~

今朝里奧大人話起咗身   所以陪我食早餐   又要麻煩佢喇   哈哈 ~

本來約咗今日中午換煤氣爐   但估唔到師傅話 9 點半可以換   好在里奧大人起咗身咋   感恩感恩 ~

菇場勁忙   但要慢慢做   好似好無 Mood 咁 ~

Lunch 食杯麵   因為落雨唔想出去呀 ~

諗住開工   收到表哥電話話姑丈今朝走了   聽完之後   個心唔係咁舒服 ~

菇場仍然忙   所以好快放工 ~

買埋外賣就番屋企   沖完涼就即開餐 ~

今晚好嘆呀   最開心係唔駛洗碗 ~

食完飯抖陣   又睇 "木棘証人" ~

估唔到今晚唔駛煮都好攰   所以我 10 點 45 分都自己瞓先喇 ~

鹽酥雞扒拚西炒飯 + 蒜蓉蒸金菇 + 忘不了小旺菜 ( 22-NOV-2020 )

( 22-NOV-2020  SUN )

今朝瞓到 9 點 20 分都起身   都預咗自己瞓得唔會太晏 ~

梳洗完就整早餐   食完就開機洗枱布   之前淘咗好多枱布   所以今朝洗深色先   今晚再洗淺色 ~

早餐係尋日里奧大人同事食剩咗嘅吞拿魚包   之前買咗樽咖啡粉   今朝終於飲哂   勁開心 ~ 

家姐話做咩個包咁燶   佢好少會咁留意   哈哈

食完抖下先   之後就熨 3 機衫   我最怕熨床單被舖同里奧大人嘅西褲   不過點都熨㗎喇   想快啲熨完快啲收埋去 ~

熨完都 12 點半   係時間抖喇   隻手有啲痛呀又 ~

里奧大人 2 點 15 分左右放工   我都預備下午茶喇 ~

估唔到今日車程咁快   等佢沖埋涼就可以即刻有得食喇 ~

芝士鹹牛肉包 & 奶油花生醬包

里奧大人話今日公司有個大禮物袋   佢就喺袋度睇下有咩公仔   佢搵到 Minions   之後再繼續搵下仲有無   咁頂爺即問佢搵咩 ?!   佢話想要 Minions   因為太太好鍾意 ~

真係估唔到里奧大人會咁主動搵 Minions   之後頂爺即刻搵咗一套 Minions 比我   真係好感動呀 ~

里奧大人做一陣公司嘢就話要瞓一陣   我同里奧大人講話今朝 9 點幾起身   佢問我做咩唔瞓耐啲 ?!   我話次次佢出門口   我都瞓得唔係咁好   同埋好似好衰咁   你番工我就瞓   之後佢話咁佢瞓晏覺又好衰咩 ?!   假期梗要瞓嘛 ~

我唔眼瞓   所以睇 Youtube   好似好耐無睇咁   哈哈 ~

唔係咁餓   里奧大人又瞓到 6 點半   所以我話 7 點半先開餐 ~

諗住 7 點 15 分準時開餐   但林謝謝打比佢訴苦   差唔多 8 點先傾完 ~

是日懶餐 - 鹽酥雞扒拚西炒飯 + 蒜蓉蒸金菇 + 忘不了小旺菜

鹽酥雞扒拚西炒飯 - 前晚同尋晚食剩嘅飯餸   本來諗住開鑊整熱   但好驚炒完之後無哂啲飯   所以都係開焗爐好啲喇   哈哈 ~

蒜蓉蒸金菇 - 好想食濃味嘢   呢個算濃味得來都健康呢 ~

忘不了小旺菜 - 之前食剩半棵   今晚都食埋去喇   最開心係清哂樽忘不了 ~

洗埋碗都 9 點   即沖涼喇   食埋生果就休息休息 ~

今晚繼續睇 "木棘証人"   差唔多 12 點先瞓 ~