生炒排骨 + 蛋炒飯 + 腐乳通菜 ( 31-AUG-2018 )

( 31-AUG-2018  FRI )

今朝接近 5 點又痛醒咗   即走去沖個熱水涼   之後就即瞓喇   唉   好煩呀 ~

唔知做乜鬼   無啦啦勁想食香口嘢   所以食吉列豬扒同薯餅   熱氣到呢   哈哈 ~



菇場忙呀   臨放期先嚟忙   要開行 Tubro 做先得囉 ~

Lunch Time 出去行半個鐘   之後再買燒賣粉果番菇場食   8 卦見到咁多辣椒油又喺度話成日食辣   但今次搞笑啦   一路上網一路食   完全無蘸過辣椒油呀 ~

仍然忙啦   好在放工前做哂   唔駛心掛掛 ~

放工去超市買餸   買完即番屋企預備喇 ~

是日晚餐  - 生炒排骨 + 蛋炒飯 + 腐乳通菜

生炒排骨 - 尋晚里奧大人話個茄汁好味道   咁諗住整茄汁豬扒比佢食   不過無哂豬扒   咁就變陣啦   改為整生炒骨啦   但無買任何配料   買咗 $30 排骨   只係煮咗一半   因為 $30 份量太多   唔想格硬食   今次好有心機整呀   慢慢半煎炸   里奧大人話好味過飯堂添呀   呢句幾咁令人鼓舞呀   百年一遇   哈哈 ~         

蛋炒飯 - 又係好有機煎隻蛋   依家炒飯都落多啲油   唔係鑊鑊都黐鑊   真係嘥鬼哂啲飯同心機囉 ~

腐乳通菜 - $9/Pack   份量好多呀   但唔想番聽晚囉 ~

食完就大清潔廚房啦   抹完之後攰到成隻嘢咁   要抖陣先沖涼呀 ~

沖埋涼就睇戲   差唔多 12 點先瞓 ~

茄汁雞扒 + 菜心苗 ( 30-AUG-2018 )

( 30-AUG-2018  THU )

尋晚半夜又痛醒   之後即沖個熱水涼就再瞓 ~

早餐食腿蛋治   今次件多士烘到熱辣辣   勁好味呀 ~



菇場唔太忙   感恩身體都 OK ~

Lunch Time 出去買水餃米   堅開始厭喇   哈哈 ~

諗住 Hea 過   點知 4 點又開始忙了 ~

放工即走   番到屋企就即預備晚餐喇 ~

想煮意粉   不過份量得好少   所以煮出前一丁   我覺得自己好低能囉   可以翻熱啲冷飯嘛   茄汁撈飯仲好味啦   唉 ~

是日懶餐 - 茄汁雞扒 + 菜心苗  

茄汁雞扒 - 塊雞扒買咗都有個幾月   係時候要清埋啦   以前我唔理㗎   但阿 mi 成日話會變疆屍肉   所以我依家盡量兩星期內清哂啲凍肉   但呢排身體唔太 OK   咪少煮囉   咁一有精神就即刻清冰格食物 lu ~    

菜心苗 - 買咗半斤   估唔到咁甜   可能太耐無食菜   哈哈 ~

洗埋碗就沖涼   之後開機洗衫   呢排都係里奧大人幫手熨衫   咁樣幫輕我好多   始終我狀態仍然未回勇呀   哈哈 ~

其實唔太眼瞓   但又可以瞓   所以 11 點 10 分都瞓 lu ~ 

粟米磨菇肉粒 ( 29-AUG-2018 )

( 29-AUG-2018  WED )

尋晚半夜扯住痛   所以又沖一次涼   再攬住暖水袋   之後就好快瞓着 ~

早餐食芝腿治   食到一半又唔想食   呢排食親嘢都係咁 ~



菇場勁忙   好在今日身體 OK   無扯住痛呢 ~

Lunch Time 出去買酸辣米線   順便幫埋齋買燒賣魚蛋   今次小辣唔太辣   但比較酸   咁又好喎   其實我無咩胃口   但又想食啲刺激嘢   最衰唔記得少米線   食剩半碗太浪費喇 ~

仍然忙   仲要加埋啲煩嘢   真係人都顛 ~

放工前搞掂   咁就可以安心回家了 ~

番到屋企就拖地同抹嘢   個幾星期無清潔喇   今日難得身體狀況好啲   就拿拿聲做喇 ~

里奧大人差唔多 7 點幾番到屋企   可以即開飯 lu ~

是日懶餐 - 粟米磨菇肉粒

粟米磨菇肉粒 - 剩咗 $10 豬展   又唔想煮意粉   比我諗到粟米肉粒   呢個餸真係方便到暈呀   哈哈 ~

洗埋碗就大清楚廚房   之後再大清潔廁所就沖涼喇 ~

食埋生果就休息喇   里奧大人就熨衫   佢最驚我係咁做做做   因為難得身體好番啲   都要抖下囉 ~

11 點幾都瞓喇   個肚又有少少痺痛添   唉 ~ 

蕃茄薯仔肉粒通粉 ( 28-AUG-2018 )

( 28-AUG-2018  TUE )

尋晚又半夜沖個熱水涼   之後又真係舒服哂   一覺瞓天光   但成日夜晚先來痛都好慘囉   唉 ~

早餐食通粉餐   比咗半碗通粉比 8 卦   我先勉強食得哂 ~



菇場唔太忙   但個人好攰咁 ~

溫總知我每月一痛   佢話我雖然皮膚白   但都睇得出我面色唔好喎   不過佢話我比之前已經好好多   我話之前 Keep 住做運動同睇中醫   身體係好啲嘅 ~

但依家又攰   天氣唔係焗就係落雨   無做運動又無做家務   成個人直頭懶哂咁呀   慘 ~

Lunch Time 出去行陣   買埋嘢食就即番菇場喇   個天又嚟料 lu ~

4 點開始勁忙   不過做到放工都即走喇   條腰超級勁痛呀 ~

買埋餸就番屋企   其實好唔想煮   因為勁攰   但更加唔想出去食   食到好悶呀 ~

里奧大人今日上大陸   由落馬洲番到屋企都差唔多 7 點半   咁我沖咗涼先   想精神啲呀 ~

是日懶餐 - 蕃茄薯仔肉粒通粉

蕃茄薯仔肉粒通粉 - 好想飲湯   所以整通粉   買咗 $20 豬展   留番一半聽晚煮其他   勁抵食   哈哈 ~

食完洗埋碗就休息   條腰痛到我死死下   頂唔順叫里奧大人幫我練幾分鐘   又好似好咗少少 ~

個肚又有啲扯住痛   腰又痛   堅辛苦   最後都係用按摩枕按摩   有啲熱力係好啲   按咗半個鐘   條腰真係舒服好多呀   感恩感恩 ~

好攰呀   11 點唔夠都要瞓喇 ~   

油雞飯 (外賣) + 燒肉飯 (外賣) ( 27-AUG-2018 )

( 27-AUG-2018  MON )

尋晚個頭又痛   個肚又扯住痛   辛苦到我爆炸   所以半夜忍唔住起身沖熱水涼   之後一覺瞓天光   瞓到 8 點先起身 ~

個肚仍然唔舒服   但就唔係每月一到嘅痛   係扯住嘅痛   但可以番到工   所以都好開心   真係唔想請日病假 ~

咁我好晏先到茶記   我叫 8 卦食完走先   佢見到我唔舒服個樣   佢即刻話妳又咩呀 ?!   我話頭痛呀   我會慢慢食   你走先 ~

菇場唔忙   咁都好   我都係攬住個暖水袋發呆   又中下眼瞓咁囉 ~

Lunch Time 即瞓   瞓到 1 點半   啱啱好開工 ~

仍然扯住痛   感恩 4 點開始無痛   但就超級攰囉 ~

放工即走   番到屋企抖陣   攰到唔想沖涼住添呀 ~

叫里奧大人買飯   差唔多 7 點幾佢就番到屋企 ~

食埋飯再抖陣   8 點半先沖涼 ~

里奧大人呢排成日食零食   不過咁都好   快啲食哂   唔係又擺到過期   哈哈



睇陣電視   10 點 20 分都瞓覺   個肚又扯住痛   好痺痛嗰隻   唉 ~

涼瓜肉燥燜腐竹 (外賣) ( 26-AUG-2018 )

( 26-AUG-2018  SUN )

今朝 10 點起身   沖埋涼就去食早餐喇   唔知做乜鬼   比個太陽曬一曬   有啲暈暈哋感覺   所以近近地去吐司工房食早餐算喇 ~





今日講道好正呀   播咗一段短片   好似係喺西班牙國家   講一個 6 歲小女孩打扮得乾淨企喺路中心   好多人會好熱心問佢係咪等人 ?!   之後易容到好污糟呢   就一個人都無關心佢呀   之後轉個場景喺餐廳   着得靚呢   啲人就會比佢坐埋嚟   污糟呢   有個男人直頭叫餐廳人員趕個小女孩走呀   個小女孩真係喊住走出嚟呀   最後因為小朋友情緒問題   影片要終結 ~

而當事奉嘅時候   真係唔可以因為污糟而拒絕依樣嗰樣   上次主日學又係咁講   所以我都好驚自己係咁   但污糟真係好難接受   唉   我真係要多多祈禱   令我可以事奉上更加得力呢 ~

崇拜完畢就同水姑飲茶   佢問我點解成日唔舒服 ?!   因為呢排見親佢都係咁   里奧大人話食咗啲藥   依家可能適應緊   之後佢叫我食多啲車厘子   我話好燥   唔敢食住   佢就話邊會燥 ?!   里奧大人話真係會燥喎   我最憎佢成日乜都話邊會咁邊會咁   最鍾意就用自己身體同人比較   好煩   佢做醫生嘅話   應該都死得人多囉 ~

水姑問我駛唔駛浸一浸 ?!   我話唔駛啦   個汁酸酸咪咪好味喎   佢話佢一定要浸   唔係一陣又咁咁咁   其實嗰下勁想串佢   咁怕就咪出街食啦   煩

之後又讚自己係一個超級好人   所以咁咁咁   真係救命   好唔好人真係唔係妳自己讚囉   係外人讚㗎   但我覺得妳做出來比人睇嘅   就一定係好㗎啦   但內心諗啲嘢係衰嘅   人哋唔知就當妳仍然係好人囉   真係咪當我哋傻先得囉   同埋有利用價值   妳咪對人好囉 ~

飲完茶再去舖頭幫手   今次我坐喺度等里奧大人   因為我暈暈哋   唔敢幫手 ~

差唔多 4 點走人   番到屋企都沖涼休息一下 ~

6 點幾開始煮飯   炒翻熱啲餸就可以   7 點食得   超勁快 ~

搞掂哂就沖涼   里奧大人幫手熨 3 機衫同開機洗衫   我呢排真係攰到一個點   除咗番工   真係唔想郁呀   慘 ~

10 點 20 分都瞓喇   個肚無啦啦扯得好犀利呀   慘 ~

米線陣 @ 官塘 ( 25-AUG-2018 )

( 25-AUG-2018  SAT )

今朝同 8 卦試間新茶記   但 8 卦話唔會再去   因為啲位好窄   哈哈 ~

菇場唔太忙   不過我好攰   做咩都無動力   好在無嘢做 ~

放工即走   番到屋企坐喺梳化瞓咗半個鐘   起身已經 2 點   其實呢排個人都唔多舒服   個肚扯住痛到好攰   所以里奧大人買餃子番來一齊食 ~



食完無耐   3 點又瞓過   又瞓咗 45 分鐘   之後 4 點 15 分又再瞓   瞓到 5 點呀 ~

人生第一次咁瞓法   可想而知我幾咁攰呢   哈哈 ~

本來要去大埔食兒生女嘅過大禮飯   最後都唔去喇   里奧大人話趕唔切喎 ~

咁再抖到 6 點幾就出發去米線陣   食完就拎淘寶 ~

番到屋企即沖涼   之後睇戲   估唔到 11 點半都眼瞓   即瞓啦 ~

台屋 @ 紅磡 ( 24-AUG-2018 )

外婆滷肉飯拚青瓜套餐 ($65) - OK 啦   無咩胃口   所以覺得酸菜係最好味   哈哈



香煎餃子 (高麗菜豬肉) ($35) - 超級油   我都頂唔順呀   所以唔食塊餃子皮呀



( 24-AUG-2018  FRI )

今朝又 7 點起身陪里奧大人食早餐   感恩尋晚瞓得好好   唔係我就會顛㗎喇   哈哈 ~

其實早咗成個鐘頭食早餐   真係唔係太食得落   但又唔想拎走   凍冰冰仲難食 ~



菇場今日 Free 爆   因為所有大粒唔喺度   可惜我個肚又扯住痛囉   唉 ~

Lunch Time 出去買車仔麵   好耐無食喇   估唔到阿姐問我仲要唔要加辣   之後我同 8 卦講   佢話真係痴根   係人都知我食辣   哈哈   8 卦一見我食辣就依依哦哦嘛   會 8 婆上身咁話繼續食啦   食到個胃成日痛啦   好搞笑 ~

仍然扯住痛   所以個人好鬼攰   勁想瞓覺   不過太揚喇   所以點都頂住啦 ~

放工即走   約咗里奧大人喺紅磡火車站等 ~

見到里奧大人嘅時候   我問佢紅磡依家係咪不是總站呀 ?!   我落車嘅時候   我見有人無落車   又見好多人上車喎   佢勁衰   話係咪見到嘢呀 ?!   我話咁恐怖 ?!   成車都係 ?!

之後佢話   咪好似啲人好鍾意喺油麻地轉車咁囉   我先醒起咋   因為見有啲人喺旺角東上車   之後紅磡又唔落車   原來如此 ~

我同里奧大人食完嘢   再約 Ivy 兩公婆喺大酒店樓下等呢 ~

唉   教會姊姐妹安息主懷   雖然我今日狀態唔好   但點都想作最後送別 ~

儀式前 15 分鐘都去定廁所   咁 Ivy 陪我嘛   估唔到佢拖住我隻手   真係除咗里奧大人同家姐   好少人會咁拖我   哈哈 ~

我唔敢合埋眼   因為我知道一合埋眼   我淚水就會不停咁流   但唱詩歌嘅時候   真係忍唔住喊   真係令人好傷感呢   嗚嗚 ~

儀式差唔多 9 點幾完畢   我地各自搭巴士番屋企   感恩去到巴士站即刻有車呀 ~

番到屋企即沖涼休息   里奧大人就睇戲   沖涼之前佢先食完個甜筒   依家就薯片加啤酒   我就勁喇   乜都無食   佢都覺得我奇怪   居然唔食零食 ?!   我話仍然唔係咁舒服   所以真係完全唔想食嘢 ~

里奧大人係咁話好鹹   話唔好再買   我話好難買喎   我唔係成日去曼谷呢   哈哈    





我 11 點幾都自己瞓先喇   又要攬住暖水袋瞓   唉 ~

大家樂 @ 官塘 ( 23-AUG-2018 )

( 23-AUG-2018  THU )

里奧大人今日番新工   所以我早半個鐘頭起身   陪佢食早餐   但我尋晚夜瞓   又瞓得極差   可能緊張得滯   哈哈 ~

咁個人溫溫燉燉咁   突然聞到好大陣阿婆油味   勁驚里奧大人唔舒服   但佢又唔會搽呢啲   咁我就更加無搽過添啦   再聞多幾聞   原來係牙膏味   但唧嘅時候又唔覺㗎喎 ~

食完早餐仲有好多時間   所以我都番屋企抖下先喇 ~

番到菇場仍然好攰   直頭想瞓添呀   哈哈 ~

Lunch Time 出去買嘢食   咁溫總同小 A 叫我一齊食魚湯飯   不過我話好攰唔去喇   溫總都話我今日個樣好攰   黑眼圈好勁 ~



唔想食辣   所以去買兩餸飯   點知食完飯即刻胃痛   唉 ~

胃痛咗一陣   之後個肚扯住痛   唉   呢啲感覺幾時完呀 ~

無啦啦又忙喎   搞到我成個人更加唔舒服添 ~

放工即走   本來今晚煮飯   但最後決定唔煮喇   攰到不得可了 ~

短短車程都瞓鬼着咗   好在知醒落車咋 ~

里奧大人差唔多 6 點半放工   我就喺屋企等佢番嚟   差唔多時間就去大家樂 ~

食完都番屋企喇   佢好驚我食藥食到咁辛苦咁   但我話唔想停藥   始終身體要一段時間適應   同埋我今日又嚴重唔夠瞓   所以咪更加唔舒服囉 ~

番到屋企即沖涼   之後咩都唔做就休息   個肚仍然扯住痛   要用暖水袋添呀 ~

睇陣 Youtube   10 點 20 分都瞓覺喇   勁早呀   哈哈 ~

金滿庭京川滬菜館 @ 九龍灣 ( 22-AUG-2018 )

京醬肉絲 (配叉子燒餅)



招牌燻魚



回鍋肉



上海粗炒



擔擔麵



( 22-AUG-2018  WED )

尋晚又瞓得麻麻哋   感恩嘅係起身沖涼之後又唔係好攰呢 ~

早餐食芝腿治   最衰無胃口啦   唔係真係好想食濕嘢 ~



菇場唔太忙   可以抖下 ~

Lunch Time 出去買魚蛋粉   啲魚蛋好難食呀 ~



仍然 Hea 過   呢個幾月真係好鬼攰   完全係唔想出街嗰隻   只係好想快啲番屋企休息 ~

放工約咗里奧大人一齊去金滿庭   姑奶們同里奧大人慶祝生日 ~

食到 7 點幾都走人   我同里奧大人去買杯   不過唔係咁啱   咁行多陣就番屋企 lu ~

沖埋涼就休息   點知睇 Youtube 睇到 12 點   要即瞓喇 ~