招牌牛腩米粉 + 手打牛丸河粉 + 腐乳通菜 (外賣) @ 屋企 ( 31-MAY-2020 )

我同里奧大人講話你一定唔記得多蔥啦 (但其實我唔記得講)   不過費事打比佢啦   估唔到佢又記得多蔥   呢下我都開心㗎   話哂記得我嘅習慣嘛   我係比較麻煩啲嘅   嘻嘻

( 31-MAY-2020  SUN )

今朝里奧大人出咗門口   我先差唔多可以瞓得着 ~

I之後係咁發惡夢  喺夢中度大叫   叫到失聲呀   所以如果里奧大人喺度   肯定嚇親佢 ~ 

有個夢係之前都發過㗎   真係好奇怪 ~

9 點 15 分起身   個人都好似溫溫燉燉咁   因為係咁發夢   其實同無瞓無咩分別   哈哈 ~

刷埋牙就大清潔廁所   搞掂哂就即沖涼喇 ~

咁睇巴士 Apps   見差唔多有車就即出門口 lu ~

無啦啦好似好趕咁   但其實我搭下班車就得囉   真係痴咗線 ~

落車有啲暈呀   我直頭想叫里奧大過來扶我   不過我覺得可能係餓得滯   哈哈 ~

慢慢嘆早餐   食食下   家姐就 Whatsapp 比我睇 2 Pack 泰國蟹肉味米粉   我頭先都心諗   希望家姐唔好幫我買米粉啦   同埋諗住咁早應該未開舖   估唔到 9 點半已經開舖   之後又再諗   想叫家姐 Send Berry 來睇下   無耐就見到 Berry 張相   唔通真係心靈相通得咁緊要   哈哈 ~

之後仲打來傾偈   家姐幾乎每個星期日都會問我食咩 ?!   我之前喺屋企整嘢食   佢以為我喺屋企食完就番教會   之後再等埋里奧大人放工再 Lunch   我話我喺屋企食就即係唔會出街㗎喇 ~

話咁快傾咗半個鐘   原來都接近 11 點   我要去里奧大人公司幫手喇 ~

崇拜完畢就等埋里奧大人放工   之後一齊食 Lunch   食完去姑奶屋企拎蜜糖 ~

芝士焗咖哩牛肉蟹柳意粉 ($48) - 呢個好味呀   熱辣辣的   里奧大人成日話我啲食物熱辣辣就好味   咁食呢啲就更係熱先好味啦   係咪呀 ?!?!?!

蒜茸汁香煎雞扒腸仔薯角 ($47) - 薯角最好味

拎完再傾陣偈就番屋企喇   第一時間去沖涼呀   今日好鬼熱 ~

里奧大人沖埋涼都瞓陣   我又瞓唔到呀   所以開機洗衫   又睇下 Youtube ~

佢 6 點左右起身   我話我好攰呀   真係唔想煮麵   所以話外賣喇 ~

次次叫里奧大人自己去買外賣   佢都好樂意   我一話餓   佢真係即出去買   所以都好感激佢   始終我頭先話煮麵嘛   最後無煮   仲要佢出去買呢 ~

咁我話你想食咩呀 ?!   我下次煮吖 ?!   佢話想食我整嘅甜品   好好食架喎   我話我整嘅甜品 ?!?!    我真係諗唔到   佢話係芒果糯米糍呀   仲叫我整比佢啲同事食   不過佢都話隔咗一晚   口感真係唔同㗎   要即整即食先好味道呢 ~

之後佢話佢咃食完   可以放兩日假   我反應太遲鈍   原來係話食完屙兩日呀   衰佬 ~

諗住唔駛再沖涼   點知食完都有啲汗   又要沖多次 ~

今晚 11 點幾都瞓先喇   好似作唔舒服咁   要快啲瞓先得喇 ~

皇城餐廳小廚 @ 紅磡 ( 30-MAY-2020 )

香辣尖椒炒牛肉套餐 ($63) - 我好鍾意食呢個小菜㗎   真係好好味

銀芽肉絲炒麵 ($48) - 我呢期好鍾意食   我覺得自己口味好似男人

鹹檸檬 7 喜 (+$10) - 實在太熱   我都忍唔住飲汽水喇

( 30-MAY-2020  SAT )

今朝一覺瞓天光   鬧鐘差唔多響就起身   但望個天好似仲係好黑   以為係半夜   但原來落緊雨   個天黑哂呀 ~

落超級大雨   拎咗水靴出來好耐   終於要着喇 ~

早餐食芝腿治烘底   我尋日同 8 卦講話今朝一定要食米粉餐   佢見我叫三文治就好愕然   我話今朝唔想食米粉   哈哈 ~

菇場唔忙   家姐打嚟話頭先忍唔住又買咗柚子甜筒   我話都估到佢會買   之後佢話尋晚同同事講話阿妹買咗   佢同事話係咪比 4 支妳 ?!   家姐話係 8 支比哂佢喎   另一個同事再話   妳阿妹係咪問妳仲駛唔駛再買多 8 支呀 ?!   家姐話係呀   原來家姐話呢個同事知佢買嘢好勁   但家姐話阿妹仲勁   因為我之前成日買香口膠比佢   真係十包十包咁買   總之一覺得抵就會買買買咁呢 ~

不過家姐次次買嘢   又真係會預埋我㗎喎   佢同事買咗愛文芒同玉荷包   家姐話要 4 個   佢同事都話係咪買埋比阿妹呢 ?!   所以家姐鍾意嘅   我一定買多多比佢㗎 ~

家姐 12 點已經到一田   所以我放工即走喇 ~

一去到見到家姐架購物車已經擺滿哂   咁我其實都無咩嘢想買   上次買嘅急凍食物   真係最近先食完   唔想又買囉 ~

我去到超市   咁啱家姐打比我   以為想要多架購物車添   因為頭先佢要排隊等購物車㗎   我話一架夠唔夠放㗎 ?!   佢話夠喎

家姐話 Johnsonville 嘅香腸好抵   咁我又買 2 包啦   之後佢話佢已經買咗 4 包   我話 10 月到期唔好買咁多啦   加上我話佢成日有新鮮餸食   駛咩買咁多腸呀 ?!   所以佢最後只係買 2 包比工人算喇   我話我比 1 包妳咪得囉   佢又話唔好   但佢個樣好慘咁   哈哈 ~

咁比錢嘅時候   我同家姐係咁拎嘢上來   我一望個收銀機係 $1,230   但仲有嘢未嘟   家姐頭先先話應該買到 $600-800   我話肯定過 $600 啦   咁滙豐卡簽滿 $1,000 有 $50 Cash Coupon   一田簽滿 $600 就有 $30 Cash Coupon   最後折咗係 $1,060   所以要家姐簽卡   益咗我   哈哈 ~

我唔怕拎重嘢   但我好怕拎液體   因為零舍重咁㗎   家姐話如果佢揸車來就好啦   我話係仲唔好呀   肯定買得更多嘢呀

買完只係 12 點 45 分   拎埋 Coupon 就搭巴士   感恩去到即有巴士   仲有孖位坐添呀 ~

我同家姐每人拎兩袋   佢兩袋肯定係最重   佢話放低個袋之後隻手係震呀   我唔知原來佢個冰袋咁鬼重   可能放滿哂嘢呀   哈哈 ~

放低哂所有嘢就叫工人煮麵   家姐話開始餓喇   本身佢話喺 Mikiki 食埋 Lunch   但我話拎住 4 袋嘢好麻煩   寧願番屋企食好過   又可以陪 Berry 姐 ~

家姐話佢啲同事成日話佢叫隻狗仔做 Mary   老實講   如果真係叫 Mary   我一定要同佢改名喇   哈哈 ~

之前家姐同同事講過唔會再養狗   今次養狗係因為阿妹養唔到狗   但阿妹又勁鍾意 Berry   所以佢養   之後佢同同事講話   就係因為 Berry 喺度   我阿妹先會一個星期嚟我屋企一次咋   無 Berry 唔會嚟囉   所以養 Berry 都好㗎   哈哈哈哈 ~

我有時未必星期六來到探 Berry   佢就會問掛唔掛住 Berry ?!   又間唔中問鍾唔鍾意 Berry ?!   奇奇怪怪   最衰里奧大人定啦   成日話我鍾意嘅嘢   好快會變唔鍾意   但 Berry 點同呀大嫂 ~

初初諗住 Berry 要去新家庭   我真係好唔捨得佢   佢咬爛咗我幾條褲   又咬爛咗我件衫   家姐話唔好掉呀   係同 Berry 嘅一個回憶   我真係無掉到㗎   嗰時仲晚晚睇 Berry 嘅相同影片   因為佢比人領養咗   真係再見唔到㗎喇   之後家姐話養 Berry   我即刻掉鬼咗見衫呀   哈哈 ~

唉   以前對媽咪唔好   成日有時間都唔願見   所以依家就多啲陪家姐啦   自己心裡都好過啲 ~

一入屋   Berry 見我地拎住膠袋   即縮埋喺梳化底   駛唔駛咁驚呀   黐線婆   哈哈哈哈 ~

呢個 Post 好女仔   但其實佢真係女仔   哈哈

工人煮麵比我哋食   咁我哋就即刻放番好啲食物   放哂入櫃就最好   整整齊齊嘛 ~

我只係要 2 Pack 腸 & 1 包烏冬 & 黃蘿蔔   條黃蘿蔔只係 $22 咋   其實我唔想要 Pack 烏冬   但家姐話平 ($55.9/2 Pack)   咁確實係平嘅   佢行咗兩轉都忍手唔買   但最後都係買   仲係都要比 1 Pack 我   最搞笑係連佢兩個雪櫃嘅冰格都差啲唔夠位放呀   所以要搵晚拿拿聲交收呢

我只買咗 2 包朱古力蛋糕 & Pancake 粉 & 1 包杏仁朱古力

我要 2 支大喜慶蠔油 ($58/2 支)   原價 $58/支

家姐幫糟糟買咗 4 支烏龍茶

我食海鮮味出前一丁   家姐食印尼撈麵   我同家姐講話好驚呢張白雪公主枱墊   哈哈

家姐同事整嘅豬腳薑   佢話個個同事都話好味喎   不過家姐唔食㗎   諗住留比姐夫   但知我鍾意食就比我食   估唔到真係好好味呀   我真係好耐無食過好味嘅豬腳薑了   所以食得好滿足呀

咩料呀   哈哈

用零食引佢

一路食一路八

我同家姐都好鍾意狗仔嘅眼睛有白色   因為成個樣會變得好慘咁   哈哈

眼瞓就好喇   唔好周圍跳   諗起佢細個真係好得意   又乖呢   依家成隻牛王頭咁   又惡喎

佢咁樣咬骨頭   個美臀係咁 "得" 住我   好在無放屁   哈哈

同家姐傾下偈   又打陣機   我 6 點左右瞓咗陣呀   瞓咗 15 分鐘   哈哈 ~

6 點 45 分左右出發接里奧大人放工   不過我就周圍行下先   順便幫里奧大人公司買 Nuts   咁我自己都買下嘢 ~

里奧大人 8 點放工   食埋晚餐就番屋企喇 ~

番到屋企即沖涼   之後睇下電視   今日體力勞動   個人好攰   唔做家務 lu ~

里奧大人 10 點半都瞓   我就 11 點幾先瞓 ~

龍蝦丸 & 墨魚丸 & 脆皮腸 + 蕃薯葉 + 芒果糯米飯 ( 29-MAY-2020 )

里奧大人成日問啲丸熟未 ?!   我話唔熟點會拎出來呀   同埋墨魚丸熟咗都係白色㗎啦

唔想洗碟   直接用焗盤



大隻嘅豬腰芒   咁樣切起來無咁麻煩   反正得我食   唔駛整咁靚   哈哈

( 29-MAY-2020  FRI )

話咁快又到 5 月尾   呢幾年覺得啲時間過得勁快 ~

早餐食餐蛋治烘底   依家 8 卦又番嚟食   不過咁都好   起碼對住一個熟悉嘅人   哈哈 ~

菇場忙咗陣就可以抖   唔錯唔錯   因為呢排個人比較攰 ~

Lunch Time 出去行陣   差唔多 1 點就番到菇場   lunch 食菠蘿叉燒包   無諗過晏晝出去   如果唔係今朝唔買定個包啦   哈哈 ~

$30/磅嘅米枝王   我見咁大粒真係好想試下   數埋得十粒咋   點知粒核都好大粒下   咁唔會再買 lu

咁影到粒荔枝唔係咁大粒   但其實 Minions 好細隻㗎咋

用埋手錶做對比   點知粒荔枝就越影越細粒   哈哈哈哈

無啦啦又勁忙   好在 4 點左右搞掂    之後 Admin 同事派口罩   疲情開始之後就每個月都會派口罩比每位同事   真係好感激老闆 ~

放工即走   諗住去買豬肉   點知無哂喎   之後再去 7 仔睇 Dreyer's 甜筒   因為家姐話柚子味好味道   咁我一早都諗住幫佢買定   之後打比佢   佢真係話好呀   哈哈哈哈   咁佢真係好鍾意食   我同佢講   我打比佢記住一定要聽呀   因為多數有筍嘢   哈哈 ~

買完即走喇   但行到半路都再打比家姐  問佢仲要唔要多 8 支 ?!   佢話唔駛   咁我都番屋企 lu ~

5 點 45 分番到屋企即預備晚餐   里奧大人 6 點左右番到屋企   但真係無咁快開餐   所以叫佢沖涼先喇 ~

買完放入雪柜   今次真係要好有技巧   我同里奧大人講話一定唔可以食 Dreyer's 嘅甜筒同雪糕批   因為買比家姐㗎

今晚 7 點先開餐呀   無諗過咁夜   哈哈哈哈 ~

是日懶餐 - 龍蝦丸 & 墨魚丸 & 脆皮腸 + 蕃薯葉 + 芒果糯米飯 

龍蝦丸 & 墨魚丸 & 脆皮腸 - 本身想煎   但真係唔想大清潔廚房   但就咁淥又唔係咁想   所以即刻諗起可以焗嘛   焗完再掃蜜糖   勁有 BBQ Feel   勁正呀   哈哈 ~

蕃薯葉 - 買咗 1 扎   好在買細扎咋   因為超級多渣   其實好耐之前買嘅都係好多渣   所以無再買   但蕃薯葉有益   所以又再買   點知都係咁   應該唔會再買喇 ~

芒果糯米飯 - 之前買咗嘅豬腰芒已經想爛   所以整芒果糯米飯   咁唔想特登開罐椰漿就加兩滴班蘭汁   賣相唔錯㗎   但其實完全無班蘭味嘅   開嘅時候又論盡   整到幾隻手指都係綠色   擦咗好耐先無色咋 ~

洗埋碗都 8 點幾   即沖涼喇 ~

咁我掃地   里奧大人話唔好夾硬掃啲嘢出嚟啦 (我成日同佢洗腦   話屋企好乾淨)   我笑出來   之後我話   咁屋企有嘢掃先掃到出來嘛   其實佢好怕我做家務   因為知我成日腰痛   咁又煮埋飯   佢會覺得我辛苦 ~

老實講   以前我成日同佢講煮飯做家務好辛苦㗎   佢反應有啲唔老嚟㗎   咁又係煩嘅   又要怨又要做   但自從我叫佢幫我有按手同按腰之後   佢就真係覺得我好辛苦   因為我好少會有咁要求嘛 ~

今晚睇多陣電視   一齊 11 點幾都瞓 lu ~

XO 醬茄子炒雞球 + 醬油燒汁豬軟骨 + 滷水雞全翼拚紅腸 (外賣) @ 屋企 ( 28-MAY-2020 )

XO 醬茄子炒雞球 + 醬油燒汁豬軟骨 & 滷水雞全翼拚紅腸 (+$16)
白飯 2 碗 + 油菜 1 碟 + 糖水 2 碗 (+$15)

( 28-MAY-2020  THU )

感恩一覺瞓天光   但依家仍都要適應里奧大人早起身   佢早我半個鐘頭起身   咁鬧鐘響都會醒一醒   之後唔會話好快瞓得着咁呢   因為翻瞓之後起身   其實個人仲攰   但我又唔想咁早起身喎   事實我真係想瞓嘛   哈哈 ~

早餐食吞拿魚治烘底   好味道 ~

菇場忙呀   好快 Lunch Time ~

今日食紅腸酸辣米線   好耐無食   覺得勁好味   今次雖然少辣   但就唔係咁辣   我又覺得 OK 喎   同埋食完無咁眼瞓   唔通啲辣先係味精所在 ?!

忙到 3 點幾就可以抖   可以準時放工 ~

今晚去尖沙咀拎藥   拎完即搭巴士番屋企 ~

我去大家樂買外賣   里奧大人啱啱落車   所以就來幫手拎 ~

本身里奧大人諗住同我喺尖沙咀食飯   但我話唔好喇   想快啲番屋企   比着以前一定唔會咁    哈哈哈哈 ~

食完抖陣就沖涼   今晚休息唔做家務喇 ~

我同里奧大人講   我唔駛煮飯真係好舒服   所以連家務都唔想做   比自己休息一下   但又覺得已經唔駛煮飯   又唔做家務好似好懶咁   之後佢話唔駛諗咁多喎   鍾意做就做   唔做就唔做囉 ~

今晚仍然睇 "慶餘年" 第 1 集   真係覺得小范閒好得意   里奧大人都已經識背對白了   我應該睇咗十幾廿次都有   之後我話佢真係好慘   要迫住睇   好似嗰時我睇 Minions 咁樣   又係睇到一聽音樂就知劇情   但最勁係我可以當新戲咁睇   哈哈 ~

今晚里奧大人 10 點半前都瞓   我就 11 點前瞓   因為都有啲攰 ~

燉奶佬餐廳 @ 大圍 ( 27-MAY-2020 )

咖哩牛筋腩飯 ($57) - 咖哩汁無咩味   不過算啦   我都唔係想食咁辣

香煎魚柳豬扒煎蛋飯 ($57) - 里奧大人最鍾意食呢啲餸   佢話好味道   但啲汁唔夠多呢

沙律最好味

( 27-MAY-2020  WED )

尋晚瞓得都算唔錯   但起身都係有啲攰 ~

早餐食奶醬多   好悶但又會叫來食 ~

菇場唔太忙   可以抖下 ~

Lunch Time 出去買牛什米   因為勁餓   唔想再等   牛什牛腩呢啲就最快   哈哈 ~

忙下停下   又係 4 點幾先有 Urgent 嘢 ~

放工即走   去接里奧大人放工   順便見下 "林謝謝"   傾咗 5 分鐘左右都要走喇 ~

今晚去阿喂爸爸嘅安息禮拜   諗住直接坐的士去大圍   不過驚路面混亂   所以里奧大人同事叫我哋搭火車   咁我哋唯有搭巴士去紅磡站再搭火車啦 ~

里奧大人話好餓呀   佢話諗住放工喺公司附近食飯   點知要去到大圍先食   哈哈 ~

去到大圍即去搵食   見到餐廳無人又唔焗就入去食 lu ~

食到 6 點 45 分左右就走   即去坐 Shuttle 喇 ~

差唔多 7 點到紀念館   鞠躬後就同阿 mi 喂傾陣偈   再介紹 mi 媽 mi 爸比我哋識   每次阿 mi 返娘家   我都會麻煩佢代為問候 mi 媽 mi 爸   所以 mi 媽見到都同我講話好有心   哈哈 ~

儀式 7 點半開始   接近 9 點完畢   咁我同里奧大人都走喇 ~

打的番屋企都好快   可能行山路啦   最搞笑比錢嘅時候   我同司機講話計咗隧道費未 ?!   司機笑住話行山路呀   唔駛隧道費呀 ~

番到屋企即開機洗衫   沖埋涼就休息 ~

今晚里奧大人 10 點半都瞓   我就 11 點唔夠都瞓了 ~

辣椒炒蜆肉 + 原味脆皮腸 + 粟米 ( 26-MAY-2020 )

( 26-MAY-2020  TUE )

呢排瞓得唔係咁好   唔知做乜鬼 ~

早餐食芝腿治烘底   好味道   但唔可以日日食 ~

菇場忙下停下   一嚟就係做 Urgent 嘅嘢   要快快快   真係就來神經衰弱   哈哈 ~

Lunch 食吞拿魚包   家姐話又食包 ?!   我話諗住晏晝會落雨   所以朝早買定囉   點知又無落   但點都要食埋去 lu ~

呢隻 Cheese Twists 都幾濃芝士味吖   我買咗 2 盒   諗住比盒家姐   點知佢唔要喎

4 點先來勁忙   今次真係要快快快喇   做到差唔多放工先做完 ~

放工即走   買完辣椒就去超市買嘢   今日買大支裝蠔油   比錢嘅時候   收銀拎支生抽出嚟   話買蠔油送嘅   真係估唔到呢   好在我無買豉油咋   唔係兩大支有排用了 ~

番到屋企都即預備喇   今晚里奧大人 6 點 15 分番到屋企   不過未食得住   咁叫佢沖涼先 ~

是日晚餐 - 辣椒炒蜆肉 + 原味脆皮腸 + 粟米

辣椒炒蜆肉 - 第一時煮呢個餸   簡單又方便   買咗 1 隻紅尖椒同 2 隻青尖椒   切紅椒嘅時候就咳到我死死下   好肯定係好辣   切完哂   我啲手指都比佢乸到好痛   所以決定唔加紅椒炒喇   但切咗無理由浪費   咁我用嚟送飯   食咗半碟真係頂唔順   個胃比火燒咁   真係要停一陣先可以再食   剩番半碟辣椒真係要掉咯 ~

原味脆皮腸 - 好想食腸仔   但依家雞肉腸都要 $22.9/排   所以唔買住   反正屋企有脆皮腸   食哂先再買雞肉腸 ~

粟米 - 想食甜嘅蔬菜   粟米係首選   哈哈 ~

洗埋碗就大清潔廚房   之後沖涼休息食生果喇 ~

里奧大人 8 點準時開會   差唔多 9 點幾就開完會   算快呢 ~

今晚里奧大人 10 點半瞓   我 10 點 50 分都瞓喇   好攰咁 ~

冬菇臘腸蒸雞翼 + 腍甜菜心苖 ( 25-MAY-2020 )

里奧大人話點解用 2 人飯煲都咁大碗飯 ?!   仲好似大過之前用大飯煲嘅飯咁嘅 ?!?!   我真係笑咗出來   我話想快啲食哂雪櫃啲米呀   所以咪大碗啲囉   同埋臘腸同腐乳鹹吖嘛   要多啲飯來送呢   食就食啦

( 25-MAY-2020  MON )

尋晚瞓得唔好呀   2 點幾起身去廁所   之後又熱醒   咁我條頸出汗嘛   拎紙巾抹啦   里奧大人問我係咪凍 ?!   我話熱呀   之後佢話係咪潮熱呀 ?!   笑死我呀   可能真係聽我講得多   所以佢講出來   哈哈哈哈 ~

臨醒前發咗個夢   係一聽道就瞓着咗   仲好好瞓   瞓到講完道呀   瞓覺發夢自己瞓覺都幾得意   哈哈 ~

早餐食奶醬多   諗唔到食咩好 ~

菇場忙咗陣   之後 Hea 過 ~

傷口都埋咗   但痛痛地

Lunch Time 落勁大雨   咁食杯麵喇  ~

仍然唔忙   但我好攰呀   所以勁想快啲放工   哈哈 ~

5 點即走   番到屋企就預備晚餐 ~

是日懶餐 - 冬菇臘腸蒸雞翼 + 腍甜菜心苖

冬菇臘腸蒸雞翼 - 今日清清哋   即係蒸嘢算喇   雞翼用五香粉醃咗半個鐘   都無咩味嘅   冬菇又唔記得醃   但其實我好少咁樣整冬菇   所以無概念要醃呢 ~ 

腍甜菜心苖 - 食埋今餐又要停下   好悶呀   哈哈 ~

洗埋碗就沖涼   之後熨 2 機衫   勁攰 ~

諗住今晚會 10 點半瞓   點知又唔係咁眼瞓   所以睇埋新聞   11 點幾先瞓 ~

韭菜餃 (外賣) + 腍甜菜心苗 + 自家制合桃包 & 朱古力包 ( 24-MAY-2020 )

朱古力包好味道   口感有啲煙韌

( 24-MAY-2020  SUN )

今朝里奧大人 6 點 15 分起身番工喇   我就繼續瞓 ~

瞓到 9 點 05 分   鬧鐘未響都起身梳洗喇 ~

今朝好在早醒咗咋   因為我以為校咗 9 點 15 分鬧鐘   但原來我係校咗 9 點半呀 ~

搞掂哂就出發食早餐   食完就即去里奧大人公司幫手 ~

佢好多同事一見到我   就話我着得好 Colorful   勁哥直頭話我去咗夏威夷咁呀   哈哈   因為我多數黑色同素色呢 ~

崇拜完畢就同里奧大人食 Lunch   佢食完之後就要去開會   我就去街市買餸同生果 ~

今次係我飲青檸梳打水

番到屋企要即沖個涼   但其實今日無咁熱㗎喇   所以開咗半個鐘頭冷氣都要關呢 ~

想瞓又瞓唔到   咁又抹嘢啦   5 點左右預備晚餐 ~

$30/3 磅嘅山竹   啲肉又細粒又酸   豬腰芒好似 $18/2 磅   都幾大隻   食起來好方便

咁浸完菜就剪韭王嘅頭頭尾尾   點知一嘢剪到手指尾流血   勁驚囉   因為其實係滴緊血   咁我即用廚房紙按實   但仲係標血   咁屋企又無冰   之後醒起冰格有退熱墊   即拎出來按住傷口   按咗 2 分鐘左右   終於止到血   但隻手指尾痺哂   哈哈   勁驚壞死皮膚呀   我覺得自己真係乜鬼都驚   哈哈 ~

第一次遇到咁情況   我覺得自己都算鎮定呀   但標血嘅時候   都諗緊駛唔駛聯針   但心諗   0.5cm 傷口應該唔駛啦 ~

我傷口係打橫   但咁樣睇好似打直咁   哈哈

里奧大人 5 點半開完會   今日都算早喇 ~ 

我特登掉咗張紙巾喺地下   叫里奧大人執呀   之後佢問咩事 ?!   我話剪親手指尾呀   之後佢即刻幫我搽藥膏貼膠布   我話左手無力呀   因為驚整爆傷口   衰奧話放張五百蚊喺地下   睇下我有無力執喎 ?!   我話我用右手執咪得囉   佢喺度大笑呀   話估唔到我咁講   佢估我會講試下放低先啦   哈哈   咁係吖嘛   我有兩隻手家嘛 ~

是日懶餐 - 韭菜餃 (外賣) + 腍甜菜心苗 + 自家制合桃包 & 朱古力包  

韭菜餃 (外賣) - 懶呀   所以又買韭菜餃 ~

腍甜菜心苗 - $9/斤抵呀   又可以分兩餐食   其實都係因為懶   哈哈 ~

自家制合桃包 & 朱古力包 - 里奧大人同事整比我食㗎   最搞笑佢同事問里奧大人啲麵包比邊個好 ?!   里奧大人答佢   比完佢都係會比我   所以我一去到佢公司   招呼都未打   佢已經比麵包比我 ~

頭先我叫里奧大人幫我洗碗   因為唔想整濕傷口   咁我拎啲碗去廚房   其實我都諗住洗㗎喇   左手用手指公同食指拎住啲碗就可以   到我洗哂   里奧大人先嚟話等佢洗碗喎   不過佢頭先真係傾緊公事嘅   我唔等佢啫   但真係要佢幫手搓手巾呢 ~

搞掂哂就開機洗衫   之後沖涼喇   真係邪啦   今朝早咗起身就大清潔廁所   如果今晚大清潔就唔可以喇 ~

沖埋涼就休息   里奧大人 10 點半就瞓   我就 11 點先瞓 ~