黑椒牛丸出前一丁 + 菜心苗 ( 31-MAR-2019 )

( 31-MAR-2019  SUN )

今朝有事奉   所以又早少少起身   食埋早餐就番教會喇 ~

茶記好多人   咁啱見到弟兄 A 兩公婆   咁我哋搭枱啦   一齊食一齊傾   傾到唔願走   哈哈 ~

崇拜完畢都 1 點   買埋栥飯就番屋企 lu ~

飲埋粉葛湯   咁就當一餐   都唔錯㗎   唔想夜晚先飲   唔係成日去廁所好煩 ~

我好攰呀   所以休息   里奧大人就熨衫   差唔多 4 點佢話瞓陣   之後我都喺梳化瞓着咗   瞓到 5 點   仲瞓得耐過佢   哈哈 ~

抖陣就煮晚餐啦   7 點可以開餐 ~

是日懶餐 - 黑椒牛丸出前一丁 + 菜心苗

黑椒牛丸出前一丁 - 清埋 2 包出前一丁   以為過期 2 星期   但原來係過了 1 個月 ~ 

菜心苗 - 1 斤菜心苗分 3 餐食   好在無爛咋 ~

洗埋碗都 8 點   諗住去徑步   點知一出門口先知落毛毛雨   咁照出去喇   反正有嘢買 ~

沖埋涼就開機洗衫   之後休息 lu ~

食埋甜品再睇陣電視   但其實都 9 點半   我覺得夜食囉   哈哈 ~

沖繩紫薯玄米茶撻 ($21) - 無紫薯味嘅

粒粒芒果千層酥 ($23) - 又係唔好味嘅   以前東海堂蛋糕好好味道㗎噃

11 點唔夠都瞓喇   不過個胃勁頂住   係勁想嘔咁   我估係食得太多大樹菠蘿喇   我狂搽阿婆油   同埋一定唔可以平瞓   咁樣會好啲 ~

聚興樓 @ 官塘 ( 30-MAR-2019 )

麻辣手撕雞飯 - 好味道呀   里奧大人要中辣   我話依家佢辣過我   但佢話覺得我鍾意食辣多啲喎   哈哈

梅菜扣肉飯 - 好味道呀   同埋個白飯口感係軟硬適中   好似絲苗米咁呢

麻辣雞腎 - 份量都唔少喎

( 30-MAR-2019  SAT )

今朝自己食早餐   本來想轉場   但都係懶行   哈哈 ~

菇場唔忙呀   如果唔駛番工就好 lu ~

放工又再去牛下街市買煲湯料   又買咗節瓜同豬腰芒   好重呀   所以都即番屋企喇 ~

2 點幾食 Lunch   之後再去街市買牛大力土伏苓   咁檔主問我煲咩  我話煲粉葛   之後佢話唔夾架   買緊嘢個太太又係咁講   仲問我係咪想煲去濕湯   之後都話咁樣煲係唔夾㗎   我又學到嘢了 ~

炸泡菜餃子 - 都幾好味   我覺得個醋勁正呀

餈飯 - 係我人生當中最難最難最難食嘅餈飯   我一摸嘅時候係軟腍腍   嚇到我即刻放番落碟   唔知點解突然好驚果種感覺囉   好恐怖

番到屋企即煲湯   之後開機洗衫   再執下個文具櫃   星期六喺屋企多數都係執嘢 ~

5 點幾飲湯   差唔多 7 點就出去食飯喇 ~

呢碗粉葛湯好夠味道   所以好開心呀   因為太耐無煲湯   有時會煲到無咩味道咁呢

食完去超市買嘢   之後番屋企 lu ~

今晚叫里奧大人幫我染髮   搞掂哂就即沖涼 ~

休息一陣就睇戲   11 點都瞓喇   呢排好攰 ~

乾燒伊麵 + 菜心苗 ( 29-MAR-2019 )

 

( 29-MAR-2019  FRI )

又 Happy Friday 喇   我覺得好似啱啱先過完 Friday 咋喎 ~

早餐食奶醬多   8 卦終於忍唔住同我食早餐啦   之前佢病   我叫佢同我隔離呀   但朝早都會 Whatsapp 問喺邊食早餐   我去佢就唔去   哈哈   希望佢覆診無事啦 ~

家姐 Send Berry 啲相比我睇   我話佢瞓得咁林   應該無掛住妳啦   哈哈哈哈 ~

捲埋咁瞓真係好得意呀   好想大力索佢   我次次好肉緊咁索佢   佢就會咬我個鼻   有次咬我頭髮添呀

我都係咁瞓㗎喎   所以我成日手痺   哈哈

工人終於近距離影佢   要等佢瞓咗好耐先可以咁影   如果唔係一行埋去就會醒

菇場忙呀   勁充實 ~

Lunch Time 出去買水餃米   阿姐問一碗夠飽喇 ?!   我話好夠啦   可能覺得食物份量同我身型唔成正比   哈哈 ~

仍然忙   好在 3 點幾搞掂   可以抖下 ~

放工即走   番到屋企都即預備晚餐喇   里奧大人今晚 7 點 15 分左右番到屋企   可以即刻開餐 lu ~

是日懶餐 - 乾燒伊麵 + 菜心苗

乾燒伊麵 - 買咗 3 個大伊麵   老闆娘話出咗水就唔係好多   但我煮完都覺得多囉   下次買 2 個大算喇   加埋 $6 韭王同 1 罐草菇   今次真係好味喎   里奧大人都話好味道 ~   

菜心苗 - 食極都仲有   其實仲有剩 20 條左右   不過見伊麵份量咁多   所以都唔淥埋去喇   依家我食得飽呢   個胃會脹到不得了㗎   無謂令自己咁辛苦啦 ~

搞掂哂又執下廚房   里奧大人話今晚睇戲   所以佢都即刻熨哂 1 機衫 ~

我開埋機洗衫就沖涼   等佢沖埋涼   就可以睇戲喇 ~

睇完都 11 點幾   我要瞓先啦   聽日要番工 ~

黑椒牛丸出前一丁 ( 28-MAR-2019 )

( 28-MAR-2019  THU )

今朝覺得熱呀   就咁長袖裇衫就搞掂   唔駛着外套 ~

之前幾日凍   呢幾日熱   下星期又話得 18 度   真係人都顛 ~

早餐食吞拿魚治烘底   今朝食覺得無咩味咁呀   奇怪 ~

菇場忙下停下   但有啲攰   周身骨痛咁 ~

Lunch Time 行陣   再去 7 仔買 Lunch 番菇場食   但食完之後   個得個胃好脹咁   總之周身唔舒服咁呀   下次都唔好再食喇 ~

仍然忙下停下   放工都即走   今晚里奧大人番學   所以我都去街市買啲急凍肉同丸   再買下其他嘢   咁之後就唔駛成日去街市 lu ~

番到屋企都 6 點半   抖咗 15 分鐘就開機洗衫   之後煮晚餐喇 ~

是日懶餐 - 黑椒牛丸出前一丁

黑椒牛丸出前一丁 - 呢個最簡單方便啦   其實係因為包丁麵過期   所以食埋去啦   哈哈 ~

洗埋碗就晾衫   之後再熨 2 機衫   搞掂就沖涼喇 ~

里奧大人 10 點幾先番到屋企   等佢沖埋涼   又傾陣偈   原來都 11 點幾喇   要瞓覺喇 ~

梅菜蒸豬肉 + 辣菜甫白菜仔 ( 27-MAR-2019 )

( 27-MAR-2019  WED )

呢排真係半夜醒一次   同埋 7 點左右就起身   但感恩起身都精神   唔係都幾慘啦   哈哈 ~

早餐食芝腿治   突然間好想食芝士呀 ~

菇場唔忙   繼續 Load 相寫 Blog   其實對眼仲攰   哈哈 ~

Lunch Time 出去行陣   之後再買魚片頭河番菇場食 ~

仍然唔忙   所以放工可以即走喇 ~

去埋街市買餸就番屋企   醃好哂嘢就拖地   今晚里奧大人 7 點 15 分先番到屋企   放低個袋就可以開飯呢 ~

是日懶餐 - 梅菜蒸豬肉 + 辣菜甫白菜仔

梅菜蒸豬肉 - 唔想炒豬肉   因為好唔想大清潔廚房   所以就整梅菜蒸豬肉   可惜買唔到梅頭   只買到唔知咩瘦肉   比較 "鞋" 囉 ~    

辣菜甫白菜仔 - 我覺得落幾粒辣菜甫已經好夠味   因為都幾辣   哈哈 ~

洗埋碗就去超市買嘢   再幫家姐去萬寧買沐浴露就番屋企   當散步啦 ~

沖埋涼就休息   今晚家姐同 2 個同事去韓國   我都幾擔心   話哂佢好少一個人同同事去旅行嘛 ~

好攰呀   所以今晚我 10 點半都瞓先喇 ~

冬菇臘腸蒸排骨 + 菜心 ( 26-MAR-2019 )

( 26-MAR-2019  TUE )

今朝 7 點都醒咗   但懶床到 7 點半先起身   第一件事係拎冬菇出來浸   咁今晚就可以食喇 ~

早餐食腿蛋治   間唔中食一次真係覺得幾好味   哈哈 ~

菇場忙呀   好快又到 Lunch Time ~

今日又食牛筋丸河   呢排鍾意食河粉   肥死呀   哈哈 ~

仍然忙呀   終於清哂啲煩嘢   實在太開心了 ~

放工去街市買餸   之後都即番屋企 lu ~

里奧大人搭快車番屋企   所以 7 點唔夠都番到嚟   可以即開飯喇 ~

是日懶餐 - 冬菇臘腸蒸排骨 + 菜心

冬菇臘腸蒸排骨 - 呢兩星期真係好鬼攰   唔想諗煮咩   但又想食住家飯   咁蒸排骨就最好啦 ~ 

菜心 - 依家對菜心又 OK 番喎   食呢啲正氣菜係好啲嘅 ~

其實今日有啲暈   所以食完飯抖陣先洗碗 ~

里奧大人去徑步   我洗完碗就抹嘢   之後開機洗衫   沖埋涼就休息 ~

食埋生果  睇多陣電視就靈修   今晚靈修 10 分鐘咋   個人好攰   讀咩都唔入腦咁 ~

11 點瞓覺   希望呢排都係呢個時間瞓啦 ~

肉餅哥 @ 官塘 ( 25-MAR-2019 )

椒鹽煎肉餅 ($49) 配菜飯 (+$3) - 無之前咁好味了

惹味魚香茄子煲 ($58) - 呢個真係好惹味呀



( 25-MAR-2019  MON )

一起身已經 Feel 到天氣係潮潮濕濕了   天色又濛濛喎   感恩都精神   唔係就真係唔想起身㗎喇   哈哈 ~

早餐食奶醬多   今朝真係無咩胃口 ~

菇場忙下停下   但個肚有啲赤赤哋痛   最後決定食止痛藥   因為成日扯住個肚   個人好攰   唔想咁囉 ~

Lunch Time 都無咩胃口   飲咗包豆奶同食少少 Flakes 就算  lu ~

終於精神番哂   之後又忙喎   真係好在食咗藥咋   哈哈 ~

放工都走喇   今晚唔煮 lu   精神狀態不佳也 ~

里奧大人 6 點 45 分都番到屋企   咁可以去食飯 lu ~

食完行陣就番屋企   抖陣就大清潔廁所   之後沖涼休息喇 ~

里奧大人熨衫   我話今晚咩都唔想做   好攰呀 ~

佢 10 點 15 分就瞓覺   我就 10 點 45 分先瞓呢 ~   

短宜 + 豆漿大王 @ 九龍灣 ( 24-MAR-2019 )

五香牛肉麵 - 好想食豆板醬   所以就食湯麵

上海排骨酸辣麵 - 里奧大人都唔飲酸辣湯   其實下次同佢 Share 仲好   我可以飲哂啲湯

招牌正宗上海栥飯 - 份量越來越少



酥炸雲吞 - 好想食   但食完 1 隻已經好飽   好後悔叫黎食呀   哈哈

( 24-MAR-2019  SUN )

今朝 7 點 15 分起身 lu   瞓得都 OK   只係間唔中有啲熱咁   因為張被實在太暖喇   哈哈 ~

Check-out 完就即出發去食早餐   上次有弟兄姊妹都有飲 Black Coffee   所以今次買多 2 支一齊 Share   佢哋見到支 Black Coffee 仲要寫個極字   以為我好飲得黑咖啡   我話我喺外地   係唔飲有奶類嘅咖啡   怕肚屙囉 ~

早餐遲咗   所以去到聚會地方比較趕   樣樣要快快手 Set-up ~

今日係去兒童牧區幫手   感恩係小朋友都好乖   但玩遊戲贏獎品就有啲失控喇   哈哈 ~

完畢之後又同其他弟兄姊妹傾偈   認識多咗   真係最開心呢 ~

11 點 45 分左右食飯喇   差唔多 1 點就走喇 ~

感恩車程好暢順   3 點左右有個 Break   差唔多 5 點 15 分就到落馬洲   感恩神保守帶領   我哋呢兩日行程非常之順利呢 ~

其實今次都不太在狀態   因為呢排個肚無啦啦有啲赤赤痛   痺住痺住咁呢   咁呢兩日個量又無啦啦多咗   真係估唔到咁樣   所以個人真係好攰   但感恩事奉嘅時候係精神呢 ~

搭車去九龍灣食嘢   食完都番屋企喇 ~

洗埋一機衫就沖涼   之後休息 ~

家姐今日同 Berry 去西貢   佢朋友都帶咗隻黑柴出來   家姐話 Berry 無同佢玩   成日呢埋喎

有無暈車浪呀 ?!

佢今日出咗街玩   今晚應該好好瞓

又心野

好似 BB 樣咁

佢隻衰眼   哈哈   咁樣瞓唔辛苦咩 ?!

家姐話佢隻耳仔好大隻

如果佢咁樣瞓   我實即刻抱佢落我身呢   哈哈

終於番入房即瞓喇   家姐話有時夜番   都會開門拎佢出嚟抱下   但工人話唔知家姐入咗嚟先搞笑   哈哈

里奧大人就熨衫   我真係好攰   個肚仲有啲赤赤哋痛   唔想郁呀 ~

今晚勁喇   10 點 15 分都要瞓覺喇   哈哈 ~

短宣 ( 23-MAR-2019 )

( 23-MAR-2019  SAT ) 

今朝 5 點 50 分起身   搞掂哂就出門口喇 ~

天氣凍咗好多呀   本來想着件薄身長褸   但里奧大人堅持要我着件有帽嘅厚褸   仲要好似氹細路仔咁   係咁話件褸幾咁好幾咁好   哈哈 ~

去到落馬洲只係 7 點 20 分左右   里奧大人就食蛋糕   我就唔食住 lu ~

8 點半已經齊人喺落馬洲過關   所以 9 點已經可以出車喇   感謝神 ~

今次總共有 17 位弟兄姊妹一齊出隊   真係好感恩有機會去另一個地方做服侍 ~

車程非常之暢順   12 點一個 Break   一落車個個都覺得好凍呀   我仲話尋晚仲開緊冷氣添呀 ~

所以個個都買啲熱嘢食   今次我都要買餃子食喇   食完個身會暖啲 ~

鬆一鬆又再上車   1 點唔夠就到聚會地方   實在感恩 ~

我見弟兄 CP 着短袖 Tee   叫佢快啲着番件褸啦   因為真係比香港凍幾度咁   但原來佢以為自己帶咗件厚褸喺背囊   點知原來係無嘅   所以弟兄 MK 就比佢件長袖厚 Tee 佢着啦   佢又係每日要換衫   但咁情況之下   都一定要比 CP 着先啦 ~

我哋個個都估唔到凍得咁緊要   所以我都好感恩里奧大人叫我着番件厚褸呢   哈哈 ~

食完飯就去聚會嘅地方   今次去兒童牧區幫手   呢個真係神嘅安排   因為我成日話去短宣無咩幫到手   咁弟兄 MK 就叫我試下幫佢手   睇住小朋友就可以   我即話好呀   之後 2 月幾佢打比我   再問我係咪幫佢手   哈哈   我話梗係啦   話咗幫就幫嘛   同埋呢個係侍奉   唔係隨便應承呢 ~

兒童牧區本來係 MK 兩公婆負責   但佢老婆今次唔出隊   所以我做呢個崗位就啱啱好   神嘅安排實在太奇妙喇 ~

團契完畢就番酒店休息   之後再番教會食飯   因為傳道人老婆想煮飯比我哋食   佢真係好勁   仲要係 2x人食   每枱 6 餸 1 湯   個個食到好飽   哈哈 ~

食完飯就團契   再玩遊戲同分組祈禱   我為弟兄祈禱   居然緊張到唔記得弟兄姓咩呀   唉 ~

聚會完畢   姊妹又煎年糕同蒸蛋糕比我哋食   食完都已經 10 點幾   所以今晚我都唔同佢地食宵夜喇   實在太飽   哈哈 ~

番到酒店即沖涼   同里奧大人傾陣偈   11 點 15 分都一齊瞓喇 ~

海景粥店茶餐廳 @ 九龍灣 ( 22-MAR-2019 )

炸兩 - 好味呀   因為啲油炸鬼脆卜卜



鹹肉糉 - 突然間好想食

鮮牛粥 - 無諗過咁大碗

( 22-MAR-2019  FRI )

今朝好好瞓喎   里奧大人鬧鐘響咗都唔知   但佢出門口我就醒咗喇   懶多陣床   7 點半先起身 ~

好熱喎   仲要好焗咁   不過好似話聽日又得 17 度   即係降咗 10 度   呢啲天氣真係要好小心身體呢 ~

早餐食奶醬多   食到唔知食咩好 ~

菇場唔太忙   咁就好喇 ~

Lunch Time 出去買牛筋丸米   唔知係咪菇場真係凍得滯   食完成身暖哂好舒服呢 ~

無啦啦勁忙下   做到 5 點 45 分先走人呀 ~

放工去九龍灣等里奧大人陪我食啲嘢   今晚係姊妹友伴週   我就約咗姊妹 TT 同 SF   里奧大人就約唔到弟兄   所以可以同佢姐夫一齊食飯   佢喺澳洲番咗黎   好似留 10 日 ~

差唔多 7 點 20 分都走人喇   因為我 7 點半開始呢 ~

傾到 10 點 15 分呀   要里奧大人等咗我半個鐘   之得唔好叫佢嚟接我啦 ~

番到屋企即沖涼喇   11 點都要瞓   聽朝好早起身呢 ~