黑椒牛仔骨 + 梅菜蒸鯇魚 ( 31-MAR-2021 )

( 31-MAR-2021  WED )

尋晚半夜 3 點幾去廁所   之後幾難先瞓得番呀 ~

今朝食腿蛋治   想食鹹嘢 ~

菇場忙咗陣   又可以抖了 ~

Lunch Time 出去行下先   不過好鬼熱   所以行 20 分鐘算喇 ~

買粉果腸粉番菇場食   我其實只想食 1 隻粉果   點知佢真係得番最後 1 隻呀   真係好感恩呢 ~

放工即走   去埋大昌買嘢就番屋企 lu ~

雖然里奧大人未咁快放工   但都要預備喇 ~

是日晚餐 - 黑椒牛仔骨 + 梅菜蒸鯇魚

黑椒牛仔骨 - 今次用脆肉瓜墊底嚟焗   因為我懶   唔想分開煮   哈哈 ~

梅菜蒸鯇魚 - 呢嚿魚只係 $33   都厚肉㗎   用梅菜蒸又係好鬼正 ~

洗埋碗就大清潔廚房   之後開機洗衫   沖埋涼就食生果 ~

8 點半開始睇 "Signal"   里奧大人話早啲睇早啲瞓   哈哈 ~

我睇戲好鍾意睇人地啲手指   好多女星啲手指都好長好幼   真係超級勁靚   里奧大人話我瘦嘅時候都手指都係瘦喎   但我話瘦嘅時候都係肥   衰奧話好句好句   好深奧呀   哈哈哈哈 ~

今晚 11 點左右都瞓喇   真係唔好太夜瞓呢 ~

菜肉餃拚水餃拚蝦滑 & 炸魚皮 (外賣) + 自家制麵包 ( 30-MAR-2021 )

( 30-MAR-2021  TUE )

感恩一覺瞓天光呀   尋晚一瞓上床已經瞓得着   好少會咁㗎   哈哈 ~

早餐食芝腿治烘底   好味道 ~

菇場唔忙呀   可以抖下 ~

Lunch Time 出去行陣   差唔多 12 點 15 分先買牛腩河番菇場食呢 ~

里奧大人 Lunch Time 有自家湯飲   真係幸福喇

唔忙又做自己嘢啦   我覺得過咗 2 點半   啲時間好似過得快好多   因為再望個電腦時間已經 4 點   同 8 卦傾多兩傾又已經 5 點 15 分 ~

放工即走   去埋街市買餸就走人   今晚唔會買太多嘢   因為之後放幾日假未必煮飯呢 ~

番到屋企都接近 6 點半   里奧大人無耐都番到嚟   咁叫佢沖涼先喇   未有咁快食得呀 ~

是日懶餐 - 菜肉餃拚水餃拚蝦滑 & 炸魚皮 (外賣) + 自家制麵包

菜肉餃拚水餃拚蝦滑 & 炸魚皮 (外賣) - 我用 1 棵半嘅旺菜做湯底   里奧大人見到話我都好鍾意食呢個菜   哈哈   但個湯真係清清甜甜㗎喎   唔通用菜心做湯底咩   成碗綠色好得人驚嘛   諗緊買唔買炸魚皮好   但最後都係買   不過次次都食唔哂   要留番第晚食呢 ~

自家制麵包 - 里奧大人同事指明比我   咁里奧大人比張相我睇   因為用膠袋包住   我睇得唔清楚   以為有幾個細嘅   咁我叫佢食一個先啦   佢話係咪玩嘢   得一個點可食先喎   哈哈哈哈 ~

洗埋碗就即沖埋喇   抖到 8 點半就睇 "Signal" ~

睇到 11 點都瞓喇   套劇都幾緊張   加上追字幕特別傷神   所以真係睇 1 集   睇完之後就會好快眼瞓   哈哈 ~

金菇牛肉卷 + 雜豆意粉 ( 29-MAR-2021 )

( 29-MAR-2021  MON )

感恩一覺瞓天光呀   但都係攰攰哋咁 ~

今朝食奶醬多   其實完全唔餓   但無理由唔食早餐嘛～

菇場忙咗陣就 Hea 過   星期一真係無咩 Mood 做嘢   哈哈 ~

Lunch Time 都唔出去喇   堅攰   就咁食即食米粉算喇 ~

呢排天氣又熱又濕   真係唔攰都變攰   加上菇場唔忙   有時都要行出去 Pantry 抖下 ~

里奧大人同姑奶飲完茶就剪髮   差唔多 3 點幾又話想食餈飯   我話買囉   反正薄餈唔會話太飽呢   同埋今晚可能晏啲食   食啲嘢打底好啲   我唔駛咁趕   哈哈 ~

放工即走   買埋急凍雜豆就番屋企 lu ~

是日晚餐 - 金菇牛肉卷 + 雜豆意粉

金菇牛肉卷 - 我鍾意食呢個餸㗎   咁之前買咗牛板腱同金菇   今晚食埋去喇 ~

雜豆意粉 - 煮完雜豆再煮意粉   之後加黑椒汁兜兩兜   今次唔整咁辣   怕里奧大人又話熱氣 ~

洗完碗就大清潔廚房   激死我啦   頭先唔小心打爛咗隻 Ikea 碟   所以要即刻開吸塵機吸玻璃碎   搞掂哂再開機洗衫   之後沖涼喇 ~

今日好熱   所以都要開冷氣 ~   

里奧大人 8 點半開會   9 點 15 分左右開完   再整埋少少嘢都已經 9 點 45 分   佢話睇番 "Signal" 第一集   因為真係字幕太長   真係未睇得切已經第二句呀 ~

今晚 11 點都瞓覺   想睇多集都無本事  哈哈 ~

肉醬意粉 + 香辣炸雞 + 西蘭花 ( 28-MAR-2021 )

( 28-MAR-2021  SUN )

今朝里奧大人起身   佢叫我瞓多陣 ~

咁我起身刷牙沖涼   之後佢話 10 分鐘內出發得唔得 ?!   我話唔得呀   太趕 ~

之後佢話巴士時間係 10 分鐘   之後就 20 分鐘   咁我就加快速度   感恩可以 10 分鐘內搞掂   但我同里奧大人講囉   下次唔好咁樣   我一緊張就會搞肚痛嘛 ~

食埋早餐就去里奧大人公司幫手   差唔多 11 點都走喇   我要去聽嘢 ~

里奧大人未放工   咁我都出去行陣   但行咗個大運都要去佢公司等佢放工   因為條街太熱喇 ~

好餓呀   里奧大人 2 點幾先放工   我話要即刻去食嘢喇   哈哈 ~

食完就番屋企   勁想快啲沖涼 ~

我買埋菜先番屋企   里奧大人就開定冷氣等我 ~

今日要大清潔廁所   搞掂哂就沖涼 ~

睇下 Youtube 又打陣機   因為真係有啲攰   唔想做家務呀 ~

里奧大人 5 點左右瞓   我眼瞓但唔想瞓囉   所以就拖地喇   哈哈 ~

6 點左右開始煲雪梨茶   里奧大人啱啱起身   不過我話 7 點幾先食   因為仲係好飽 ~

是日晚餐 - 肉醬意粉 + 香辣炸雞 + 西蘭花

肉醬意粉 - 都係落鑊炒熱   因為焗熱會好乾 ~

香辣炸雞 - 呢個最方便   焗熱就搞掂 ~

西蘭花 - 食西餐應該要配西蘭花   如果配菜心白菜仔呢啲好似好怪咁   哈哈 ~

洗埋碗再沖涼   之後休息 ~

里奧大人家姐打嚟問限聚令嘅嘢   佢完全唔明限聚令人數嘅規則   仲話澳洲係咁咁咁   里奧大人好慶囉   話呢度係澳洲咩 ?!   妳依家用緊港幣定澳幣呀 ?!   佢家姐答話以為係咁咋   里奧大人叫佢自己上網睇下啦   佢居然叫里奧大人搵番比佢睇   但里奧大人都係叫佢自己搵 ~

真係好少聽里奧大人講嘢咁慶   佢話最慶係講澳洲係咁   但呢度係香港   點會跟澳洲嘅法例呀 ?!   我咪話囉   成日咩都講澳洲   自己又唔係長時間喺澳洲生活過   又唔知自己係井底之蛙   唉 ~

其實我哋個個最憎佢係咩都話澳洲係咁   澳洲唔係咁   好心啦   依家講緊嘅係香港   成日只係聽個老公話   又唔睇下新聞   資訊又 Out   仲講到自己好巴閉咁   真係頂佢唔順   妳去住番三五七年   先好同人講自己澳洲生活係點點點啦 ~

今晚 9 點幾開始睇 "Signal (信號)"   不過睇一集算喇 ~

11 點 15 分左右都要瞓 lu   今晚有啲熱要開冷氣   咁樣會瞓得好啲呢 ~

薄餅 ( 27-MAR-2021 )

( 27-MAR-2021  SAT )

尋晚半夜 2 點幾喉嚨有啲腫脹咁呀   所以即刻用鹽水漱口   希望唔再痛啦 ~

感恩起身嘅時候無再喉嚨痛   但就無咩精神   哈哈 ~

臨起身前發咗個好真實嘅夢   我用新買嘅檸檬味廁所噴霧大清潔廁所   洗嘅時候好多泡同好香檸檬味呀   仲有洗廁所嘅方向同真實嘅係一樣   所以我覺得好搞笑   連發夢都要做家務   係咪咁慘情呀   哈哈 ~

早餐食丁米餐   唉   不過無咩胃口   所以食剩一半   激死我   之得食三文治啦   都唔知做乜鬼叫咗丁米 ~

放工即走   拎埋米線就搭巴士去家姐屋企 ~

家姐早我兩班車   里奧大人就遲我一班車   佢哋都話落車幫手拎米線   不過我話唔駛喎   落得車不如一齊食埋先番屋企啦   哈哈 ~

今日都熱   家姐話開定冷氣等我   但我話唔好呀   因為菇場同巴士都凍呀 ~

一開門   Berry 又係咁樸我   今日佢仲沖咗涼   所以啲毛特別滑   好好摸呀 ~

抖咗 10 分鐘   里奧大人都嚟埋喇   Berry 即刻縮喺梳化底   我哋咪話里奧大人好耐無探 Berry 囉   呵呵 ~

好耐無一齊食嘢喇   勁開心呀   地上最愛嘅人喺我食邊 ~

過橋米線 (重慶三小辣湯底) + 麻辣豬耳 + 紅油雲耳 - 兩碗過橋米線真係份量勁多   大家食完呢餐   都覺得飽到上額頭

次次同佢哋一齊   我就好少睇手機   因為唔怕聽唔到佢哋電話   哈哈 ~

里奧大人就同家姐整電腦   我同家姐就睇 "女神降臨" ~

我灘喺梳化   點知 Berry 放臭屁   佢今日做咗臭屁女王   放咗 3 次臭屁呀 ~

縮入梳化底 

又要八

咪到對眼好實  

出咗嚟又係瞓 

比佢食牛舌片   聽到佢食到 "bi la ba la" 聲   真係好治癒   哈哈哈哈 

好兇狠嘅樣 

牙仔大特寫 

食飽有啲眼瞓   咁我瞓梳化右邊   家姐瞓左邊   Berry 就瞓喺中間   仲要係迫埋嚟   之後仲將個頭仔 "long" 喺家姐條腰度瞓呀   如果向我邊瞓就好啦   哈哈 ~

佢其實已經合埋眼瞓覺   因為佢全程無郁過 

已經瞓緊覺

檸來檸去   揀好位置再瞓 

Berry 係都要咁攝埋嚟瞓   之後成個頭仔攝落家姐個 Pat  Pat 後面   因為家姐瞓咗覺   佢以為我用腳撩佢

每次睇韓劇   家姐就會問我主角咩名   但原來佢係問主角嘅真名   哈哈   呢樣我無佢咁叻㗎   好多時啲韓劇都係佢介紹比我睇呢   佢自己就睇咗好多套   但我無時間睇嘛   所以真係揀嚟睇囉 ~

我同佢講李修豪真名係叫車銀優   但家姐叫佢做金銀柳   哈哈哈哈   係咪新年花嚟㗎 ?!?!

家姐睇 Opening 話原來有中文名㗎   仲好開心話睇到中文字   里奧大人個樣非常之愕然呀   問家姐平時點睇呀 ?!   笑死我呀   佢以為家姐無字幕都照睇呀 ~

家姐今日超勁開心啦   因為佢之前轉咗 50 吋電視   但睇 Youtube 好散   咁本身條片解像度唔夠   所以好濛   我同家姐都以為電視大咗   所以啲嘢散得咁犀利   佢仲以為 Download 咗嘅戲都會咁散囉   所以唔睇 ~

佢本身用 I-Pad 睇 "女神降臨" 嘛   不過話依家用電視睇好清呀   之後會再重睇一次   哈哈 ~

咁里奧大人同家姐喺餐枱整嘢   我又坐埋去   之後我望梳化底唔見 Berry   原來佢喺餐枱底呀   我都唔知佢幾時瞓咗喺度   真係好得意呀   好似跟住我哋咁   因為之後有一次又係咁呢 ~

喺枱底陪住我哋   之後我哋散開   佢就跳上梳化   好似好跟人咁   抵錫

Berry 又咬家姐隻拖鞋   我睇住佢咬㗎   真係發神經   佢到依家都只係咬家姐對拖鞋   好搞笑 ~

感激里奧大人幫家姐買 Hard Disk 同埋 Download 戲   又幫佢 Download 哂所有相喺 Hard Disk 度   咁家姐唔駛驚無哂啲相 ~

Berry 晚餐

搞掂哂都 6 點   家姐車我哋番屋企 ~

我叫里奧大人沖涼先呀   今晚要抹嘢   因為聽日無時間 ~

抹完就沖涼   勁舒服呀 ~

今晚大家都好飽呀   所以 7 點半先焗熱 3 塊薄餅 Share 食就算   家姐都係食蟠桃做晚餐咋   哈哈 ~

差唔多 7 點 45 分先開餐   食完就睇下 Youtube ~

里奧大人話聽朝番早   咁我話陪佢啦   所以 11 點左右都要瞓覺喇 ~

CHUBBY'S PIZZA (外賣) @ 屋企 ( 26-MAR-2021 )

星期一套餐 ($165) - 環球世界薄批 (普通批) & 肉醬意粉 & 炸雞 4 件

( 26-MAR-2021  FRI )

尋晚 10 點瞓   仲一覺瞓天光   真係好感恩呢 ~

今朝覺得熱咗   同埋仍然一樣潮潮濕濕   我其實最鍾意係秋天   之後就係冬天   因為夏天要開冷氣   電費貴呀   同埋吸埋啲冷氣對身體唔好呢 ~

早餐食奶醬多   無啦啦又想食甜嘢 ~

菇場唔忙   又抖下咁啦 ~

里奧大人今日放半日假   佢去深水埗買 Hard Disk 比家姐   如果唔係下星期連續幾日假   其實我都想請假一齊去呢   哈哈 ~

里奧大人同事整咗綠豆沙   不過里奧大人今日出街   所以叫佢唔駛留比我   佢話整得好味道呀   材料多又唔太甜

Lunch Time 出去行陣   之後買酸辣買線番菇場   今次勁喇   湯底唔酸又唔辣   星期一阿齋都話湯底唔掂   但我又唔想今次要大辣喎   好驚食完個胃又唔舒服呢 ~

 

家姐咁樣影佢   先知佢對腳原來舉到咁高

 

真係好好瞓   搞到我都想瞓   哈哈

仍然唔忙呀   放工即走 ~

番到屋企即沖涼   6 點 15 分左右外賣就到   可以開餐喇 ~

食剩 3 件 Pizza 同 3 件炸雞   肉醬意粉就完全無食過   所以聽晚又食呢啲喇   哈哈 ~

食完就開機洗衫   之後休息 lu ~

呢排又濕疹發作   今次係手指同格甩底位置   我覺得手指先煩   因為成日都要洗手   希望快啲好番啦 ~   

再睇翻 "女神降臨"   其實有好多 Part 係睇唔切   所以依家睇番仍然覺得好好笑 ~

今晚 11 點左右都瞓喇   聽日要番工 ~

咖哩拉麵 + 豬肉餡餅 + 超甜粟米 ( 25-MAR-2021 )

之前喺 AEON 買嘅 Q TEE 梨   都幾清甜

( 25-MAR-2021  THU )

尋晚發惡夢醒咗   我係驚到成個身硬哂咁   感覺仲喺個夢入面 ~

第一個夢係 CC 同我慶祝生日   仲送條彩色冷頸巾比我 (現實當中我係買咗呢條冷頸巾)   佢仲幫我戴上   之後再拍片紀錄一下 ~

第二個夢係我同家姐 婆婆 阿姨 大食仲有幾個親戚一齊坐直昇機   大食做機師   點知起飛無耐已經成架機倒轉   之後直插落海   好記得當時我知道一定死   仲諗緊得番剪髮一個人喺世上好慘 ~

第三個夢係教友個仔 8 個月前走咗   但佢去旅行已經買定 8 月後嘅節日禮物比我哋   當下我好傷感 ~

最勁係成個夢   我知自己已經死咗   但仲喺人間   之後地獄使者話夜晚 12 點會搵我   CC 話佢都要去   地獄使者真係 12 點拉我入個地方   好記得係有門   CC 話佢都要入去   但使者推開佢   話佢未夠時間 ~

我坐低之後   地獄使者叫我幫里奧大人同另一個人祈禱   我驚到唔知點祈禱   之後我驚到醒咗 ~

嘩   真係咩事呀   明明生日但最後又死咗   哈哈 ~

早餐食餐蛋治   食完真係超級滯 ~

菇場唔忙   今朝有啲攰 ~

個樣好唔順超

Lunch Time 去一田買洗衣液同洗手液   再買 2 支浴室清潔噴霧   家姐講咗兩次話小心重呀   我心諗唔會好重啦   點知放哂落袋真係重   哈哈   拎嘅時候係分開拎係會唔覺重嘅   哈哈哈哈 ~

番到菇場已經 12 點 25 分   要即食 Flakes + 乳酪喇 ~

今次嘅乳酪好稀呀   之前好杰身㗎   食埋呢 4 支唔會再買 lu

 

仍然唔忙   做下自己嘢 ~

里奧大人話呃人嘅   得咁少果乾   我話你第一次食咩

之後再 Send 呢張比我睇   話張相啲果乾好大粒喎   哈哈哈哈

家姐 Lunch Time 入房抖下   但入房無耐   Berry 姐已經瞓緊覺

八耐舜子網絡圖片   里奧大人一見到就話係我心聲   哈哈

放工又同里奧大人一架車   本身諗住去買水餃   但依家要轉陣煮拉麵喇 ~

番到屋企即刻預備   諗住只係焗熱翻熱同煮個麵   估唔到都要一個鐘   接近 7 點半先開餐喇 ~ 

濃縮洗衣液廿菊補充孖裝 ($49.9) / 浴室清潔噴霧 ($12/支) 

潔麗兒潔手液補充裝6包裝 ($42.9) / 潔麗兒柑橘芳香泡泡潔手液 ($12.9)

是日懶餐 - 咖哩拉麵 + 豬肉餡餅 + 超甜粟米

咖哩拉麵 - 尋晚食剩咖哩   所以今晚煮拉麵   咖哩汁撈拉麵   無餸都好正架 ~

豬肉餡餅 - 終於食哂盒蔥阿伯豬肉餡餅   簡直係一個解脫   哈哈 ~

超甜粟米 - 唔想買菜呀   又食罐頭粟米 ~

沖埋涼就休息一下   之後做功課同靈修 ~

里奧大人 8 點半瞓覺   佢話晏晝飲完杯咖啡好反胃   仲係有啲唔舒服   所以想瞓覺 ~

我都好勁呀   10 點瞓覺   哈哈 ~