BBQ 雞中翼 + 甜豆拼粟米 ( 31-JAN-2023 )

無味嘅香草蕃茄醬意粉   哈哈哈哈

( 31-JAN-2023  TUE )

感恩一覺瞓天光呀   鬧鐘未響都已經醒咗 lu ~

早餐食芝士夾甜餐包   仲有 1 塊芝士未食   希望聽朝清埋去啦 ~

菇場唔忙呀   咁做下 Email Filing   呢啲真係做極唔完咁㗎 ~

里奧大人突然改咗番下午   所以成日都會搞亂哂今日係星期幾咁囉   上次佢睇牙醫又係咁   講啱日子但講錯星期幾   好在我提一提佢   唔係又唔知等到幾時了 ~

Lunch Time 出去行下先   之後買水餃米粉番菇場慢慢食 ~

菇場仍然唔忙呀   咁一定係 Skype 到放工   哈哈 ~

放工即走   番到屋企都預備晚餐了 ~

是日懶餐 - BBQ 雞中翼 + 甜豆拼粟米

BBQ 雞中翼 - 1 磅 ($28) 都有 12 隻都唔錯喎   同埋都唔算細隻   最緊要唔駛自己醃   始終我有時都諗唔到煮咩好   買呢啲都可以囉 ~ 

甜豆拼粟米 - 甜豆半斤都要 $18   我覺得貴咗好多呀   咁之前食剩 1 條粟米就淥埋去喇   唔想成日記住要食 ~

煮埋個魚片手打烏冬比里奧大人聽日帶飯   之後就即洗碗   抖陣就同里奧大人去做運動 ~

依家做番運動   做 20 分鐘都有啲攰咁   真係要勤力啲做番先得 ~ 

沖完涼都休息   睇下 Youtube 又 11 點   時間都過得好快   所以要瞓覺喇 ~

蒸蘿蔔糕 + 超甜粟米 ( 30-JAN-2023 )

咁樣好似未蒸咁   但其實係熱辣辣㗎

( 30-JAN-2023  MON )

尋晚半夜都有好輕微嘅肚痛   之後不斷祈禱   感恩好快唔痛   仲瞓到 7 點半起身 ~

感恩起身都精神呀   感謝主 ~

早餐食牛角酥   尋日無食到   今朝食埋去啦   勁好味道 ~

菇場唔忙啦   今日都係 3D   勁爽呀 ~

阿花比我嘅 Binnie 生日應援   我最鍾意人着西裝呢

Lunch Time 行陣就去買牛雜河   順便去派利是   難得佢哋今日齊哂人呀 ~

菇場仍然唔忙   所以都係 Skype ~   

姑奶們今日嚟我屋企傾嘢   可惜我要番工   不過佢哋傾到 4 點幾都走   咁都同唔到佢哋食飯 lu ~

放工即走   番到屋企都預備晚餐   今晚勁簡單 ~

是日懶餐 - 蒸蘿蔔糕 + 超甜粟米

蒸蘿蔔糕 - 終於清哂盒八珍蘿蔔糕   但仲有底奇華未食   不過今星期都要清埋㗎喇 ~   

超甜粟米 - 我好鍾意食粟米   里奧大人就麻麻 ~

洗埋碗就開機洗衫   做埋小清潔就沖涼喇 ~

里奧大人做運動   我就休息下 ~

姑奶送咗 2 盒士多啤梨比我哋   估唔到甜喎

今晚有啲攰   10 點半都瞓覺 lu ~

煎蘿蔔糕 + 昆明生菜 ( 29-JAN-2023 )

 

( 29-JAN-2023  SUN )

今朝同里奧大人一齊番工   感恩身體狀況都 OK ~

食完早餐就去幫手   之後番學   但今朝要早啲走   因為要番自己教會事奉 ~

蛋牛治   都好厚蛋噃

12 點半崇拜完畢   咁買埋菜就番屋企 lu ~

差唔多 1 點半先番到屋企   所以即刻整 Lunch 喇 ~

食唔哂個牛角酥   又要留番聽日做早餐了

我就睇 Youtube   里奧大人就瞓晏覺   星期日嘅節目就係咁   哈哈哈哈 ~

5 點幾去超市買油   原來成支過咗期呀   激氣   咁順便再買麵包就番屋企 lu ~

其實都唔記得幾時買   只記得屋企有油

是日晚餐 - 煎蘿蔔糕 + 昆明生菜

煎蘿蔔糕 - 我想煎比里奧大人食呀   船頭佢地話蒸蘿蔔糕唔好食   我話蒸好味喎   之後我覺得里奧大人好慘咁   成日只係食蒸糕   所以點都要煎比佢食   佢話唔好嘥時間   我話邊會呢   佢話如果知我買油係用嚟煎糕   一定唔會比我落去買   佢好感動我特登煎糕比佢食呀   搞笑呀呢 ~

昆明生菜 - 呢度係 1 斤   份量啱啱好 ~

洗埋碗再做小清潔就沖涼   里奧大人自己去做運動   我就睇聖經喇 ~

今晚食藥先睇到藥袋寫嘅嘢   原來全部都係 For 胃嘅   有粒仲要咬碎   我係今晚先知   里奧大人都話有無搞錯呀   哈哈哈哈 ~

屋企突然間多咗好多零食   依家每晚食啲食啲   好想快啲食哂去呀

今晚 9 點先睇 "善良的男人"   但睇到 10 點 45 分都要瞓覺了   因為有啲攰呀 ~

打邊爐 @ 屋企 ( 28-JAN-2023 )

今次用李錦記嘅沙爹湯底   再加 1 條昆明超甜粟米   條粟米真係好甜呀

喺 759 買嘅 Seawakk 冷凍韓國慶南蠔 1 kg (韓國直送 熱賣速銷價 $88.8) - 都有蠔味喎   同埋淥完唔會縮到好細隻呢

水魷要 $32   牛柏葉要 $35   我真係覺得好貴   但好想食囉 

蝦滑 4 兩 ($45) 

鳳城水餃 (半打 $18)

我買咗半磅牛板腱   因為唔想買一磅食唔哂又要留

我其實想食響鈴   真係拎起又放低   放低又拎起   但最後都唔買   因為一盒好多呀   如果家姐嚟打邊爐就會買   哈哈

呢期鍾意食蟹柳   勁似家姐   哈哈

( 28-JAN-2023  SAT )

尋晚個肚有啲冤冤痛   所以瞓到 8 點 15 分先起身   慢動作沖涼洗頭   之後就搭車去家姐屋企喇 ~

一入屋 Berry 就撲唔停   但佢真係太重   加上佢又唔會比我抱   唔係抱下佢都好 ~

佢唔鍾意影相   哈哈哈哈

但我鍾意幫佢影相噃

嚇我嗎 ?! 哈哈哈哈   其實佢好似打喊露定咩   唔係想咬我呢

佢個美臀挨住我個身㗎

同佢自拍   點都走唔甩

我同工人講話 Berry 係大小姐   之後話家姐係大少奶   工人即刻話先生叫老爺   真係笑鬼死我   因為之前佢同家姐一齊睇古裝劇   佢係咁問家姐咩叫做少奶同老爺 ?!   仲話想叫老爺唔想叫先生   哈哈 ~

忍唔住又幫家姐執好啲文件   我都費事問佢得唔得   咁我執好哂佢啲文件再話佢知   佢都不知幾開心   仲話自己好懶 ~

家姐 10 點唔夠就番到屋企   咁我就可以食早餐喇 ~

Urban 買嘅牛角酥都好味㗎 

家姐叫我抓銀   我拎朱古力金幣   家姐吖大口話估我唔到   哈哈哈哈   因為我唔會買嘛   同埋 1 包咁多又食唔哂   依家食 1 粒過口癮咪算囉   呵呵

呢支洗頭水好用   所以家姐比我試下

又比咗零食比我

之後家姐坐飯廳入利是   我行埋飯枱前面同家姐傾偈啦   Berry 女無啦啦喺枱底吠我喎   好似保護家姐咁   但佢係咪傻咗呀   連我都吠   哈哈哈哈 ~

用手仔按住零食

成張梳化都係口水

同家姐又傾下偈   所以好快又 12 點幾   咁佢同姐夫出去整嘢   我都走人喇 ~

係都唔望我呀   工人話佢唔鍾意影相   哈哈

唔望我都可以影的

咁我同家姐講番 Berry 係大小姐單嘢   家姐話係咪我教工人講大小姐 ?!   我話無喎   原來佢今朝叫 Berry 做大小姐呀   係咪咁啱呀   哈哈 ~   

我去完超市買嘢就同里奧大人一齊食 Lunch   食完就去買餸喇 ~

食點心都飽   所以牛角酥要留番聽日食

今晚打邊爐   里奧大人講明唔食丸   哈哈   不過我其實都唔係咁鍾意食   但就會買定當儲備咁囉 ~

家姐 Whatsapp 叫我打比佢   我話其實直接打比我都得㗎喎   之後佢話因為驚里奧大人瞓覺   真係太了解里奧大人   佢真係啱啱去瞓覺   哈哈 ~

里奧大人 5 點幾起身   所以可以 6 點開餐   今晚邊食邊洗   所以食完好似唔駛點洗碗咁   勁爽呀 ~

抖到 8 點   里奧大人自己去做運動   我就做小清潔同拖地再開機洗衫   搞掂就沖涼 lu ~

雖然今日每月一到   但感恩都精神同有胃口呀 ~

等埋里奧大人沖涼完就睇宋仲基套 "善良的男人"   其實係 2012 年㗎喇   但啲影評話好睇   咁又睇下囉 ~

睇咗 1 集都算幾好睇咁啦   不過睇到 11 點都瞓   聽朝要早起呢 ~

燒鴨飯 + 蠔油燜冬菇雞膇 + 菜心苗 ( 27-JAN-2023 )

( 27-JAN-2023  FRI )

感恩一覺瞓天光呀   里奧大人都係   最搞笑佢話可能大結局無咁血腥   所以瞓得好   哈哈 ~

早餐食芝士夾甜餐包   里奧大人就醬占提子麥包   有時我都想麥包   但真係好驚嗰幾粒提子   一咬落口度唔知點咁 ~

菇場忙咗陣   又可以做自己嘢了 ~

Lunch Time 出去行陣   之後買牛腩米番菇場食 ~

同阿齋講開喺 Ikea 食嘢   之後索性喺我位睇 Openrice   簡直當西瓜無到   哈哈 ~

之後又再傾下其他嘢   傾到差唔多 3 點   好在西瓜無出來咋 ~

放工即走   番到屋企即預備晚餐 ~

是日懶餐 - 燒鴨飯 + 蠔油燜冬菇雞膇 + 菜心苗

燒鴨飯 - 尋晚剩咗半盒即食白飯   今晚焗熱算喇   估唔到焗到有飯焦   勁開心呀 ~

蠔油燜冬菇雞膇 - 終於清哂   好在里奧大人依家帶飯   但食唔哂夜晚再食  佢即係食足 3 餐都幾悶   哈哈 ~

菜心苗- 本來只想煮一半   但又唔知聽晚煮唔煮飯   所以食埋去 lu ~   

洗埋碗就沖涼   依家唔駛追劇   生活回復正常了   哈哈哈哈 ~

今晚食湯丸   因為想清埋碗綠豆沙呀 ~

睇 Youtube 睇到 11 點幾都瞓   其實算遲㗎喇 ~