茄汁煎蝦碌 + 蒜蓉蒸金菇 + 芫茜皮蛋魚片湯 ( 31-MAR-2020 )

( 31-MAR-2020  TUE )

呢兩日又涼咗   之前先問里奧大人收得冬天衫未   又同阿齋講話開始要着短袖   點知呢兩日要着番長袖 ~

早餐食奶醬多   無咩胃口咁 ~

菇場忙下停下   好快到 Lunch Time 了 ~

今日唔出去喇   想清埋啲黑芝麻五谷粉   食完又可以 Load 相 ~

又要做長命 Report   平時無咁早家嘛 ~

西瓜話疫情持續擴大   所以聽日開始放 4 點   之後再派口罩比我哋   所以真係好感激老闆 ~

4 點半放工   去街市買餸   買完即番屋企   好在落毛毛雨咋   可以唔駛開遮 ~

番屋企睇下買咗咩   原來只買咗兩晚餸   咁都好重下   仲以為自己買咗四晚添   哈哈   不過可能買咗四隻蕃薯   呢啲都好重呢 ~

預備好哂都已經 6 點   拖埋地諗住抖下   但里奧大人 6 點幾放咗工   又要開始煮嘢喇 ~

是日晚餐 - 茄汁煎蝦碌 + 蒜蓉蒸金菇 + 芫茜皮蛋魚片湯

茄汁煎蝦碌 - 買咗 $40   寫明海蝦   但應該唔係   不過想食就買啦 ~

蒜蓉蒸金菇 - 見到 $9/3 包即買   就咁豉油蒜蓉已經好好味   可以當一個餸   哈哈 ~

芫茜皮蛋魚片湯 - 里奧大人話熱氣   咁滾呢個下火湯啦   快靚正 ~

洗埋碗又已經 8 點半   大清潔廁所就即沖涼休息 ~

里奧大人幫手熨兩機衫   我就可以睇 "無心法師" 喇 ~

睇到 11 點幾都瞓   今晚有啲攰 ~

菠蘿咕嚕肉 + 梅菜扣排骨 (外賣) @ 屋企 ( 30-MAR-2020 )

菠蘿咕嚕肉 + 梅菜扣排骨



( 30-MAR-2020  MON )

今朝又落雨   咁都好  沖散下啲菌 ~

早餐食芝腿治烘底   想食鹹嘢 ~

菇場忙咗陣就 Hea 過   都好呀   每月一有啲攰   嘻嘻 ~

Lunch 食杯麵   因為懶得落街   同埋我超級勁凍呀   一定要食啲熱嘢 ~

咁我食粒 Panadol 打底   其實我已經長袖 1 piece + Legging   再加條披肩   但都超級凍   之後同溫總講啦   佢都話今日菇場冷氣好明顯比人校低咗   咁我見 8 卦行去校冷氣   問佢係咪校到 25 度 ?!   佢話係呀   佢覺得好鬼凍呀   我話我都覺得今日超級勁凍呀   佢話佢以為自己病   我話我都以為係自己病呀   都唔知邊鬼個校到冷氣咁鬼凍 ~

4 點半準時放工   此地不宜久留   實在太太太太太太凍喇 ~

番到屋企抖陣   6 點左右去買外賣 ~

食完就沖涼   之後開機洗衫 ~

今晚唔做家務唔熨衫   留力聽晚一次過做   因為好想抖下呀 ~

9 點幾家姐又 Video Call   不過 Berry 依家完全唔理我喇   叫極都無反應   嗚嗚   傷心傷心   但工人話佢攏哂尾喎 ~

傾咗 15 分鐘   Berry 姐想瞓   所以收線喇   哈哈哈哈 ~

睇 "無心法師" 睇到 11 點幾   係時候要瞓覺喇 ~

菜甫肉鬆煎蛋 + 滑蛋粟米魚塊 (外賣) @ 屋企 ( 29-MAR-2020 )

菜甫肉鬆煎蛋 + 滑蛋粟米魚塊

( 29-MAR-2020  SUN )

今朝里奧大人番晏啲   咁都好   唔駛咁早起身出門口 ~

我就瞓到 10 點   沖埋涼就去食早餐喇 ~

食完都即番屋企   抖陣就睇預苦期靈修集   睇到 12 點半   諗住出發去深水埗   但里奧大人公司又有突發事要搞   咁我去佢公司等佢喇 ~

差唔多 1 點幾就走人   之後搭車去深水埗 ~

我同佢講話餐廳依家要量血壓喇   之後佢反應幾快話咁好呀   有無量埋心跳呀 ?!?!   哈哈   講真   我習慣講量血壓嘛   量體溫好少講   多數講探熱嘛   哈哈 ~

出到去都 2 點   諗住去蘇媽蘇媽   但有成十個人等位   依家又有限制人數   所以都唔等喇 ~

咁周圍行陣先   見到間冰室無咩人就入去食喇   因為都差唔多 2 點半呢 ~

食完就幫公司買電話卡   買完之後搭車番屋企喇 ~

已經 4 點   有啲反胃   因為頭先坐車睇手機 ~

想瞓又瞓唔到   咁睇 Youtube 啦   里奧大人就做公司嘢 ~

仍然有啲反胃   所以我沖個熱水涼先   又好啲咁喎 ~

里奧大人 7 點左右去買外賣   今晚沖完涼先食飯   真係好鬼正呢 ~

食完就睇 "無心法師"   今晚唔做家務喇 ~

無啦啦好攰呢   所以 10 點幾瞓 lu ~

泰亞萊泰式美食 @ 紅磡 ( 28-MAR-2020 )

香草辣椒肉碎煎蛋飯 ($50) - 好正宗泰菜味道   因為好辣   哈哈   呢個肉碎真係好味道

咸脆豬肉炒芥蘭 ($68)

涼粉冰 ($15)

( 28-MAR-2020  SAT )

今朝同里奧大人 10 點唔夠就自然醒   沖埋涼就去食早餐 ~

食完就去超市買嘢   之後就番屋企 lu ~

里奧大人公司有 Urgent 嘢搞   所以 1 點要番到公司 ~

咁我就抹嘢啦   搞掂哂又沖多次涼   開埋機洗衫就唔再做家務喇 ~

之後安心睇 Youtube   食埋下午茶就抖下 ~

兩個蘋果 + 兩塊芝士   因為好唔想見到啲蘋果   所以食兩個   但都仲剩番一個囉   無理由一次次食三個家嘛   飽死都似   哈哈

差唔多 7 點出發接里奧大人放工   食完都番屋企喇 ~

沖埋涼又睇陣 "無心法師"   差唔多 12 點先瞓 ~

黑椒豬扒扁意粉 + 魚腥草蜜棗茶 ( 27-MAR-2020 )

依家開始清冰格嘅食物   見有五粒魚肉燒賣就清埋去   唔想又見到一袋嘢

尋晚剩咗嘅南瓜餅   今晚食埋去喇

( 27-MAR-2020  FRI )

又嚟天陰陰咁喎   但好鬼熱呀   不過今晚又話會落雨   即係又會凍番呢   大家真係要小心身體呢 ~

早餐食奶醬多   無咩胃口 ~

菇場忙下停下   聽日唔駛番工   感謝主 ~

因為菇場好鬼靜   所以我多數叫里奧大人同家姐搵我就 Whatsapp 先   我會用菇場電話打番比佢哋   我用手機講呢   佢哋覺得好細聲 ~

今朝又係咁   里奧大人叫我 Call 佢   傾完就到家姐叫我 Call 佢   駛唔駛咁啱呀   佢哋好多時都係差唔多時間搵我   有時直頭同步添呀 ~

家姐話有個細路女好鍾意 Berry   尋晚見到 Berry   直頭電視都唔睇   仲同 Daddy 講話 Berry 重要啲   真係好搞笑 ~

佢哋無養狗   但佢媽咪會買啲狗零食比佢比其他狗仔食   家姐尋晚同佢一齊試我買比 Berry 嘅零食   話幾好味喎   因為我都會試狗嘅零食   其實得個香味㗎咋   根本食落係無味   之後個細路女話好驚自己會食哂狗仔啲零食呀   家姐話唔好呀   係試下㗎咋   唔係咁樣當零食食呢 ~

咁家姐又比咗 2 包狗零食比佢   等佢可以比狗仔食   佢勁開心   之後問家姐會唔會比 Berry 比人 ?!   家姐話梗係唔會啦   零食可以買得番    但 Berry 唔可以買番家嘛   之後佢話咁又係   細路諗啲嘢真係好單純   但我哋覺得好搞笑   哈哈 ~

Lunch Time 出去買豬腰芒   里奧大人好鍾意食   點都要買啦   雖然屋企仲有幾個   之後買埋牛腩河番菇場食   已經 1 點喇   食到出汗 ~

扣底都好多   但驚話叫一半又好鬼少唔夠食   哈哈

依家戴口罩帶到皮膚都差埋   同埋好多鼻屎咁呀   希望快啲唔駛戴口罩啦 ~

仍然忙下停下   4 點半可以準時放工 ~

番到屋企即上網睇 Youtube 教魚腥草嘅煲法   之後即做嘢   但其實洗耐過煲囉 ~

之後里奧大人問做咩要飲魚腥草 ?!   我話有消炎作用   之後神色凝重咁問我係咪唔舒服 ?!   我話唔係呀   只係想買來煲來下   見 $10/半斤就買囉   其實 1 斤只係 $15   但我想試下味道先   所以買半斤試下   我加咗五粒蜜棗煲 20 分鐘   甜甜哋幾好味喎 ~

因為唔太餓   所以 7 點先開飯 ~

是日晚餐 - 黑椒豬扒扁意粉

黑椒豬扒扁意粉 - 今次整得好好味呀   以前只會買現成醬   但其實好多時啲味道好怪   所以上網睇黑椒汁煮法   原來係非常簡單   最緊要係好味嘛 ~

洗埋碗再煎南瓜餅   食完就大清潔廚房 ~

9 點先沖涼   之後開機洗衫 ~

聽日唔駛番工   咁睇 "無心法師 1"   不過都係睇到 11 點幾都瞓呢 ~

燒汁豬扒配冬蔭功扁意粉 + 芝士腸 + 南瓜煎軟餅 ( 26-MAR-2020 )

( 26-MAR-2020  THU )

今朝 6 點起身去廁所   之後我瞓番啦 ~

我同里奧大人講話佢鬧鐘響嘅時候   我以為自己無瞓過呀   因為一醒已經係天光   但其實已經瞓咗個半鐘   佢話我精神分裂喎   佢好鍾意咁話我㗎   因為前一秒話唔食   後一秒就即話食   哈哈 ~

天陰陰又落毛毛雨   好在夠精神   唔係堅無 Mood ~

早餐食芝腿治烘底   好想食鹹嘢 ~

菇場忙呀   時間過得好快 ~

Lunch 食黑芝麻五谷粉   都懶得出去   阿齋同我傾偈   話其實公司都好好   放早一個鐘   星期六又唔駛番   但唔扣我哋假喎   因為佢朋友無得放早   佢話阿爽話喺公司食飯好辛苦   佢話其實公司都係為妳好啫   同埋都係叫妳呢個月   又唔係一世   大家相就下啦   咁我同佢又唔覺得喺公司食嘢好辛苦囉   一路食一路上網都不知幾爽   同埋其實對住唔識嘅人食飯   都周身唔自在   食早餐都可以食快啲   但 Lunch 好難食得快家嘛 ~

仍然忙   感恩放工前做哂   可以準時走 ~

溫總話我依家無咁怕凍   收番哂啲衫   哈哈   因為我之前張櫈有兩張大披肩   個個見到都話誇張   但依家到我隔離個肥仔就日日着厚褸同戴帽   可想而知我個位係幾咁凍呢   我果時覺得啲水好快凍添呀   我仲係 100 度熱水倒出來喎 ~

買埋方包比里奧大人就番屋企   抖陣就預備晚餐 ~

里奧大人 6 點幾放工   再去買電話卡先番嚟   番到嚟就可以開餐喇 ~

是日晚餐 - 燒汁豬扒配冬蔭功扁意粉 + 芝士腸 + 南瓜煎軟餅

燒汁豬扒配冬蔭功扁意粉 - 之前買咗好多冬蔭功醬料   但放湯呢   味道好酸   唔係咁鍾意   所以試下炒扁意粉   估唔到咁樣仲好味喎   我炒到好乾身   所以無汁都好鬼辣   哈哈 ~

芝士腸 - 估唔到已經過咗期幾日   拿拿聲食埋去   一次食咁多   之後堅唔想再食 ~

南瓜煎軟餅 - 第一次整㗎   都算成功   口感煙韌   但味道偏啖   最搞笑里奧大人問啲南瓜餅喺邊度買 ?!?!   我話我自己整㗎   買番嚟唔會咁肉酸啦   佢話唔係呀   都好靚   哈哈   佢話口感啱佢   仍都話可以甜啲   咁我仲剩咗啲南瓜蓉   聽晚加啲糖再煎過   唔好浪費 ~

洗埋碗都已經 9 點   沖埋涼再開機洗衫 ~

之前比 2 張大枱布比里奧大人拎番公司   估唔到反而佢同事阿妹勁鍾意   咁即比佢啦   衰里奧大人又話我最鍾意買買買   張枱布根本無用過   之後佢同事話咁叫妳老婆買多啲嘢喇   呢下搞笑   哈哈 ~

睇下 Youtube 又傾下偈   里奧大人話已經 11 點幾喇   真係估唔到咁夜喎   所以即刻瞓覺喇 ~

冬菇栗子燜雞翼 + 蕃茄南瓜粟米洋甘筍洋蔥湯 ( 25-MAR-2020 )

( 25-MAR-2020  WED )

呢兩朝都好熱   開始着短袖喇 ~

今朝去麥記食早餐   有啲悶但又唔想食多士 ~

菇場唔忙   可以做自己嘢 ~

Lunch Time 出去一田買嘢   之後買菠蘿叉燒包番菇場食   成日話人來來去去都食嗰啲   原來自己都係咁   所以我依家都唔敢亂話人喇 ~

菇場仍然唔忙   準時 4 點半放工 ~

去街市買湯料   之後即番屋企喇   好鬼重 ~

番到屋企換好哂衫就預備滾湯   太多嘢要切粒   切極唔完咁   哈哈 ~

搞掂哂就抖陣   里奧大人 6 點半放工   7 點 15 分可以開餐 ~

是日晚餐 - 冬菇栗子燜雞翼 + 蕃茄南瓜粟米甘筍洋蔥湯

冬菇栗子燜雞翼 - 尋晚燜定㗎   所以今晚翻熱就得   但蒸完嘅時候好多汁   唔似燜餸   所以再落鑊煮   收咗啲汁   咁樣就似燜餸喇   嘻嘻   我覺得勁好味呀   我好少讚自己㗎   始終我唔係咁識煮嘢食呢 ~

蕃茄南瓜粟米甘筍洋蔥湯 - 五個大蕃茄 + 半個南瓜 + 一條粟米 + 一個洋蔥 + 一條甘筍   切到手軟   玫瑰鍋都放唔哂啲料   剩咗 2/3 南瓜   留番聽晚煮   好在唔係最後落甘筍   唔係就唔知點煮好喇   哈哈 ~

洗埋碗再大清潔廚房   原來已經 8 點半   里奧大人又話好攰同埋唔係咁舒服咁   我有啲擔心   所以唔去徑步喇 ~

沖埋涼就休息   今晚我 10 點 45 分都自己瞓先喇 ~

豆豉鯪魚炒油麥菜 & 苦瓜 ( 24-MAR-2020 )

呢餐青 BB   咁睇以為自己食得好健康   哈哈

( 24-MAR-2020  TUE )

尋晚熱醒咗兩次   條頸出哂汗   但又唔想起身沖涼囉   所以瞓得唔係咁好   仲諗住開冷氣瞓得好啲添 ~

問里奧大人尋晚熱唔熱 ?!   佢都話熱   可能我哋蓋咗 2 張被呀   我都無諗過添   今晚肯定要拎走一張被   我唔想再熱醒呀 ~

早咗起身   順便浸冬菇   今朝早咗 10 分鐘搞掂   所以同里奧大人一齊食早餐 ~

我同里奧大人講話好想唔食嘢呀   佢話可以呀 (知我老吹)   之後我話擔心唔食嘢會暈㗎喎   佢話睇我身型   好肯定兩個星期唔食嘢唔飲水都可以支持到    哈哈哈哈   衰人 ~

尋晚我話想改名叫吳秀德   佢話梗係要啦   我呢啲樣真係唔肥就唔好睇㗎   不過咁   呢排天氣好都會徑下步   真係唔可以太懶 ~

食完早餐就番工喇   菇場忙下停下   我估呢半年西瓜都應該唔上大陸㗎喇   成日碌來碌去   我上網真係好唔方便   所以我鍾意超級勁忙   咁個心就只會掛住做嘢呢   哈哈 ~

Lunch 食黑芝麻五谷粉   又係打孖上   我超勁唔想見到佢   但仲剩 4 包   今星期一定要清埋去 ~

菇場忙咗陣就可以抖   4 點半又準時放工喇 ~

去超市買嘢   再買個苦瓜就番屋企   咁就已經 5 點半了 ~

今晚里奧大人 7 點先放工   見有時間就燜冬菇雞翼   咁聽晚就有餸喇 ~

搞掂哂都已經 6 點 45 分   係時候預備晚餐喇   咁里奧大人 7 點幾番到屋企可以即刻有飯食呢 ~

是日晚餐 - 豆豉鯪魚炒油麥菜 & 苦瓜

豆豉鯪魚炒油麥菜 & 苦瓜 - 想煮好耐㗎喇   但嗰排唔想食油麥菜   所以唔想煮囉   今晚再買多個細細嘅苦瓜   原來要 $8   不過依家買咩都貴㗎喇   呢兩個餸都好味   以前起碼食 4 大棵油麥菜   所以炒完個菜都好攰下   因為太多菜要分開落鑊   依家食少好多   即係時間用少好多   所以煮起上嚟唔會攰   哈哈 ~ 

食完就洗碗   再大清潔廚房   開埋機洗衫就沖涼喇 ~

呢兩晚瞓得唔好   今晚諗住 10 點 45 分瞓啦   里奧大人 10 點半已經瞓添呀   點知佢一上床   手機就響   咁已經唔聽   但又再打嚟   咁里奧大人就聽啦   係公司同事嚟嘅   一傾就傾咗 35 分鐘   搞到我都無得早瞓呀   哈哈 ~

黑椒牛扒 + 翡翠苗 ( 23-MAR-2020 )

( 23-MAR-2020  MON )

尋晚瞓到半夜熱醒   感恩之後都瞓得番 ~

早餐食芝腿治烘底   想食飽啲 ~

菇場忙下停下   咁就好喇 ~

Lunch Time 去入票   之後再買炒麵番菇場食   西瓜喺群組呼籲各同事最好叫帶飯或者叫外賣喎   食店係高度傳染地方   不過就算係咪痠情   其實買番嚟食都好㗎   感覺乾淨啲   同埋唔駛對住唔識嘅人食嘢   哈哈 ~

仍然忙下停下   準時 4 點半放工 ~

去官塘拎淘寶   咁里奧大人 4 點半開 Conf Call   我就去一田行下喇   買定啲魚肉燒賣同餃子比佢 WFH 食呢 ~

今次最大收穫係買咗雪糕   都係買比里奧大人食㗎 ~

里奧大人開完會 5 點 40 分開完會   我啱啱番到屋企   之後佢話 8 點要再開 Conf Call   咁我要即刻預備晚餐喇   因為煮得嚟都要 6 點半先開餐呢 ~

$65/盒   我有 95 折仲抵   買三盒送兩盒細

是日晚餐 - 黑椒牛扒 + 翡翠苗

黑椒牛扒 - 尋日喺青林買㗎   因為星期一比較攰   但又想煮   所以買呢啲餸就最好   起碼唔駛醃   又好味喎   哈哈 ~

翡翠苗 - $12/2盒   幾抵呀   最緊要係快熟   今晚就咁淥熟就算喇 ~

食完都 7 點 10 分   洗埋碗再大清潔廁所   搞掂哂就沖涼   之後做埋 Mask 就熨衫 ~

里奧大人 9 點幾傾完   即刻拻個柑比佢食 ~

等佢食完就叫佢熨自己嘅褲喇   因為我開始攰 ~

屋企冰格又幾乎放滿哂   所以叫里奧大人食埋啲雪糕   佢不知幾開心   哈哈 ~

里奧大人 10 點 45 分都瞓   我就 11 點先瞓   想睇多陣 Youtube 呢 ~ 

蒜蓉豬扒 + 燒汁年糕油麥菜 + 香辣海鮮意粉 ( 22-MAR-2020 )

( 22-MAR-2020  SUN )

今朝同里奧大人一齊 6 點幾起身   我同里奧大人講話好似去旅行咁   哈哈 ~

食埋早餐就去佢公司幫手   所以又唔覺得眼瞓 ~

頂爺好搞笑   見到我幫手   即刻大大聲講話里奧大人   男人背後一定有個成功嘅女人   笑死 ~

我崇拜之後就去姑奶屋企拎嘢   唔經唔覺同佢傾咗一個鐘   係時候就走人喇  ~

去街市買菜   再去青林買醃好咗嘅豬扒牛扒   之後即番屋企喇   好鬼熱 ~

原來只係 1 點   我仲覺得做咗好多嘢   以為 2 點添 ~

里奧大人 2 點半先放工   等佢番嚟再同佢一齊食下午茶 ~

食完即番屋企   我叫佢沖涼瞓下啦   雖然都已經 5 點   但瞓到咪瞓囉 ~

我都沖個涼先   因為我要熨兩機衫 ~

搞掂哂就睇預苦期靈修集   睇到 6 點左右   里奧大人都起身   不過大家都唔餓   我話 7 點半先開餐 ~

是日晚餐 - 蒜蓉豬扒 + 燒汁年糕油麥菜 + 香辣海鮮意粉

蒜蓉豬扒 - 青林買嘅豬扒真係好味道   兩塊要接近 $25   不過懶得醃   又想喺屋企食   所以買啦 ~

燒汁年糕油麥菜 - 想清冰格嘅嘢   所以煮埋啲年糕   里奧大人覺得呢味餸好奇怪   問我年糕係咪過期 ?!   咁有時叫佢搽 Cream 啦   佢又問係咪過期 ?!   不過又唔怪得佢咁問   哈哈   試過好好人咁幫佢敷 Mask   佢好開心呀   但我話因為就嚟過期   所以要佢幫手敷埋去   真係自此之後   我叫佢用每一樣嘢   佢都會問係咪過期   哈哈 ~

香辣海鮮意粉 - 尋晚食剩   如果我自己食   我會直接放入焗爐   不過焗完就好鬼乾   但因為係比里奧大人食   所以我就好比心機煮㗎   期間又會加啲水   起碼唔會煮到啲意粉乾爭爭嘛 ~

洗埋碗都 9 點   開埋機洗衫就沖涼   之後休息喇 ~

今晚里奧大人陪我睇 "無心法師"   但我 10 點半都要瞓覺   因為今朝實在太早起身   哈哈 ~

脆味批 CHUBBY'S PIZZA (外賣) @ 屋企 ( 21-MAR-2020 )

大胃 A 餐 ($175) - 環球世界普通批 (薄批) & 香辣海鮮意粉 & 炸雞 3 件 & 蒜蓉包
肉醬焗薯 (+$36)

( 21-MAR-2020  SAT )

今朝里奧大人番工之後   我都瞓到 10 點半 ~

一開手機   里奧大人叫我 Call 佢   家姐工人又有 Whatsapp 比我   打比里奧大人又無人聽   都估佢忙緊   聽家姐工人口訊   原來係家姐   原來佢跌爛咗部手機呀   所以即打番比佢啦 ~

其實都啱啱起身   我都係聽啲唔聽啲咁   佢話晏啲拎手機去整   咁我話好吖 ~

不過我要幫手搵佢同事   因為佢地之後要 WFH   所以要 Set-up 嘢   傾咗半個鐘   我先可以刷牙洗臉整早餐 ~

咁晏起身   唔食超米喇   一陣 2 點實食唔落嘢   咁煮 4 條芝士腸 + 2 隻雞蛋就搞掂 ~

淥完腸再淥雞蛋   之後開始個人醒哂   諗諗下家姐無手機喺身   出去整嘢都煩啦   有咩事又搵唔到我哋   咁我難得又 Off   所以話陪佢去整   最搞笑喺我叫佢出到旺角就打比我   我再教佢點去朗豪坊   家姐話無手機打比我喎    哈哈哈哈   完全唔記得添 ~

家姐叫工人借電話比佢   佢只係會接我嘅電話   唔會睇佢啲嘢   原來家姐工人電話有 Password 㗎   佢都話埋比家姐知   工人都好乖同好好呀 ~

咁食埋條腸就即沖涼喇   因為家姐都差唔多出門口   所以我勁趕呀   同埋留番 2 隻雞蛋一陣坐車食 ~

咬完一啖即封實個袋   但又唔可以食得快   雞蛋黃好乾   我驚哽死   哈哈

咁我同家姐嘅巴士站係附近   咁家姐早過我到   佢話如果好耐仲未見到我   已經諗定叫萬寧職員打比我   但就唔會掂人哋手機   因為呢個時勢   人哋都會唔比妳掂嘛   佢話叫人幫忙通知我   話佢已經到咗就得㗎喇   笑死我   我話人哋手機打比我   之後仲要聽到妳把聲   咪仲更加嚇死我囉   哈哈哈哈 ~

12 點半左右到   預咗要等   終於 1 點 20 分到我哋喇   咁啱里奧大人都到咗   職員話屏幕爆咗   要收 $850 (其中包括 $150 維修)   里奧大人問保養期內都要 ?!   職員話係人為喎   咁 $850 都 OK 㗎   因為出去整都要 $800   但如果部機有嘢要換   就會再報價咁呢 ~

咁家姐問里奧大人做咩唔 Whatsapp 打番比佢 ?!   里奧大人話 Whatsapp 見到係印尼電話   所以即 Block   家姐就係話知道會 Show 印尼電話號碼   所以都唔打比佢   用 Whatsapp 語音比佢   但點知都係唔聽   哈哈哈哈 ~

家姐話有事搵我哋就慘   因為我未起身   肯定無開電話   咁佢打比糟糟 3 次   佢又聽唔到   之後佢再打比家姐   又搵唔到佢   家姐話糟糟同佢講   以為佢死咗呀   黐鬼線   哈哈哈哈   咁又係   無理由工人會無啦啦打比佢家嘛 ~

不過咁喎   我同家姐講話今次係好感恩先啱   難得我今日 Off   更加難得係里奧大人番早   如果番夜起碼要 9 點先可以整到   之後家姐都話真係好感恩   哈哈 ~

1 點 45 分去南記食 Lunch   食完即番屋企整電話   因為次次過 Whatsapp 都好鬼耐 ~

春卷米線 ($38) & 凍豆漿 ($12) & 凍奶茶 ($15)

招牌辣豬肉+春卷米線 (酸辣 $47) + 招牌辣豬肉米線 ($38)

我屋企有 2 部後備手機   咁家姐之前部手機又喺我屋企   不過 Set-up 唔到啲嘢囉   所以用唔到   要用我哋嗰部 ~

里奧大人同家姐 Set 緊手機   我又睇緊自己手機   突然間有電話響   我哋話係咩嘢聲呀 ?!   因為我哋唔係呢啲鈴聲嘛   但另一部手機又無開   原來係家姐工人手機響   笑鬼死   諗起午夜凶鈴呀 ~

4 點半搞掂哂   咁家姐即 Send 嘢比同事   之後諗住番屋企啦   點知 4 點 40 分收到維修部訊息   話維修已完成   星期一至日可以去拎   我話打比維修部   問依家可唔可以拎啦 ~

里奧大人用自己手機打去維修部   點知咁啱佢電話響   里奧大人仲話都唔係嗰個電話號碼   之後家姐話係有電話搵你呀   呢下好笑呀   哈哈哈哈 ~

感恩可以即刻去拎   所以諗住出埋去食嘢   但里奧大人話想喺屋企做嘢   咁無問題啦   我同家姐出去   因為其實里奧大人今日手機真係響唔停   都唔想阻佢做嘢   同埋唔記得番嚟仲要 Set 番所有嘢去手機度呢 ~

即搭車出去   去到 6 點 50 分   Number 係 C85   而我哋係 C89   所以好快就搞掂 ~

拎完就即搭車番屋企喇   番到去都 7 點半   佢哋即刻整手機喇 ~

今晚唔送家姐搭車   所以我即沖涼   之後再開機洗衫 ~

7 點 45 外賣到   好在之前叫里奧大人落 Order 咋 ~

食完又繼續整手機   9 點 45 分搞掂   家姐都即番屋企 lu ~

睇下 Youtube   又 12 點先瞓 ~