麥蘆卡蜜糖烤雞餐 (外賣) @ 屋企 ( 31-DEC-2021 )

麥蘆卡蜜糖烤雞1隻 + 芝士肉醬意粉 + 牛油粟米 & 紅豆冰 2 杯

( 31-DEC-2021  FRI )

尋晚瞓到半夜凍凍哋   之後里奧大人掂到我   話我全身凍冰冰   嚇到佢即刻幫我蓋多張被   佢真係好緊張   好搞笑 ~

今朝早咗一班車出門口   8 點唔夠都落車 ~

早餐食粟米吞拿魚包   好耐無食   覺得勁好味   但我唔再去大家樂等飲品囉   實在等得太耐了 ~

菇場唔忙啦   個個都等食 Pizza   哈哈 ~

11 點西瓜叫我入房   話代表老闆比信比我   咁佢講 Special Bonus 嘅時候   真係聽到驚一驚呀   因為無諗過咁多   所以真係非常感恩   同埋人工加幅又非常滿意   真的感謝主   同時都感恩有個好老闆 ~

差唔多 1 點左右先開餐   今次全部人一齊食   感覺勁開心呀   因為可以周圍同同事傾計同影相   如果飲茶就唔得咁呢 ~

全部叫大 Pizza   但唔記得係十幾吋添

仲有沙律 & 薯條 & 意粉

好香蒜蓉味

Prama Ham 正呀  

食完都已經 2 點   周圍傾下偈   好快就 4 點了 ~

非常感恩   呢一年平安健康渡過呢

新一年好快又開始了

今日個個都好興奮   所以一到 4 點   個個都開開心心一齊放工   哈哈 ~

感恩好快有車   家姐今日過嚟屋企   叫里奧大人幫佢貼手機 Mon 貼   咁我打比里奧大人   佢話家姐走咗啦   整 Mon 貼好快搞掂   其實我有啲唔開心   因為家姐好少唔等埋我先走囉 ~

我一開門就問里奧大人做咩飲汽水 ?!   佢話口渴   之後我望到家姐對鞋   原來佢呢埋扮走咗呀 ~

同家姐 Share 食   但家姐唔食   因為佢同我一樣勁憎提子乾   哈哈

家姐 5 點左右都走喇   我送佢搭車   之後去超市買嘢 ~

里奧大人話家姐痴鬼線   係都話要呃阿妹話走咗   哈哈 ~

之後我話做咩開咗條三角黑朱古力嘅 ?!   里奧大人話家姐食嘅   之後話佢驚阿妹鬧   食咗佢啲嘢   我話食哂仲好啦   屋企太多嘢食喇 ~

抖到 6 點幾去買外賣就番屋企   7 點可以開餐 ~

食完抖陣就同里奧大人去徑步   今日食得勁   所以攰都要去做運動呀 ~

開機洗衫就沖埋涼   之後就睇 "Tunnel"   不過睇到 11 點唔夠都瞓 ~

肥豬女又出現了

話咁快就 2021 年最後一日   感恩今年感恩嘅事係特別多   感謝神嘅保守帶領   生活過得比往年更豐盛 ~ 

豉油皇雞中翼 + 豆苗拼銀絲旺 ( 30-DEC-2021 )

( 30-DEC-2021  THU )

感恩一覺瞓天光   每月一到之後都無朝早徑步   希望快啲離開我   我想正常生活呀   哈哈 ~

今朝仍然係奶醬多   茶記阿哥話我好飄忽   尋日先飲咖啡   前日阿姐又問我做咩飲檸茶   我話想戒囉   但唔係唔飲呢 ~

菇場唔忙呀   勁正   因為想做自己嘢呀 ~

Lunch Time 出去買咖啡同菜   之後買墨魚丸河就番菇場 lu ~

仍然唔忙   放工準時走人 ~

呢排下下要等 15 分鐘車   所以又係好遲先番到屋企 ~

放低袋要即預備晚餐   咁里奧大人就唔駛等咁耐   哈哈 ~

是日懶餐 - 豉油皇雞中翼 + 豆苗拼銀絲旺

豉油皇雞中翼 - 本身想煮紅燒雞翼   不過時間唔夠   所以改為豉油皇   不過里奧大人麻麻哋   話太甜   可能我頭先落得太多冰糖呀 ~

豆苗拼銀絲旺 - 剩番 4 小棵銀絲旺   所以加多份豆苗   依家想食多啲菜 ~

洗完碗抖陣就去徑步   其實都係散步   我唔想血氣太運行呀   哈哈 ~

沖埋涼又睇下功課   差唔多 10 點 15 分先睇劇   不過睇到 10 點 45 分左右都瞓   所以一套劇真係好襟睇   哈哈哈哈 ~

辣肉腸炒刀削麵 + 蠔油本菇金銀旺 ( 29-DEC-2021 )

( 29-DEC-2021  WED )

今朝里奧大人話尋晚瞓得勁差呀   因為成日驚我冷親   又成日摸住我   話兩張被又成個身好熱   一張被個身又凍   係咁轉被加被無瞓過咁   不過我又唔知喎   但我每次一郁   佢又真係問我凍唔凍喎 ~

最搞笑佢又話我成個火爐咁   搞到佢都熱醒埋   我話我真係唔知自己個身咁熱喎   呵呵 ~

天氣又無咁凍啦   等我尋晚仲拎住厚褸出嚟   但今朝都唔駛着佢了 ~

早餐食奶醬多   呢期完全只想食奶醬多   唔知點解 ~

菇場唔忙喇   年尾都係咁 ~

Lunch Time 去萬寧買 Water Jel   之前家姐想買   不過無哂貨   感恩有貨之餘仲要做大降價   所以即買 3 盒   里奧大人又係鍾意搽 Water Jel   我就無咩所謂 ~

買埋牛筋丸米就番菇場慢慢食   我食完多數將個袋放喺地下   開工先拎去掉   今日唔知邊個幫我拎走咗呢   但我完全唔覺有人經過我個位喎   因為我伏喺枱瞓覺   聽唔到腳步聲   哈哈 ~

好油呀   勁恐怖   好在食落唔係成口油咋

$79/盒   但 $180 先可以扣 $28   所以要買夠 3 盒喇

菇場唔忙   但頭先碗米粉味精勁重   搞到我好鬼眼瞓 ~

幾辛苦先等到放工   今晚仲要等 20 分車   嗚嗚 ~

番到屋企要即刻預備   本來想煮雞翼   但唔夠時間   所以即改為辣肉腸算喇 ~

好在臨煮之前睇下   原來已經過哂期   哈哈哈哈

是日晚餐 - 辣肉腸炒刀削麵 + 蠔油本菇金銀旺

辣肉腸炒刀削麵 - 屋企無哂意粉   所以即轉刀削麵   因為我唔想辣肉腸送白飯   哈哈 ~

蠔油本菇金銀旺 - 之前剩落   今晚點都要煮㗎喇 ~

洗埋碗就抖陣   之後同里奧大人去徑步喇 ~

開機洗衫就即沖涼   食埋生果就睇 "Tunnel" ~

今晚 10 點 40 分都瞓喇   都算早呀   哈哈 ~

章魚肉餅飯 + 豉椒排骨飯 + 雞扎 + 燒賣 (外賣) @ 屋企 ( 28-DEC-2021 )

( 28-DEC-2021  TUE )

今朝起身   沖熱水涼沖咗好耐   感覺好似有啲唔舒服咁   唉 ~

里奧大人問支清熱酷係咪比佢 ?!   我話你想飲咪帶囉   佢話妳想我帶咪飲帶囉   完全無答案   哈哈哈哈 ~

菇場唔忙呀   但頭重重又好鬼凍   好似發燒咁   所以即食粒感冒 Panadol   可能今朝起身無着外套攝一攝呀 ~

Lunch Time 去銀行打簿   咁要量體溫嘛   感恩係 36 度無發燒   個心當堂安樂哂 ~

買埋 12 個葉橙就去買墨魚丸麻辣米線   我要食麻辣驅寒呀   對我嚟講係好有用㗎   一路食個咀唇一路麻   同埋食到流眼淚呢下先勁   哈哈 ~

菇場仍然唔忙   不過個人唔係咁舒服咁囉 ~

放工即走   今晚唔煮喇   想快食快休息 ~

買埋晚餐就番屋企   之後里奧大人都番到嚟喇   可以快快開餐 ~

里奧大人同事送嘅聖誕禮物   佢地每個位前面都有隻聖誕襪裝聖誕禮物㗎   今年幾乎全部係食   咁就啱哂我啦   哈哈哈哈

食完抖陣就沖涼喇   呢排每晚都食個葉橙   我覺得好好味呀 ~

9 點幾先睇 "Tunnel"   但 10 點半都瞓覺喇   好攰咁呢 ~

雜丸拚海鮮卷 + 椰菜炒刀削麵 ( 27-DEC-2021 )

( 27-DEC-2021  MON )

今朝 9 點半左右都自然醒 lu   之後等里奧大人去買早餐   今日唔出街喇   加上又凍又落雨   我想喺屋企抖下 ~

食完早餐就睇下食譜   真係好認真睇有咩可以煮㗎 ~

我話下年煮 200 個新菜式   里奧大人好大反應話係咪呀 ?!?!?!   要記低佢先   之後我話以為你掛住睇電視唔會聽我講嘢   原來係聽到   哈哈 ~

差唔多 1 點 45 分都食 Lunch 喇   唔想太晏食呢 ~

又再睇 ASTRO Starlight 演唱會   每睇一次都好感動   因為佢哋好努力   感恩依家開始火起來   希望佢哋一直走花路啦   我會繼續支持佢哋呢 ~

最搞笑里奧大人同阿妹話今次對我跌哂眼鏡   無諗過鍾意 ASTRO 咁耐喎   佢估我最多最多 3 個月貨仔   因為睇我鍾意啲公仔   真係最多 3 個月喎   呵呵 ~

工人影比家姐   哈哈   感恩佢都好錫 Berry 女   

睇完就溫書啦   差唔多 6 點就要預備晚餐 lu ~

是日晚餐 - 雜丸拚海鮮卷 + 椰菜炒刀削麵

雜丸拚海鮮卷 - 尋晚見新鮮炸起就買啦   不過最後都無咩點食   咁今晚都食埋去啦 ~

椰菜炒刀削麵 - 里奧大人話鍾意咁食法   我其實都鍾意乾撈麵   食起嚟無咁熱   哈哈 ~

洗完碗就開機洗衫   沖埋涼就同里奧大人一齊睇 "Tunnel" ~

估唔到好睇喎   但最搞笑係之前我曾經睇第一集   之後話唔睇   依家又突然睇番   真係頂自己唔順   成日一時一樣 ~

今晚 10 點 45 分都要瞓   可以天氣勁凍   好易眼瞓   哈哈 ~

打邊爐 @ 屋企 ( 26-DEC-2021 )

今次仍然係湯爹湯底

新鮮炸起嘅海鮮卷同雜丸魚腐

即包嘅韭菜豬肉餃 ($30/打) - 我覺得超級抵   隻隻都好大隻㗎

隻隻都脤卜卜

冰格嘅雜丸

都係冰格嘅牛板腱

銀絲旺

蔥花辣椒豉油

家姐買嘅芝士蛋糕

( 26-DEC-2021  SUN )

今朝瞓到 8 點半都醒   所以去徑步喇 ~

番到屋企即開機洗衫   之後整早餐   係尋晚食剩嘅包   我再加蒜蓉牛油   今次焗得好香脆   下次要再焗比里奧大人食   因為尋晚唔係咁香脆囉   嗚嗚 ~

好想食雞蛋   不過就無食蛋黃   我唔想咁滯

拖埋地就沖涼   之後出發去里奧大人公司幫手 ~

崇拜完就等里奧大人放工   差唔多 2 點先食 Lunch ~

今次去婆婆屋企附近食 Lunch   之後去馬莎行陣   等埋家姐就一齊上婆婆屋企喇 ~

正宗泰式遊船湯河

雞軟骨豬肉捧餃子

冬蔭功豬頸肉扎肉河

家姐喺 A1 買咗個蘋果批比婆婆   又順便買多個芝士蛋糕比我   真係係咪咁啱呀 ?!   我啱啱先喺馬莎買咗蛋糕做甜品喎   係咪咁心靈相通呀 ?!   哈哈 ~

傾咗一個鐘都走喇   家姐要去整嘢   我同里奧大人就喺附近買邊爐料   今晚勁凍呀   好想打邊爐呀 ~

番到屋企都 5 點半   都要預備晚餐 lu ~

好開心可以打邊爐呀   因為好想用下個鍋呀 ~

6 點 45 分左右開餐   打邊爐一定要慢慢食   因為樣樣都好熱   哈哈 ~

洗埋碗就沖埋涼   之後休息喇 ~

家姐問好唔好食 ?!  我話一般   佢話諗住我好開心   之後整個喊樣   我話整鬼妳啫   唔好食點會食咗半個呀   之後佢又好開心   我下次都係唔好整鬼佢喇   哈哈

喺馬莎買嘅藍莓夾心穀物 ($49)   我買多盒比家姐

睇下 Youtube   差唔多 11 點幾先瞓呀 ~

黑椒西冷牛扒 + 焗牛油蒜蓉包 + 本菇粟米蛋花湯 ( 25-DEC-2021 )

( 25-DEC-2021  SAT )

今朝同里奧大人一齊 7 點 10 分起身   因為我要去佢公司幫手呀 ~

食完早餐就同里奧大人去開工   差唔多 1 點 45 分就放工喇 ~

頂爺送比我嘅蝴蝶酥   好開心呀   但份量太多   所以同家姐 Share

里奧大人話餓   咁食埋 Lunch 先番屋企呢 ~

冬蔭功豬扒金邊粉

泰式海鮮炒飯 - 個炒飯好辣

龍眼冰

我去超市買晚餐   叫里奧大人番屋企先   咁我可以慢慢行下 ~

番到屋企沖個涼都休息   今日滕來滕去有啲攰   所以都瞓咗半個鐘 ~

我真係好想瞓   所以將自己手機校靜音   4 點左右開始瞓   之後好似聽到手機震嘅聲   原來家姐打嚟   話上緊嚟我屋企呀 ~

真係好日都唔校靜音囉   家姐都覺得我係瞓咗覺   因為無覆佢   哈哈   不過我都瞓咗半個鐘   估唔到咁好瞓 ~

家姐 5 點半左右到   明明話今晚先車啲臘味比我嘛   點知又特登拎過嚟   咁我話今晚食完飯徑步   等埋佢來先沖涼   佢話驚我今晚太夜   我話怕咩呀 ~

佢今朝仲買咗增城蔗糖比我    呢樣咁鬼重   等我下次自己拎都得啦   睇見佢拎咁重   真係心都痛囉 ~

又買儲備比我   哈哈哈哈

鵝肝腸 1 斤 / 油鴨肶 2 隻 / 鮮肉加瘦臘腸 1 斤

傾偈傾到 6 點鐘左右   佢都要番屋企食飯 lu ~

里奧大人 6 點幾先醒   咁都瞓咗 2 個幾鐘   到我要煮晚餐喇 ~   

是日晚餐 - 黑椒西冷牛扒 + 焗牛油蒜蓉包 + 本菇粟米蛋花湯

黑椒西冷牛扒 - 聖誕節食西餐   其實係自己懶   只想開焗爐煮嘢   哈哈 ~

焗牛油蒜蓉包 - 焗得唔夠香脆添   不過呢隻芝麻包都幾好味 ~

本菇粟米蛋花湯 - 懶呀   菜都唔想浸   所以開罐粟米湯喇 ~

洗埋碗就沖涼   今晚都唔徑步喇   之後同里奧大人一齊睇戲   但睇半場都已經接近 11 點   咁唔可以睇喇   聽朝佢要早起身   寧願留番聽晚再睇呢 ~