焗海鮮卷 + 粟米 ( 31-OCT-2020 )

( 31-OCT-2020  SAT )

尋晚夜飲湯   去咗 2 次廁所   好在起身唔眼瞓咋 ~

早餐食餐蛋治+凍咖啡   見到三文治盒有冒氣以為啱啱整好   點知唔係囉   下次唔會再買 lu ~

菇場唔忙   可以 Hea 過 ~

肥仔豪 12 點半先比 Urgent 嘢我做   咁開行 Turbo 啦   但都要做到 1 點 05 分   做完即走喇 ~

去譚仔拎外賣   之後搭車去家姐屋企 ~

真係好耐無自己搭車去家姐屋企喇   咁啱今日又比嘢佢喎   仲要一袋二袋   勁驚個袋爛呀 ~

Berry 見我拎咁多嘢都驚咗我   之後我放低哂嘢   佢就撲我喇 ~

食埋午餐就抖下   家姐慘啦   依家佢有腕管綜合症同彈弓手   好在針灸都有作用咋 ~

豬潤米線 (重慶三小辣湯底) / 麻辣豬耳

我比件晨褸比家姐   話無送生日蛋糕所以有生日禮物   之後家姐碌大對眼話妳比咗封大利是我喎   真搞笑   我都完全唔記得添 ~

家姐問係咪見到紫色所以買   我話買嘅時候都唔無為意係紫色   只係覺得質地好舒服咋

抖陣就煲雪梨乾蘋果茶   咁家姐隻手痛   佢話想聽日煲   我話今日啦   咁我問佢有無批皮器 ?!   佢答我有   佢睇住我批皮   之後佢好好奇咁問我點樣批 ?!   我話咪咁樣批囉   我唔慣用刀   家姐就話佢多數用生果刀   但我感覺佢仲係好好奇咁 ~

終於知道大家搭錯線   佢以為我用批皮器可以將蘋果整到一粒粒呀   真係笑鬼死我呀 ~

咁我將蘋果一開四   剩番好大個蘋果芯   咁家姐又望住我切   之後又好奇怪咁望住啲蘋果芯   佢以為我唔要蘋果芯呀   因為仲剩好多肉嘛   我話放心   剩番嘅肉一陣會慢慢批出來呢 ~

家姐話 Berry 呢幾日發顛   成日咬佢隻手   之後我見家姐抹張梳化   衰女真係追住家姐隻手來咬呀   做乜鬼會咁㗎 ~

我去廁所   之後叫完聲 Berry 就關門   咁我出嚟   家姐話我痴痴哋線   叫完 Berry 就關門   話 Berry 一聽見我叫佢   佢即去搵我呀   但去到走廊一半   聽見關門聲就轉身走   我真係無諗過 Berry 會跟住我囉   哈哈 ~

見到零食就係咁聞   超級八

今日姐夫喺屋企   我話幫佢執個藥箱   佢話咩都要   點知執哂出來原來全部都唔要囉   之後佢自己都喺度笑 ~

咁再執茶葉柜   我同姐夫講話呢盒一定要留   家姐話肯定又唔知幾多年   哈哈   我話唔太耐   只係 2014 年啫 ~

搞掂哂就抖下   之後姐夫叫我幫佢執佢嘅衣櫃   我同家姐喺度笑   我話呢樣好難執喎   又唔知你邊啲衫要唔要   不過最後佢又係咩都話要   我細細聲同家姐講   下次佢唔喺度先掉哂去   哈哈 ~

執開有條路   雖然 5 點   但又忍唔住執埋個大鐵柜   比我見到 10 個地拖頭同 10 隻洗碗手套   果下有啲想暈   我好肯定好肯定家姐唔知自己買咗咁多囉   仲有 2 張記憶地毯比 Berry 瞓嘅   但都有啲發黃   我話唔好要喇   雖然張毯 $138 係貴   但妳自己買完周圍放   搞到用唔到都無計喎 ~

不過依家家姐好搞笑   成日記得我講話執完唔好再亂買嘢   我真係次次一開佢柜   佢就會話佢無亂買嘢   但次次比完嘢我呢   就會好開心話又可以買嘢 ~

個樣好悶咁

又唔出嚟比我摸

咁我唯有瞓低同佢影相啦

佢望緊家姐

7 點左右就番屋企   大清潔廁所再沖涼   之後等里奧大人放工喇 ~

里奧大人 8 點幾先放工   咁即刻焗海鮮卷   之後淥埋粟米同米粉就搞掂 ~

呢排都好夜食飯咁   成日好似食完無耐就要瞓覺   哈哈 ~

里奧大人 11 點幾都瞓   我就 12 點先瞓 ~

梅菜蒸鯇魚 + 芫茜皮蛋魚片湯 ( 30-OCT-2020 )

( 30-OCT-2020  FRI )

呢排天色都灰灰暗暗   所以感覺有啲涼涼哋 ~

早餐食奶醬多   好在我唔抗拒食包   唔係真係幾慘   雖然食到悶   但真係唔知食咩好   因為奶醬多唔駛咁飽   始終依家仲係 11 點 45 分食早飯   食得太飽真係 1 點都食唔落㗎 ~

菇場唔忙   做自己嘢   嘻嘻 ~

Lunch Time 出去行陣   同 8 卦行同一方向   佢話我行得好快   不過其實之前徑步開始   行路真係快過以前好多   加上我 Lunch Time 出去行只係拎 1 個好輕嘅袋   所以可以行得更快 ~

買埋粉果+腸粉就番菇場食   雖然覺得好味道   但都要停下先喇 ~

仍然唔忙   同 8 卦傾偈   佢成日話我口衰   最邪係我次次話老闆會叫佢   真係無耐就叫佢   所以佢話以後唔好講呢 啲   咁我話你每晚準時收工囉   但佢話唔知點解出自我把口   好似咀咒緊佢要夜走咁   哈哈   不過里奧大人同家姐都成日話我   經過我把口唔方好嘢 ~

放工即走   今晚買咗幾隻想買嘅碟   真係勁開心呢   雖然貴過淘寶幾蚊雞   但都照買   因為里奧大人好鬼衰架   我次次將碗碟放入購物車   佢唔幫我買㗎 ~

番到屋企沖埋涼就拖地   之後滾湯 ~

里奧大人 7 點半放工   我都預備晚餐 lu   今晚又要 8 點半開餐 ~

是日懶餐 - 梅菜蒸鯇魚 + 芫茜皮蛋魚片湯

梅菜蒸鯇魚 - 尋晚買架   呢件魚係 $35   我以前買一碟碟嗰啲   但好似有啲腥   咁今次呢件就唔覺得腥喎   家姐之前比咗梅菜比我   今晚試下   又幾好味喎 ~

芫茜皮蛋魚片湯 - 都係尋晚買定   鍾意滾呢個湯原因係啲材料可以買定   第晚番到屋企可以即滾湯   哈哈 ~

洗埋碗就即沖涼喇   已經 9 點半   抖陣再食生果 ~

雖然呢排夜食飯   但 11 點左右都瞓覺   可能天氣涼   成日有睡意   哈哈 ~  

韭菜餃拚菜肉餃 & 炸魚皮 (外賣) ( 29-OCT-2020 )

( 29-OCT-2020  THU )

感恩一覺瞓天光   起身都好精神 ~

早餐食奶醬多   其實一至五來來去去都係多士或者三文治   咁又唔覺得悶   但就肯定係番工嘅感覺囉   哈哈哈哈 ~

我食早餐之前會抹電話  Keyboard 同 Mouse   因為多數一路上網一路食   有時又會打比里奧大人   所以呢 3 樣嘢一定要抹咗先   食完哂就再抹成張枱   阿齋見我抹枱   問我抹夠未呀 ?!   仲叫我做抹枱大臣   話朝朝番嚟都見我抹枱   我覺得好搞笑   因為里奧大人又好鍾意話我係咁抹嘢   好似病態咁   哈哈   我話抹好過唔抹啦   係咪先 ?!

菇場唔忙呀   又可以做自己嘢 ~

今日唔出去喇   所以食杯麵 ~

仍然唔忙   又係咁同 8 卦 Skype   咁時間就會過得好快 ~

放工去街市買餸   買完即番屋企   因為對手就嚟斷咁滯 ~

已經 6 點幾   沖埋涼就預備湯底   買咗條白蘿蔔   但有細半段係淺藍色   咁我即掉喇   唉   我特登番轉頭買吔   本身喺另 1 檔買   但要行好遠   所以求其去 1 檔買囉   今次真係衰懶喇   嗚嗚 ~

7 點都未收到里奧大人電話   咁我都再沖涼洗頭喇   反正今晚都涼涼哋   應該唔會食到出汗   哈哈 ~

年紀大喇   今晚拎完重嘢隻左手係痺哂又無力   感覺勁唔舒服   所以都無熨衫 ~

里奧大人 7 點 40 分放工   咁諗住好快番到嚟   點知塞車   咁再等埋佢沖涼   8 點 45 分先食晚餐呀 ~

是日懶餐 - 韭菜餃拚菜肉餃 & 炸魚皮 (外賣)

韭菜餃拚菜肉餃 & 炸魚皮 (外賣) - 我都好鍾意食水餃   好在里奧大人都鍾意食咋   咁佢哋就可以成日出現啦   哈哈   炸魚皮又係勁正   所以又買嚟食喇 ~

食完洗埋碗   抖陣就食木瓜   搞掂哂已經 9 點 25 分   之後可以坐定定睇 "木棘証人" ~

我同里奧大人講話呢排嚴重失憶   好多嘢真係完全無印象   之後我話如果我有認知障礙症   你用咩方法令我記得起你呀 ?!   佢話唔駛記啦   哈哈哈哈    超級賤格呀 ~

雖然今晚夜食   但估唔到 11 點都眼瞓   咁都要瞓喇 ~

XO 醬茄子炒雞球 + 菠蘿咕嚕肉 + 油雞拚燒鵝 (外賣) @ 屋企 ( 28-OCT-2020 )

今次唔知係咩糖水   食落好似漿糊咁樣   所以食咗幾啖要掉喇

( 28-OCT-2020  WED )

今朝鬧鐘響   有唔想起身嘅感覺   可能天氣凍凍地   成日想瞓 ~

早餐食腿蛋治   今次要食飽啲   因為晏晝要出去買生果 ~

菇場唔忙   可以做自己嘢 ~

Lunch Time 出去買人參果   再買埋腸粉就番菇場喇 ~

今次要 5 條腸粉   真係好好味   同埋食完唔會話好口渴 ~

仍然唔太忙   放工即走 ~

里奧大人今日 Off    咁我唔煮喇   去大家樂買外賣   依家好多人打邊爐   真係好吸引   不過我就唔敢喇   哈哈 ~

買完即番屋企   沖埋涼就開餐喇 ~

里奧大人今晚本身 8 點開會   之後同事話改咗 8 點半   好在通知佢咋   唔係里奧大人 8 點唔見人   以為取消咗   哈哈 ~

9 點半開完會   可以一齊睇 "木棘証人"   我覺得呢套戲真係幾好笑 ~

里奧大人話今日發夢嚇醒咗   佢今日瞓到 12 點 45 分   仲話發夢自己瞓到 1 點幾   最恐怖係有個工人坐喺佢腳尾   一路睇電視一路食嘢   佢即問妳係邊個 ?!   工人答佢個名叫 XX   里奧大人問佢幾時嚟㗎 ?!   工人話嚟咗幾年啦   同埋佢自己租另外 1 間屋住   咁里奧大人即打比我問我幾時請咗個工人   點解佢唔知嘅 ?!   我話工人嚟咗幾年啦   之後就話我做咩請咗工人   但都見我日抹夜抹   成日做家務㗎 ?!   我無答到佢   仲話工人其實做哂所有嘢就會番自己屋企   即係我開工佢開工   所以唔會成日見到佢囉 ~

我覺得呢個夢都幾搞笑   佢上次見我坐喺度睇電視都會抹下梳化   佢個樣真係好驚咁㗎   所以我話想我真正休息   真係要出街   唔係我真係成日做家務架   但佢話咁到佢無得休息喎   衰格 ~

今晚唔係咁眼瞓   所以睇埋新聞先瞓呢 ~

咖喱醬焗雞膇 + 蘭州拉麵 ( 27-OCT-2020 )

( 27-OCT-2020  TUE )

感恩一覺瞓天光   今朝 7 點半起身都好精神 ~

對足里奧大人 6 日   今日自己食早餐   要啲時間適應   哈哈哈哈 ~

菇場超級忙呀   做到 Lunch Time ~

依家天氣好   基本上都會出去行下   咁去 759 買餅乾比里奧大人同事   之後再買生果   買埋腸粉燒賣就番菇場喇 ~

腸粉真係熱辣辣   我食到最尾都係熱   但已經食咗 20 分鐘   怪不得阿齋每次食都讚啦

仍然忙呀   對手完全無停過 ~

4 點半終於忙完   好攰呀 ~

放工去買菜   番到屋企浸完菜就沖涼   之後拖地   抖到里奧大人放工先預備晚餐 ~

里奧大人 7 點幾放工   8 點先開餐 ~

是日懶餐 - 咖哩醬焗雞膇 + 蘭州拉麵

咖哩醬焗雞膇 - 又整呢個餸   貪佢夠簡單同埋可以清埋樽咖哩醬   今次搽咗蜜糖   甜甜辣辣好味道呀 ~

蘭州拉麵 - 等里奧大人番到屋企先煮   因為包裝話係煮 3 分鐘   咁我拎一大扎麵問里奧大人食唔食得哂 ?!   佢話玩嘢   之後話我嘥時間   哈哈   不過今次真係衰咗啦   煮咗好多呀   同埋我煮咗起碼 10 分鐘先熟   好在我每次煮麵都會試下熟唔熟先咋   呢款拉麵嘅口感都唔錯   下次可以試下做撈麵   因為想清盒韓式炸醬呀 ~

洗埋碗就沖涼   之後睇電視 ~

今晚都幾攰   所以 11 點左右都瞓先喇 ~

雜丸泰式米粉 + 蘋果椰果粟米沙律 ( 26-OCT-2020 )

( 26-OCT-2020  MON )

尋晚瞓得麻麻哋   今朝瞓到 10 點半呀 ~

今日係紅假   最鍾意星期一係紅假   咁樣呢個星期會過得好快咁   哈哈 ~

里奧大人買早餐   我就即梳洗喇 ~

食埋早餐就執嘢抹嘢   再熨 2 機衫   再大清潔廚房就開機洗所有袋   搞掂就沖涼 ~

抖陣就煲雪梨羅漢果茶   咁都已經 2 點   係時候整嘢食喇   其實只係炒翻熱尋晚嘅螺絲粉   同埋焗熱件炸雞   非常之簡單 ~

唔知係咪隔咗 2 日食   雖然焗咗 20 分鐘   但塊皮都唔脆嘅

洗好哂所有嘢就整沙律   之後真係要抖下   哈哈 ~

里奧大人做公司嘢做到 5 點   我話估唔到我今日都好忙   好在今日係假期可以做屋企嘢 ~

因為實體崇拜之後   我無時間大清潔屋企   難得今日假期   好想做大清潔   感覺乾淨好多 ~

6 點幾開始預備晚餐   今晚想早啲食   因為聽日要番工喇 ~ 

是日懶餐 - 雜丸泰式米粉 + 蘋果椰果粟米沙律

雜丸泰式米粉 - 唔想開鑊炒嘢   更加唔想食外賣   所以求其煮米粉   我就食年糕   簡單又好味   哈哈 ~

蘋果椰果粟米沙律 - 今日執廚櫃再抹罐頭   見到罐椰果過期   接近廿蚊一罐   所以點都食埋去呀   咁唯一用到佢嘅就係整沙律   咁其實都好   之前買咗幾個富士大蘋果   都好似 2 個星期有多   買嘅時間就想食   買完之後就唔想切來食   真係好懶   咁今次好啦   唔切唔得   哈哈 ~

搞掂哂就沖涼   真正休息 ~

咁食法   真係想瘦都難   食埋呢次   唔再買煙肉碎喇

睇埋 "阿爺廚房"   今晚 11 點左右都有睡意   勁開心啦   始終今朝瞓得晏   勁驚今晚唔眼瞓呀 ~

蕃茄肉碎螺絲粉 + 酸齋 (外賣) + 法邊豆 ( 25-OCT-2020 )

尋日食唔哂嘅炸雞   但今晚都食唔落   要留番聽日食   打拋豬肉都係尋晚食唔哂   加埋落螺絲粉度再炒兩炒就搞掂

( 25-OCT-2020  SUN )

今朝同里奧大人 9 點 45 分起身   食埋早餐就番崇拜 ~

里奧大人好耐無番教會   所以 TT 同牧師一見到佢就係咁傾偈   最搞笑係我喺女廁見到 SW   我一話里奧大人番咗嚟   佢即衝出去搵里奧大人   之後約下次食飯傾偈   雖然我哋有群組   但有時好難喺群組傾咁多嘢呢 ~

崇拜完畢就同 AS 傾偈  又傾咗廿分鐘先走 ~

去德福行陣   經過 6IXTY8IGHT 又入去睇下   見到件 Ryan 晨螻好靚   所以買比家姐   今日買仲有 9 折呀   折咗之後係 $241   咁又抵喎 ~

買完之後就行 MUJI   差唔多 2 點幾再去 Fooddeli 食嘢 ~

Chicken no. 852 係炸雞店嘅名   我個 Order no. 係 853   唔知以為 Order no. 係 852 呀   哈哈

好想食炸雞   但食剩 1 件雞胸   咁要拎走喇

里奧大人最鍾意食黑椒牛肉飯

喺商務買座枱月曆   今次真係要第一時間 Send 比家姐睇呀   唔係一陣佢又買比我就慘喇   佢上次買比我嘅梳乎蛋月曆   我比里奧大人用呀   因為我自己本身已經有嘛 ~

里奧大人就買咗本書   之後再去位元堂買龍眼肉同胎菊   今日好開心   所買嘅嘢都做特價 ~

諗住行 DECATHLON   但行咗幾步已經覺得好焗   所以唔入去喇   最後去埋 Market Place 買餸就番屋企 lu ~

番到屋企沖埋涼就休息   里奧大人瞓晏覺   其實我之後都好眼瞓   但唔瞓啦   因為無洗頭嘛 ~

龍眼肉 $125 (買一送一) / 浙江貽菊 ($75/3 樽) 

6 點左右預備   但差唔多 7 點先食 ~

是日晚餐 - 蕃茄肉碎螺絲粉 + 酸齋 (外賣) + 法邊豆

蕃茄肉碎螺絲粉 - 清埋包唔知買咗幾耐嘅蕃茄意粉醬汁   好在未過期咋   估唔到味道都唔錯   有機會再買嚟食 ~

酸齋 (外賣) - 間唔中好想食酸齋   自己整又煩   所以見到 MP 有得買就即買喇 ~

 

法邊豆 - MP 只係 $15/Pack 咋   咁即買啦   因為里奧大人鍾意食呢 ~

大清潔廚房再開機洗衫   沖埋涼就休息喇 ~

我次次坐梳化睇電視   我會好自然抹下梳化   里奧大人話我好恐怖   明明睇緊電視都可以抹梳化   哈哈 ~

見到張藍色毯   就知天氣凍喇

食虫呀   哈哈哈哈   其實係朱古力條已經過期   所以就加落雪糕度囉

今晚我 12 點先瞓   都係自己衰啦   食飯時飲咗包檸檬茶   唉 ~

打拋豬肉 + 清甜白菜 + 土伏苓牛大力豬骨湯 ( 24-OCT-2020 )

( 24-OCT-2020  SAT )

今朝里奧大人 9 點起身   我就 10 點先起身 ~

食出面嘅早餐食到厭   所以我話蒸燒賣食   最搞笑里奧大人話驚我辛苦   我話就咁蒸之嘛   非常之簡單 ~

今日都唔出街喇   因為肯定多人   同埋都想抖下 ~

洗埋碗就出去買餸   里奧大人就要熨 3 機衫 ~

番到屋企就大清潔廁所   沖埋涼就休息 ~

2 點左右煲湯   里奧大人就去買下午茶   今日早啲食   咁可以早啲食晚餐 ~

食完就睇下 Youtube   5 點幾飲湯   6 點幾預備晚餐   話咁快又 1 日 ~

是日晚餐 - 打拋豬肉 + 清甜白菜 + 土伏苓牛大力豬骨湯

打拋豬肉 - 尋日里奧大人想食呢個味道嘅炒飯   但我搞錯咗   所以今晚整呢個餸比佢食啦 ~

清甜白菜 - 好耐無食   又買嚟食喇 ~

土伏苓牛大力豬骨湯 - 諗住買四十蚊西施骨   豬肉佬叫我買豬尾骨   但我唔要   因為我諗起條豬尾就覺得好恐怖   雖然根本唔會有條豬尾出來   最後佢拎條西施骨比我   咁我又買咗三十蚊梅頭   佢收我一百蚊   佢可能以為我要七十西施骨呀   四同七差唔多音   我戴住口罩又講得細聲   今餐豬肉要一百蚊   好鬼貴呀   里奧大人叫我下次做埋手勢   咁就知係要幾多錢啦   又係喎 ~

洗埋碗就大清潔廚房   今次搵自己笨   抖咗 3 日煮第 1 餐   應該全蒸就算   唔駛洗咁多嘢嘛   哈哈 ~

沖埋涼就休息   睇多陣電視   今晚都係 11 點幾瞓 ~

索罟灣 --> 榕樹灣 --> 麥當勞 (外賣) @ 屋企 ( 23-OCT-2020 )

脆洋蔥安格斯套餐 & 麥樂雞

( 23-OCT-2020  FRI )

今朝 9 點半自然醒   食埋早餐就抖陣   沖埋涼就出發去南丫島喇 ~

里奧大人去買麵包   等佢買完就一齊搭車喇 ~

仍然係去尖沙咀碼頭坐兩程船   今次由索罟灣行去榕樹灣   我以為無咩人入去   好在之後都有人坐船   我都安心啲   話哂今日 3 號風球嘛 ~

無人去中環 ?! 

唔熱就舒服   哈哈

呢隻船好 Colorful

風平浪靜

今日着行山鞋同拎行山仗

我好少機會見到貨櫃船

本來里奧大人諗住行城門   但我哋怕好多人   同埋我都係想去離島行下   無咁悶嘛 ~

個天灰灰暗暗   但最緊要唔好落雨

等船去索罟灣 

話咁快就飄緊去喇 

應該差唔多到

其實好大浪   我聽到隻船間唔中 "隆隆" 聲   同埋感覺好似有嘢頂住咁   所以我勁驚啦   喺海中心點會有嘢撞到㗎 ~

12 點半落船   去埋洗手間就開始行喇 ~

@ 索罟灣碼頭 

話咁快啲人已經上哂船喇 

有幾間飯店係主打食海鮮的

里奧大人尋晚做定功課   始終今日 3 號風球應該唔多人行呢 ~

今日陰陰天又涼涼哋   行山真係超級勁舒服呀 ~

咁諗住問個女人點行去榕樹灣   但佢居然答話佢係去索罟灣   答完之後佢好快就走咗去 ~

我同里奧大人其實都比佢嚇到呆咗   呢度已經係索罟灣嘛   咁諗住行快啲睇下佢喺邊   之後就見佢喺我哋前面   咁即係其實佢都係去榕樹灣呢 ~

我覺得個女人好勁   一個人自己行山   今日係平日仲要打風   唔會好多人行嘛   一個人行真係好危險囉 ~

往榕樹灣方向 

到榕樹灣只需 1 小時 15 分鐘

見到左下角 "榕樹灣" 嘅指示嗎 ?! 

又榕樹灣又索罟灣   我都就來亂哂   哈哈

雖然個天仍然灰灰暗暗   但有涼風好舒服 

天后廟 

索罟灣第一街 

里奧大人保護式打扮  

開始行喇 

索罟灣 

直行 

沿途會見到啲住宅 

名副其實乾塘

啲路幾好行咁喎 

不准進入   其實唔知入面係點 ?! 

1956 年建築物

好多指示牌

再一路行

向上嘅樹枝好特別 

凸咗出來嘅大石頭 

經過住宅 

蘆鬚城村簡介 

進入蘆鬚城村 

零零舍舍一幢村屋  

蘆鬚城村公所

好在只係上幾級樓梯   哈哈 

沿途都有啲人

有山又水 

鐵牌爛到咁嘅   好危險噃 

企喺度吹風好舒服 

有路就行 

1 點半去到觀光亭   都望唔到個海嘅   咁一場嚟到   就食埋個麵包啦   因為里奧大人話已經行到一半   好快就去到食豆腐花嘅舖頭   驚我一陣食唔落豆腐花呀 ~

無諗過里奧大人會買吞拿魚包比我   諗住佢都係買芝麻餐包就算   佢話知我鍾意食吞拿魚包   所以買呀   我嗰下好心甜㗎   起碼佢記得我鍾意食咩   哈哈

呢度路面不平好危險 

里奧大人想去南丫風采發電站 

睇位置圖嘅時候   我喺個袋拎把梳出嚟梳頭   里奧大人話估我唔到   佢話以為拎搓手液或者紙巾   真係完全無諗過我無啦啦會梳頭   我話頭髮薄同埋好大風   都係梳下好啲   哈哈 ~

有唔少外國人帶狗狗行山

里奧大人終於除咗件裇衫喇   我成日覺得着住件裇衫好熱呀 

真正處於南丫島   哈哈 

好快就到呢度   之前好多人坐喺度抖涼㗎   今日完全無人

三支香無處不在   哈哈 

呢啲路真係好好行 

依家我地就去榕樹灣喇 

經過洪聖爺灣泳灘

今日應該唔會有人游水啦   

CLOSED

呢條路去南丫風采發電站 

行斜路   所以開始有啲熱 

跟住路牌指示 

菠蘿山莊特產 

我其實係比啲紅色字體吸引咗

大蕉葉   諗起家姐話有次等巴士   有個男人拎住塊大蕉葉問佢幾點 ?!   但佢隻手係戴住隻錶   所以家姐答完佢即刻走開   我覺得好好笑   家姐嗰排成日都見到啲傻人㗎 

翠綠 / 枯萎  

行極唔遠   我開始有啲發脾氣喇 ~

我見到有個女人着長袖厚衛衣呀   我即問里奧大人依家熱唔熱 ?!   好在佢話好熱咋   哈哈 ~

終於到啦   我都覺得自己好無耐性   有時都覺得自己好難頂 ~

似乎有排行 

好攰呀   行埋呢條斜路就到㗎喇 

@ 南丫風采發電站 

一場嚟到要自拍一下   哈哈 

私人地方不得自取   因為樹上好多香蕉 

好大梳香蕉呀 

其實落斜路   不過我哋望番轉頭影呢   哈哈 

好貼近嘅 3 個路牌

3 點就去食豆腐花   得 1 枱客人   又要講番以前   想搵個位坐都難㗎 ~

建興阿婆豆腐花   我覺得阿婆阿伯呢啲店舖名   係代表老字號 

任妳揀位坐

好大煲豆腐花

I AM THE LEGEND OF EATING 

豆腐花都好滑

我同里奧大人話想佢好生意   將豆漿一杯 $8 改為豆漿十杯 $8   哈哈哈哈 

食完又周圍行陣   一場嚟度   點都要行   哈哈 ~

Little Thai 

買咗 1 包炸蝦片

行番出去大街 

又見到呢架車 

出南丫島喇

大灣新村 

1955 年建築物 

終於有個矮過我個嘅郵筒   哈哈  

細個見到呢啲商店已經好開心 

去搵食 

行到差唔多 4 點就去食哘   本來諗住食日本嘢   但佢哋落場   咁唯有食其他啦 ~

唔多人   真係好好行 

行咗一大個圈   見到有間食泰國午餐   咁就入去食喇 ~

豬頸肉泰式湯粉套餐 ($40) - 呢個味道 OK 啦

香草肉碎炒飯 ($50) - 呢就就味道麻麻哋

泰式凍奶茶 ($+5)

5 點 15 分有班船   所以食完又周圍行下 ~

行去碼頭附近睇下

@ 榕樹灣大街

@ 南丫郵政局

 

行去碼頭喇

今日嘅南丫島好靜

南丫島北段公共圖書館及南丫島歷史文物室

好多單車

最後都係去碼頭入面等船   因為唔想食風   哈哈

好靚嘅回收箱

天色無變過   全日都灰灰暗暗

現正三號風球

聖經金句

行南丫島真係舒服   諗唔到地方行   可以再去多次   哈哈 ~

5 點 15 分準時開船

離開南丫島了

差唔多到中環碼頭

話咁快就到中環碼頭

搭天星小輪去尖沙咀

7 點幾番到屋企   咁去麥當勞買晚餐算喇   今次到我想食麥當勞   因為好想食 Nugget 呀 ~

沖埋涼就開餐   之後先開機洗衫 ~

今日有護膝 + 行山杖 + 行山鞋   對腳真係唔痛呀   感恩感恩 ~

炸蝦片 ($20) 超級好味呀 / 紫菜 ($10)

9 點左右食燒餅   焗熱仍然咁好味   下次再買   哈哈 ~

睇埋新聞   11 點半都瞓覺喇 ~