水餃拚雲吞 (外賣) + 菜心苗 ( 31-AUG-2021 )

( 31-AUG-2021  TUE )

感恩一覺瞓天光呀   真係接近一個月無試過喇 ~

不過呢排起身比較慢動作   好在真係要比自己徑步   如果唔係我覺得自己又會開始懶呢 ~

早餐食甜餐包   間唔中齋齋哋都唔錯 ~

菇場忙呀   但一到 Lunch Time 就即走   因為家姐同我食 Lunch 呀 ~

牛柳 (277g) $108 - 都知家姐一定會話食牛   因為要我補血呀   佢話有蔥/蒜/洋蔥   知我鍾意食蔥就揀蔥   佢自己食會揀蒜頭   我話蒜頭我都好鍾意㗎   之後佢個樣好唔開心   仲講咗幾次話之得揀蒜頭啦   走嘅時候   我見有人係揀蒜頭   我同家姐講話好在無揀咋   係妳最驚熟蒜呢   之後家姐好開心話好在無揀   其實我呃佢啦   因為唔係咁   肯定一陣坐車   又會問我係咪鍾意食蒜頭㗎喇   再話好後悔揀蔥咁呢   哈哈

都幾厚身

鰻魚丼 (M) $60 - 我只係可以同家姐食鰻魚架咋   因為里奧大人唔食呢

黑芝麻糖條 / 花生糖條 ($40/包)   初初覺得貴   但原來份量都幾多   之後番到屋企試下啦   真係好有驚喜呀   好脆好新鮮咁   又唔係太甜先好嘛   我無要黃皮   好記得有次食新鮮黃皮   酸到我胃都痛埋   自此就唔敢再食了

我話唔要月餅   家姐問點解 ?!   我話唔要黃皮   又問點解   總知我一話唔要   就係咁問點解 ?!   好搞笑

我麻麻哋呢啲月餅   但家姐就鍾意食芋泥   咁兩個綠豆就比糟糟   咁都好啲   一個人食哂會好肥㗎

家姐依家會好早番到公司附近   佢就會去 AEON 睇嘢   仲話開咗間 Bakery   諗住聽日買十幾個麵包   我正想話 WFH 都唔駛買咁多啦   之後佢話買埋比同事一齊食   咁都正常啲   請人食包都好   話哂啲麵包都輕吖嘛   如果請嘢飲就唔好喇   哈哈 ~      

食完就去 Starbucks 飲免費咖啡   之後送埋家姐搭車就番工喇 ~

仍然忙呀   感恩放工前搞掂哂 ~

放工去買餸同西瓜   再買埋急凍排骨粒就即刻番屋企喇   落雨濕濕好麻煩呢 ~

放低個袋即預備晚餐   但 7 點半先開餐   因為里奧大人晏放工呀 ~

是日懶餐 - 水餃拚雲吞 (外賣) + 菜心苗 

水餃拚雲吞 (外賣) - 我同里奧大人開始有啲厭   哈哈 ~

菜心苗 - 買 2 斤分兩晚食   咁唔駛成日去街市 ~ 

洗埋碗就抖陣   之後去徑步   里奧大人唔去啦   尋晚咁夜瞓 ~

輕輕鬆鬆又徑咗半個鐘   開機洗衫就沖涼 ~

睇劇又睇到 10 點 45 分開始眼瞓   次次徑步都係呢個時候眼瞓呢 ~ 

焗煙鴨胸 + 煎糯米雞 (外賣) + 粟米蛋花湯 ( 30-AUG-2021 )

( 30-AUG-2021  MON )

尋晚瞓得唔係太好   感恩起身都精神 ~

今朝開始番徑步喇   都係徑半個鐘   實在好耐無朝早徑步   出完汗真係舒服好多 ~

早餐食腿蛋包   我都幾鍾意食甜蛋   但就唔可以食太多   會反胃㗎 ~

菇場忙呀   所以做到 11 點 45 分先出去 ~

呢排一落樓   行無耐就頭暈腳軟咁   但只係番工先會咁   好奇怪 ~

去完萬寧買嘢   之後再行一陣   唉   唔知食咩好   咁買燒賣腸粉啦 ~

萬寧買 LOTTE 杏仁朱古力餅   原價 HK$7.9   今日出位價 HK$10/2 盒超級抵   忍唔住買咗 10 盒   比 4 盒家姐   其他留番慢慢食

仍然忙呀   不過想抖下   同阿花傾計又傾咗 2 個幾鐘   真係唔經唔覺   之後大家再努力工作喇 ~

放工即走   去 759 買埋拉麵同茄汁先番屋企 ~ 

$25.9/2 包   買夠 10 包   咁又可以比家姐試下

諗住好簡單   就咁焗嘢+滾湯+煮辛辣麵   但都接近 7 點開餐呀 ~

是日懶餐 - 焗煙鴨胸 + 煎糯米雞 (外賣) + 粟米蛋花湯

焗煙鴨胸 - 想買手撕雞   但諗諗下份量好多咁   所以都係焗煙鴨胸算喇 ~

煎糯米雞 (外賣) - 里奧大人今日同姑奶們飲茶   食唔哂件煎糯米雞   咁我話拎番屋企當晚餐 ~

粟米蛋花湯 - 好想快啲清哂啲雞蛋   所以整呢個湯 ~

洗埋碗抖陣就去徑步   呢排天氣涼涼哋   無咁易出汗   我要再急步行   因為好想爆汗呀   哈哈 ~

開機洗衫就沖涼   抖陣又睇劇喇 ~

今晚 10 點 45 分都自己瞓覺喇   里奧大人就仍然繼續睇呢 ~

鮮菜豬肉迷你水餃 + 白菜仔 ( 29-AUG-2021 )

( 29-AUG-2021  SUN )

今朝瞓到 9 點半鬧鐘響   梳洗之後就徑步喇 ~

買埋吞拿魚包就番屋企   食完就大清潔廁所   沖埋涼就出發喇 ~

諗住早啲去里奧大人公司幫手   點知遲咗成廿分鐘先到 ~

崇拜完就同阿妹傾偈   最搞笑勁哥問阿妹喺度做咩 ?!   阿妹話陪我   之後勁哥再話里奧大人放咗工啦   我話我都想佢放咗工呀   哈哈 ~

里奧大人 1 點 50 分放工   咁食埋 Lunch 先番屋企 lu ~

我要去超市買菜   所以叫里奧大人番屋企先 ~

諗住買菜   但買下買下又買咗 2 支凍咖啡同 6 罐咖啡   之後再買咗樽泰式甜辣醬   所以個袋越嚟越重   咁係時候番屋企喇   哈哈 ~

沖埋涼就休息下   里奧大人瞓晏覺 ~

睇睇下 Youtube 想瞓覺   但原來已經 5 點幾   所以唔瞓啦 ~

里奧大人 6 點半起身   我都預備晚餐喇 ~

是日懶餐 - 鮮菜豬肉迷你水餃 + 白菜仔

鮮菜豬肉迷你水餃 - 激死我   煮到甩皮甩骨咁   下次都係睇住   唔好由得佢滾先得 ~

白菜仔 - 想買唐生菜   但無哂   咁食白菜仔啦 ~

洗埋碗就即刻去徑步   因為已經 8 點幾喇 ~

依家多數徑半個鐘   我唔可以太耐   始終之前失血過多   點都有啲攰咁呢 ~

沖埋涼就休息   抖多陣就睇劇 ~

今晚 10 點 45 分瞓覺   因為聽朝要徑步呢～

黑椒牛扒 + 菜心苗 + 蘋果粟米沙律 ( 28-AUG-2021 )

豆沙燒餅妹味   但實在太飽   只食咗 1 個咋

( 28-AUG-2021  SAT )

尋晚里奧大人半夜話熱醒   要開埋風扇   真係誇張囉   反而我又唔覺熱喎 ~

今朝買完早餐再買雞骨草比里奧大人   之後都番菇場喇 ~

早餐食腿蛋治   因為可能 2 點先食 Lunch   所以要食飽啲 ~

菇場忙呀   又係星期六忙   哈哈哈哈～

放工準時走   我去超市買餸   之後就同里奧大人食 Lunch ~

沖埋涼就抖陣   里奧大人就瞓陣晏覺   我就做小清潔 ~

每月一到終於清哂   足足陪咗我 20 日   真係就嚟命都無呀 ~

今晚 6 點半左右預備晚餐   7 點開餐最理想   哈哈 ~

是日懶餐 - 黑椒牛扒 + 菜心苗 + 蘋果粟米沙律

黑椒牛扒 - 係時間要補下血   所以買牛扒呀   $52 有 兩大塊   都好抵食 ~

菜心苗 - 呢排仍然鍾意食菜心苗   因為好林甜呀 ~

洗埋碗就去徑步   里奧大人叫我抖下   但我話真係想做運動呢 ~

番到屋企就開機洗衫   之後沖涼休息 ~

睇劇睇到 11 點都要瞓    因為里奧大人聽日要番工 ~

炸雞 & 薄餅 + 焗肉醬意粉 + 蘋果粟米沙律 ( 27-AUG-2021 )

~

( 27-AUG-2021  FRI )

話咁快又星期五   好快又過埋個 8 月添呀 ~

起身有啲頭重重   呢個月身體真係唔多掂   好在之前有做運動   如果唔係可能仲更加差   希望下星期可以開始早晚徑步啦 ~

里奧大人話尋晚追劇追到好夜   估佢唔到喎   我話係咪追模範生 ?!   佢話又幫人地改名   哈哈   我未瞓醒嘛   我話個名幾好聽吖   佢話個名係三十年前啲名   哈哈哈哈 ~

早餐食芝腿治烘底   今朝食飽啲   因為 11 點要開會傾 System ~

菇場唔忙   所以越坐越凍呀 ~   

11 點開會開到 12 點 15 分   真係好奇怪約埋呢啲食飯時間囉   雖然對我無影響   因為我今日都諗住食杯麵   哈哈 ~

忙咗陣之後又同阿花 Whatsapp   又傾咗兩個鐘   因為 Whatsapp 可以即時 Send 相   如果唔係用 Skype 仲好   我覺得打字快好多咁呢 ~

放工去超市買嘢   之後都番屋企喇   原來已經 6 點半 ~

里奧大人 7 點半先番到屋企   好在今晚唔駛徑步 ~

是日晚餐 - 炸雞 & 薄餅 + 焗肉醬意粉 + 蘋果粟米沙律

炸雞 & 薄餅 - 今次分開焗   咁里奧大人就可以食到熱辣辣薄餅 ~

焗肉醬意粉 - 落鑊炒下啦   咁樣無咁乾   其實有衝動想就咁焗熱   不過算啦   對里奧大人好啲啦   哈哈 ~

蘋果粟米沙律 - 買咗 8 個加拿蘋果都有 3 個星期   所以今晚真係點都食埋去喇   不過下次唔會再買   因為我唔鍾意食粉粉哋嘅蘋果 ~

洗埋碗就即沖涼   抖陣就睇模範計程車 ~

本來我 10 點半想瞓   但越睇越緊張   終於睇到 11 點 40 分呀   怪不得尋晚里奧大人睇到 1 點啦   原來真係會追   哈哈哈哈 ~

CHUBBY'S PIZZA (外賣) @ 屋企 ( 26-AUG-2021 )

星期一套餐 - 環球世界薄批 (普通批) & 肉醬意粉 & 炸雞 4 件 (+$12)

買滿 $200 送嘅牛油粟米

( 26-AUG-2021  THU )

尋晚半夜發惡夢大叫   因為我比個大黑影捉住咗   係咁吹氣落我度呀 ~

其實放幾日假   預咗番工前一晚係瞓得唔好   因為我好怕唔知醒起身   雖然校咗鬧鐘   哈哈 ~

感恩起身精神   話哂瞓少兩個幾鐘嘛 ~

早餐食粟米吞拿魚包   因為想有啲沙律醬    濕濕哋易入口 ~

菇場忙呀   時間好快過   正呀 ~

Lunch Time 去幫里奧大人公司拎嘢   之後買埋炒麵就番菇場喇 ~

忙下停下又放工   今晚都唔會煮   所以叫 Pizza 外賣 ~

番到屋企即開機洗衫   沖埋涼就等食喇 ~

好似好耐無食 Pizza   覺得好好味呀 ~

里奧大人 8 點去徑步   佢呢 3 晚都飲咗啤酒   話唔徑步都唔得喎   但其實我都想叫佢自己去徑步呢 ~

等埋佢先一齊睇劇   不過我睇到 10 點 50 分都瞓先喇 ~

招牌辣豬肉春卷酸辣米線 & 西生菜 (外賣) @ 屋企 ( 25-AUG-2021 )

( 25-AUG-2021  WED )

今朝瞓到 10 點   算係遲起身㗎喇 ~

其實唔係想比自己抖下   我寧願焗麵包食   因為成日食粉麵餐都幾悶   哈哈 ~

食完抖陣就沖涼   之後睇陣 Youtube ~

差唔多 1 點幾就出門口   因為約咗菜菜子 2 點喺佢公司等   點知佢話可能要半個鐘後先到   所以我哋搵地方食下午茶   一路食一路等佢喇 ~

香茅豬扒撈檬 ($40) - 好味呀

我鍾意食撈檬係因為鍾意呢啲酸醋

越式熟牛肉湯粉 ($39) - 都好味喎   呢間食物質素唔錯呢

全場得幾個人   我覺得勁正呀   可能平日關係 ~

衰仔差唔多 3 點先到   不過佢嚟到   我哋都食完 lu ~

佢話里奧大人次次約佢都係即刻見   如果唔喺度就即刻走   笑鬼死   真係唔講唔覺   哈哈哈哈 ~

傾咗個幾鐘就去佢公司坐陣   買下嘢又傾下偈   之後都走喇   唔阻佢做嘢嘛 ~

同里奧大人行陣 APM 啦   去 MUJI 買咗兩包花生朱古力同棉花糖比家姐   之後又周圍行 ~

紫色 + 野口真係勁鍾意   可惜我真係好少帶 Cap 帽

里奧大人喺 UNDER ARMOUR 又買咗頂黑色 Cap 帽   仲要只係 $229   之前睇親都要三百幾㗎   咁我話再送比佢生日禮物啦   佢依家成日問我八達通用剩幾錢 ?!   我話用剩 3 百幾咋   成日話驚我用唔哂   我話平時唔駛用八達通搭車買嘢嘅 ?!   真係呢 ~

   

差唔多 5 點 15 分都走喇   約咗姑奶們 5 點 45 分喺大圍等   之後一齊去寶福山 ~

里奧大人嘅 5 嬸走得好突然   所以佢哋屋企人都唔捨得   見到佢 5 叔都流眼淚   咁大年紀都咁   肯定好愛 5 嬸 ~

6 點 40 分左右做儀式   所以我哋都走喇 ~

姑奶佢哋 5 個人一齊去食飯   我就唔去食喇   我仍然唔想太多人一齊食飯呢 ~

搭地鐵走人   去南記買埋晚餐先番屋企 ~

沖埋涼先開餐   估唔到啲湯仲係好熱 ~

9 點半開始睇劇   但今晚 10 點半都自己瞓先   話哂聽日要番工   唔想又 12 點先瞓 ~

拚盤 ( 24-AUG-2021 )

前晚食剩嘅豬肋骨 & 雞膇 & 薯條 + 尋晚食剩嘅香菇肉餅 & 叉燒油雞

( 24-AUG-2021  TUE )

今朝 9 點半起身   梳洗後就開機洗衫   次次朝早洗衫   里奧大人就會覺得好驚訝   之後就會話唔駛咁早就做家務呀 ?!   抖下啦 ~

食完早餐都係抖下先出去   感謝神   今日狀態都 OK   所以出旺角改張 Claim Form   之後就搭地鐵去深水埗   去到都差唔多 1 點 45 分   所以食埋 Lunch 喇 ~

台南滷肉便當 ($45) - 普通啦 

招牌紅燒牛肉麵 ($59) - 呢個好味呀   同埋牛肉份量都好多

(+$10) 珍珠奶茶 - 唔好飲嘅

食完就去高登買 4TB Hard Disk   之後再行陣黃金就搭巴士番屋企 lu ~

番到屋企即沖涼   休息到 6 點就預備晚餐 ~

今晚 6 點半開餐   其實就咁焗熱真係好快 ~

食完就洗碗   之後再沖多次涼   雖然無汗   但都係覺得沖完涼乾淨啲咁 ~

8 點幾開始睇 "模範計程車"   真係好好睇喎   睇到 11 點幾都瞓 ~