橋鍋居 @ 紅磡 ( 30-NOV-2019 )

豚肉雜菜湯鍋定食 ($45) - 我以為係泡菜湯呀   不過呢個湯底都 OK

雞扒夜貓大碗飯 ($45) - 里奧大人真係好鍾意食呢個飯   搵晚整比佢食先   因為材料簡單   哈哈



一口台式腸串 ($28) - 仲以為係大條嘅台灣腸添   之後仲叫咗杯凍水蜜桃 ($12/杯)   但無味道嘅



( 30-NOV-2019  SAT )

今朝 7 點 50 分起身   差唔多 8 點 35 分先到茶記   所以真係快快食   唔想遲到呀 ~



菇場超級凍   因為得一半人番工   8 卦話佢果邊冷氣係 17 度   黐線咩   都唔知邊個校到溫度咁低   後尾原來係因為師傅嚟整冷氣   即係佢教到 17 度呢 ~

放工即走   約咗家姐食 Lunch 同推拿 ~

我早一個站落車   之後打比家姐   佢都差唔多到   仲話本來想喺巴士站等我㗎   我話好彩無咋 ~

估唔到家姐話去八方雲集食麵線   我真係打個突喎   因為佢唔鍾意食小籠包同酸辣湯   但我覺得餃子似小籠包   麵線似酸辣湯咁杰杰地 ~

麵線套餐 - 翡翠芹菜餃子餐 + 台灣麵線 ($39)



韓式辣味鍋貼餐 ($40)



一路食一路傾   家姐有嚴重鼻敏感   所以睇個相熟中醫   中醫話家姐可能會哮喘死   之後我聽到超級唔開心   最後忍唔住喊   家姐問係咪掛住媽咪 ?!   我話唔係   佢問係咪驚佢死 ?!   我點頭   之後佢話唔食咁多辣   要長命啲對住我   我話仲要加埋做運動   之後我都話如果佢唔喺度   其實我都唔想做人喇 ~

食完就去推拿   約咗 2 點半呀 ~

今次我仍然推拿 + 刮沙 + 拔罐   2 點 45 分開始    做完已經 5 點   時間過得好快喎 ~

之後家姐刮沙 + 拔罐   不過佢好快   15 分鐘搞掂 ~

傾多陣偈   差唔多 6 點先走   咁唔探 Berry 喇   周圍行陣算喇 ~

家姐陪我等巴士   等咗 45 分鐘先有巴士   感恩車程暢順 ~

去到等多陣   里奧大人都放工 lu ~

里奧大人知我想食韓國嘢   佢話食牛肉鍋飯   我話怕佢熱氣   下次先食   咁我話食湯飯 ~

食完就番屋企   開機洗衫再沖涼 ~

里奧大人 10 點幾都瞓   我睇 Youtube 睇到 11 點幾先瞓 ~

阿南廚房 @ 美孚 ( 29-NOV-2019 )

香茅豬肉撈檬 ($50) - 豬肉都好味   但個酸醋汁完全係無味   我第一次食撈檬要加辣椒醬呢



越式豬頸肉湯檬粉 ($58) - 見到啲豬頸肉咁樣   都覺得唔好味咯   加埋湯底又無味   里奧大人食到乸口乸臉



特色皮蛋 (送) - 我鍾意食皮蛋㗎   但里奧大人就唔食呢

( 29-NOV-2019  FRI )

今朝問里奧大人今晚搭咩車番學 ?!   之後佢又問番我幾點到 ?!   我答佢好爆㗎   之後佢問我咩好爆 ?!   哈哈哈哈   笑死我呀   我話地鐵車廂好爆呀   所以有時要等下一班先到   我成日講嘢真係無頭無尾   又九唔搭八  哈哈 ~

今朝食丁米餐   但食到一半就好飽   真係假期瞓夠先可以食呢啲飽餐呢 ~

菇場忙呀   好快到 Lunch Time ~

今日食 Flakes + 乳酪   食完好鬼凍呀 ~

終於可以抖下   放工可以即走 ~

里奧大人準時放工   所以早過我到美孚   周圍睇下有咩好食   最後我揀咗越南菜   但非常之唔好食   哈哈 ~

食完都番學校   今晚教嘅嘢好難咁   好多都唔明呀 ~

準時放學   里奧大人又買埋綠豆沙同紅豆大菜糕先番屋企呢 ~

沖埋涼就睇多陣 Youtube   11 點半都一齊瞓覺喇 ~   

豉汁蒸鯧魚 + 超甜粟米 ( 28-NOV-2019 )

里奧大人話細個鍾意食潤腸   大個之後就鍾意食臘腸   反而我由細到大都鍾意食潤腸   臘腸就一般   因為口感比較硬

( 28-NOV-2019  THU )

感恩尋晚一覺瞓天光   起身都精神 ~

早餐食奶醬多   今次烘得好味道 ~

菇場忙下停下   時間過得都幾快 ~

Lunch Time 出去食鯪魚球米線   食完行陣再買林柿   之後番菇場喇 ~

放工即番屋企   拎住袋林柿都幾驚   一陣爆哂就煩喇 ~

番到屋企第一件事係拎林柿出嚟   爆咗一個呀   今晚比里奧大人食   哈哈 ~

呢期多數買林柿同人參果   因為里奧大人都鍾意食   以前佢唔食㗎   所以我唔會嚟食   依家可以大買特買喇   勁開心

預備好哂晚餐   諗住抖下   點知醒起要拖地   呢排真係好無記性 ~

搞掂哂就煮嘢喇   里奧大人 7 點番到屋企   可以即開餐 ~

是日懶餐 - 豉汁蒸鯧魚 + 超甜粟米

豉汁蒸鯧魚 - 今次啲豉汁就好味喇   因為用辣椒豆豉   唔係執雪櫃都唔記得佢存在添 ~

超甜粟米 - 條粟米好大條架   之得買 1 條   唔駛食得咁辛苦   哈哈 ~

最鍾意蒸餸   因為就咁倒咗啲水就搞掂   但其實我都會用少少洗潔精清潔下   感覺乾淨啲咁 ~

搞掂哂就開機洗衫   沖埋涼就睇 Youtube ~

里奧大人呢排 10 點幾就瞓   仲有少少感冒未清   但我今晚 10 點 50 分都瞓呀   可能今日天氣凍   好想瞓覺   哈哈 ~

韭菜餃 (外賣) ( 27-NOV-2019 )

( 27-NOV-2019  WED )

尋晚臨瞓前人短片 "山脊上急速狂奔"   勁刺激呀   所以成晚係咁發夢   里奧大人話睇笑片嘛   睇埋呢啲 ~

早餐食芝腿治烘底   叫完先後悔   其實無咩胃口   應該叫奶醬多呢 ~

菇場勁忙   正呀 ~

Lunch Time 想抖下   所以唔出去喇   食 Flakes + 乳酪 ~

忙到 4 點幾就搞掂   抖下又放工 lu ~

去街市買 2 晚餸   買完都走人喇 ~

是日懶餐 - 韭菜餃 (外賣)

韭菜餃 (外賣) - 買咗 1 條白蘿蔔 ($7)   但唔甜嘅   好在無渣   再加幾粒牛筋丸   煮埋都要分開 2 碟先裝得哂呀 ~

洗埋碗就開機洗衫   之後沖涼休息 ~

睇多陣 Youtube   11 點都瞓喇 ~

青咖哩扎肉 + 蠔油菜心 ( 26-NOV-2019 )

( 26-NOV-2019  TUE )

呢排瞓得唔係咁好   個人好似好熱咁 ~

今朝早咗出門口   所以同里奧大人食早餐 ~

菇場超級勁忙呀   話咁快就 Lunch Time ~

去銀行入票再去食 Lunch   食完行下就番菇場喇 ~

仍然忙爆   真係做到要停下先再做   因為隻手好痛呀 ~

放工前搞掂哂所有嘢   可以準時放工 ~

買埋菜就番屋企   里奧大人 6 點放工   所以我都要即預備晚餐喇 ~

7 點前食得   今晚煮丁麵   突然間好想食呀 ~

是日晚餐 - 青咖哩扎肉 + 蠔油菜心

青咖哩扎肉 - 家姐比㗎   今晚我好有心機煎   落多啲油真係好煎好多   哈哈 ~

蠔油菜心 - 又食菜心喇   其實懶得諗 ~

大清潔廚房就開機洗衫   沖埋涼就休息喇 ~

里奧大人 10 點幾瞓   我 11 點都即瞓   今日有啲唔舒服   想快啲瞓覺 ~

元氣壽司 @ 尖沙咀 ( 25-NOV-2019 )

芥辣八爪魚軍艦 ($14) - 必食呀   好鍾意爽爽哋嘅口感

飛魚籽軍艦 ($17)

吞拿魚壽司 ($19)

皇帝蟹柳壽司 ($17) - 好似 4 隻手指   哈哈

帆立貝壽司 ($17)

脆蒜長鰭吞拿魚壽司 ($10) - 加埋啲脆蒜   味道好怪

炸蝦天婦羅壽司 ($10) - 食咗 2 隻   因為好想食炸嘢呀

油甘魚壽司 ($10) - 我鍾意食   但都係唔好食咁多生嘢

珍寶皇帝蟹柳壽司 ($10) - 里奧大人要食熟嘢   

我話好想搶前面枱嘅壽司   里奧大人話動作要好快   哈哈

離遠我已然話啲食物到喇   里奧大人好驚訝話點解妳知嘅 ?!   我話 Feel 到 (其實係見到盞黃色燈閃閃下呀   哈哈)

( 25-NOV-2019  MON )

9 點幾起咗身   即刷牙沖埋喇 ~

今日 A/L   本來打算去大陸兩日一夜   但最後決定取消喇   咁我話不如我今日番工啦   但里奧大人話叫我陪佢喎   咁難得聽見佢開口叫我陪   咁點都要陪啦 ~

不過都感恩嘅   里奧大人喉嚨都仲有少少唔舒服   所以唔去大陸都好㗎 ~

10 點幾出門口   我話去 mega BOX 飲茶   但飲開果幾間無開   所以轉去煌府呢   但點心唔太吸引 ~

上素蒸粉果 - 最鍾意食個皮   因為煙煙韌韌

龍蝦湯鮮竹卷

蠔皇叉燒包 - 呢期鍾意食呢啲包

蜜味叉燒腸

呢排瞓得唔太好   就算今日放假都攰   可能無飲咖啡   所以我話去 Starbucks   又可以用埋啲 Coupon ~

Red Velet & Chocolate Chips Muffin 紅絲絨碎朱古力鬆餅 ($20) - 好味道呀 
焦糖咖啡 ($42) - 完全唔掂

行咗陣就去舖頭拎嘢   之後再去尖沙咀 ~

去美麗華行下   又買咗件外套   勁開心 ~

突然間又鍾意番小丸子同蠟筆小新   所以里奧大人話我好奇怪   哈哈

行去 Harbour City   行到 4 點左右   里奧大人話想食啲嘢   咁見鼎泰豐無咩人   就入去食嘢喇 ~

小籠包 ($64/6 個) - 居然無蟹粉小籠包   咁試下小籠包啦   味道都 OK

都有湯汁

台式紅燒牛肉湯麵 ($92) - 呢個賣相真係唔多掂   

牛肉同麵嘅份量都好少

食完又行陣   差唔多 6 點就去元氣食晚餐   今日係咁食食食   勁開心   哈哈 ~

差唔多 8 點就搭巴士番屋企喇   沖埋涼就熨 2 機衫   之後休息 lu ~

頭先喺車度瞓咗 20 分鐘   好在 11 點半都有啲睡意   所以要即瞓喇 ~

麥當勞 @ 官塘 ( 24-NOV-2019 )

之前做媽咪會會員   送咗一套迎新禮品 (板燒雞腿包 + 蘋果枇 + 汽水(中))   Cashier 居然收 $41   我話 Coupon 嚟喎 ?!   之後佢話係喎   救命

( 24-NOV-2019  SUN )

9 點起身   又係慢吞吞咁去刷牙沖涼   所以遲咗出門口 ~

食埋早餐番學   崇拜完之後就接里奧大人放工 ~

去咗超市買嘢   買完就接到里奧大人電話   話搞掂放工喇 ~

今日去試另一間泰菜   咁比自己多過選擇嘛 ~

去骨海南雞配冬蔭功湯河 ($45) - 味道 OK 呀

蝦醬炒飯 ($58) - 都 OK   但食到最後係好油   之後再叫杯椰汁冰 ($18) & 泰式奶茶 ($15)   兩杯係完全無味道的

食完就搭車番屋企   里奧大人即沖涼瞓晏覺   我就煲羅漢果茶比佢   再睇下 Youtube ~

之後佢瞓醒就睇書   睇睇下又話瞓覺   不過我之後睇睇下 Youtube 都瞓咗   瞓咗半個鐘   啱啱好睇新聞 ~

7 點幾去食嘢   食完番屋企 ~

開機洗衫再大清潔廁所   沖埋涼就休息 ~

今晚里奧大人又係 10 點幾瞓   我仍然睇 Youtube   差唔多 11 點半先瞓呢 ~

橋鍋居 @ 紅磡 ( 23-NOV-2019 )

豚肉雜菜湯鍋定食 ($45) - 呢排成日睇韓國食播   搞到我勁想食泡菜湯飯   呢個湯飯好味呀   同埋份量好足呢

雞扒夜貓大碗飯 (木魚絮 + 紫菜絲 + 牛油拌) ($45) - 里奧大人話好味道   佢比哂啲黃蘿蔔比我   話我鍾意食   我真係好鍾意食㗎

( 23-NOV-2019  SAT )

今朝里奧大人 9 點半起身   我都起身喇   佢番 11 點半   陪我食完早餐就番工喇   其實我記得佢番 11 點半   但以為後尾改咗時間咋 ~

食完都番屋企   里奧大人坐陣都番工喇 ~

今日執衣柜同執什物櫃   終於分哂類喇   整整齊齊好開心   但勁攰呀 ~

抖到 1 點   抖陣就沖涼喇   之後去食 Lunch ~

狗仔粉 ($30) - 坐得先知道得 1 個 Size (大)   上個月同家姐食都仲有大同細 Size 㗎噃

辣汁魚蛋 ($12) - 就咁食狗仔粉好悶   所以加多碗魚蛋   最後就食唔哂啲狗仔粉   唉

食完就探 Berry   一入去就怪叫   之後又撲我要我摸佢   又喺廁所門口等我 ~

一坐低就發顛

比嘢食就即坐定定   萬試萬靈

同我爭梳化

係咁昅實我   哈哈

攰就瞓啦

無眼睇我   哈哈

今日都幾攰下   同 Berry 玩下  又睇下電視   之後都瞓着咗 lu   我估瞓咗半個鐘左右 ~

家姐 5 點幾同姐夫一齊番嚟   佢哋咁啱坐車見到   姐夫話無諗過家姐咁早   哈哈   但家姐知我嚟   所以早啲放工呢 ~

家姐特登叫同事喺日本買比我㗎   知我手痛要貼   龍角散就未試

6 點半走人   去埋買金羅漢果同合桃肉就接里奧大人放工喇 ~

8 點半先食飯   今晚食飯又飲湯真係好胃脹   唔可以同步做   哈哈   即係湯飯唔啱我添 ~

暖笠笠咁喎   好得意

食完即番屋企   沖埋涼就睇 Youtube   里奧大人 11 點即瞓   我又 12 點先瞓 ~