麥蘆卡蜜糖烤雞餐 (外賣) @ 屋企 ( 31-MAY-2022 )

素肉醬意粉留比里奧大人聽日 Lunch

( 31-MAY-2022  TUE )

感恩一覺瞓天光呀   再瞓得唔好就唔掂㗎喇   哈哈哈哈 ~

早餐食奶醬多   好似食足一個月   呢兩日烘到好乾   其實乾都唔係問題   但實在太少奶醬呢 ~

今朝飲凍啡   家姐以為我好熱   我話唔想飲咁濃呀   每次飲熱啡少奶走甜   我真係只飲半杯   否則反胃   但就一定唔可以正常奶   唔係更易反胃   哈哈哈哈 ~

菇場唔忙   好想快啲到 Lunch Time ~

一夠鐘就飛去一田買威化餅同朱古力比里奧大人   今次買得最少嘢   哈哈   之後買埋紅腸酸辣米線就即番菇場   因為已經開始落雨喇 ~

仍然唔忙   可以準時放工 ~

去買雞骨草比里奧大人   估唔到之後又同佢一班車   佢話咁早放工唔好煮喎   所以又買外賣喇 ~

食完抖陣就做小清潔   里奧大人話特登比我抖   點知又做家務   我話唔駛煮飯有時間整   咁等屋企乾淨啲嘛 ~

搞掂哂就開機洗衫   之後即沖涼休息了 ~

呢排里奧大人都好主動幫我按摩條腰   比佢按完真係舒服好多   但隻手就一樣有啲痛   呢下先煩 ~

今晚 11 點鬆啲都瞓   其實最想係 10 點 45 分瞓   但好多時唔係 11 點就係 10 點半瞓咁囉   梗係唔會 10 點 45 分   哈哈 ~

蜜煎欖角骨 + 菠蘿生炒骨 (外賣) @ 屋企 ( 30-MAY-2022 )

蜜煎欖角骨 - 排骨都唔係煎嘅   不過個汁甜甜地都幾好味

菠蘿生炒骨好味呀   呢期非常之鍾意食

( 30-MAY-2022  MON )

尋晚瞓得麻麻哋   好似胃酸倒胃感覺   幾經辛苦先瞓得着呀 ~

唔知係咪食咗糭呢 ?!   下次再食多次先   如果真係咁   咁要里奧大人拎番公司食了 ~   

早餐食奶醬多   今次件多士好乾呀   要食剩啲邊 ~

家姐最怕見到呢杯苦茶   哈哈哈哈

洗玻璃杯同暖水杯   點知拎咗 2 隻玻璃杯去洗   第一次咁咋   今朝不在狀態添 ~

菇場唔忙   我真係好眼瞓咁 ~

Lunch Time 去一田買嘢   之後買埋炒麵就番菇場喇 ~

唔忙加上靜   再加埋我好攰   真係好想瞓   哈哈 ~

放工即走   同里奧大人一班車   之後一齊去買外賣   但佢負責等   我就番屋企沖涼先 ~

我話等埋佢沖涼先食   佢話驚我餓   所以咩都快快咁做   咁又係喎   我都奇怪佢做咩咁心急除鞋   平時慢慢除家嘛   哈哈 ~

咁我又真係唔太餓   咁大家乾乾淨淨食晚餐   真係舒服好多 ~

萊家粒粒雙皇朱古力威化 & 黑朱古力威化 ($36.9/3包) - 買咗 12 包比里奧大人同事

ORIHIRO 蒟蒻 ($26.9/2包) - 買比家姐

南北行買嘅杞子   我覺得 $58/2 包都抵呀

食完就睇下電視   里奧大人話做咩唔睇班寶貝 ?!   我話今日好攰   想聽下廣東話先   哈哈 ~

今晚我 10 點半都瞓先   真係前所未有咁眼瞓呀 ~

紅豆糭 + 麻醬青瓜 ( 29-MAY-2022 )

( 29-MAY-2022  SUN )

今朝 9 點 15 分自然醒   感恩都瞓得唔錯   因為起身都好精神呢 ~

梳洗完就整早餐   我同里奧大人講話一路食一路睇 ASTRO   佢話我係都要睇下佢哋先安樂   哈哈 ~

食完抖陣就大清潔廁所   尋日師傅走咗都做唔到任何大清潔   所以今朝拿拿聲做埋啦   最緊要了咗一件事嘛   哈哈   晏晝仲要大清潔廚房   搞掂哂就安樂喇 ~

真係唔好講笑   今朝超級焗熱   大清潔完廁所真係爆汗   我係要沖凍水涼咁滯呀 ~

沖完涼抖陣就番崇拜   時間啱啱好 ~

崇拜完就同 B san 傾偈   之後阿妹又一齊傾   最後連里奧大人都嚟埋一齊傾   傾到 2 點左右就各散東西了 ~

原來里奧大人見我哋咁好傾   咁等埋我哋傾完先一齊去買 Lunch   佢本身話有會要開   不過最後唔駛   所以特登嚟接我呢 ~

食完 Lunch 就去姑奶屋企幫佢整啲嘢   佢買咗 8 隻紅豆糭同 1 磅半蒿頭比我   咁今日點都要去佢屋企呢 ~

一入屋就見好多貓糧   係水姑買㗎   幾乎每個角落都見到   櫃面有櫃桶又有   連床頭櫃都有   最詭異係有樽叉燒醬喺床上面囉   救命 ~

4 點半走人   今次打的番屋企呀   因為想快啲番屋企做大清潔 ~

番到屋企即大清潔廚房   做咗個半鐘終於搞掂   之後即煮晚餐   今晚差唔多 7 點半先開餐呀 ~

是日懶餐 - 紅豆糭 + 麻醬青瓜

紅豆糭 - 唔係好大隻   所以一次過蒸 3 隻   味道都唔錯呀   如果啲糯米再煙韌啲就好   以前媽咪買嘅紅豆糭勁好味㗎   甜甜哋   啲糯米又煙煙韌韌   我同家姐勁鍾意食呢 ~

麻醬青瓜 - 真係雪到變冰咁滯   所以點都食埋去啦 ~

開機洗衫就沖涼   之後休息喇真係 ~

今晚里奧大人 10 點半都瞓   我就 11 點幾先瞓呀 ~

排骨上海麵 + 希靈魚軍艦 + 山葵爪魚軍艦 (外賣) @ 屋企 ( 28-MAY-2022 )

排骨上海麵 - 里奧大人話排骨都好味   但個湯底無味   所以叫我唔駛再買   哈哈哈哈

希靈魚軍艦 + 山葵爪魚軍艦

( 28-MAY-2022  SAT )

諗住 8 點起身   不過 7 點 45 分都醒咗   所以都沖涼洗頭番工喇 ~

今朝好焗熱咁   應該會落雨㗎喇 ~

早餐食奶醬多   都唔想諗食咩   最緊要唔可以太飽   唔係中午食唔落 ~

菇場靜英英   但居然 10 點 45 分先有 Urgent 嘢做   好在忙咗兩個鐘頭就搞掂 ~

準時放工   買埋 Lunch 就番屋企 ~

因為約咗師傅 1 點整嘢   所以要快啲食嘢 ~

師傅 1 點 40 分左右先嚟   好在 1 個鐘就搞掂   感恩感恩 ~

睇下 Youtube   好快又要出發番學喇 ~

因為我要去買嘢   所以早啲出發   咁就可以慢慢行慢慢買   嘻嘻 ~

今晚 Miss 想教多一 Part   之後望住個鐘話咁快放學嘅   所以要留番下次先教 ~

買埋晚餐就即番屋企   星期六多數做外賣員   哈哈 ~

沖埋涼都休息一下   之後同阿花 Whatsapp   因為大家都好想知 ASTRO 演唱會啲嘢呀 ~

今晚差唔多 11 點半先瞓   都算早喇   呵呵 ~  

豆豉鯪魚炒油麥菜 ( 27-MAY-2022 )

( 27-MAY-2022  FRI )

今朝又落毛毛雨   加上塞車   好在都有時間食早餐 ~

早餐都係奶醬多   呢排其實朝早無咩胃口咁   可能天氣有關   哈哈～

菇場唔忙   依家整新 System 好多嘢要 Set Up   咁有啲文件喺我嗰位   所以阿爽同溫總要拎嚟睇   我覺得頭兩日拎都算   但佢哋係日日拎嚟睇   仲要睇嚟睇去都係嗰份文件   幾乎一日 3 次   動作又大喎   如果真係要重覆睇就自己影印啦   我頭先都忍唔住同里奧大人講呢單嘢   之後佢話強兵手下無弱將   佢又講得啱   因為 8 卦都話點解溫總佢哋要搞咁耐   又要問咁多嘢 ?!   我都話因為佢哋兩個都唔係醒 ~

我都唔係醒   但個腦會轉彎   我知佢地最鍾意簡單複雜化   因為人叫做乜就做乜   唔會諗咩方法係最簡單同最快   所以我次次都要好勞氣同佢哋講   應該點點點做   佢地就只會哦哦哦   真係救命 ~

Lunch Time 出去萬寧買嘢   之後即買紅腸酸辣米線番菇場   因為開始落雨了 ~

仍然唔忙   放工即走 ~

里奧大人中午出去灣仔睇嘢   所以早過我番到屋企   我番到屋企都要即刻預備晚餐喇 ~

是日晚餐 - 豆豉鯪魚炒油麥菜

豆豉鯪魚炒油麥菜 - 今晚用 3 棵油麥菜 + 1 罐豆豉鯪魚   炒埋好大碟   下次買 2 棵應該都夠了 ~

洗埋碗都沖涼   之後休息 ~

今晚仍然睇 "尋人記 2"   主角係單親爸爸   又係好感動   幸福真係唔係必然   呢個真係事實   感恩我童年非常愉快   但可惜爸爸媽咪比較早走   有時都後悔做女嘅時候   無多啲時間陪佢哋   話哂當時佢地仍然行得走得嘛 ~

結婚之後又無咩時間陪媽咪   但諗番轉頭   其實都係懶   時間係自己安排嘛   咁家姐結咗婚都晚晚番媽咪屋企食飯啦   所以我覺得自己真心衰女 ~

好在今晚 "尋人記 2" 都係 Happy Ending   所以今晚可以 11 點準時瞓   哈哈 ~

香煎蓮藕餅 & 生煎鍋貼 (外賣) + 昆明生菜 ( 26-MAY-2022 )

( 26-MAY-2022  THU )

感恩都瞓得唔錯   不過應該瞓矮頸   希望快啲正常番啦   哈哈 ~

天氣好焗熱   所以要慢慢行   唔係好易出汗呢 ~

早餐當然食奶醬多啦   其實落單嘅時候   我真係好想講 "照舊"   哈哈哈哈 ~

菇場唔太忙   咁 Skype 過日晨 ~

Lunch Time 出去買菜同點心   之後買埋艇仔粥同油炸鬼就番菇場喇 ~

食剩半條油炸鬼   今晚再焗熱食

阿花又比幾包護眼 Jelly 比我食   真係要多謝車銀優   哈哈

今日準時放工   番到屋企都預備晚餐 ~

我叫里奧大人睇實賽果   之後一齊睇 ASTRO 拎第一位   真係好開心呀   以佢哋間公司咁差   可以拎到好嘅成績   真係算好叻仔   同埋對手仲要係 PSY   雖然 99% VS 1% 表面係贏硬   但音源真係唔理想   所以投票好緊要   韓國同香港班 AROHA  真係好勁   無佢地真係無可能贏呢 ~

終於第一次睇到直播   所以好開心呢

是日懶餐 - 香煎蓮藕餅 & 生煎鍋貼 (外賣) + 昆明生菜

香煎蓮藕餅 & 生煎鍋貼 - 喺包點料理買架   估唔到又幾好味 ~

昆明生菜 - 呢期鍾意食   因為浸同煮都好方便   哈哈 ~ 

洗埋碗就開機洗衫   之後沖涼休息了 ~

今晚 10 點半睇 "尋人記 2"   主角係 "杯麵男孩"   佢真係好可憐   細細個只係食杯麵做晚餐   咁邊夠營養呀   唉   所以都忍唔住喊咗出來 ~

睇完就 Whatsapp 啲筍嘢比家姐   其實已經 11 點幾   家姐話仲未瞓 ?!   仲問我有無睇尋人記 ?!   我話有呀   之後一齊 Send "好慘"   如果同家姐坐埋一齊睇   到時肯定一齊喊呀 ~

咁睇多陣 Youtube 都要瞓喇   始終聽日要番工   唔想又 12 點先瞓 ~

柚子香檸雞 + 菠蘿咕嚕肉 + 叉燒拚燒鴨 (外賣) @ 屋企 ( 25-MAY-2022 )

( 25-MAY-2022  WED )

今日屋企有嘢要整   所以里奧大人請假   咁可以陪我食早餐呢 ~

菇場唔忙   可以抖下~

Lunch Time 去一田掃貨   不過唔係買咗好多   阿花都話做咩買咁少嘢 ?!   我話因為上年買嗰啲都未食完呀   哈哈 ~

今次都係排15 分鐘就可以比錢   諗起初初要排個幾鐘㗎   搞到我哋個個都遲哂番菇場呢 ~

Lunch 食 Flakes + 乳酪   終於清埋杯乳酪   有時擺喺雪柜真係會唔記得食呢 ~

仍然唔忙   準時放工 ~

番到屋企   師傅仲未走   咁等佢搞掂先買外賣了 ~

7 點開餐   食完即同里奧大人一齊大清潔屋企 ~

差唔多 9 點先搞掂   快快沖涼休息喇 ~

KETTLE 手製黑椒味薯片 ($41.9/2包) x 1 / 日清牛奶朱古力脆米批 ($17.9/2包) x 1

YUKA 抹茶果仁朱古力 ($39.9) x 1 / 座山牌脆豬肉條 ($19.9/包) x 3

仲買咗總統牌芝士 ($58.9/3包)

睇睇下電視   我仲以為今日係星期二   仲覺得自己好似呢個星期無煮過飯呀   真係老人痴呆咁   哈哈 ~

今晚同里奧大人一齊 10 點 50 分瞓覺喇   大家都好攰呢   哈哈哈哈 ~ 

蜜糖檸檬焗雞膇 + 椒香麻辣鮑魚昆明生菜 ( 24-MAY-2022 )

( 24-MAY-2022  TUE )

我同里奧大人講話感恩一覺瞓天光呀   之後佢話點解無啦啦咁講 ?!   我話呢排瞓得勁差   尋日全日仲勁攰   再瞓得唔好肯定會病囉 ~

早餐食奶醬多   真係無諗過仲未厭喎 ~

菇場唔忙   但傾下計   咁就好快到 11 點 45 分呢 ~ 

Lunch Time 去拎糉   順便買埋豬腳薑   之後即買牛腩河番菇場喇 ~

第一次見佢咁嘅姿勢瞓覺呀   好 Lady 咁   哈哈

1 點 45 分開會傾 System 問題   一開就開到 4 點半   好在大家都有共識   但要再試   所以希望快啲搞掂    成日要開兩次會先解決問題   真係好浪費時間   根本將所有問題簡單複雜化   拖得越來問題越多咁   唉 ~

無同過西瓜開會   我會覺得佢做嘢都掂   但開完會之後   我覺得佢只係將勤補拙   做嘅方向完全係順住老闆走   自己唔會思考嘅   即係明明做 1 個表可以睇哂所有嘢   但老闆就要求做 10 個表   而每個表只睇一樣嘢   睇完之後就要再做多 1 個表睇哂所有嘢   其實佢可以提出   咁就唔駛做 10 個表   所以佢地啲時間就係咁浪費 ~

毛重又係講嘢一嚿嚿   搞到我都亂埋   我都指住佢話又話咁咁咁   雖然佢係高層   但真係比佢講到亂哂   所以忍唔住咁話佢囉   之後 8 卦話我係英雄   因為夠膽指住毛重咁講嘢   咁我話事實係亂嘛   同埋新 System 已經好煩   仲講到亂七八嘈   我唔出聲   真係搵我嚟搞囉   錯咗要我負責架 ~

之前老闆都有一齊傾 System   佢仲問我消唔消化到 ?!   因為個 Sales 講得勁快又勁多新嘢   咁我真係直接答老闆話要一啲時間消化   我覺得有問題要講囉   唔係倒頭來要自己食番哂呢 ~

做埋一啲手尾就放工   番到屋企要即睇 Youtube 呀   好開心 ASTRO 喺 The Show 拎一位呀   投票真係無白費   不過都唔夠其他 AROHA 勁   出錢出力 ~

里奧大人 6 點都番到屋企   不過無咁快開餐   叫佢沖涼休息下先 ~

是日晚餐 - 蜜糖檸檬焗雞膇 + 椒香麻辣鮑魚昆明生菜

蜜糖檸檬焗雞膇 - 酸酸咪咪好味道   依家仲剩 3 個檸檬都唔知點解決好   哈哈哈哈 ~ 

椒香麻辣鮑魚昆明生菜 - 安記出品   個汁都有少少麻辣味 ~

洗埋碗就沖涼   之後食哈蜜瓜   里奧大人話好食過西瓜   我話咁又好呀   唔駛拎咁重   哈哈 ~

睇咗陣 Youtube   今晚 11 點左右都瞓覺 ~

三色椒炒一口牛肉粒 + 黑椒牛丸炒烏冬 + 炸雞黑芝麻麵包 + 麻醬青瓜 ( 23-MAY-2022 )

尋晚食剩隻雞膇   今晚兩食   哈哈

( 23-MAY-2022  MON )

尋晚瞓得勁差   今朝鬧鐘響仲以為發生咩事   哈哈哈哈 ~

周身骨痛加上星期一仲要落雨   真係超勁攰 ~

早餐食奶醬多啦   真係連諗都唔想諗即刻就叫呀   哈哈 ~

菇場忙咗陣就 Hea   可以全程做自己嘢喇 ~

Lunch Time 出去買生果同菜   之後買粉果同炒米粉就番菇場慢慢食 ~

今日過得好慢   原來阿花都覺得   咁加上我今日又攰   仲覺得勁耐   哈哈 ~

放工即走   番到屋企都要即刻預備晚餐了 ~

是日懶餐 - 三色椒炒一口牛肉粒 + 黑椒牛丸炒烏冬 + 麻醬青瓜 + 炸雞黑芝麻麵包

三色椒炒一口牛肉粒 - 終於清哂包牛肉粒   成日留半包好麻煩   但又唔想連續食兩日咁囉 ~

黑椒牛丸炒烏冬 - 呢碟特登煮比里奧大人帶飯㗎   佢見到即話 : "點解整呢碟嘅 ?!   晏晝又話煮辛辣麵嘅 ?!   我要去消費者委員會告妳呀"   之後我拎碗辛辣麵出來   特登喺佢側面掠過   見佢立一立之後再好認真望   個樣即刻笑出來呀   真係好搞笑   一個辛辣麵令佢咁開心   哈哈 ~

炸雞黑芝麻麵包 - 今次焗熱個麵包仲正呀   下次叫里奧大人再買先 ~

麻醬青瓜 - 仲有 3 條未食   遲啲可能整沙律   如果未壞嘅話 ~

洗埋碗就沖涼   食埋生果就灘抖喇 ~

今晚 11 點唔夠都瞓覺   真係好攰咁呢 ~

炸雞黑芝麻麵包 + 炸雞 + 肉醬意粉 + 麻醬青瓜 ( 22-MAY-2022 )

( 22-MAY-2022  SUN )

本身諗住瞓到 9 點 15 分   但 9 點唔夠都醒咗 lu ~

今朝連里奧大人出門口都唔知   估唔到瞓得咁林   實在難得難得 ~

梳洗完之後就食早餐   早咗起身唔駛咁趕   所以可以睇 ASTRO   哈哈 ~

早咗 15 分鐘到里奧大人公司幫手   原來佢就係想我早 15 分鐘到   不過就唔會催我嘅   所以佢見到我早到好開心呢   因為要即刻幫手做嘢 ~

本來想出去買嘢飲   但唔敢行開   之後叻叻拎佢私伙飲品比我   又比糖我食   當我細路仔咁   哈哈 ~

之後見到阿雄   佢話我瘦咗   不過今星期都突然瘦咗幾磅   可能瞓得唔好呀 ~

做嘢做到 12 點 45 分   之後同里奧大人出去買 Lunch 番公司食 ~

里奧大人食完要即刻去開會   今日無得瞓晏覺肯定好攰 ~

我去完超市買嘢先番屋企   大清潔之後執鞋柜   拖埋地就開機洗衫   最後就大清潔廁所   之後就沖涼 lu ~

坐喺梳化抖下啦   里奧大人話開完會   我先知原來已經 6 點   要預備晚餐喇 ~

是日晚餐 - 炸雞黑芝麻麵包 + 炸雞 + 肉醬意粉 + 麻醬青瓜 

炸雞黑芝麻麵包 - 特登買 2 個試下   因為里奧大人話間麵包店啲包好食   口感真係唔錯   同埋唔係輕飄飄   我加咗炸雞 & 青瓜 & 沙律醬   勁好味呀   哈哈 ~ 

炸雞 - 諗住今晚要清埋去   但又食剩 1 件雞膇   咁聽晚要再整炸雞包了 ~ 

肉醬意粉 - 呢個都食得哂   我勁鍾意加埋 TABASCO 一齊食   以前勁唔鍾意 TABASCO 陣味㗎   依家就屋企長備   哈哈 ~   

麻醬青瓜 - 呢期會成日出現   因為我想快啲清埋 2 支麻醬 ~

里奧大人突然話辛苦哂   因為佢知我呢個星期真係唔多掂   手痛肚痛腰痛   我好少成個星期都唔煮   仲要唔做家務喎 ~

沖埋涼就開機洗衫   之後休息   今晚 11 點都瞓喇   算早啦   哈哈 ~