辣肉腸長通粉 + 蒜蓉菜心苗 ( 28-FEB-2022 )

( 28-FEB-2022  MON )

今朝同里奧大人要番工   所以同佢一齊食早餐喇 ~

依家番工前要做測試   報告係陰性先可以番工   其實咁都好㗎   保障大家嘛 ~

菇場都忙   因為間唔中有 Urgent 嘢搞 ~

咁同埋阿爽佢地傾偈   之後阿齋去開冷氣   發覺今朝無開到我哋呢邊嘅冷氣   佢話坐坐下好熱   阿爽仲搞笑   話佢都驚驚哋係咪自己發燒 ?!  我話我喺屋企   覺得個身好熱就即探熱添呀   所以里奧大人都話我情緒有啲問題   不過我真係好驚呀 ~

但阿齋同阿爽都係咁   其實相信好多人都係咁   始終呢個病毒傳播力好強   每日 3 萬幾宗真係好恐怖呀 ~

我話依家我哋好似生還者咁   大家真係要好好保護自己呀 ~

Lunch Time 出去買麵包同零食   之後買埋墨丸河   侍應阿哥見到我好開心   仲話好掛住我   我都忍唔住笑   因為我呢排無去叫外賣早餐同午餐   星期六又唔駛番   所以少見呢 ~

阿爽係咁叫我食完就走   不過我話唔好啦   反正番咗嚟   同埋我想清埋啲 Urgent 嘢先呀 ~

聽日菇場要做消毒   所以個個都執好哂食物入袋   最搞笑阿爽話噴埋文件都唔錯   哈哈 ~

我都有唔少杯麵同零食   有時唔想出街就食呢啲做午餐㗎喇

4 點左右   BG 叫我呢星期都唔駛番嚟   因為我部門無人番   所以四點半唔夠都可以走 ~

買埋雞骨草就去美心買排包   因為連續 4 日喺屋企食早餐   點知去度得 3 個吞拿魚包   真係唔夠人搶 ~

番到屋企即消毒所有嘢   再沖涼洗頭 ~

里奧大人要晏啲放工   所以 7 點左右先開餐 ~

是日晚餐 - 辣肉腸長通粉 + 蒜蓉菜心苗

辣肉腸長通粉 - 唔知煮咩好呀又   所以又煮呢個   哈哈 ~

蒜蓉菜心苗 - 要清埋呢份菜喇   唔想又擺到黃咁咁 ~ 

洗埋碗就沖涼   之後休息 lu ~

今晚唔係咁眼瞓咁   所以 11 點幾先瞓 ~ 

泡菜豆卜 + 鴛鴦腸飯 + 蒜蓉菜心苗 ( 27-FEB-2022 )

( 27-FEB-2022  SUN )

今日里奧大人 WFH   所以即係我都會好忙   哈哈哈哈 ~

難得里奧大人喺屋企   基本上我都想整早餐比佢食   咁唔駛佢滕來滕去買嘢食呢 ~

沖埋涼就休息   之後網上崇拜 ~

2 點左右食 Lunch   之後我就睇 Youtube   里奧大人仍然開工 ~

我食番尋晚嘅芝士蛋糕

今晚都求其煮   最想食哂啲隔夜嘢   哈哈 ~

是日懶餐 - 泡菜豆卜 + 鴛鴦腸飯 + 蒜蓉菜心苗

泡菜豆卜 - 終於食哂啲豆卜   下次都係唔買喇   唔想食到有壓力   哈哈 ~

鴛鴦腸飯 - 尋晚食剩一盒白飯   咁加臘潤腸一齊蒸   慳水慳力 ~

蒜蓉菜心苗 - 依家會整好多蒜蓉   其實擺得耐都會爛   咁快啲食埋去好過   哈哈 ~

洗埋碗就開機洗衫   之後沖涼喇 ~

本身同里奧大人一齊睇戲   但佢無啦啦有 Urgent 嘢搞   咁唔睇得戲 lu ~

今晚 10 點 40 分都瞓覺   呢段時間   最緊要夠抵抗力呀 ~

沙爹牛肉炒芥蘭 + 菠蘿生炒骨 (外賣) @ 屋企 ( 26-FEB-2022 )

沙爹牛肉炒芥蘭 - 份量都好多   同埋都好味道呀

 菠蘿生炒骨 - 呢個又係份量好多同妹味道   今晚好開心   食到好味嘢   哈哈

里奧大人買藍莓芝士蛋糕   佢知我鍾意食   我話今次醒喇   因為我好驚食有 Cream 嘅蛋糕呢

( 26-FEB-2022  SAT )

今朝瞓到 10 點先起身   又係瞓到有啲頭痛先醒   我發覺瞓到 9 點幾就唔會有呢啲問題   好奇怪 ~

食埋早餐就大清潔廚房   始終天氣仍然潮潮濕濕   都係徹底清潔好啲 ~

搞掂哂就拖地   沖埋涼就休息 ~

家姐話我今日生日唔好做大清潔   我話啱啱先做完啦   哈哈 ~

里奧大人 3 點幾先放工   不過我又唔太餓   感恩感恩 ~

估唔到里奧大人會買生日蛋糕比我   呢樣好有驚喜   最搞笑頭先家姐問有無生日蛋糕 ?!   我話肯定無添   哈哈 ~

今晚比自己嘅生日禮物係唔煮飯   唔算過份啦   哈哈哈哈 ~

本身叫 Pizza   但無人聽   可能唔開呀   不過無咩所謂   因為我都係想食與唔想食之間呢 ~

接近 8 點半開餐   因為太晏食午餐   如果 7 點真係食唔落呢 ~

食完又要食生日蛋糕喇   勁開心   依家疫情太嚴重   我公司又係重災區   所以我一定唔會探家姐   雖然有啲遺憾   但家人嘅安全係最緊要呢 ~

沖埋涼就睇戲   咁當然睇笑片啦   係睇 2008 年嘅 "極速緋聞"   12 年前勁呀呢   因為我鍾意朴寶英   最開心係睇到我好鍾意個小朋友呀   原來呢套戲係有份做   依家佢都 18 歲喇   哈哈哈哈 ~

11 點幾都瞓覺   其實呢排無咩必要   都想喺 11 點前瞓呀 ~

蜜汁焗雞中翼 + 七味粉焗豆卜 + 辣菜甫娃娃菜 ( 25-FEB-2022 )

( 25-FEB-2022  FRI )

里奧大人尋晚話陪我食早餐   但佢今朝沖完涼先叫我   但其實我已經醒咗   佢仲話諗住都係唔叫我起身   等我瞓晏啲 ~

今朝真係買咩無咩   所以里奧大人去買點心番屋企食呢 ~

菇場都忙呀   仲要有 Urgent 嘢   好在今日有番工咋 ~

Lunch Time 出去買菜同零食   所以成 12 點半先番到菇場   不過我都係食 Flakes + 乳酪   唔駛咁多時間食呢 ~

忙到 4 點半就放工   因為里奧大人好晏放工   咁我番到屋企即大清潔廁所   沖埋涼再大清潔屋企喇   咁聽日唔駛做咁多嘢 ~

差唔多 8 點半先開餐   好在唔餓咋   呵呵 ~

是日懶餐 - 蜜汁焗雞中翼 + 七味粉焗豆卜 + 辣菜甫娃娃菜

蜜汁焗雞中翼 - 間唔中就好想食雞翼   同埋依家冰格幾乎爆哂   所以咩都要開嚟食啲   哈哈 ~

七味粉焗豆卜 - 上次買咗半磅新鮮炸豆腐   係時候要食咁啲喇 ~

辣菜甫娃娃菜 - 今次喺另一間買辣菜甫   估唔到好味喎   因為無之前嗰間咁鹹呢 ~

洗埋碗就再沖涼   依家又要一日沖 3 次涼了 ~

睇多陣 Youtube   11 點幾都瞓 lu ~

豚肉炒烏冬 + 豆苗 ( 24-FEB-2022 )

( 24-FEB-2022  THU )

今日 WFH   所以可以 9 點半起身 ~

食埋早餐就沖涼   之後 Stand By ~

里奧大人就超級忙啦   搞到我真係好得閒咁   哈哈 ~

1 點左右食 Lunch   唔想又搞到啲食飯時間亂哂 ~

4 點半放工   咁就可以全情投入睇 Youtube 喇 ~

6 點預備   但 6 點 45 分先可以開餐 ~   

是日晚餐 - 豚肉炒烏冬 + 豆苗

豚肉炒烏冬 - 之前剩嘅豚肉同秀珍菇   再加 2 個烏冬   估唔到煮出嚟咁大碟 ~ 

豆苗 - 終於食哂喇   下次買菜心苗好啲   好似可以擺得耐過豆苗咁 ~

洗埋碗就沖涼   之後休息 ~

諗住同里奧大人睇劇   但突然有特急事要處理   差唔多 10 點幾先搞掂   所以聽日都要番工 ~

今晚 11 點唔夠都瞓覺   呢排真係唔好咁夜瞓   始終呢加要有強勁嘅抵抗力   希望疲情快快消失啦 ~

韭菜水餃餐 & 招牌鍋貼餐 (外賣) @ 屋企 ( 23-FEB-2022 )

( 23-FEB-2022  WED )

尋晚里奧大人話今朝陪我食早餐   咁好啦   其實我係番 9 點半   本身係瞓到 8 點 15 分   依家要早起身陪佢食就真啦   哈哈 ~

食完之後   里奧大人叫我一陣瞓下覺   我話一陣要番工喎   佢記錯我今日 WFH   怪唔得話陪食早餐啦 ~

菇場忙呀   好快又 11 點 45 分 ~

Lunch Time 出去行陣   但好似凍過今朝咁嘅 ?!

又係好想食雞翼酸辣米線   不過食埋今次要停下   好似有啲厭   哈哈 ~

菇場仍然忙   今日都係 4 點半放工 ~

去姑奶屋企拎嘢   搞掂哂就去買豆漿   之後番屋企喇   咁又已經 6 點 15 分了 ~

沖埋涼就開機洗衫   之後等里奧大人買外賣   今晚佢 7 點幾放工   所以唔煮喇 ~

抖陣又睇 Youtube   又 12 點先瞓 ~

燒汁炒秀珍菇豚肉 + 豆苗 ( 22-FEB-2022 )

( 22-FEB-2022  TUE )

今朝 9 點 25 分起身   但居然想繼續瞓呀   不過無可能咁啦 ~

梳洗之後即整早餐   之後要 Stand By 喇 ~

1 點半食 Lunch   今日喺屋企特別餓   唔知係咪太凍呢 ?!   我關哂窗都覺得超級凍呀 ~

碗邊有辣椒醬都懶得抹   真係好唔願郁呀   哈哈

食完抖陣又溫書   咁又已經 5 點幾喇 ~

開機洗衫就預備晚餐   里奧大人 8 點先番到屋企   不過都知佢忙㗎喇 ~

是日晚餐 - 燒汁炒秀珍菇豚肉 + 豆苗 

燒汁炒秀珍菇豚肉 - 焗完再炒   真係覺得自己好懶   不過我真係唔鍾意啲油彈到周圍都係   我次次大清潔廚房仲耐過煮呀   咁計唔化算呢   哈哈 ~

豆苗 - 淥得太耐   變咗黃咁咁添   唉 ~

洗埋碗都即沖涼喇   好鬼凍呢 ~

睇 Youtube 睇到 11 點幾   覺得好眼瞓   好感恩有睡意呀 ~ 

蒸素餃 & 腐皮卷 & 齋滷味 + 煎堆拚鹹水角 (外賣) ( 21-FEB-2022 )

( 21-FEB-2022  MON )

感恩一覺瞓天光呀   但真係凍到唔想起身囉   哈哈 ~

今朝我都要戴冷帽   好似得 10 度咋   加上又落雨   最怕呢啲濕凍 ~

早餐都係食奶醬多   依家隔日食就無咁悶   哈哈 ~   

菇場嘅 Server 突然有問題   所以可以睇下書   其實咁都唔錯㗎

但搞掂之後就勁忙   真係估唔到   哈哈 ~

Lunch Time 出去買齋   之後再買埋雞翼酸辣米線就番菇場喇   本身想食炒麵   但真係超級凍   所以食熱嘢 ~

今日 12 點 35 分先開餐   仲要食中辣   真係食到流眼淚   同埋食得好急   下次咁遲真係想食都唔買喇 ~

4 點半放工   一番到屋企   里奧大人叫我要着條珊瑚絨睡裙   我覺得佢好變態囉   成日幫我搵嘢又要我着   又話我買咗好多帽同頸巾   依家咁凍好拎出嚟用喎 ~

抖到 6 點幾就預備晚餐   雖然未餓   但里奧大人就話餓囉 ~

是日懶餐 - 蒸素餃 & 腐皮卷 & 齋滷味 + 煎堆拚鹹水角 (外賣)

蒸素餃 & 腐皮卷 & 齋滷味 - 好耐無食啦   其實我可以一星期食一次   不過里奧大人會覺好好密囉 ~

煎堆拚鹹水角 - 無啦啦又係勁想食   估唔到勁好味   下次一定會再買   哈哈 ~

洗埋碗即沖涼喇   之後睇 Youtube ~

里奧大人 11 點都瞓   我差唔多 1 點先眼瞓呀   唔知係咪飲咗茶呢 ~

咖哩雞肉烏冬 + 焗三文魚柳 + 福花 ( 20-FEB-2022 )

( 20-FEB-2022  SUN )

感恩一覺瞓天光    8 點半都起咗身了 ~

今朝里奧大人 WFH   尋日話今朝食麵包   但佢話天氣咁凍想食熱嘢   咁我煮個水煮蛋米粉比佢食啦   我就食糙米芝士包 ~

第一次咁樣煮蛋   但下次用另一方法好啲   咁樣唔駛嘥咁多蛋白呢

睇下 Youtube 又到 1 點   係時間預備午餐喇 ~

喺凍肉店買嘅芝士雞肉漢堡   估唔到幾好味喎   都有唔少芝士

里奧大人 2 點半開會   開到 6 點半   好在喺屋企開咋   咁我唔駛等佢番嚟先煮晚餐嘛   哈哈 ~

是日晚餐 - 咖哩雞肉烏冬 + 焗三文魚柳 + 福花

咖哩雞肉烏冬 - 今次都係用包裝嘅日式咖哩醬   真係好方便   天氣凍真係唔想搞咁多嘢架 ~

焗三文魚柳 - 用油掃下啲魚皮   不過都係唔脆嘅   激死 ~

福花 - 依家一份福花兩餐食真係好抵   以前後生真係食好多菜   依家一斤都要分兩餐食   真係年紀大嘅象徵了   哈哈哈哈 ~   

洗埋碗就開機洗衫   之後即沖涼喇   好鬼凍呀今日 ~

今日真係覺得係冰凍嘅感覺   可能加上落雨   真係凍上加凍 ~

睇 Youtube 睇到 11 點幾都瞓   今晚要加張珊瑚絨被墊底   仲要蓋 3 張被先夠暖呀 ~

雲吞拚韭菜餃 + 福花 ( 19-FEB-2022 )

( 19-FEB-2022  SAT )

今朝放假   不過瞓到 9 點左右都醒咗   梳洗之後就整早餐呢 ~

食完就抖下   之後開埋機洗衫就沖涼   雖然唔出街   但都習慣朝早沖涼洗頭呢   精神好多㗎 ~

12 點 45 分又食午餐了   因為里奧大人要番工 ~

里奧大人 1 點半都出門口   我睇多陣 Youtube   差唔多 3 點先開始溫書 ~

溫到差唔多 6 點都要停喇   對眼好攰呀   哈哈 ~

里奧大人晏放工   差唔多 9 點先開餐 ~

是日懶餐 - 雲吞拚韭菜餃 + 福花

雲吞拚韭菜餃 - 又係食水餃餐   因為太夜食   我唔想焗嘢炒嘢呀 ~ 

福花 - 一份好似 $12   最正係可以留呀   我都好似擺咗幾晚了 ~

洗埋碗即沖涼   好似凍咗好多咁呢 ~

仍然睇 Youtube   不過 11 點半都瞓   越來越凍喇   唔瞓唔得呢   哈哈 ~

燒汁辣醬焗雞膇 + XO 醬炒洋蔥蝦仁 + 蒜蓉菜心 ( 18-FEB-2022 )

( 18-FEB-2022  FRI )

今朝里奧大人喺屋企食早餐   不過我都仍然照瞓到 8 點 15 分   嘻嘻 ~

天氣凍咗又落毛毛雨   真係比較麻煩 ~

早餐食奶醬多   唔想諗呀 ~

我影埋支涼茶   家姐以為我唔舒服呀   無諗過佢會咁諗   哈哈

菇場忙咗陣又可以抖下   咁又繼續投票啦 ~

Lunch Time 出去一田買嘢   之後去買麵包   因為聽日後日都唔會出街   我都無諗過可以日日食麵包   越嚟越似家姐    哈哈   最後買埋炒麵都即番菇場喇 ~

又比工人玩   哈哈

西瓜叫我 3 點 50 分可以放工   實在太好喇 ~

咁即去街市買餸   番到屋企都已經 5 點 ~

里奧大人無咁早放工   咁又大清潔屋企啦   咁聽日可以做自己嘢 ~

之後 Whatsapp   隻手係咁震真係勁驚囉   好驚甲狀腺翻發   咁伸直隻手又無咁震   終於諗起頭先拎得太重呀   所以咪手震囉   哈哈 ~

里奧大人番到屋企都要等陣先食   咁叫佢沖埋涼先 lu ~

6 點 45 分左右開餐   呢個時間最好   唔遲又唔早 ~

是日晚餐 - 燒汁辣醬焗雞膇 + XO 醬炒洋蔥蝦仁 + 蒜蓉菜心

燒汁辣醬焗雞膇 - 估唔到 3 隻雞膇都幾多肉   今次味道都唔錯   依家幾乎用哂盒韓國辣椒醬   真係深受韓劇影響   哈哈   因為以前用最多 3 湯匙㗎咋   之後擺到過期就掉囉 ~

XO 醬炒洋蔥蝦仁 - 泰式咖哩過咗期   咁即轉 XO 醬炒啦   下次都唔買呢啲白對蝦   我唔係咁鍾意啲口感 ~ 

蒜蓉菜心 - 價錢比平時貴幾蚊 1 斤   咁我都接受到嘅   所以買 1 斤喇 ~

洗埋碗就大清潔廁所   之後沖涼休息了 ~

瞓得好舒服咁喎

今晚睇 Youtube 睇到 12 點先瞓   呢排啲作息時間唔太理想   哈哈 ~