隨變燒烤麻辣雞煲 @ 佐敦 ( 28-FEB-2014 )

隨便麻辣雞煲 - 小辣 ( 1隻 $178 ) - 預咗唔辣嘅   得小小小小麻囉   不過 d 雞就好滑   都唔錯

奇脆炸魚皮 ( $32 ) - 脆就脆   但好腥呢   驚驚 

美國安格斯肥牛 ( $128 ) - ok 啦

新鮮有膏鵝腸 ( $45 ) - 好爽架   同埋淥熟之後就唔見哂 d 膏   咁又唔錯喎  

重點必食魚皮餃 ( $45 ) - 麻麻啦

隨便粉 ( $22 ) - 口感好煙韌   最有驚喜係佢呀   哈

串燒牛魔王 ( $32 ) - 入口即溶   正

燒雞腎 ( $22 ) - 想食咋   籮籮話辣喎   孜然粉黎之嘛   

燒雞軟骨 ( $18 ) - 無特別囉

燒豬頸肉 ( $18 ) - 無咩特別囉   同埋好呃人呀   因為有塊係超級細

香燒雞皮 ( $18 ) - 完全唔掂   又唔熱又唔脆 

( 28-FEB-2014  FRI )

又 happy friday 喇   但 d 天氣就麻麻喇   唔凍但又唔可以唔着褸   着褸又覺得有 d 熱   最慘係潮潮濕濕咁呢 ~

早餐食奄列餐   其實呢間嘅早餐真係唔錯   不過嘢飲就唔係咁熱咁囉 ~   

菇場唔忙呀   不過個人仲係好鬼攰   勁想瞓覺 ~

Lunch 出去行陣   之後再買酸辣米線番菇場食   我食完成發覺成個身都係酸辣米線味呀   勁誇張   好在之後無味咋   唔係就慘咯 ~  

今晚約咗家姐同糟糟籮籮食雞煲   咁放工即走喇   喺九龍塘站 join 埋糟糟一齊去尖沙咀   估唔到家姐最快   6 點 15 分就出到尖沙咀   咁佢地話餓喎   所以去加連威老道食燒賣魚蛋   不過我都食唔落   之後再去貢茶買嘢飲就行 K11 喇 ~   

呢檔鹹濕嘢唔係成日都開檔架 

買咗 1 包黃色梨仔 + 1 包紅色梨仔 + 1 包魚柳 + 1 包菠蘿粒   總共要 $75   我以為自己聽錯呀    之前買都係 $10 包之嘛   依家梨仔要 $20 包   其他要 $15 包   好貴呀

差唔多 7 點 45 分就行番出佐敦   再去裕華買嘢食就走喇   因為籮籮已經到咗呢 ~

8 點 15 分等到 9 點 45 分   真係人都顛   食店又奇怪   糟糟已經係第 3 個打電話黎架喇   不過佢地間嘢講到明打電話只係用黎登記   唔係留位   同埋會比 walk-in 嘅人入去先   咁講真   最極限都係等兩個半鐘   因為佢地限時兩個半鐘囉 ~

9 點幾打比里奧大人   佢喺大陸都仲未收工   不過我都話我都唔係好妳好多   我地仲喺度等緊 ~ 

差唔多 10 點先食呀   籮籮又話辣又 E 樣果樣   知佢好想快 d 食完快 d 走啦   我最鬼驚佢咁   之後都話叫個清湯嘅比佢   佢又唔要   其實我係想佢食嘢   唔好喺度 EE 哦哦   最後食到 11 點就走啦   睇住我地 3 個食都無意思   所以我地 3 個決定下次再去另一間食雞煲   但飛佢   哈哈 ~

籮籮車埋我地番屋企   我番到屋企都係 11 點 20 分   里奧大人覺得奇怪呀   點解會咁早番喎 ~

里奧大人慘啦   喺大陸 office 跟開佢嘅 asst. 比人炒咗   所以佢要由頭到尾跟番哂 d 嘢   本來諗好聽日去街都唔去得 lu   不過我又無所謂   因為我其實都好攰   想喺屋企抖下呢 ~     

黑椒牛扒 + 油麥菜 ( 27-FEB-2014 )

( 27-FEB-2014  THU )

尋日行咗成日   所以今朝都好攰呀   哈 ~

早餐食奶油多   其實尋晚果餐都未落格   不過唔食又唔得 ~

番到菇場就忙喇   差唔多 12 點先忙完咋   所以覺得好快又 lunch 咁呢 ~

唔知食咩好   咁就買燒賣粉果   估唔到呢間粉果 d 皮煙煙韌韌   下次再買黎食先 ~

今日家姐打黎唔知講咩   佢形容個 size 我聽   話個 size 好似隻手掌咁   但無手掌咁大   切哂 d 手指嘅 size 咁啦   我話妳話半隻手掌或者掌心咪得囉   駛咩講到切哂 d 手指咁恐怕架   哈哈 ~

放工走喇   今晚唔駛去買餸   實在太好喇 ~

番到屋企預備晚餐   之後飲埋碗魚湯   抖陣就煮喇   反正我自己食先   早 d 食就最好   多 d 時間消化嘛 ~          

是日懶餐 - 黑椒牛扒 + 油麥菜  

黑椒牛扒 - 完全唔記得仲有牛扒   因為之前媽咪買咗 d 新嘅比我   我都唔記得仲有蕭果 d 未食   所以拿拿聲食埋   我用淘大黑椒醬煮汁   但得個鹹字   唉 ~  

油麥菜 - 勁喇   星期日買架   不過無食   今晚先食   好在無壞咋 ~

里奧大人 8 點幾放工   所以我都沖埋涼喇   之後就淥冬蔭功麵佢食啦   其實我完全唔記得喺泰國買咗番黎   所以記得食就要食   唔係又過期   過期唔係問題   最大問題係一次過食好多餐先驚囉 ~

搞掂哂都差唔多 9 點半喇   咁里奧大人都陪我一齊睇電視劇   依家睇緊 "The Mentalist"   勁好睇呀 ~

元氣未復   所以 11 點就瞓喇 ~

海洋公園 + Outback Steakhouse @ 銅鑼灣 ( 26-FEB-2014 )

香辣炸雞搥 ( 伴芹條和藍芝士醬 ) ( $78 ) - 我地要中辣   但都唔係好辣   但份量就勁多啦   我初初諗住 6-7 隻   估唔到有 10 隻   所以叫家姐拎走   

昆士蘭沙律 ( 新鮮沙律菜配雞胸肉粒 ， Monterey Jack 蒙特耐傑克芝士，  車打芝士， 煙肉碎 ， 碎蛋， 蕃茄片， 杏仁片及烤麵包粒配農村沙律醬 ) ( $122 ) - 份量又好多   好在多菜   d 雞胸好難   所以無咩點食

肉眼牛扒拼豬肋骨 ( 10oz 肉眼牛扒配半份豬肋骨， 焗甜蕃薯及炸薯條 - 黑椒汁 ) ( $252 ) - 嚇啦   咁大份   因為我地用咗 Ruby 嘅份量黎叫嘢食   Ruby 份量唔係好多   所以相比 Outback   佢地 d 份量真係超巨   食唔哂肋骨同薯條   又叫家姐拎走

是日餐湯 - 好似食扒附送例湯 or 沙律   我要熱湯   因為頭先飲完凍嘢   哈

雲呢拿雪糕朱古力軟餅 ( 熱果仁朱古力軟餅 配雲呢拿雪糕， 忌廉，熱朱古力醬， 伴上朱古力碎 ) ( $58 ) - 我黎 Outback 原因係想食呢個甜品   真係好好味   下次黎再食   

       

芝士蛋糕 - 餐廳送比我嘅生日蛋糕 ^^

載一盒雞膇啫   駛唔駛咁大個紙袋呀   嘩哈哈哈

( 26-FEB-2014  THU )

尋晚里奧大人手機無啦啦響   之後播生日歌   係 New Kinds On The Block 唱嘅   我第一次聽架咋   原來當時係踏正 2 月 26 日嘅 12 點   呢下好有驚喜呀   哈哈   算佢啦   有 d 表示 ~

8 點起身喇   去金加利食早餐   不過早餐唔好食   咖啡唔好飲囉 ~

鹹牛肉炒蛋   乾到呢

食完就番屋企   抖陣就沖涼   差唔多 9 點半就出發去海洋公園喇 ~

搭地鐵去金鐘   再搭 629   差唔多 10 點半到海洋公園   都算幾快呢 ~

我覺得對熊貓好大陸 feel 咁

諗住落雨架喇   估唔到有太陽   我直頭覺得熱囉   但最勁係我仲着毛毛 boots 呀   而里奧大人要換短袖 tee 添呀   佢自己帶咗黑超   但我無啦   我話佢衰呀   唔提我帶 ~

我生日就 free   但里奧大人就要比 $320 入場   一入到去   完完全全覺得自己身處大陸   哈 ~ 

其實公平 d 講   外國人都會無禮貌   不過大部份外國人都會守規矩   會禮讓   絕對唔會打尖   但 d 大陸人真係好自私好自私   咩都搶   咩都打尖   我係親眼見識過   又比 d 細路周圍當街屙尿   我頭先一落巴士   就見到個小朋友喺街度屙尿   係個媽媽示意佢除褲屙尿添呀    大佬呀   女仔喎   妳點都要好好保護佢啦   點會叫佢咁做架   正常人都會叫佢忍住先   反正落條電梯已經係海洋公園嘛   點解唔快快入去海洋公園嘅洗手間呢 ?!

入場喇   都好多人   好多人唔緊要   但最慘係 95% 係大陸人   完全覺得自己又去咗長隆咁   ohoh ~~~~ 

第一站去海洋奇觀   之後去大熊貓之旅睇熊貓同金絲猴   今日都幾多人   又熱喎   所以我都無咩心機影相   叫里奧大人幫我影相算喇 ~  

隻熊貓係咁索隻門

 咁又唔望人 lu

海洋公園真係好識做生意   每去完一個館就會見到 Souvenir 區  定力小 d 都唔得   哈哈 ~ 

之後去香港老大街同埋玩環迴水世界   其實即係迴轉木馬之嘛   只不過將木馬改為海底動物   不過我都係鍾意坐木馬多 d   兒時回憶嘛 ~ 

坐 Cable Car 上山去南極奇觀睇企鵝   等咗起碼 20 分鐘先上到 Cable Car ~   

@ 南極奇觀

差唔多 1 點喇   而我都開始餓   所以食嘢先   抖陣再行 ~

食完就去坐摩天巨輪   之後再玩 "飛天鞦韆"   因為我 plan 好要玩   如果唔玩   就真係純粹觀光   唔抵呀   哈 ~ 

摩天巨輪

最勁係得我一個人玩咋   里奧大人話幫我影相喎   但其實我去到又唔敢玩呀   因為覺得好似飛得好高咁   對我黎講都算勁嘢黎架   不過里奧大人話細路都玩   有咩好驚呀   仲話我痴線添呀   驚到有罪   哈哈   咁佢咁講   我就玩啦   不過轉嘅時候一高一低都有離心力架   里奧大人就負責影醜態   但我無望里奧大人呀   望住個天好 d   因為無咁似跌落黎咁 ~  

之後去中華鱘館   大到呢   唔駛 5 分鐘就行完   初初仲諗住睇陣先影相   點知好快到出口   我地仲以為行錯路添呀   因為無可能咁快行哂囉   咁之後去睇鯊魚同水母萬花筒喇 ~

條鯊魚個樣好懵  

@ 水母萬花筒

隻水母好似荷包蛋   所以叫里奧大人即刻影低呀

去埋熱帶雨林天地同熱帶雨林探險徑就去玩 game 喇 ~

其實仲有好多毒嘢   仲有唔知邊個國家嘅巨蟑螂   佢地用 " 可愛 " 黎形 d 巨強   路不同   真係唔識欣賞   叫里奧大人唔好影   佢仲特登影多幾張   衰 

侏狨

成隻老鼠咁   

撩狨

水豚   

知記得咩鳥   我以為係假添

去玩 "雷霆節拍"   上次黎已經想玩   不過糟糟話驚喎   但其實只係好快速咁轉之嘛   不過衝落去果下有 dddd 離心力咁啦   不過我真係唔驚囉   因為唔喺半空嘛   我同里奧大人覺得玩呢個 game 係勁無聊   但見 d 人係咁叫   我地覺得好好笑   所以我地都叫埋一份囉   我仲叫埋救命添呀   嚇到前面兩個人即刻望過黎   哈哈   不過唔好講笑   落車果下真係有 d 暈   同埋把聲拆咗   抵死   哈哈 ~

雷霆節拍   

呢個 game 叫翻天覆地

睇見都腳軟   我仲叫得大聲過佢地   哈   

坐 "海洋列車" 落山喇   等咗一陣咋   5 分鐘內就落到山  好快架咋 ~   

好多時里奧大人一影相   咁我都會跟住影嘅   我二仔底嘛   咁佢影緊嘅時候   我企喺佢後小小啦   因為我無打算影嘛   之後我聽到佢講 "縮手"   我心諗   又幾堅喎   叫個大陸女人 "縮手"   而個女人真係好驚咁即刻縮手喎   妳知啦   好多大陸人真係唔會理妳家嘛   佢要影就會 "得" 喺妳面前係咁影   咁佢影完之後   我正想讚佢夠哂 man 呀下   點知佢話以為係我隻手呀   嘩哈哈   樣衰 ~   

再玩多次環迴水世界   去埋香港老大街行一陣就走 lu ~   

@ 香港老大街 - 呢日熱呀   所以見到西瓜好想食

最後一站當然係去番 "四川奇珍館" 買熊貓公仔啦   其實我一話買熊貓公仔開始   之後到咁上下   都聽到里奧大人講話 " 去埋呢度咁咁咁   最後買埋熊貓公仔就走 "   佢知我好鍾意   所以佢一定記入心   同埋去到每個 Souvenir  區   佢都會望下有無   如果有就即刻買呢   真係好感動架 ~    

我今次勁呀   忍到手   因為買滿 $300 有 9 折   但熊貓公仔只係 $199   我又睇仲咗個磁石貼   但都係 $49 一個   咁點都唔夠 $300   但無理由買 3 個同款磁石貼家嘛   所以最後就咁買熊貓公仔算喇 ~

差唔多 5 點去到巴士站   諗住有 629A 直接去銅鑼灣  但原來 5 點 20 分先開頭班車   咁我地都唔等 lu   坐番 629 去金鐘   再搭地鐵去銅鑼灣 ~

我對腳就黎斷喇   所以我話去麥當勞坐陣   之後再去 Body Shop 買 2 支細香水就去 Outback 喇 ~

家姐 6 點 45 分到啦   即落 order 喇   因為佢話好餓 ~

食到 8 點 45 分就走   一齊坐 619   家姐喺官塘再轉車番屋企   我地就直接番到屋企   唔駛行好遠   所以我鍾意坐 619 多過地鐵呢 ~

番到屋企即沖涼喇   勁攰   所以 11 點瞓喇   哈哈 ~

特價 $89/支   都幾抵   家姐仲搞笑   我同佢講有 4 款味道係 $89/支   我買咗 2 支   不過我都未講完   家姐叫我買埋果 2 支   話送比我   但我話我唔鍾意果 2 支 d 味道   所以唔買嘛    哈   佢梗係以為我唔捨得買呢