Saizeriya ( 薩莉亞意式餐廳 ) @ 紅磡 ( 31-MAR-2023 )

 原味雞翼 4 隻 ($18) - 好入味   唔錯唔錯

香焗芝士意大利雲吞 - 一般啦   想食啲新嘢咁呢

香焗白汁菠菜 ($20) - 我覺得好味呀   但份量真係好少   雖然我知道只係廿蚊雞   哈哈   但以前食過   價錢都係平但份量多嘛   唉

蕃茄煙肉意大利粉 ($30) - 呢個好味   所以又叫喇

莎樂美腸薄餅 ($36) - 我問里奧大人食咩薄餅 ?!   之後我指住呢個話佢鍾意食   頭先意粉又係咁   所以佢都忍唔住笑   話我其實唔駛問佢啦   哈哈哈哈 

( 31-MAR-2023  FRI )

尋晚係咁發夢   個夢係趕住番工   最後唔換衫就番工 ~

之後就唔知去到邊   里奧大人眼濕濕話好唔捨得我   我話可能兩日都見住   下星期放幾日假都見住啦   再有個夢係要跳落一級樓梯   但條樓梯又好高又半空咁   我最驚發呢啲夢 ~

早餐食菠蘿油   突然醒起仲有盒牛油   好想快啲食哂去囉   但其實應該有排食   搵晚整蒜蓉多士   咁樣去牛油好似快啲 ~

菇場 3D   開心開心 ~

阿花又比銀優應援比我喇   佢次次都拎多份比我   諗起真係因為銀優先同佢熟   但其實大家都識咗起碼 10 年   不過佢都係好人嚟嘅   成日笑笑口   同埋唔係講是講非咁呢 ~

望靚嘢係開心啲嘅   哈哈

Lunch Time 雖然落毛毛雨   但忍唔住出去行   成日坐真係好鬼悶 ~

今日食 Flakes + 乳酪   其實想食熱嘢   不過今朝菠蘿油太 Heavy   都係唔食湯米喇 ~

仍然唔忙   同阿花 Whatsapp 到放工 ~

今晚唔煮喇   所以同里奧大人出去食 ~

食完就番屋企抖下   之後番祈禱會 ~

番到屋企就開機洗衫   沖埋涼就休息下 ~

睇多陣 Youtube   今晚 11 點唔夠都瞓了 ~

燒汁炒豬肉片 + 福花 ( 30-MAR-2023 )

( 30-MAR-2023  THU )

雖然尋晚都知道自己有發夢   但都感恩一覺瞓天光呀 ~

早餐仍然食朱古力瑞士卷   依家覺得有啲 Cream 仲好食   口味真係完全唔同哂   哈哈 ~

菇場唔太忙   但因為 3D 可以做自己嘢   咁就開心喇 ~

Lunch Time 都唔出去行 lu   所以食即食烏冬   好耐無食又覺得好好味咁 ~

仍然唔忙呀   又傾偈到放工 ~

放工買埋麵包就番屋企   今晚好慢動作咁   不過其實又唔需要急嘅   又唔係繁複嘅餸   哈哈 ~

是日晚餐 - 燒汁炒豬肉片 + 福花

燒汁炒豬肉片 - 喺 759 買嘅急凍豬肉片   我覺得份量好多   好在依家里奧大人帶飯   唔係又分兩餐煮㗎喇 ~

福花 - 呢度係 $10   我蘸紅油食呀   唔知點解想食辣嘢 ~

洗埋碗就大清潔   之後沖涼休息 ~

睇陣 Youtube 再睇陣聖經   今晚 11 點唔夠都瞓喇 ~ 

茄汁豬扒 + 西蘭花 ( 29-MAR-2023 )

 

( 29-MAR-2023   WED )

尋晚半夜發惡夢   夢見 ASTRO 喺我前面唱歌   之後有個女侍應拎住盤香檳   但佢倒落自己度   我好奇怪就用手機照住佢   佢突然間變咗一條好扁嘅蛇咁   再由床邊滑過嚟   咁啱里奧大人出房門   但對明就慢慢關埋   我大叫救命   我蓋住被   但條蛇係咁喺我心口亂掃   我就叫咗好多壽救命   之後我醒醒哋咁   原來係里奧大人掃我心口問我咩事呀    仲話之前摸我塊臉   我係無反應   所以佢掃我心口平復一下我 ~

有個夢就係我喺酒樓即場換袋   但係趕住去集合   所以拎咗個吉袋   因為唔記得自己換咗袋   又要去酒樓拎番   家姐話比嘢我   叫我自己喺車度拎   仲有個夢係洗床單同按摩   總之係咁發夢啦 ~

里奧大人話我成晚隻手係咁郁   我真係唔知   哈哈 ~

咁我沖綠茶茶包比里奧大人   佢一出嚟就話唔記得叫妳唔好沖茶添   因為要飲飲咖啡   佢話我搞到佢尋晚瞓得好差呀   咁又真係嘅   所以叫佢拎樽咖啡番公司飲呢 ~

菇場今日 3D   又 skype 到 Lunch Time ~

今日去大生買堅果棒   因為想試咗好食就再買比家姐食呢   再行多陣就買腸粉番菇場食喇 ~

Happy Village 有機迷你雜錦堅果棒 ($89)

仍然唔忙   繼續 Skype 到放工   其實有 Skype 真係好好   可以傾偈又可以持續練打字   如果打字可以美手就好啦   哈哈 ~

放工即走   番到屋企都預備晚餐 ~

是日晚餐 - 茄汁豬扒 + 西蘭花

茄汁豬扒 - 我覺得個汁好味   以前唔識煮真係咩工具都買齋   依家雖然都唔係叫識煮   但份量真係唔會跟足   煮到里奧大人鍾意嘅味道就已經好開心㗎喇 ~

西蘭花 - 今晚煮 2 個細嘅西蘭花   真係咬到個口好攰   哈哈 ~

洗埋碗就抖陣   8 點左右就同里奧大人去做運動 ~

其實好攰   但好想郁下   所以只做咗 20 分鐘運動呢 ~

開完機洗衫就沖涼   之後食芝麻糊 ~

睇陣電視同 Youtube   今晚由 10 點半開始睇聖經   但睇到 10 點 45 分咋   因為真係好攰   所以 10 點 50 分都瞓覺喇 ~

台南魯肉飯 + 鹽酥雞肉燥飯 + 甜不辣 + 炸澎湖花枝丸 (外賣) @ 屋企 ( 28-MAR-2023 )

鹽酥雞肉燥飯 ($49) - 鹽酥雞肉都好多   真係好抵食

台南魯肉飯 ($36) - 特登叫呢個飯   咁里奧大人可以帶飯   

甜不辣 (+$9) & 炸澎湖花枝丸 (+$9) - 我最鍾意係呢兩個小食   哈哈

( 28-MAR-2023  TUE )

尋晚半夜發夢大叫   記得係搭 Lift 上 5 樓   但感覺係衝落去   所以好鬼驚係咁大叫   次次發夢大叫都係無咩氣咁叫   要出盡力先出到聲   最驚呢啲感覺 ~

早餐食麥包   今朝要食飽啲   因為頂到起碼 1 點先食飯 ~

菇場唔忙就好喇   始終我下午要準時放工呢 ~

感恩等 10 分鐘有車   12 點半去到家姐屋企了 ~

家姐 WFH 但未收得工   我話唔緊要喎   做嘢要緊嘛   反正都未出門口 ~

發花顛

扮彊屍   哈哈

又咁樣望我呀   衰

摔眼仔

咩事呀佢   哈哈哈哈

又正常番了

鬼祟眼   哈哈

咁我哋出門口   家姐叫工人記得照顧 Berry 女呀   工人即刻話: 睇下佢想唔想我照顧佢囉 ?!   嘩   我聽到 O 咗咀呀   講得真係非常流利   用嘅文法完全正確   哈哈哈哈   因為佢上次話喺屋企等我   佢係講: 我同 Berry 等喺屋企㗎   所以家姐話佢成日駁咀駁舌   哈哈 ~

我話去街街   佢即刻望過嚟

家姐話同我飲茶   我話唔啦   食啲佢想食嘅嘢   所以佢又話食豚肉   佢次次都話食豚肉㗎   所以佢真係好想食囉   咁姐夫又無問題   所以即刻去食啦 ~

上次我同里奧大人話唔食   佢同事又話唔食   如果今次連姐夫都話唔食   咁我同家姐講   妳真係同呢間食店無緣   唔好去食喇 ~

佢最搞笑係話見到張相影得好靚   所以佢覺得好好食好想食   佢影比同事都係影豚肉飯張相   可惜仍然吸引唔到去食   呵呵 ~

宮崎和牛 - 鰻魚雙併飯 ($179) - 家姐同我都鍾意食鰻魚   但就唔會食太多   但里奧大人同姐夫唔食   所以今日一定要叫嚟食   哈哈

生薑燒豚肉飯 ($88) - 套餐有味噌湯 + 迷你沙律   最有驚喜係個湯   飲到最後都係熱呀   我真係好怕飲凍嘅湯呢

豚肉份量都多   同埋口感好林   唔係鬆肉粉嘅林喎   呢個都好味道

南蠻炸雞 (3件) (+$25) - 估唔到咁大件   最搞笑我講錯每人 3 件 

日式煎餃 (3 件) (+$22) - 都算大隻   同埋都好味呀

姐夫食完就去整嘢   我咃坐多陣就就搭的士去醫院喇 ~

2 點 35 分左右到醫院   因為家姐係睇 3 點   咁去到都只係睇緊 2 點   但我話我其實都預咗等   有時我睇私家醫生都要等一個鐘啦   反正坐喺度等無問題囉 ~

坐坐下覺得醫院好似有啲焗   因為突然好眼瞓咁   之後我話唔知係咪飯氣攻心   但家姐都話係焗   咁我話要食粒勁薄荷糖   咁比粒佢啦   佢話以為係萬寶路   我大聲笑咗   我知佢係想講萬樂珠   大路   人哋聽到真係以為我哋煙癮咁大   要喺醫院食煙呀   哈哈   最慘係我哋唔係煙民嘛   不過爸爸以前都係食煙   所以一定識萬寶路呢 ~

之後家姐仲搞笑   唔知係咪講開食   佢無啦啦話買咗包咖哩味薯片比工人   其實雖然嗰個係我家姐   但都要讚佢對工人真係好好   食咩飲咩都預埋佢   有時又特登買佢鍾意食嘅飯   我真係睇住工人肥咗好多   但最搞笑佢成日都接受唔到   係都要話家姐肥過佢   真係咩都識講   哈哈 ~

好感恩 3 點 45 分有得睇呀   仲要係食完粒薄荷糖好醒神先入醫生房   因為要記得一陣要問醫生啲咩嘛 ~

Book 埋覆診時間就去拎藥   之後再去 Book 物理治療   最搞笑等 Lift 嘅人全部係醫生護士   我話係咪醫護人員專用㗎 ?!   但唔見有寫   同埋真係得呢邊上去喎   所以都唔理喇 ~

5 點就可以走人   感恩過程都順利呀 ~

咁搭巴士走啦   家姐全程橋住我隻手傾偈   好搞笑   平時唔會咁㗎喎   只係會拖住手行 ~

傾下傾下又好快到旺角   家姐話出開去嘛   如果下次出就係特登出   呢個說法真係非常之好喇   哈哈 ~

佢叫我快啲打比里奧大人   我話佢實會話買   因為佢都想我唔好煮   等隻手抖下 ~

我落車就里奧大人啱啱放工   一齊去買瑞士卷   咁啱有個女仔又係買瑞士卷   里奧大人以為我特登買兩款唔同味   我話唔會啦   食兩日再買好過 ~

換埋衫就開餐   本身諗住做運動   但飲咗啤酒就唔做喇   咁做小清潔   搞掂就沖涼 ~

抖陣就熨 2 機衫   但熨到一半好攰   要叫里奧大人幫手埋尾   哈哈 ~

10 點 15 分睇聖經   睇咗 40 分鐘   差唔多 11 點都瞓 lu ~

蒜蓉豬扒抄麵 + 超甜粟米 ( 27-MAR-2023 )

 

好在今日 load 相   先記起仲有水魷同牛柏葉未食咋 

( 27-MAR-2023  MON )

感恩一覺瞓天光呀   瞓到 7 點半就鬧鐘響 ~

早餐食麥包   今次唔搽花生醬 lu ~

菇場忙呀   咁就好喇   始終星期一比較攰   有嘢做真係比較精神啲㗎 ~

阿花又比車銀優應援比我喇   我最鍾意係 ASTRO 兩張小卡   哈哈

Lunch Time 去韓印紅同一田買嘢   之後買埋炒麵就番菇場喇 ~

忙下停下   之後又做 Filing 又傾下偈   所以好快放工 ~

買埋 8 樽朱古力奶就番屋企   今晚晚餐都簡單   不過都要 7 點先開餐 ~

是日晚餐 - 蒜蓉豬扒抄麵 + 超甜粟米

蒜蓉豬扒抄麵 - 姑奶整咗豬扒比我哋   所以焗熱再切絲炒麵喇 ~

超甜粟米 - 打邊爐食唔哂   咁今晚都要食呢   因為又差唔多變冰了 ~

洗埋碗再抖下   之後同里奧大人去做運動   今晚都係做 25 分鐘 ~

番到屋企都即刻開機洗衫   沖完涼就休息休息 ~

呢幾包喺韓印紅買嘅

香辣豬肉泡菜湯 ($20) / 薯片 ($12/2包)

Bibigo 牛肉海帶湯 ($60/3件)

呢幾包喺一田買嘅

神州小御于即沖味噌湯 ($12.9) / 松鶴年糕醬料 ($13/包)

睇 Youtube 到 10 點 45 分   之後睇聖經   睇半個鐘之後聽陣歌   差唔多 11 點半先瞓呢 ~    

焗三文魚柳 + 雜丸炒讚崎烏冬 + 金菇拚脆肉瓜 ( 26-MAR-2023 )

 ( 26-MAR-2023  SUN )

今朝同里奧大人都早咗起身   所以又出去食早餐喇 ~

我同里奧大人講話一個餐真係好飽   但假期瞓到 9 點幾食又可以食得哂㗎喎 ~

凍啡好飲呀   不過我一定要少甜少奶嘅

都好大塊豬扒

去里奧大人公司坐陣   之後番學 ~

因為我等埋水姑一齊崇拜   肥肶話我做咩行嚟行去   呢句好笑呀   好似覺得我唔識路咁   哈哈 ~

崇拜完畢就去買麵包   里奧大人就啱啱開完會   但仲未走得 ~

2 點先食 Lunch   抖到 3 點就去做運動   今次做 25 分鐘   其實攰攰哋   不過又想郁下 ~

今日 Lunch 都係求其食   大前題係要清哂   哈哈 ~

里奧大人問邊到買 ?!   我話上次食剩咗 1 塊   咪焗埋去囉

尋晚食剩嘅 4 粒水餃

呢度係有 2 塊蜜汁牛肉乾的

蕃薯餅真係好好味   仲有 1 塊就聽晚食

朱古力奶只係 $5/樽咋   里奧大人話好飲   聽日再入貨

沖埋涼就睇下 Youtube   睇到 5 點終於頂唔順喺梳化瞓咗   好在瞓到 5 點半咋 ~

差唔多 6 點幾就煮晚餐   感覺好似一起身就煮   好似咩都未在狀態咁   哈哈哈哈   所以 7 點半先食得呀 ~

是日懶餐 - 焗三文魚柳 + 雜丸炒讚崎烏冬 + 金菇拚脆肉瓜

焗三文魚柳 - 上年底喺百佳買㗎   好似 $99/2 Pack   估唔到咁厚肉又唔腥   但呢個價   應該就算有特價都唔會咁平了 ~

雜丸炒讚崎烏冬 - 里奧大人話好味呀   呢個真係超級易煮呢 ~

金菇拚脆肉瓜 - 最鍾意一鐵熟   呢度係 2 個脆肉瓜 + 1 包韓國金菇   切埋就咁大碟了 ~

洗埋碗就沖涼   之後睇電視 ~

尋日買咗 3 盒桑葚   所以同家姐每人盒半

今晚 10 點 15 分開始睇聖經   我真係覺得自己好懶   又太多藉口   所以今朝決定每日點都要睇聖經呢 ~

睇到 10 點 50 分就瞓喇   其實想靈修一個鐘   但今晚比較攰   下次早啲靈修先 ~